Lūn Song-sū 03

Lūn Tû-lêng, iā kóng The̍h-toh

Ū lâng hàu chı̍t-pah jı̍t, ū lâng hàu sı̀-cha̍p-káu jı̍t, ū lâng hàu chı̍t-goe̍h jı̍t, iā ū lâng hàu poàⁿ-goe̍h jı̍t; kok sûi ke-sū hong-sio̍k bô ū tēng-kui. Kàu hit-jı̍t kng choá-chhù chhut goā-bı̄n sio, hō-chò Tû-lêng, kng toh kap âng-teng khı̀ lō͘-piⁿ hiat-ka̍k, hō-chò The̍h-toh. Lâu chı̍t-sian sı̂n-chú sı̄-nı̂ peh-cheh lâi hàu, hō-chò ho̍k-sāi hiuⁿ-ian. The̍h-toh hit-jı̍t tio̍h bé mı̍h-kiāⁿ lâi chhiáⁿ pang-chān kang ê lâng, hō-chò chhiáⁿ song-kha. Chò koé lâi hēng ū mı̍h chō͘-song ê lâng, hō-chò Tap choá-hūn.

Keh tńg nı̂ tùi sí hit jı̍t lâi hàu, hō-chò Chò tùi-nı̂. Chheng-bêng jı̍t thâu- chı̍t-pái khı̀ chè bōng, hō-chò Poē sin- bōng. Í-āu ta̍k nı̂ tùi sí hit jı̍t lâi hàu, hō-chò Chò-kı̄. Hoān ēng seng-lé mı̍h- kiāⁿ, put-lūn hàu sı̂n-chú chè hûn-bōng, it-khài bô ha̍p Siōng-tè ê chin-lí. Sı̀n Chú lâng chū-jiân chai.

Lūn Song-ho̍k, sio̍k kóng Hà-ho̍k, kap hàu-lāi ê só͘ chò

Song-ho̍k bô tēng-kui. Sàng-chòng hit jı̍t hàu-lâm hàu-hū chhēng-moâ, tı̀- moâ sı̄ tē-it tāng ê ho̍k; kı̂-ı̂ he̍k-sı̄ chhēng tē-á, á-sı̄ chhēng pe̍h--ê, kok chiàu chhin-se lâi hun-pia̍t. Pē-bó-hà tio̍h toà saⁿ-nı̂ chiàⁿ thǹg, ı̀-sù sı̄ eⁿ-á tio̍h io, phō, saⁿ-nı̂ chiàⁿ lı̄ kha-chhiú; só͘-í toà saⁿ-nı̂ hà lâi pò-tap pē-bó ióng- io̍k khu-lô ê chhim-in tāi-tek.

Toà-hà ê tāi-khài put-lūn lâm-lí, thâu- chang-boé, koh-soh, ê, bō, i-chiûⁿ kok ū kı̀-jı̄n thang chai. Hàu-lāi sin-chiūⁿ bē toà-tit kim-gı̂n ge̍k-khı̀, bē chhēng-tit tiû-toān chhái-sek ê i-ho̍k, bē tāng-tit ga̍k-khı̀. Ū koaⁿ-chit ê lâng bē chò-tit koaⁿ, tha̍k-chheh lâng bē khó--tit, peh- sèⁿ lâng bē kè-chhoā--tit. Bô chiàu án- ni kiâⁿ-gı̂, sǹg sı̄ put-hàu. Ta̍k-hāng ê giâm-kín, bô-m̄-sı̄ piáu-bêng iu-būn, khó͘-thàng, pi-siong ê sim.

Sı̀n Chú ê lâng pān-lí song-sū ê tāi- chı̀, nā sio̍k ı̄ⁿ-toan--ê chū-jiân m̄-thàn. Ū hāng sui-jiân m̄-sı̄ ı̄ⁿ-toan, iā bô tek- khak tio̍h lóng thàn. Nā hoè-khı̀ song- ho̍k, chiū thian-lí jı̂n-chêng lâi lūn, káⁿ bô lâng ē an-sim; kı̀-jiân bô an-sim, chū-jiân tio̍h siú.

