Lāi-hio̍h lia̍h ke-á-kiáⁿ
Soaⁿ--nih toà 1 chiah eng-á kiò Lāi-hio̍h (mā ū lâng kiò Bā-hio̍h), sin chhēng o͘-saⁿ o͘-khò͘ kui-sin o͘-sô-sô, 2 lúi eng-á ba̍k-chiu chin lı̄-hāi, khoàⁿ chin-hn̄g chhiūⁿ Chhian-lí-gán; 2 ki kha-jiáu chiam koh lāi, nā hō͘ jiàu--tio̍h it-tēng toā-khang sè-lı̍h hō͘ lí toā-siaⁿ sè-siaⁿ it-tı̍t ai; poe ê sok-tō͘ bô-goā-kín, m̄-koh ū te̍k-ki, ē-tàng ùi khong-tiong hiông-hiông cho̍k lo̍h tē-bı̄n, chún koh mé-chhè. Eng-á chhùi-pe seⁿ-chò kau-kau lāi-kiàm-kiàm, nā hō͘ tok--tio̍h it-tēng bô-miā bô kā lí phiàn. M̄-chiah chiáu-á-cho̍k nā khoàⁿ-tio̍h i sûi-sı̂ cháu kah bô-khoàⁿ-iáⁿ. Lāi-hio̍h pak-tó͘ nā iau, tio̍h siūⁿ beh chia̍h bah, khó-liân tē-bı̄n ê sè-chiah chiáu-á, choâ kap niáu-chhí-á, hō͘ i lia̍h--tio̍h sûi-sı̂ thiah-chia̍h lo̍h-pak. Pêng-siông-sı̂, i siōng-ài chia̍h ke-á-kiáⁿ, in-ūi ke-á-kiáⁿ hó-lia̍h bah koh iù, só͘-í Lāi-hio̍h pak-tó͘ nā iau tio̍h poe lâi chng-kha, sı̀-koè cháu-chhoē, chhoē khoàⁿ ū ke-á-bah thang chia̍h--bô? Kin-á-jı̍t, Lāi-hio̍h poe lâi kàu 1 ê chng-kha, tı̄ thiⁿ-téng khoàⁿ-kı̀ⁿ 1 tı̄n ke-á-kiáⁿ, toè-tı̄ ke-bó ê sin-khu-piⁿ leh chhit-thô. Ke-bó it-tı̍t bô-êng leh chhéng thô͘-kha, ke-á-kiáⁿ chi-chi-chiuh-chiuh háu bē-soah. Lāi-hio̍h khoàⁿ hó-ki-hoē í-keng lâi--a, koáⁿ-kín tián i ê hó-kang-hu, cho̍k lo̍h-khı̀ beh lia̍h ke-á-kiáⁿ. Siáⁿ-chai beh kàu tē-bı̄n ê sı̂, hiông-hiông hoat-hiān ke-bó í-keng kā ke-á-kiáⁿ kho͘ tńg-lâi sin-khu-piⁿ, iōng i ê sı̍t-kó͘ pó-hō͘ kah mi-mi-mi. Ke-bó thâu taⁿ-taⁿ, ke-mo͘ chhàng-chhàng, chhiah-pê-pê, ūi-tio̍h pó-hō͘ sè-kiáⁿ chún-pı̄ beh kap Lāi-hio̍h su-iâⁿ. Lāi-hio̍h khoàⁿ m̄-sı̄ pān-sè, oa̍t-thâu tián-sı̍t piàⁿ leh cháu. Hó-ka-chài, 1 tı̄n ke-á-kiáⁿ, in-ūi lāu-bú ê pó-hō͘, chiah an-choân bô tāi-chı̀. Lāi-hio̍h chiâⁿ sit-bāng, pak-tó͘ tng-leh iau, bô koh chhoē chia̍h mā bē-soah-tit, i poe--a poe, poe lâi-kàu keh-piah-chng, poàⁿ khong-tiong, se̍h 1 liàn-tńg, hó-khang--ê lâi kàu-ūi, kāng-khoán sı̄ 1 chiah ke-bó chhoā 1 tı̄n ke-á-kiáⁿ, tāi-khài ū 10 goā chiah, tı̄ mn̂g-kháu-tiâⁿ hia leh sńg, Lāi-hio̍h sim-lāi ū phah-sǹg, “ kiuh~” 1 ē kho͘ 1 siaⁿ, ke-bó “kok kok kok kok” háu bô thêng-khùn, m̄-chai sı̄ ke-á-kiáⁿ siuⁿ gōng, iah-sı̄ ke-á-kiáⁿ tham sńg, 1 sı̂-kan, soah ū kúi-nā-chiah ke-á-kiáⁿ tı̄ hia gāng-gāng, m̄-chai-iáⁿ beh cháu tńg-khı̀ bih-tiàm a-bú ê sin-khu-piⁿ, sı̍t-kó͘-lāi, sap-sı̂ Lāi-hio̍h ná chı̀ⁿ cho̍k-lo̍h-lâi, 1 chiah ke-á-kiáⁿ “ki--ò͘ ki--ò͘ “ kiò a-bú koáⁿ-kín lâi kiù, í-keng bē-hù, khó-liân ê ke-á-kiáⁿ chù-tiāⁿ sı̄ Lāi-hio̍h ê keⁿ-tǹg, khó-liân ê ke-bú, chí-ū ba̍k-chiu kim-kim siòng ùi poàⁿ-khong-tiong, khoàⁿ i ê sè-kiáⁿ hō͘ Lāi-hio̍h lia̍h khı̀ chò tiám-sim, “khó-liân ê kiáⁿ-jı̂! Lí ná-ē m̄-thiaⁿ a-bú ê oē, ná-ē chiah-nı̍h ài-sńg, lóng bô khó-lı̄ an-choân? Goá ê sim-koaⁿ-á kiáⁿ, iau-siū ê Lāi-hio̍h, lí ná-ē chiah-nı̍h khok-hêng, āu-pái lí nā koh poe--lâi, it-tēng kiò o͘-chhiu kā lí jiok kah cháu bô-lō͘! Khó-liân ê kiáⁿ! Khó-liân ê sim-koaⁿ-á kiáⁿ!”