Lūn kiù Siàu-liân lâng
Hiah-kú ū kúi-nā lâng tı̀-ı̀ siūⁿ cháiⁿ iūⁿ thang kiù siàu-liân lâng bián-tit phiâu, tó͘, a-phiàn, hı̀, kap lóng-chóng su-io̍k. Kū nı̂ kı̂-tó-hoē hit lé-pài iā ū siūⁿ. Kin nı̂ khah siông-sè siūⁿ. Kin nı̂ phah-sǹg thang o̍h Se-kok hoat, lâi kiàn-tı̀ Kiù siàu-liân ê Hoē. Kai-chài, ū Lô Bo̍k-su tùi Tāi-Eng kok lâi, pâi-lia̍t Se-kok ê siau-sit. Ē-mn̂g Tiong-goā ê Bo̍k-su kúi-nā lâng chū-chı̍p, tāi-seng siūⁿ chiah-ê tāi-chı̀, lio̍h-á phah phe-bô͘ thang hō͘ lâng siūⁿ. Āu-lâi, kàu chiaⁿ ge̍h 23 jı̍t, chiū chū-chı̍p tı̄ Kó͘-lōng-sū, tı̄ San Ngá-kok ê chhù, lâi kau-poê, gı̄-lūn tāi-chı̀.
Chū-chı̍p ê lâng, ū pún-toē siàu-liân lâng choē-choē. Lāu lâng iā ū. Koh ū goā-kok lâng, chiū-sı̄ bo̍k-su, kap i ê chhin lâng, pêng-iú. Pún-toē lâng ū 80. Goā-kok lâng 18. Tāi-ke tāi-seng chia̍h tê. Āu-lâi tâng sim chū-chı̍p ū kı̂-tó, iā ū gı̂m-si, iā toâⁿ-khı̂m, chok ga̍k. Tāi-ke lóng hoaⁿ-hí. Āu-lâi, ū lâng piān-lūn siat Kiù siàu-liân lâng ê Hoē. Khí-thâu, ı̀-sù bē lóng bêng, thèng-hāu tāi-ke saⁿ-kap kóng siông-sè, chiah ū siū kám-tōng. Ū 39 ê siàu-liân lâng chiah khí--lâi, kóng i ài jı̍p chit hō ê hoē. In ê miâ chiū liâm-piⁿ kı̀ tı̄ phō͘--nı̍h. Koh 35 hè í-chiūⁿ, iā ū 10 lâng iā jı̍p. Chit hō lâng chiū-sı̄ ū miâ bô koân, put-kò tàu pang-chān, in-ūi tē-it iàu-kín, chiū-sı̄ siàu-liân lâng tio̍h ka-kı̄ tam-tng i ê tāi-chı̀. Chú-lí chiū-sı̄ Lô Bo̍k-su; Kı̀-sū nn̄g-ê, Táng-sū la̍k ê. Chiah-ê tng-chit lóng sı̄ ta̍k kàu-hoē ū miâ-siaⁿ ê lâng. Lūn chū-chı̍p ê sı̂, khí-thâu m̄-káⁿ siat siuⁿ choē pái, só͘-í chí-ū chhiat-iàu kóng nn̄g pái, chiū-sı̄ lé-pài-jı̍t chı̍t pái, lâi káng-kiù lêng-hûn ê tāi-chı̀; êng jı̍t chı̍t pái, lâi káng-kiù lóng-chóng iú-ek ê tāi; put-kò m̄-thang kha̍p--tio̍h kàu-hoē ê lé-pài, in-ūi ı̀-sù m̄-sı̄ beh hāi kàu-hoē, sı̄ beh ke-thiⁿ lı̄-ek; chiū-sı̄ siàu-liân lâng tio̍h tián i ê châi-tiāu saⁿ chiàu-kò͘ tek-hēng; koh hia̍p-le̍k kiù goā-bı̄n lâng.
To̍k-to̍k ta̍k jı̍t e-hng-sı̂ lâng nā ū êng thang kàu tı̄ chū-chı̍p ê só͘-chāi khoàⁿ chheh, á-sı̄ sin-bûn-choá. Chū-chı̍p ê só͘-chāi phah-sǹg tı̄ Thài-san ê lâu-téng, bián-tit kiáu-jiáu. Ū lâng ín $50 thang boé ke-si. Lūn āu-lâi ê só͘-hùi siàu-liân kóng, bô oh.
Lūn sím-mı̍h lâng thang jı̍p hoē, bô beh kóng i chêng ê tāi, to̍k-to̍k iàu-kín chit-tia̍p tio̍h lı̍p-chı̀ choè chèng-keng ê lâng. Lâng boē thang phah-sǹg oē sûi-piān thiàu-jı̍p, thiàu-chhut. Tek-khak tio̍h chai koan-hē. Kàu-sı̂ beh siat-hoat chit-ê tāi-chı̀ kàu chim-chiok, chiū-sı̄ lâng beh jı̍p, tio̍h hoē-lāi ê lâng pó-kú.
(Tâi-oân Hú-siâⁿ Kàu-hoē-pò tē 33 tiuⁿ, 1888 nı̂ 4 ge̍h)