1. Sè-siok tē-it toā tùi-tiōng,
Chiū-sı̄ ám-píⁿ ê chhâ-siōng,
Ám-píⁿ chhâi-siōng ná mn̂g-chhoàⁿ,
Lāi-goā siá-jı̄ hō͘ lâng khoàⁿ.
2. Mn̂g-chhoàⁿ chhiàm-chheng miâ bo̍k-chú,
Hō-choè kong-má kap pē-bú,
Bo̍k-chú bêng-bêng sı̄ chhâ-thâu,
Lia̍h-choè chó͘-kong chin bô gâu.
3. Che-chhâ nā oē choè kong-chó͘,
Sí-liáu kiáⁿ-sun mı̍h-sái khó͘?
In-ūi kong-chó͘ kng khı̀ tâi,
Chhâ-thâu liâm-piⁿ thang jı̍p-lâi.
4. Chó͘-kong kı̄-sı̂n chı̍t-ē kàu,
Sio-hiuⁿ tiám-chek pâi teh hàu;
Kiáⁿ-sun kūi-lo̍h kho̍k thâu-hia̍h,
Ho͘-chhiáⁿ chó͘-kong tio̍h lâi chia̍h.
5. Bô siūⁿ chó͘-kong pı̄ⁿ tı̂m-tāng,
Hó-mı̍h boē-oē chia̍h poàⁿ-hāng;
Hô-hòng sí-liáu tâi lo̍h-thô͘,
Iáu-kú teh chhiáⁿ, chin hô͘-tô͘.
6. M̄-chai sı̂n-hûn kui im-kan,
Boē-oē koh-lâi chia̍h sam-chhan;
Sui-jiân toh pâi moá biō-lāi,
Boē kàu im-kan hit só͘-chāi.
7. Ta̍k-pái choè-kı̄ miâ chè-chó͘,
Sı̍t hàu ka-kı̄ ê pak-tó͘;
Hàu-liáu siūⁿ chia̍h siūⁿ lim-thı̂n,
Boē-kı̀ hit-jı̍t sı̄ kı̄-sı̂n.
8. Ta-po͘ hū-jı̂n lóng án-ni,
Soè-kiáⁿ chia̍h kàu beh saⁿ-chiⁿ,
Sè-sio̍k chèng-lâng siūⁿ m̄-kàu,
Choè-kı̄ khêng-chin sı̄ put-hàu.
9. In-ūi boē chia̍h lán chè-hiàn,
Bêng-bêng sı̄ ké sı̄ moâ-phiàn;
Moâ phiàn chó͘-kong toā bô lí,
Thiⁿ-téng Chú-cháiⁿ m̄ hoaⁿ-hí.
10. Chó͘-kong chin-chiàⁿ bô koh-lâi,
Bô-chhái chè-mı̍h moá toh pâi;
Hàu-soah chè-mı̍h bô koh-iūⁿ,
Ta̍k lâng bêng-chai oē-hiáu siūⁿ.
11. Siat-sú chó͘-kong oē hián-sèng,
Hióng-siū kiáⁿ-sun só͘ hàu-kèng,
Eng-kai saⁿ-tǹg chhiáⁿ lâi chia̍h,
Chı̍t-nı̂ chı̍t-pái bô kàu-gia̍h.
12. Nı̂-choeh soà hàu chham lâi sǹg,
Thong-nı̂ lóng chia̍h bô kúi-tǹg,
Nā beh chı̍t jı̍t saⁿ-tǹg hàu,
Put-sı̂ lâi chú iā bô kàu.
13. In-ūi cho͘-kong kúi cha̍p-tāi,
Choê-lâi chin-choē bô só͘-chāi,
Choè-thâu seng kàu ûi lâi chia̍h.
Tè-bé ūi-chhù bô kàu-gia̍h.
14. Kiáⁿ-sun ài chhiáⁿ pun bô pı̂ⁿ,
Chiong-lâi hoán-tǹg oē kau-tı̂ⁿ,
Le̍k-tāi chó͘-kong thài choē lâng,
Hù-kùi pı̂n-chiān bô saⁿ-tâng.
15. Pı̂n-chiān hoaⁿ-hí lâi kàm-la̍p,
Hù-kùi sı̄m-chı̀ bô saⁿ-ha̍p,
Kàm-la̍p ê hûn ài pó-pı̀,
Bô ha̍p ê sı̂n ài siū-khı̀.
16. Liân-lūi im-hûn saⁿ khòng-kù,
Lêng-khó͘ bô chè khah bô sū,
Chè-sū bêng-bêng sio̍k hu-lé,
Hàu-kèng bô chin piān sı̄ ké.
17. Sio̍k-gú siông kóng chı̍t tiám sim,
Chit kù ı̀ siūⁿ lí khiok-chhim,
Siōng-tè tō-lí sı̄ chèng-tit,
Ài-lâng hàu-kèng sim chin-sı̍t.
18. An-hūn siú-kí kiâⁿ toan-chèng,
Chit hō chiū-sı̄ chin hàu-kèng,
Sêng-sı̍t hàu-kèng, thiⁿ hoaⁿ-hí,
Tú-ha̍p Siōng-tè chin tō-lí.
19. Khó͘-khǹg chèng-lâng tio̍h hoán-hoé,
Káng-kiù Sèng-keng ê kun-toé;
Chiah chai choè-lâng ê pún-hūn,
Iàu-kín kèng thiⁿ kiâⁿ hàu-sūn.
20. Khó-sioh ū lâng m̄ lūn-lí,
Kiau-ngō͘ kò-chip kàu tı̄ sí;
Khún-kiû Thiⁿ-pē toā lı̂n-bín,
Hō͘ lâng chhíⁿ-gō͘ oē khah kín.
21. Thiⁿ-pē, Lí ū toā koân-lêng,
Goán lâi kūi-lo̍h Lí bı̄n-chêng,
Kiû Lí toà-tio̍h goán Tiong-pó,
Kín-kín lâi chiâⁿ goán kı̂-tó.
22. Hut-jiân tùi thiⁿ kàng Sèng-sı̂n,
Kám-hoà kò͘-chip ê gû-bı̂n;
Hō͘ i oē chai ū tāng-choē,
Hoán-hoé sı̀n Chú jı̍p sèng-hoē.
(Ka-têng ê Pêng-iú tē 19 kı̂, 1959 nı̂ 9 ge̍h)
