Gō͘ ge̍h ê tē-jı̄ lé-pài, ta̍k-nı̂ tı̄ Tâi-oân Kàu-hoē kap choē-choē pa̍t-ūi ê kàu-hoē ū ngiâ-chih “Lāu-bú ê jı̍t.” Chit pái siá chiah ê lo̍h tı̄ Kong-pò 5 goe̍h hō, m̄-kú khah bô beh tùi-tiōng hit ê “Jı̍t” ê ı̀-sù, á-sı̄ kan-ta koan-hē choè lāu-bú ê ı̀-gı̄. Chú-pit kiò goá siá ê toê-ba̍k m̄-sı̄ hit ê ı̀-sù ê khoán. In-ūi sı̄ kóng, “Lāu-bú kap kiáⁿ.” Chit ê toê-ba̍k sı̍t-chāi sı̄ khah ha̍h Ki-tok-kàu só͘ tio̍h chham-khó ê. Án-ni kā i siūⁿ, ū 4 hāng ê koan-hē thang kóng:
(1) Lāu-bú kap kiáⁿ ê chong-kàu koan-hē. Tı̄ se-iûⁿ, pò͘-tō-ka siông-siông ai ín-lē, kóng-khí lâng lı̄-khui kàu-hoē, āu-lâi hoán-hoé tńg-lâi ê sū. Chhin-chhiūⁿ lō͘-ka 15 chiuⁿ ê hòng-tōng-kiáⁿ lı̄-khui ka-kı̄ ê chhù, khı̀ hái-goā choè pháiⁿ, āu-lâi hoán-hoé tńg-lâi in tau. Pò͘-tō-ka khah-siông kóng chit khoán lâng oē tńg-lâi lāu-bú ê só͘-chāi. Tùi án-ni thang chai lāu-bú kap kiáⁿ ū te̍k-pia̍t chhim kap ò-biāu ê koan-hē. Tùi sím-mı̍h chiah oē án-ni? Tı̄ Eng-kok ū chı̍t pún chheh “Understandeng o͘r childernl” (Jı̄m-sek lán ê kiáⁿ-jı̂), ū kóng phah-sǹg hit khoán lâng tı̄ soè-soè hàn gín-á ê sı̂, i ê lāu-bú hē i tı̄ bı̂n-chhn̂g beh hō͘ i khùn, ū ūi-tio̍h i kı̂-tó, kiû Siōng-tè chiàu-kò͘ i, pang-chān i, hō͘ i tit-tio̍h kiù. I sui-jiân hiah ê oē bô tú-tú chai ı̀-sù, chóng-sı̄ ū chhin-chhiūⁿ siū siá chin bêng, chin pe̍h, tı̄ i ê thâu-náu lāi. Kúi-nā nı̂ āu oē pı̀ⁿ-choè chhin-chhiūⁿ oa̍h-oa̍h ê oē khí-lâi.
(2) Lāu-bú kap kiáⁿ ê ka-têng koan-hē. Tı̄ Eng-kok ū chı̍t ê bo̍k-su miâ kiò Urwin; kūn-lāi tù chı̍t pún chheh miâ kiò “Can the family survive?” (Ka-têng ū chûn-chāi ê khó-lêng-sèng á-bô?). Hiān-sı̂ tı̄ se-iûⁿ á-sı̄ tı̄ tang-iûⁿ ū chin-choē lâng teh khoà-lū ka-têng ê chiong-lâi. Kū-nı̂ joa̍h-thiⁿ ê sı̂, chı̍t ê Bí-kok chí-tō-chiá tù chı̍t pún chheh miâ kiò “The Recovery of Family life” (Ka-têng seng-oa̍h ê chài-kiàn). Chit pún kóng, Hiān-sı̂ kiōng-sán chú-gı̄ ê sè-kài teh kiaⁿ ka-têng, kiaⁿ-liáu oē chó͘-tòng in siā-hoē ê kè-oē. Chu-pún chú-gı̄ ê sè-kài ài chióng-lē ka-têng ê kiàn-kò͘, chóng-sı̄ tı̄ sı̍t-chè seng-oa̍h tiong ū choē-choē hāng teh chó͘-tòng ka-têng ê it-tı̀. Tı̄ hit tiong-kan bô-lūn tó-ūi ê sè-kài, choè lāu-bú ê lâng toā-toā ū sù-bēng thang kiù ka-têng.
Kin-nı̂ 11 goe̍h 2—16, tı̄ Ma-nı̂-lah beh chū-chı̍p chı̍t ê Siu-ióng-hoē, beh gián-kiù Tang A Ki-tok-kàu ka-têng seng-oa̍h. Ǹg-bāng lán kàu-hoē chham-ka tı̄ hit ê hoē ê tāi-piáu, oē siū choē-choē ê hiaⁿ-ché ê kı̂-tó, hō͘ in siū toā chí-tō ê lêng-le̍k.
(3) Lāu-bú kap kiáⁿ ê ka-têng kàu-io̍k koan-hē. Ū ha̍k-chiá kóng lâng tit-tio̍h tē-it ū ı̀-gı̄ ê kàu-io̍k, sı̄ tùi ka-têng. Só͘-í ka-têng nā ēng kàu-io̍k ê oē kóng ê, sı̄ chhin-chhiūⁿ choè chı̍t keng toā-o̍h, iā hit keng toā-o̍h ê chóng-tiúⁿ sı̄ lāu-bú. Tı̄ Ka-ná-tāi ū chin chhut-miâ ê tâng-siōng, sı̄ beh kı̀-liām Chú-jı̍t-o̍h chhòng-siat-chiá Robert Raekes. Kūn-lâi ū lâng kóng, Chú-jı̍t-o̍h só͘ choè ê kang-chok sı̄ chin toā, chóng-sı̄ ū só͘-chāi khah chó͘-tòng Ki-tok-kàu ka-têng ê kàu-io̍k, in-ūi pē-bú siuⁿ khoài pàng hit ê chek-jı̄m hō͘ Chú-jı̍t-o̍h ê sian-siⁿ.
(4) Lāu-bú kap kiáⁿ ê siā-hoē chí-tō koan-hē. Ū sio̍k-gú kóng, “Iô-nâ ê chhiú oē koán-lí sè-kài.” Nā mn̄g sè-kài ê toā chí-tō-chiá, he̍k-sı̄ choè bo̍k-su, kàu-io̍k-ka, á-sı̄ chèng-tı̄-ka, mn̄g in cháiⁿ-iūⁿ teh choè chit ê kang-chok, in khah-siông khah oh ı̀n. In siūⁿ kóng phah-sǹg sı̄ goá ê lāu-bú ài án-ni, iā ūi-tio̍h án-ni lâi kı̂-tó. Tùi án-ni thang chai in ê lāu-bú kap in ê lāu-bú só͘ chí-tō ê home sı̄ choè i khı̀ siā-hoē choè kang ê chhut-hoat-tiám.
(Tâi-oân Kàu-hoē-kong-pò tē 785 kı̂, 1954 nı̂ 5 ge̍h)