Ū lâng mn̄g kóng, Sı̀n Chú ê lâm-lí khı̀ sàng hiaⁿ-tı̄ bâi-chòng, tàu-tí tio̍h pau pe̍h khah-hó, á-sı̄ bián pau iā ē chò--tit? Ìn i kóng, Kı̀-jiân sı̄ sàng- chòng piān-sı̄ iu-būn ê tāi-chı̀, káⁿ tio̍h ū kı̀-jı̄n thang piáu-bêng khah ha̍p-sit; nā bô só͘ hun-pia̍t, kap koè-lō͘ ê lâng ū siáⁿ koh-iūⁿ--leh? Lô͘. 12:15.

Lūn Thó͘-tı̄-bōng-á

Sè-sio̍k tı̄ chiàⁿ-bōng ê chó-pêng, lēng-goā koh chò chı̍t-ê sè ê bōng-á, hō- chò Thó-tı̄-kong bōng-á; bōng-pâi siá Hō͘-thó͘ nn̄g-jı̄; ı̀-sù sı̄ chiong sí lâng ê kut-hâi kau Thó-tı̄-kong chiàu-kò͘ pó- hō͘. Só͘-í kı̀ⁿ ū poē bōng iā tio̍h chè i.

Che sı̄ ı̄ⁿ-toan, sı̀n Chú ê lâng m̄-bián o̍h in ê khoán. In m̄-bat Siōng-tè, phah-sǹg kok ūi tē-hng kok ū sı̂n teh koán. Thó-tı̄-kong sı̄ liāu-lí hit-hō tāi- chı̀, chiàⁿ ū án-ni chò.

Lūn Táⁿ-tháng ê in-iû

Chó-toān kóng, Thian-chú sí, chhit- goe̍h-jı̍t chhut chòng. Chu-hô͘, gō͘-goe̍h- jı̍t. Tāi-hu, saⁿ-goe̍h-jı̍t. Tha̍k-chheh- lâng, chı̍t-goe̍h khah ke. Kó͘-jı̂n bô liâm-piⁿ chhut-chòng, sı̄ in-ūi tán-hāu goā- kheh ê lâng boē chiâu kàu, song-sū boē chiâu piān, m̄-sı̄ in-ūi chhoē hong-súi. Hiān-sı̂ ê lâng táⁿ-tháng iā ū kúi-nā in- toaⁿ. Ū ê in-ūi beh ūn-koan kui pún-hiuⁿ. Ū ê in-ūi chó͘-chiūⁿ boē kui-thó͘; phı̀-jū kong sí boē kui-thó͘, chiū pē sí tio̍h táⁿ--teh. Ū ê in-ūi kiáⁿ-sun chhut- goā. Ū ê in-ūi beh chhoē hó hong-súi. In-ūi hong-súi lâi táⁿ-tháng, chiū-sı̄ ı̄ⁿ- toan.

Ū lâng mn̄g kóng, Ai-kı̍p ê Iok-sek m̄-ài chòng tı̄ Ai-kı̍p, in-ūi siáⁿ-sū? Chhòng. 50:24-26. Ìn i kóng, In-ūi chhim-sı̀n Siōng-tè beh chhoā peh-sèⁿ chhut hia, m̄-sı̄ in-ūi tē-lí ê hó-pháiⁿ. Lâi. 11:22.

Lūn Khioh-hâi chhian chòng, sio̍k kóng Khioh hong-súi

Khioh kut-hâi iā ū kúi-nā in-toaⁿ. Ū ê in-ūi bōng lı̄ chhù hn̄g, le̍k-nı̂ oh-tit sûn-sı̄. Ū ê in-ūi chúi pang, tē hām. Ū ê in-ūi ka-lāi lap-kha̍p, á-sı̄ bē heng- ōng hoat-ta̍t. Ūi-tio̍h lō͘ hn̄g, chúi pang, tē hām sı̄ ha̍p-gı̂. Nā in-ūi lâng bē pêng-an, á-sı̄ châi-bu̍t bē heng-ōng, lâi tùi-hù pē kong ê kut-thâu, kā i chhian-lâi soá-khı̀. He! M̄-nā ı̄ⁿ-toan, iā sı̄ toā put-hàu.

Sı̀n Chú ê lâng chai pēⁿ-thiàⁿ sí-sit, in-ūi ū choē. Hù-kùi êng-hián sı̄ tùi Siōng-tè siúⁿ-sù. Chū-jiân m̄-sı̀n ı̄ⁿ-toan, iā m̄ thàn-sio̍k.

