Tı̄ Bí-kok ê tang-pêng hái-kı̂ⁿ, Virginia chiu ê chháu-tē, ū chı̍t ê sè-sè ê hiuⁿ-siā kiò-chò Webster, ū chı̍t ê jia̍t-sim sı̀n Chú ê hū-jı̂n-lâng, miâ-kiò XXXXX. Tı̄ kàu-hoē chò Chú-jı̍t-o̍h ê kàu-oân 26 nı̂ kú, ū chı̍t ê lé-pài-jı̍t teh kà 10 tiâu kài, tú teh soat-bêng tē 5 kài, chiū-sı̄ tio̍h kèng lí ê pē-bó ê kà-sı̄, te̍k-pia̍t kóng-khí lāu-bó ê thiàⁿ cháiⁿ-iūⁿ ê toā, soà kóng: “Ǹg-bāng tı̄ lín tiong-kan, ū sím-mı̍h lâng ē-thang siūⁿ-chhut hó ê hong-hoat, thang hō͘ hiān-tāi ê lâng, tùi chiah toā ê thiàⁿ, tùi sim-té piáu-chhut kám-siā.” Tú-hó i ê cha-bó͘ kiáⁿ XXX iā tı̄ chit pan teh chò ha̍k-seng, chóng-sı̄ bô loā-kú, XXXXXX hu-jı̂n soà sí-khı̀, nā-sı̄ XXX chiong lāu-bó só͘ kóng hit kù oē kı̀ tiâu-tiâu. Āu-lâi in ê kàu-hoē hiah ê hū-jı̂n-lâng, ēng sim kè-kàu ūi-tio̍h XXXXXX hu-jı̂n khui chı̍t ê tui-tō-hoē, hit-sı̂ XXX kám-liām lāu-bó ê oē, ūi-tio̍h siàu-liām lāu-bó hiah toā ê in-ài, chiū ēng chı̍t siuⁿ ê chián-jiông-hoe lâi sàng hit ê tui-tō-hoē. Che chiū-sı̄ hiān-kim tı̄ lāu-bó jı̍t, ēng chián-jiông-hoe ê goân-in, iā hit-jı̍t chhut-se̍k tı̄ chit ê tui-tō-hoē ê chèng hū-jı̂n-lâng, lóng kám-kek hit-jı̍t ê toā hok-khı̀, chiū tâng-sim gı̄-koat ta̍k-nı̂ tio̍h khui chit ê tui-tō-hoē, í-goā ê kàu-hoē iā ēng tâng chı̍t-iūⁿ ê sim, nı̂-nı̂ khui chit khoán ê tui-tō-hoē.
XXX kok kap hit ê chhut-miâ ê XXXX chham-siông, tit-tio̍h i ê chàn-sêng, ēng 5 goe̍h ê tē-jı̄ lé-pài-jı̍t tı̄ XXXX ê toā keng tiàm lâi khui chit ê kı̀-liām-hoē, che chiū-sı̄ lāu-bó jı̍t ê khí-goân, iā XXXXXXXX ê sin-bûn, hui-siông chàn-sêng chit ê kı̀-liām-hoē, toā-toā thè i soan-thoân, só͘-í ta̍k só͘-chāi ê kàu-hoē lóng chiàu chit ê khoán teh kú-hêng lāu-bó ê jı̍t. XXX koh chhut-la̍t ūn-tōng, ài hō͘ chit ê jı̍t pı̀ⁿ-chò kok-chè ê kı̀-liām-jı̍t, iā i ū nn̄g hāng ê bo̍k-tek: —
1) In-ūi beh ke-thiⁿ ka-têng ê hēng-hok, chiū tio̍h chı̄n-la̍t tōng-oân kok-ka, thoân-thé, kàu-hoē, Chú-jı̍t-o̍h, kò-jı̂n kap siā-hoē, hō͘ in chū-kak kò-jı̂n ê chek-jı̄m sı̄ ài hō͘ ka-têng ê tek-hēng koh-khah ko-siōng, chiū-sı̄ hō͘ ka-têng ná ū ka-têng-tek, chong-kàu-tek, kok-bı̂n-tek ê chı̀n-pō͘, chóng kóng sı̄ tio̍h chiong chit ê lāu-bó-jı̍t, hō͘ i chiâⁿ-chò choân jı̂n-lūi sı̍t-chāi hēng-hok ê jı̍t, chiū-sı̄ ta-po͘, hū-jı̂n, gín-ná, tı̄ sim-lāi, tı̄ seⁿ-oa̍h chò i kò-jı̂n ê jı̍t.
2) Cho͘-chit hia̍p-hoē, kó͘-bú hō͘ chit ê lāu-bó-jı̍t chò sè-kài-tek ê kı̀-liām-jı̍t.
Kàu 1941 nı̂ Bí-kok kok-hoē gı̄-koat, tēng 5 goe̍h tē 2 lé-pài-jı̍t chò kok-chè lāu-bó-jı̍t. Tı̄ chit ê lé-pài-jı̍t kú-hêng te̍k-pia̍t ê kı̀-liām lé-pài, siàu-liām pē-bó ê thiàⁿ-thàng bô pí, iā ēng chián-jiông-hoe pín tı̄ heng-chêng lâi chò kı̀-liām; pe̍h-hoe sı̄ piáu-bêng lāu-bó í-keng lı̄-khui sè-kan, âng-hoe sı̄ lāu-bó iáu tı̄-teh. Chit khoán ê ūn-tōng, bô loā-kú chiū khóng-khoah kàu Au-chiu ta̍k-kok, kàu A-se-a-chiu, A-hui-lı̄-ka-chiu, kàu tı̄ tē-ke̍k; lóng siú lâi siàu-liām pē-bó ê in.
(Tâi-oân Kàu-hoē Kong-pò tē 749 koàn, 1951 nı̂ 5 goe̍h)
