Lūn Kam-chià

Chit gō͘ goe̍h tô͘ sı̄ oē goā-kok kheh-chià se̍k-thn̂g ê tāi-chı̀. Téng-bı̄n ū chià-hn̂g; kheh-chià ê khı̀-kū khoàⁿ bē tio̍h, chóng-sı̄ ē-bı̄n tiong-ng thang khoàⁿ-kı̀ⁿ thih-kńg lâu chià-chiap lo̍h toā-tháng. Kı̂-û--ê tô͘-á-lāi ū lâng se̍k-thn̂g tı̄ thn̂g-tiáⁿ teh lā, ū-ê teh koè-lı̄ chià-chiap hō͘ i chheng-khı̀, iā ū-ê se̍k-liáu iúⁿ-thn̂g lo̍h lāu-chhài.

Tâi-oân ê kam-chià ū âng-ê pe̍h-ê, nn̄g iūⁿ; âng-ê kiò-chò âng-chià, pe̍h-ê kiò-chò tek-chià. Chhut-sek sı̍t-chāi chin-chē, ta̍k-nı̂ thn̂g chhut put-siáu. Nā-sı̄ hn̂g ū hó pháiⁿ, thn̂g ū o͘ pe̍h; o͘-ê chng-lo̍h thn̂g-láng, pe̍h-ê iúⁿ-lo̍h lāu-chhài. Khó-sioh lán chit-pêng chhòng-phō͘ se̍k-thn̂g ê khı̀-kū m̄-hó, kài-thn̂g ê kang-hu bô kàu, m̄-ta̍t-tio̍h goā-kok ê khı̀-kū khiáu-sit, kài-thn̂g ê hoat-tō͘ chin pe̍h, niá m̄ chhin-chhiūⁿ goā-kok ê khı̀-kū lâi án-ni chò leh ?

Ài-beh chhah kam-chià, ū sin-chai iā ū jı̄-nı̂. Chám chià-boé chı̍t-chat, chiông-tiong ê nn̄g-ba̍k seng chı̀m-chúi, thèng-hāu hn̂g lê hó, ēng chià-boé lâi chhah, chiū-sı̄ sin-chai. Kam-chià chhò-liáu, iû-goân lâu hiah-ê kū chià-thâu hō͘ i hoat, m̄-bián koh-chài chhah, hō-chò jı̄-nı̂--ê. Hō͘ in nn̄g-hō khoài-hoat, iàu-kín tio̍h lo̍h pûi-pùn, nı̂-tang ê hō͘-chúi iā tio̍h tú-hó; oá cha̍p-goe̍h-kan í-keng toā-châng chià-chiap kāu, chiah ē piàⁿ-hn̂g hó kheh.

Lâi chéng chı̍t-tiuⁿ phō͘ khí-lâi, tio̍h ū saⁿ-sı̀-pah ê gı̂n-chı̂ⁿ. Sui-jiân phō͘-têng sı̄ chháu tah--ê, m̄-kú khı̀-kū teh siong-tiōng, só͘-í ta̍k-ūi ê choh-sit lâng khah siông tio̍h saⁿ-kap chhut-chı̂ⁿ, lâi chéng-phō͘ khiā-koà----chı̍t koà ū saⁿ-chiah gû, kiōng tio̍h chiâⁿ-cha̍p koà. Iū-koh in tio̍h bé chio̍h-chhia chı̍t-hù, thn̂g-tiáⁿ la̍k-chhit-ê, toā-tháng chı̍t nn̄g kha, chhia-kô chı̍t-ki. Chhiàⁿ-kang ê lâng iû-goân ū kúi-nā hō, ū-ê hiâⁿ-hoé kiò-chò hoé-kong, ū-ê teh kheh-chià kiò-chò gû-pô, iā ū se̍k-thn̂g--ê, chiū-sı̄ chheng-chò sai-hū.

Lūn pún-tē lâng kheh-kam-chià, in phō͘-lāi ê chio̍h-chhia téng-ē ū nn̄g-tè pang, chhia-lāi ū nn̄g-ki sim, chı̍t-ki lo̍h chhia-kô hō͘ chúi-gû teh-tio̍h. Nā tı̍t-tı̍t tńg, chit-lia̍p toè hit-lia̍p, kam-chià tùi chio̍h-chhia tiong-ng ē kheh koè-khı̀, chià-phoh ē tùi hiùⁿ-pêng jı̍h-chhut--lâi. Án-ni kheh saⁿ-pái, hō͘ chià-phoh ta-ta-ta, chià-chiap chiū lóng tùi ē-té tek-kóng-lāi lāu-lo̍h thn̂g-tiáⁿ. In-ūi tú-á lāu-lo̍h ê sı̂, chit-hō chiap sı̄ chin kiaⁿ-lâng, só͘-í tio̍h chham hoe-hún lo̍h-khı̀ lā, iā tio̍h iúⁿ-lo̍h se-thai lâi koè-lı̄ tı̄ toā-tháng; koh, tio̍h piàⁿ-koè thn̂g-tiáⁿ hō͘ i kún, chit-tiáⁿ koè hit-tiáⁿ; āu-lâi thn̂g-phoe̍h khioh liáu-lı̄, chiū ē pı̀ⁿ-chò thn̂g, piān-piān thang chng-lo̍h láng hoat-bē.

Taⁿ ū iàu-kín ê siau-sit ài thong-ti lín, chiū-sı̄ kı̄n-lâi goán chó͘-ke ū chı̍t-ê chhut-miâ sian-siⁿ teh kóng-khí, “Kam-chià ū chí.” Hit-ê chí sı̄ kiat tı̄ kam-chià-boé--nı̍h, sè-sè lia̍p-á ài chhoē tio̍h ēng hàm-kiàⁿ lâi khoàⁿ. Sian-siⁿ pún-sin kàu-khàm liáu, chiong kúi-lia̍p chèng-lo̍h thô͘-kha hō͘ in kín-kín hoat-khí--lâi. I iā teh phah-sǹg nā-sı̄ choh-sit lâng ta̍k só͘-chāi gâu tùi-tiōng chit-hō sū, bô-loā-kú thn̂g ē khah chē, koh ē têng-poē khah pan-gı̂. Che kiám m̄-sı̄ hō͘ lán chai lâi káng-kiù Siōng-tè só͘ chhòng-chō ê mı̍h chin-chiàⁿ ū toā lō͘-ēng? Lâng ta̍k-jı̍t tio̍h chia̍h ê bí-niû pún sı̄ kiâm-ê khah siông, m̄-kú ngó͘-bı̄-lāi iû-goân iā tio̍h tiⁿ, só͘-í thn̂g sı̄ hō͘ lán chò iàu-kín ê mı̍h-kiāⁿ; chhin-chhiūⁿ sio̍k-gí kóng, “Chia̍h kiâm it-tio̍h tiⁿ, chia̍h tiⁿ it-tio̍h kiâm.”

(Tâi-lâm Hú-siâⁿ Kàu-hoē Pò Tē 61 Hō, 1890 nı̂ 5 goe̍h)