Lūn Kùi-choá Poē-bōng

Sin bōng le̍k-nı̂ pān lé-mı̍h khı̀ hàu, hō-chò Poē-bōng. Kū-bōng ēng choá- liân khı̀ teh tı̄ bōng-téng, hō-chò Kùi- choá. Kùi-choá ū kúi-nā ê ı̀-sù. Ū ê kóng, sı̄ kā sí lâng hō tē; ū ê kóng, sı̄ kā sí lâng têng-chhù; ū ê kóng, sı̄ chò kı̀-jı̄n hō͘ lâng chai, hit-ê bōng iáu ū kiáⁿ-sun. Che sı̄ ı̄ⁿ-toan, iā bô tō-lí.

Nā kóng sı̄ hō tē, chiū ē hāi bông-hûn sio-cheⁿ sio-phah; in-ūi khı̀ kùi-choá ū-ê tāi-seng, ū-ê lō͘-boé, chū-jiân kùi liáu ē tham-lâi tham-khı̀. Nā kóng sı̄ têng-chhù, kèng khah put-thong; in- ūi choá ba̍k tâm chiū noā-khı̀, choáⁿ-iūⁿ ē tí-tng hō͘-chúi?

Lūn Khai bêng-lō͘, sio̍k kóng Khui hûn-lō͘

Chhiáⁿ Hoê-siūⁿ Tō-sū lâi tha̍k keng-chhàm, hō-chò Khui hûn-lō͘. Chia̍h- chhài ê lâng chiū chhiáⁿ chhài-iú lâi pàng-phoāⁿ chò. He̍k-sı̄ chò saⁿ-mê-jı̍t, he̍k-sı̄ gō͘-mê-jı̍t, chiàu kè-chı̂ⁿ ê chē- chió lâi thiu-thè. Ì-sù sı̄ kiáⁿ-sun ū sio chē-chē kim-gı̂n-choá, hō-chò Khò͘-chı̂ⁿ; í-kı̍p choá kô͘ ê kim-soaⁿ, gı̂n-soaⁿ, toā- chhù, tı̂-têng, chúi-koh, ta̍k-hāng ke-si gia̍p-bu̍t, lô͘-châi lí-pı̄. Tiōng Hoê-siūⁿ Tō-sū ê kong-le̍k, chhiau-tō͘ bông-hûn chhut kan-khó͘, tit-tio̍h khoàⁿ-oa̍h.

Chit-hō ê tāi-chı̀ sè-sio̍k bêng-lí ê lâng iā chai sı̄ ké, put-kò hō͘ hong-sio̍k só͘ pé-pa̍k, bô chin-lí ê khùi-la̍t hō͘ lâng hó-táⁿ pàng-soah tiāⁿ-tiāⁿ. Sı̀n Chú ê lâng tio̍h chò sè-kan lâng ê kng, lâi chhoā lâng chhut bê-lō͘, piàn-oāⁿ o͘-àm m̄-hó ê sı̍p-sio̍k, thoân hō͘ lâng chai sià-choē tit-kiù kàu khoài-lo̍k ê só͘-chāi, sı̄ oá-khò Siōng-tè ê kiáⁿ Iâ-so͘ ê kong- lô; m̄-sı̄ khò Hoê-siūⁿ Tō-sū ê hoat-le̍k.

Lūn chhiáⁿ Ang-ı̂ khan-bông

Sè-sio̍k lâng pē-bó koè-sin, iu-būn koè-thâu, mê-jı̍t su-siúⁿ pi-siong, ài chai bông-hûn ê kéng-hóng choáⁿ-iūⁿ, chiū chhiáⁿ ang-ı̂ lâi mn̄g; ı̀-sù sı̄ bông-hûn ē tùi ang-ı̂ chiūⁿ-sin lâi kóng i ê kéng-gū, kiáⁿ-sun chiū thang chai i ū sím-mı̍h khiàm-khoeh kan-khó͘, choáⁿ-iūⁿ thang pó͘-chiok--i. Che sı̄ ı̄ⁿ-toan.

Lâng sí lêng-hûn iû-chāi Siōng-tè hun-hoat, bē-tit ka-tı̄ chú-ı̀, thái-thó ū sı̂n-hûn thang lâi tùi ang-ı̂ chiūⁿ-sin? Chiū siat-sú kiáⁿ-sun ū chı̂ⁿ-châi chı̄n- chē, iā poê-pó͘ bông-hûn bē tio̍h. In-ūi Siōng-tè sı̄ ke̍k kong-gı̄ ê Sı̂n, m̄ pí lâng ē mái-chiok--tit. Lō͘. 16:19-31.

