Ū chı̍t ê sàn-chhiah-ê ūi-tô͘-ka chı̍t pái tı̄ i ê thâu-ló-lāi ū siūⁿ-chhut chı̍t-tiuⁿ chin súi ê tô͘ beh ūi. I chiūⁿ-tâi ê sı̂ chiū boē kı̀-tit sè-kan ê sū. Kàu i lo̍h-lâi tâi-kha ê sı̂ chiū siūⁿ-tio̍h bí-àng-lāi bô bí, koh bô loā-choē chhài, chóng-sı̄ i koh chiūⁿ-tâi ê sı̂ i ê thâu-ló-lāi koh siūⁿ-chhut hit tiuⁿ tô͘, oán-jiân chhin-chhiūⁿ jı̍p tı̄ Thian-kok chı̍t-iūⁿ, chin pêng-an, chin hoaⁿ-hí, chin khoài-lo̍k, lóng bô thiaⁿ-kı̀ⁿ sè-kan ê siaⁿ-im; chóng-sı̄ nā koh lo̍h-lâi ê sı̂, chiū ū sàn-hiong ê kan-khó͘ kàu tı̄ i. Chit nn̄g khoán seng-oa̍h hit ê cheng-chha sı̄ chin-toā.
Ta̍k ê chin-sı̍t ê Ki-tok-tô͘ sı̄ chı̍t ê ūi-tô͘-ka teh ūi éng-oán-oa̍h. Tı̄ i ê sim-lāi só͘ siūⁿ--ê, chiū-sı̄ thiàⁿ-thàng kap chèng-gı̄. I nā teh ūi che ê sı̂ chiū bô sè-kan ê kiáu-jiáu. I nā lú chia̍p ūi, sè-kan ê khó͘-thàng lú bô kàu tı̄ i, put-lūn cháiⁿ-iūⁿ i pı̂ⁿ-pı̂ⁿ hó kè-jı̍t. Sui-bóng siông-siông lo̍h tâi-kha siū sè-kan ê kan-khó͘, iáu-kú i siông-siông koh chiūⁿ khí-khı̀, chiū sè-kan-tāi lóng boē kı̀-tit khı̀. Chit khoán ê sim beh ū Thian-kok tı̄-hia.
Kó͘-chá tı̄ Tiong-kok ū chı̍t ê lâng siông-siông thiaⁿ-kı̀ⁿ ge̍h ê kò͘-sū, sim chin ài khı̀ khoàⁿ. I khoàⁿ-kı̀ⁿ ge̍h siông-siông hioh tı̄ tùi-bı̄n ê soaⁿ-téng, phah-sǹg nā kàu hit ê soaⁿ chiū oē jı̍p tı̄ ge̍h ê sè-kài, chiū boē i ê gia̍p, khoán pau-ho̍k, toà hō͘-soàⁿ, chiū khí-sin. Kiâⁿ kúi-nā lé-pài kú ê lō͘, khoàⁿ-kı̀ⁿ ge̍h bô koh-iūⁿ tı̄ chhù-nı̍h só͘ khoàⁿ, lóng bô khah-kūn, sim-koaⁿ ná sit-chı̀. Chı̍t àm kàu tı̄ chı̍t châng toā-chhiū-kha ià-siān beh tiàm hia kè-àm.
Beh bı̂n-khı̀ ê sı̂, hut-jiân ū chı̍t ê chhiū-sı̂n iô i kóng, “Lí beh khı̀ tó-ūi?” I kóng, “Goá beh khı̀ ge̍h ê sè-kài. Goá kiâⁿ kúi-nā lé-pài kú lóng bô khah-kūn, m̄-chai tio̍h kiâⁿ joā-kú chiah kiâⁿ oē kàu, hò͘ⁿ?” Hit ê chhiū-sı̂n kóng, “Lí chin-gōng; bô lâng oē kàu hia. Lí nā-sı̄ ài khoàⁿ ge̍h lāi-bı̄n ê khoán, goá ū nn̄g lia̍p ê phòng-kiàⁿ lí nā tàu hó-sè chiū oē khoàⁿ-kı̀ⁿ.” Hit ê lâng kā i seh-siā, chiong-sı̀n chiong-gı̂ chiū oat tò-tńg-khı̀. Āu-lâi kó-jiân tàu choè bōng-oán-kiàⁿ, lāi-bı̄n ta̍k hāng khoàⁿ chin-bêng, chiū hoaⁿ-hí kàu ke̍k, hoah kóng, ‘Ge̍h cháu jı̍p kiàⁿ-lāi lah!”
Iâ-so͘ kóng, “Siōng-tè ê kok lı̂m-kàu m̄-sı̄ hián-jiân, ia̍h boē kóng tı̄-chia á-sı̄ tı̄-hia, in-ūi Siōng-tè ê kok sı̄ tı̄ lín lāi-tiong.”
Lâng tùi goā-bı̄n sı̀-koè beh chhē Thian-kok. Thèng-hāu chiong-lâi beh tit-tio̍h Thian-kok, ū an-ùi nā-tiāⁿ, bô ū hoaⁿ-hí tı̄-teh, che sı̄ bô ún-tàng, in-ūi Thian-kok sı̄ tı̄ lâng ê sim-lāi. Chù-ı̀ tı̄ sim-lāi ê khoán-sit ê lâng, ài siám-pı̄ sè-kan ê kiáu-jiáu, choan-sim ǹg Siōng-tè, sim-koaⁿ ài kap Iâ-so͘ ê sim saⁿ-hô ê lâng ū Thian-kok tı̄-teh.
Thok-má-su Khún-phit-su (Thomasa Kempis) kóng, “Tio̍h choan-sim ǹg Siōng-tè, pàng-sak chit sè-kan, sim-koaⁿ oē tit-tio̍h an-hioh. Tio̍h thoàn-liān khı̀-sak sè-chiūⁿ ê tāi-chı̀, ia̍h choan-sim khoà-jū lāi-sim ê sū, lí chiū chai Siōng-tè ê kok lı̂m-kàu tı̄ lí sim-lāi.” “Siōng-tè ê kok sı̄ gı̄ kap pêng-an kap tı̄ Sèng Sı̂n ê hoaⁿ-hí” (Lô-má 14:17). Siōng-tè ê kok bô beh kàu tı̄ bô ài chiâⁿ-sèng ê sim.
(Tâi-oân Kàu-hoē-pò tē 511 koàn,1927 nı̂ 10 ge̍h)
