Lâng chı̍t-ē chia̍h-lāu, thè-hiu, hı̄ⁿ-khang tāng, ba̍k-chiu su, hêng-tōng bô í-chêng hiah-nı̍h liú-lia̍h, khah bô hoat-tō͘ thàn-chı̂ⁿ, chò chı̍t-koá iú-hêng ê khang-khoè, ūi-tio̍h án-ni, lāu-lâng óng-óng ē khoàⁿ ka-tı̄ sı̄ í-keng bô lō͘-ēng, bô kè-ta̍t ê lâng, nā án-ni siūⁿ, tong-jiân sı̄ lú oa̍h lú ut-chut, lú pháiⁿ koè-jı̍t.
Khiā tı̄ sı̀n-gióng ê lı̍p-tiûⁿ, goá bô chàn-sêng kóng, boē chò-kang, boē thàn-chı̂ⁿ, chiū sı̄ khah bô lō͘-ēng, khah bô kè-ta̍t.
Siōng-tè só͘ siúⁿ-sù hō͘ lâng ê, ū chin-choē chin-choē hong-bı̄n, hō͘ lán ū chin hong-hù ê oa̍h-miā: tong-jiân ū khoàⁿ, thiaⁿ, chò-kang ê lêng-le̍k, koh khah tiōng-iàu--ê, ū su-siúⁿ ê lêng-le̍k, ū kò-sèng, ū sim-lêng, ū lêng-hûn, ū chhin-chêng iú-chêng, ū thiàⁿ-sim, ū oa̍h-miā ...... téng-téng, chiah-ê lóng hō͘ lán chiâⁿ-choè ū kè-ta̍t. (Chin khó-sioh, lán khah-chió siūⁿ tio̍h chiah-ê lâi kám-siā Siōng-tè).
Lí iáu oa̍h--leh, lí-ê kiáⁿ-jı̂-sun, chhin-lâng, pêng-iú tùi lí lâi tit-tio̍h hióng-siū chhin-chêng kap iú-chêng, che chiū-si lí-ê kè-ta̍t.
Lí iáu ū him-sióng ta̍k-chióng gē-su̍t, him-sióng tāi-chū-jiân ê lêng-le̍k, che chiū-sı̄ lí-ê kè-ta̍t.
Lí iáu ē siūⁿ tāi-chı̀, che chiū-sı̄ lí-ê kè-ta̍t.
Lí iáu ē an-ùi lâng, che chiū-sı̄ lí-ê kè-ta̍t.
Lí iáu ē ūi sè-kài, kàu-hoē, siā-hoē, chhù-lāi ê lâng, pêng-iú lâi tāi-tó, che chiū-sı̄ lí-ê kè-ta̍t. (Tû-hui lí siūⁿ kóng kı̂-tó sı̄ phiàn--lâng-ê. )
Lí iáu ē sı̀-koè khı̀ chhit-thô, hō͘ ka-kı̄ hoaⁿ-hí, che chiū-sı̄ lí-ê kè-ta̍t.
Lí iáu ē chhoē pêng-iú, chhù-piⁿ-thâu-boé khai-káng, in hoaⁿ-hí, lí iā hoaⁿ-hí, che chiū-sı̄ lí-ê kè-ta̍t.
Lí iáu ē ha̍k-sı̍p choē-choē tāi-chı̀, chham-ka kok-chióng ê chū-hoē, che chiū-sı̄ lí-ê kè-ta̍t.
Lí ē kèng-pài Siōng-tè, che chiū sı̄ lí-ê kè-ta̍t.
Lí, iáu-ū chin-choē kè-ta̍t.
Ū chin-choē sı̄m-chı̀ kū-nı̂ tó tı̄ pı̄ⁿ-chhn̂g ê lāu-lâng, to iā-ū téng-bı̄n só͘ kóng chiah-ê kè-ta̍t. Siáⁿ-lâng káⁿ kóng, “Lāu-lâng bô kè-ta̍t ?”
(Hong-hiòng Tē 6 kı̂, 1990 nı̂ 9 goe̍h)