Ū lâng mn̄g kóng, Sèng-chheh kı̀ Sò- lô ông chhoē ang-ı̂ khan Sat-bó-ní ê sı̂n-hûn, to kó-jiân ū lâi; nā beh bô iáⁿ, só͘ kóng Sò-lô pē-kiáⁿ kap kun-peng ê sū, choáⁿ-iūⁿ ē lóng èng-giām? I Bó. 28: 7-19, 31:1-6. Ìn i kóng, Chit chân tāi-chı̀ ū khah, oh--tit. Ū lâng teh thó͘- siūⁿ lâi kóng, m̄-chai ē ēng-tit á-bē.

Sò-lô sı̄ chı̍t kok ê ông. Sat-bó-ní sı̄ Siōng-tè tı̄ chèng peh-sèⁿ tiong só͘ tiōng-iōng ê chı̍t lâng. Koh chit pái sı̄ Sò-lô ông ê boé-kio̍k, iā sı̄ ū koan-hē ê sı̂-chūn. Kiám-chhái sı̄ Siōng-tè sūn chit-ê ki-hoē thang hō͘ Sò-lô pı̄-pān koè-óng ê tāi-chı̀ iā káⁿ. Tek-khak m̄-sı̄ sûi-piān lâng, chhı̀n-chhái sı̂ lâi chò lóng ū iáⁿ; só͘-í lâng m̄-thang siū bê-he̍k.

Koh lán khoàⁿ Sèng-keng tio̍h put- chí chim-chiok sè-jı̄. Chhin-chhiūⁿ chı̍t- pái Siōng-tè hō͘ lı̂ ē kap Pa-lân kóng-oē. Bı̂n 22:28-30. II Pí. 2:15, 16. He sı̄ ū koan-hē iàu-kín ê sı̂ lâi án-ni, iā sı̄ ngó͘-jiân hi-hán ê sū. Taⁿ siat-sú ū lâng tùi lán kóng, Bó͘ ūi ū cheng-seⁿ ē kap lâng piān-lūn kóng-oē; lán chiū sı̀n kóng, Ū iáⁿ, in-ūi Sèng-keng iā ū kı̀ lı̂ ē kóng-oē; án-ni, kiám ē kóng--tit mah?

Lūn Thióng-tē, Hûn-bōng, Ha̍p-chòng.

Sè-sio̍k sı̀n hong-súi ē tı̀-ı̀m lâng, châi, teng, kùi, hok, lo̍k, siū; só͘-í ū gia̍h lâng pêng-sı̂ chhı̄ tē-lí-su sı̀-kè chhoē-tē, nā tē-lí-su kóng, hit ūi ū sím- mı̍h hó-hia̍t, chiū liáu chē-chē só͘-hùi iā beh bé kàu sêng. Ū-sı̂ tı̀-jiá chai-hō iā bô iàu-kín. Che sı̄ m̄-bat chin-lí, chiàⁿ án-ni siū bê.

Koh Hûn-bōng tio̍h chiàu tē-hia̍t lâi chhui-pâi, he sı̄ siáⁿ hia̍t, bōng tio̍h choáⁿ-chò chiàⁿ ē kiâⁿ-khı̀, beh chhú teng, á-sı̄ beh chhú kùi, iū tio̍h choáⁿ- iūⁿ chè-chok. Ta̍k-hāng lóng-tio̍h thàn tē-lí-su ê oē, m̄-káⁿ oai-chhoa̍h. Che m̄- nā ı̄ⁿ-toan, iā sı̄ gōng.

