1.Chhâ, chio̍h, thô͘, choá, ê ngó͘-siōng,
Peh-sı̀ⁿ kūi-pài chin tùi-tiōng,
Lâm-hū ló-iù lóng án-ni,
M̄ chai toā-toā tek-choē thiⁿ.
2. Che siōng sí-sí boē tín-tāng,
Thái-oē hō͘ lâng thang ǹg-bāng,
Phı̄ⁿ-khang boē phı̄ⁿ, hı̄ⁿ boē thiaⁿ,
Ba̍k-chiu boē khoàⁿ chhùi bô siaⁿ.
3. Chhiú nı̍h boē choè, kha boē kiâⁿ,
Tiāⁿ-tiāⁿ kù lâng kng teh ngiâ,
Hó pháiⁿ boē chhiò iā boē háu,
Chai-ē nā kàu boē hiáu cháu.
4. Ti-tu kiⁿ-si thô͘ eng-ia,
Niáu-chhú tn̄g-tó, pe̍h-hiā chhia,
Lóng tio̍h khò lâng lâi chhòng hó,
Bêng-bêng chū-sin put-lêng-pó.
5. Thang chai ta̍k-hō ê ngó͘-siōng,
Chin chiàⁿ sí-sí put-tiòng-iōng,
Khó-sioh khoàⁿ lâng hoān tāi-chı̀,
Lóng sı̄ ǹg-bāng pu̍t pó-pı̀.
6. M̄-chai ngó͘-siōng chhâ-thâu pu̍t,
Chiàⁿ-sı̄ ı̄ⁿ-toan toā siâ-su̍t,
Ūi-hô peh-sı̀ⁿ boē-hiáu siūⁿ,
Thoè i khí-keng siat hê-siūⁿ.
7. Poaⁿ-hı̀ koah-hiuⁿ toā sài-hoē,
Hiuⁿ-chek gûn-choá sio chin choē,
Pâi-chè hàu-kèng bô chhái-kang,
Kàu-bé liáu-chı̂ⁿ sı̄ khang-khang.
8. Taⁿ khǹg tāi-ke tio̍h hoé-gō͘,
Khı̀-siâ kui-chèng kiâⁿ thiⁿ-lō͘,
Chhâ-thâu ngó͘-siōng pàng hiat-kak,
Siōng-tè Sèng-keng khûn-khûn tha̍k.
9. Chiū chai to̍k-it chin Siōng-tè,
Chhe i Sèng-kiáⁿ lâi kiù-sè,
Sèng-kiáⁿ chun-miâ Chú Iâ-so͘,
Sè-kan lâng-lâng tio̍h chheng-ho͘.
10. Iâ-so͘ ū thoân thiⁿ chin-lí,
Thoè lâng sio̍k-choē siū-khó͘ sí,
Kong-lô oân-choân choè Tiong-pó,
Hō͘ lâng oá-khò thang kı̂-tó.
11. Sèng-pē Siōng-tè chı̀ chun-kùi,
Sè-kan lâng-lâng tio̍h kèng-ùi,
Kèng-ùi ho̍k-sāi ê hoat-tō͘,
Chí khò Iâ-so͘ chit tiâu lō͘.
12. Taⁿ kiû Sèng Sı̂n ēng hok-im,
Kà-sı̄ kám-hoà lâng ê sim,
Oē hiáu khò Chú pài Siōng-tè,
Éng-oán ho̍k-sāi kàu bān-sè.
(Ka-têng ê Pêng-iú tē 17 kı̂, 1959 nı̂ 4 ge̍h)
