Lı̄-ek chhiⁿ-mı̂-lâng ê kò-pe̍h

Thong Tiong-kok-lāi ê chhiⁿ-mı̂-lâng chha-put-to ū gō͘-cha̍p-bān chó-iū. Sı̀-nı̂ chêng,Siōng-hái ê Chóng-hoē ū kéng-soán kúi-nā lâng thoè in siat-hoat , iā khǹg ta̍k-ūi ê sian-siⁿ tio̍h kap hiah-ê lâng chı̄n-le̍k tàu-pān.

Lín í-keng chai Hú-siâⁿ-lāi kap Choân-chiu-siâⁿ hiān-chāi ū nn̄g keng o̍h hō͘ chhiⁿ-mı̂-lâng thang siū ta̍k hāng ê kàu-hùn . Ha̍k-seng múi-jı̍t chiàu-sı̂ ēng-kang tha̍k-chheh iā kiam lio̍h-á teh o̍h kang-gē . Kū-nı̂ Î-sian-siⁿ-niû tı̄ Hú-siâⁿ chin chhut-la̍t lâi liāu-lí chit-chân sū. Khó-sioh i-ê seng-khu jiám-tio̍h phoà-pı̄ⁿ , ko͘-put-chiong tio̍h tò-khı̀ Chó͘-ke . I siông-siông thoè in tô͘-bô͘ kiù-oân, siūⁿ kàu jı̍t-āu ê tāi-chı̀; só͘-í m̄-nā kà in tha̍k-chheh siá-jı̄ nā-tiāⁿ, koh kà in choè kan-kí thang ka-kı̄ thàn-chı̂ⁿ, lâi tō͘-khó͘, m̄-bián chiong-sin oá-khò pa̍t-lâng chhı̄.

Taⁿ in-ūi sū iáu-bē chiâⁿ, goán ài chai tiàm Tâi-oân á-sı̄ Tn̂g-soaⁿ ū hiaⁿ-tı̄ á-sı̄ lia̍t-ūi sian-siⁿ, kam-goān siá-chhut chı̍t-phiⁿ lâi lūn-khí chhiⁿ-mı̂-lâng tio̍h choè sím-mı̍h tú-hó ê kang-gē, lâi ka-kı̄ tō͘-chia̍h . Beh choè chit-phiⁿ lūn ê lâng tāi-seng tio̍h khı̀ chhâ-khó kúi-nā hāng, chiah ū lō͘-ēng ; chhin-chhiūⁿ in pún só͘-chāi chhiⁿ-mı̂ ê lâng-gia̍h ū loā-choē,in ê chêng-hêng ia̍h sı̄ sím-mı̍h khoán,hiān-sı̂ teh choè sím-mı̍h thâu-lō͘ , ta̍k-jı̍t thàn loā-choē . Koh , tio̍h siūⁿ ū sím-mı̍h iáu-bē ha̍k-sı̍p ê kang-gē thang siat hō͘ in choè , iū-koh tio̍h kı̀ hit-hāng kang-gē ê pún-chı̂ⁿ loā-choē , chhut-sek loā-choē.

Lūn chhiⁿ-mı̂-lâng choè kàu-hoē ê kang chhin-chhiūⁿ tı̄ I-koán-lāi á-sı̄ koe-chhı̄ tha̍k Sèng-keng , boē chheh , thoân tō-lí , goá iā sı̄ ài chai hiaⁿ-tı̄ ê ı̀-kiàn, tio̍h chiàu sím-mı̍h hoat-tō͘ khah-hó , tek-khak tio̍h ū lâng khan á m̄-bián.

Nā ū-êng ê ki-hoē,chhiáⁿ ta̍k-ūi ê hiaⁿ-tı̄ lio̍h-á lâi thé-thiap chit-chân tāi-chı̀ , kàu 12 ge̍h chhoe-cha̍p-lāi ûi-chí kià só͘ choè ê lūn thang hō͘ goán lâi phoe-phêng . Phoe-phêng liáu chhú tē-it miâ-ê beh siúⁿ i chhit ê gûn-chı̂ⁿ , chhú tē-jı̄ miâ-ê beh siúⁿ i gō͘-kho͘, tē-saⁿ-miâ saⁿ-kho͘. Iàu-kín tio̍h tāi-seng chhâ-khó, āu-lâi ta̍k-hāng chiàu chhù-sū siông-sè lâi siá . Lūn ê toê-ba̍k chiū-sı̄ :－

“Lūn kàu-hoē-goā ê chhiⁿ-mı̂-lâng,in-ê lâng-gia̍h, thâu lō͘,kap chêng-hêng ; koh , lūn chhiⁿ-mı̂ bat-jı̄ ê hiaⁿ-tı̄ chí-bē , in ū sím-mı̍h thang choè chiū ka-kı̄ oē thàn chia̍h , m̄-bián it-khài oá-khò pa̍t-lâng .”

Lūn tio̍h chiong pe̍h-oē-jı̄ lâi siá, tio̍h lo̍h àm-hō, iā tio̍h ēng chı̍t-hong lāi-bı̄n chù-bêng bó͘-hō chiū-sı̄ sím-mı̍h lâng-ê , tâng-chê kià hō͘ Kam Bo̍k-su .

(Tâi-oân Hú-siâⁿ Kàu-hoē-pò tē 113 koàn, 1894 nı̂ 8 ge̍h)