Ū lâng mn̄g kóng, Sı̀n Chú ê lâng chhoē bōng-tē, bé thióng-tē thang mah? Ìn i kóng, Eng-kai tio̍h; iáu-kú kap sè-sio̍k tio̍h hun-pia̍t, lán sı̄ boeh chhoē kian- chòng ún-tàng khah bē pang-hāi ê só͘-chāi, chòng-liáu m̄-bián khoà-lū ū sím- mı̍h sún-hoāi, m̄-sı̄ ūi hong-súi khí-kiàn. Bé thióng-tē iā sı̄ chhú kui-khı̀ bô kap lâng chhap-cha̍p hô͘-hūn; nā hûn-bōng ū kui-ūi, chiū le̍k-nı̂ hó sûn-sı̄ chiàu-kò͘. Koh sı̀n Chú ê lâng sı̀n sí ū koh oa̍h, nā bâi-chòng kāng-ūi, kàu koh oa̍h hit jı̍t thang saⁿ-kap ngiâ-chih Chú. Hān. 28-29, 6:40. Sèng-keng iā ū kı̀ A-pek-lia̍p-hán bé thióng-tē. Chhòng. 23:16-18. Iā ū kóng, A-pek-lia̍p-hán, Sat-lia̍p, Í-sat, Lı̄-pek-ka, Ngá-kok, Lı̄-a, lóng-chòng kāng thióng. 25:7-10, 49: 9-32. Lia̍t-ông-kı̀ siōng-hā koàn iā siông-siông kóng, lia̍t-ông sí kap chó͘ tâng-chòng. Ū-ê ông kiâⁿ-pháiⁿ chiū bô thang án-ni. Hiān-sı̂ ū-ê kàu-hoē bé kong-thióng, iā-sı̄ ài hun-pia̍t, m̄-bián hūn-cha̍p tı̄ sè-sio̍k ê tiong-ng. Chit-hō hoat-tō͘ put-chí hó.

Lūn Bō͘-pi, sio̍k kóng Bōng-pâi.

Ēng chio̍h phah-jı̄ chhāi tı̄ bōng-thâu, hō-chò Bō͘-pi; bō͘-pi ê khoán tiong-ng siá sí-lâng ê miâ sèⁿ, chó-pêng siá nı̂-kō jı̍t goe̍h, iū-pêng siá hàu-lâm hàu-sun ê miâ-jı̄. Hū-jı̂n-lâng ê bōng-pâi nā sèⁿ Lı̂m kè hō͘ sèⁿ Tân--ê, chiū siá Tân-bûn Lı̂m--sı̄ bó͘ miâ ê bōng.

Khiā bōng-pâi sı̄ tio̍h hoat, hō͘ lâng chı̍t-ē-khoàⁿ chiū chai sı̄ bó͘ lâng in ê bōng. Nā-sı̄ sı̀n Chú lâng ê bōng-pâi tio̍h ū khah koh-iūⁿ chiàⁿ ha̍p-sit; chiū-sı̄ tio̍h siá Kiù-chú kàng-seng ê nı̂-kō, kap Ki-tok-tô͘ ê jı̄-iūⁿ, chiàⁿ kap sè-sio̍k ū hun-pia̍t, chiàⁿ ū kı̀-jı̄n thang chai.

Sè-sio̍k nā sı̄ bô-kúi-hoè ê gín-á, kap khah chió nı̂-kí chiū-sí-ê, chiū sûi-piān tâi-tâi--teh, bô chhiáⁿ tē-lí-su chhoē-tē, iā bô khiā-pâi, ı̀-sù sı̄ i-ê bōng bē tı̀-ı̀m oa̍h lâng. Chhin-chhiūⁿ sio̍k-gí kóng, “Sí-gín-ná bōng bô ǹg.” Sı̀n Chú lâng tio̍h m̄-thang koh án-ni hun-pia̍t.

Sè-sio̍k koh ū chı̍t-khoán ê m̄-hó, chiū-sı̄ chhut-sı̀ bô kúi-jı̍t ê gín-ná nā sí, chhı̀n-chhái ēng ka-chı̀, á-sı̄ phoà saⁿ-á- khò͘ kā i pau-lau kńg-kńg teh, phō khı̀ hiat tı̄ khe--nı̍h, á-sı̄ chúi-kau toā-khut, hō͘ i khı̀ chhı̄ hı̂-á hê-á bô lia̍h-chò iàu- kín, ı̀-sù sı̄ nā tâi, chiū oh-tit khı̀ chhut- sı̀. Che sı̄ ı̄ⁿ-toan koà hāi-lâng, sı̀n Chú lâng chit-khoán tio̍h ké-oāⁿ.

Put-lūn toā sè hàn sí, tek-khak tio̍h tâi chiàⁿ ha̍p-lí.

