Lūn Hoé-hun-chhia lō͘

Hiān-sı̂ Tāi Eng-kok ê hoé-hun-chhia lō͘ kè-kiōng 5,0000 lí. Lóng sı̄ peh-sı̀ⁿ thê lâi chò--ê, m̄-sı̄ sio̍k tı̄ koaⁿ-hú--ê. Pún-chı̂ⁿ chóng-kiōng ū 90 bān bān gı̂n . Múi-nı̂ chài lâng-kheh 10 bān bān lâng. Peh-sı̀ⁿ ha̍p-kó͘ lâi chiâⁿ chit-hō-sū kiò-chò kong-si. Goán Chó͘-ke liāu-lí hoé-hun-chhia lō͘ ê kong-si ū chha-put-to pah-gō͘ ê; chiông-tiong sı̀-ê khah-toā . Taⁿ chiong siāng-toā kong-si ê chêng-hêng kı̀-tı̄ ē-té .

I-ê pún-chı̂ⁿ chha-put-to cha̍p bān bān gı̂n. Só͘ khui ê thih-lō͘ oá 5000 lí ê tn̂g. Múi-jı̍t siu-gı̂n saⁿ-cha̍p bān. I chhiàⁿ-kang, he̍k-sı̄ chho͘-kang, á-sı̄ koán-chhia á-sı̄ siá-jı̄, chóng-kiōng 6,0000 lâng. Múi-jı̍t chài 15,6000 ê lâng-kheh .

Hit-ê só͘-hùi iā siong-tiōng. Teh chiàu-kò͘ lō͘ ê só͘-hùi, kang kap liāu múi-jı̍t tio̍h nn̄g bān goā gı̂n. I-ê chhia teh chài lâng-kheh ê ū 5000 goā tiuⁿ; múi nı̂ siu-lí hiah-ê chhia ê só͘-hùi oá 300 bān gı̂n. Lēng-goā sè-tiuⁿ chhia kan-ta teh chài-hoè ê ū 6,0000 goā tiuⁿ, in múi-nı̂ ê só͘-hùi ū 100 bān gı̂n. Hit-hō lâng-kheh chhia, siōng-téng--ê chò sin ê tio̍h 7000 goā gı̂n .

Thô͘-chhia, chiū-sı̄ kek hoé-hun teh thoa--ê, múi-tiuⁿ ta̍t chha-put-to 3 bān gı̂n; chóng-kiōng ū 2770 tiuⁿ. Sái chhia ê kang, múi-goe̍h kang-chı̂ⁿ 45 bān gı̂n. Múi-jı̍t sio thô͘-thoàⁿ ū 6 bān tàⁿ khah-ke, ta̍t-tit bān-goā gı̂n. Ēng chúi kek-ian múi-jı̍t tio̍h 40 bān tàⁿ, múi-goe̍h ta̍t chı̍t-bān gı̂n .

Lēng-goā iáu ū chē-chē hāng ê só͘-hùi . Ta̍k lō͘-chām tio̍h khí chhù hō͘ lâng-kheh tán-chhia, koah-toaⁿ, hē hêng-lí. Tio̍h lâng tiàm tı̄-hia chiàu-kò͘ , liāu-lí , thiah toaⁿ, poaⁿ hêng-lí ; in-ê kang-chı̂ⁿ múi-nı̂ chı̍t chheng gō͘-pah bān gı̂n . Bé-choá ı̀n-jı̄ ê só͘-hùi múi-nı̂ chha-put-to 60 bān gı̂n .

Iā ū chhı̄ 3900 chiah bé, ū bé-chhia 4000 goā tiuⁿ. Chit khoáⁿ ê só͘-hùi nı̂-nı̂ ū 200 bān goā gı̂n .

Hoé-hun-chhia teh kiâⁿ ū-sı̂ ū gō͘-sū, lâng-kheh ū-ê siū-siong ū-ê sit-lo̍h sı̀ⁿ-miā. Chiū tio̍h hō͘ Kong-si poê ; poàⁿ-nı̂ ê tiong-kan bat poê lâng 5,0000 gı̂n. Ū-sı̂ mı̍h hō͘ in chài-khı̀ bô tú-hó , ū-ê sún-hoāi ū-ê phah-m̄-kı̀ⁿ; poàⁿ nı̂ ê tiong-kan bat poê-mı̍h 25 bān gı̂n . Múi-nı̂ la̍p koaⁿ-hú 135 bān-gı̂n .

Múi-nı̂ chóng-siu--ê kè-kiōng chı̍t bān bān gı̂n khah ke, chóng khui ê kè kiōng chha-put-to 5800 bān .

Téng-bı̄n só͘-kı̀-ê sı̄ sio̍k tı̄ chı̍t-ê Kong-si nā-tiāⁿ .

(Tâi-lâm Hú-siâⁿ kàu-hoē-pò tē 133 koàn,1896 nı̂ 4 ge̍h)