Lín m̄-thang kek kiáⁿ-jı̂ ê siū-khı̀

Ùi Wiki Tô·-su-kóan

Tı̄ Sin-iok Í-hut-só͘ tē 6 chiuⁿ, thâu-chām ū lūn hàu-tō ê tō-lí. Lūn hàu-tō sı̄ Tang-iûⁿ choè tē-it iàu-kín ê tō-tek, só͘-í kóng, 萬惡淫為首百行孝為先; ı̀-sù, chiū-sı̄ kóng bān hāng ê pháiⁿ sı̄ kan-ı̂m choè thâu, iā pah hāng ê phín-hēng chiū-sı̄ iú-hàu choè tāi-seng. Só͘-í Tang-iûⁿ tùi kó͘-chá chiū khoàⁿ hàu-tō choè tē-it iàu-kín, nā boē-hiáu iú-hàu, sı̄ khoàⁿ choè khı̂m-siù siāng khoán. Taⁿ lūn chit chân hàu-tō, khoàⁿ choè phín-hēng tiong sı̄ pâi tı̄ tāi-seng, che khiok sı̄ tāi-ke kong-jı̄n ê tō-tek, chóng-sı̄ lūn-khí Khóng-chú só͘ kà-sı̄ ê hàu-tō hit-ê kàu-io̍k-hoat, tùi lán Ki-tok-kàu kā i khoàⁿ sı̄ put oân-choân; chiū-sı̄ boē-oē hō͘ choè kiáⁿ-jı̂ ê lâng lâi chı̄n i ê hàu-tō. In-ūi só͘ kà-sı̄--ê, lóng sı̄ kiò kiáⁿ-jı̂ tio̍h choa̍t-tùi-tek ho̍k-chiông sūn-thàn pē-bú, lóng bô kóng-khí, choè pē-bú ê lâng tio̍h cháiⁿ-iūⁿ lâi hō͘ i ê kiáⁿ oē thang kiâⁿ tı̄ hàu-tō. Nā-sı̄ Ki-tok-kàu chiū m̄-sı̄ án-ni. Lán nā khoàⁿ Í-hut-só͘ 6 chiuⁿ 1 chat kóng, Choè kiáⁿ-jı̂ ê, lín tiàm tı̄ Chú tio̍h sūn-thàn lín ê pē-bú. Án-ni kap Khóng-chú só͘ kà-sı̄ ê sı̄ siāng khoán, chóng-sı̄ án-ni bô kàu-gia̍h; tı̄ tē 4 chat ū koh kà chı̍t kù kóng, Choè lāu-pē ê, lín m̄-thang kek kiáⁿ-jı̂ ê siū-khı̀, án-ni chiah ū oân-choân. In-ūi nā bô koh ke chit kù "m̄-thang kek kiáⁿ-jı̂ ê siū-khı̀." Sui-jiân i ê kiáⁿ-jı̂ ū ài iú-hàu lâi sūn-thàn i ê pē-bú, chóng-sı̄ pē-bú put-sı̂ ài kek kiáⁿ-jı̂ ê siū-khı̀, án-ni choè kiáⁿ-jı̂ ū iú-hàu ê sim soà pı̀ⁿ choè put-hàu, án-ni chit-ê put-hàu ê choē kiám sı̄ kiáⁿ-jı̂ ê mah? Só͘-í hoān-nā tùi pē-bú ê kong-kek lâi put-hàu, chit-ê choē m̄-sı̄ kiáⁿ-jı̂ tio̍h tam-tng, chiū-sı̄ i ê pē-bú tio̍h tam-tng. Taⁿ lán sio̍k Chú ê hiaⁿ-tı̄ chí-bē, lán ài lán ê chú-tē iú-hàu kiong-kèng lán, lán tio̍h chin soè-jı̄, m̄-thang kek kiáⁿ-jı̂ ê siū-khı̀. Lán nā kek kiáⁿ-jı̂ ê siū-khı̀ lâi hō͘ kiáⁿ-jı̂ put-hàu, sı̄ bô tè thang thó͘-khùi, kóng chhut hō͘ lâng thiaⁿ. Kin-á-jı̍t ū khoàⁿ-kı̀ⁿ choè pē-bú ê lâng, choē-choē lâi thiàⁿ i ê kiáⁿ; chiū-sı̄ tùi chhut-sı̀ chiū mı̂-noā iúⁿ-chhı̄ iⁿ, boé hó-mı̍h chu-ióng-phín lâi hō͘ i chia̍h, chián súi ê pò͘ choè saⁿ hō͘ i chhēng, boé choē-choē ê thit-thô-mı̍h hō͘ i thit-thô. Āu-lâi hō͘ i tha̍k-chheh, ha̍k-hāu chı̍t keng tha̍k kè chı̍t keng, chı̂ⁿ-gûn khai kúi-nā chheng; choè kiáⁿ-jı̂ ê put-chí hoaⁿ-hí kap boán-chiok, ài kín chhut tı̄ siā-hoē lı̍p-kong kiàn-gia̍p, lâi pò-tap lāu-pē. Chóng-sı̄ it-tàn chı̍t ê tióng-sêng, ài beh oa̍h-tāng tı̄ siā-hoē lâi heng-khí i ê ke, nā-sı̄ i ê lāu-pē khoàⁿ-kı̀ⁿ kiáⁿ ê gâu, soà tio̍h-kiaⁿ, só͘ ū ê châi-sán kiaⁿ i chai, só͘ ū ê tāi-chı̀ kiaⁿ i chhap. M̄-nā án-ni, soà koh pun chı̍t ê kiáⁿ lâi thióng-ài, mı̂-jı̍t tı̄ i ê sin-piⁿ, thiàⁿ i iâⁿ-kè tı̄ i só͘ siⁿ ê kiáⁿ, tı̀-kàu hō͘ i ê hāu-siⁿ sit-chı̀ thó͘-khùi kóng, Ah! Goá ê lāu-pē sı̍t-chāi chin khó-lı̂n, boē-hiáu hióng-hok i ê hok-khı̀, kam-goān choè gû-gōng. Āu-lâi chiū siūⁿ kóng, Goá tio̍h kiò-chhíⁿ goá ê lāu-pē, lâi siūⁿ-khí chá-chêng ióng-sêng iúⁿ-chhı̄ goá ê bo̍k-tek, kàu kin-á-jı̍t cháiⁿ-iūⁿ chiah lâi bû-sı̄ goá. Lāu-pē thiaⁿ kiáⁿ-jı̂ ê kan-chèng, m̄-nā bô cheng-sı̂n, hoán-tńg ài kā i lı̄-iân, giâ to ài thâi i. Chhin-chhiūⁿ chit khoán ê lāu-pē lâi kek kiáⁿ-jı̂ ê siū-khı̀, i ê kiáⁿ-jı̂ beh cháiⁿ-iūⁿ lâi iú-hàu i ê lāu-pē, pa̍t lâng m̄-chai ū sím-mı̍h hoat-tō͘ bô, nā ū, chhiáⁿ chí-sı̄ goá. Chóng-sı̄ nā-sı̄ goá, sı̍t-chāi boē-hiáu iú-hàu. Só͘-í choè lāu-pē nā ài hó-miā, tio̍h m̄-thang kek kiáⁿ-jı̂ ê siū-khı̀. Nā ū chit khoán ê lāu-pē, sı̄ chin khó-lı̂n, chin sam-pat, chin bô hok-khı̀, sı̄ lāu pháiⁿ-miā. Lia̍t-ūi ê hiaⁿ-chí ah! lán ū chú-tē bô? Nā ū, í-keng tióng-sêng, tio̍h khoán-thāi i choè chı̍t ê toā-lâng, m̄-thang khoàⁿ i sı̄ gín-á. In-ūi kiáⁿ-jı̂ tióng-sêng, ū i ê lí-sèng kap i kò-sèng, lán nā bû-sı̄ khoàⁿ-khin i ê lí-sèng kap kò-sèng, sı̄ teh kong-kek kiáⁿ-jı̂ ê siū-khı̀, sı̄ teh chau-that pō͘-jio̍k i ê jı̂n-keh, nā án-ni, chū-jiân choè kiáⁿ-jı̂ ê bô beh hâng-ho̍k i ê sı̄-toā. Choè lâng ê pē-bú nā kek kiáⁿ-jı̂ ê siū-khı̀, siōng-chhiáⁿ hō͘ i ê kiáⁿ sit-lo̍h i ê iú-hàu kap kiong-kèng, hô-hòng m̄-sı̄ choè lâng ê pē-bú lâi kek lâng ê siū-khı̀, hit-ê hoán-kám kiám sı̄ sió-khoá mah? (Tâi-oân Kàu-hoē Kong-pò tē 609 Hō, 1935 nı̂ 12 goe̍h)