Lūn Sè-miâ

Lâng sí, kiáⁿ-sun koh kā i lēng hō chı̍t-ê hó-miâ, lâi siōng sı̂n-chú bōng-pâi, hō-choè “sè-miâ”. Chiàu-lé sı̄ ū koa̍t-ūi ê lâng chiah oē kham-tit. M̄ sı̄ sûi-piān lâng lóng thang án-ni. In-ūi ū koa̍t-ūi ê lâng sí, kok-kun chiàu i pêng-seng ū sím-mı̍h kiàn-kong lı̍p-gia̍p lı̄-ek kok-ka, chiàu án-ni kā i lēng hō chit-ê hó-miâ lâi êng-hián i, hō͘ i ê hong-miâ liû-thoân tāi-tāi. Peh-sı̀ⁿ lâng bô kok-kun sù-sè, kiáⁿ-sun ài hō͘ i ê pē-kong tit-tio̍h hó-miâ, chiū sûi-piān kā i piáu-hō, thui-goân i ê sim sı̄ iú-hàu, khe-khó i ê só͘-choè khoah chiàn-lé; kı̀-jiân chiàn-lé, chiū m̄-thang o̍h.

Put-kò lâng ū-sı̂ ū hō hit-hō thó͘-miâ bô jı̄ thang siá; iah sı̄ pháiⁿ-miâ chhin-chhiūⁿ chhàu, àu hit-hō, nā-sı̄ chhoē chı̍t-ê oá hit-ê miâ ê jı̄ lâi chioh, iah-sı̄ ēng chı̍t-ê khah-hó ê jı̄ lâi oāⁿ hit-ê pháiⁿ- miâ, thang chiūⁿ cho̍k-phó͘ bōng-pâi khah bûn-ngá; khiok bô-m̄ thang.

Chóng-kiat choân-phiⁿ ê tāi-ı̀

Sè-sio̍k put-lūn pı̂n-hù kùi-chiān, koaⁿ-ke peh-sèⁿ, hoān ū song-sū put-lı̄ tio̍h ēng Hoê-siūⁿ, Tō-sū, Tē-lí-su; in-ūi sim-ba̍k bô chin-lí ê kng, nā-bô chhiáⁿ chit kúi-téng ê lâng lâi siat-hoat êng- ûi, chiū kiaⁿ-tang kiaⁿ-sai, m̄-káⁿ chhun- kha chhut chhiú; nā-bô ang-ı̂ chiū hoân-ló m̄-chai bông-hûn ê siau-sit. Nā-bô sio kim-gı̂n choá-liāu, chiū kiaⁿ sí- lâng sàn-hiong; bô seng-lé chè-sū, chiū kiaⁿ bông-hûn iau-gō iā m̄-koè sim. Ū lâng sui-jiân chia hiah-ê sı̄ bô lı̄-ek koè- sı̀ ê lâng, nā-sı̄ hō͘ hong-sio̍k ûi-teh, nā m̄ án-ni iū kiaⁿ lâng thí-chhiò.

Só͘ hiâm pài Siōng-tè ê lâng put-hàu, khoán-thāi koè-sı̀ ê lâng bô-lé bô-māu, chhin-chhiūⁿ tâi-ti tâi-káu, só͘-hiâm ta̍k-hāng chiū-sı̄ in-ūi lán bô ēng téng- bı̄n chit kúi-téng siâ-kàu ê lâng, m̄ sio bô-iáⁿ ê choá-liāu, m̄ ēng liû-thoân ê chè-sū, bô tiōng píⁿ-pang ê sı̂n-chú. Sè-sio̍k hun-hun loān-loān, sio-thàn sio-hán, hoān-sı̄ bô jı̄n-chin kiù-khàm chin-ké, sı̄-hui. Só͘-í hong-sio̍k jú-kú jú pāi-hoāi. Kai-chài! Siōng-tè khui tit-kiù ê oa̍h-lō͘, chhe lâng thoân kng- bêng ê chin-lí, hō͘ lán ē tit khı̀-siâ kui-chèng, lı̄-àm chiū-kng. Hoān chò Iâ-so͘ ê ha̍k-seng tio̍h chı̄n-la̍t saⁿ-kap bán- hoê tó-hoāi ê hong-sio̍k, m̄-thang toè sè-sio̍k phû tı̂m iû-ı̂ bo̍k koat. Goān Siōng-tè toā-toā si-in, hō͘ ta̍k-ūi o͘-àm pı̀ⁿ-chò kng-bêng, ta̍k-hāng thàn chin-lí, só͘-chò kek-tû ı̄ⁿ-toan. Sim só͘-goān.

(Tâi-oân Hú-siâⁿ Kàu-hoē-pò tē 57~62 tiuⁿ,1890 nı̂ 2~7ge̍h)