Lūn kiū chia̍h A-phiàn ê lâng

Chit phiⁿ sı̄ tùi sin-bûn hoan-e̍k--ê

Lāi-séng Kong-hoē ê Kam-tok, ū kàu Soaⁿ- sai séng, kóng tú-tio̍h pún-toē ê hiaⁿ-tı̄ ka-kı̄ liáu chı̂ⁿ, siat koé a-phiàn ke̍k. I kàu bó͘ siâⁿ, khoàⁿ -kı̀ⁿ ū poeh- káu-cha̍p lâng pài Siōng-tè , lóng sı̄ tùi chit-ê koé a-phiàn ke̍k tit-tio̍h kiù .

Ū chı̍t-ê pún-toē Bo̍k-su ka-kı̄ chhut chı̂ⁿ, chóng-tng koé a-phiàn ke̍k ê chek-sêng. Chit-ê Bo̍k-su ê sim chin hó, í-keng siat chı̍t-ê ke̍k tı̄ bó͘ só͘-chāi , koh ài kè-bô͘ siat chı̍t só͘-chāi; ta̍k chá-khí lé -pài ê sı̂, chı̍t jı̍t kè chı̍t jı̍t , siông-siông chiong chit- ê tāi-chı̀ kı̂-tó. Kàu-bé i-ê hū-jı̂n-lâng kā i kóng, Lí siáⁿ-sū siông-siông in-ūi chit só͘-chāi kı̂-tó, siáⁿ-sū m̄-khı̀ siat , chhin-chhiūⁿ pa̍t só͘-chāi chı̍t-iūⁿ ? Ìn kóng, Goá ê chı̂ⁿ lóng liáu, bô pa̍t-hāng chı̂ⁿ thang choè chit-ê lō͘-ēng, tio̍h thèng-hāu Siōng-tè siúⁿ-sù. Hū-jı̂n-lâng kóng, Hō͘ⁿ ! tio̍h ēng joā-choē chiah oē siat? Kóng, Hāiⁿ ! nā beh siat tio̍h ū jı̄-saⁿ-cha̍p chheng chı̂ⁿ chiah oē. Hū-jı̂n-lâng thiaⁿ-kı̀ⁿ chiū khı̀, bô koh kóng sím-mı̍h. Tē jı̄ chá-khí, chit-ê Bo̍k-su iû-goân in-ūi chit-ê tāi-chı̀ kı̂-tó bêng-pe̍k, i-ê hū-jı̂n-lâng chiū-kūn i , koāⁿ chı̍t- ê chhiú-kun toé mı̍h , kā i kóng, Chit lāi-bı̄n ū goá ê chhiú-khoân, hı̄-kau, chiam-á,chhiú-sek, khı̀ boē, só͘ tit-tio̍h ê gûn pí lí só͘ khiàm--ê iáu khah choē ; án-ni thang khui chit- ê koé a-phiàn ke̍k , goá bián ēng chiah-ê mı̍h .

Hit-ê Bo̍k-su kā Kam-tok kóng, Goá bô oē thang kā lí kóng chit ê tāi-chı̀ , m̄ chai thang khui chit keng koé a-phiàn ke̍k choè tē-it hoaⁿ-hí, á -sı̄ tit-tio̍h hū-jı̂n-lâng oē khek-kí thāi-jı̂n choè koh khah hoaⁿ-hí .

Kam-tok kóng, Goá lé -pài-jı̍t khı̀ i-ê chhù , put-chí ū pêng-an, chū-jiân ū kap i kóng-oē . Goá chiū kā i kóng, Lí pàng-sak chiah ê chhiú-sek, kiám bô khó͘ mah? In-ūi goá chai Tiong-kok ê hū-jı̂n-lâng, chhin-chhiūⁿ Tang-sı̀ chiah-ê kok ê hū-jı̂n-lâng, iā lóng sı̄ tiōng chit -hō mı̍h, lia̍h chng-thāⁿ choè iàu-kín. Taⁿ chit-ê sian-siⁿ-niû chı̄n pêng-an, chiū khoàⁿ i-ê bı̄n, sui-jiân bē kóng-oē, goá í-keng chai i beh kóng sím-mı̍h oē.

I ı̀n kóng, Bô goá chin hoaⁿ-hí; goá í-keng tit-tio̍h Chú Iâ-so͘ choè hó-gia̍h, goá kiám bô hō͘ lâng ti-chiok.

Kam-tok kóng, Hāiⁿ ! Pêng-iú ah, goá oh-tit thang kā lín kóng, goá hoaⁿ-hí kàu lâu ba̍k-sái. Í-keng 20 nı̂ kú, ū thoè Soaⁿ-sai kap keh-piah séng kı̂-tó, nā-sı̄ sui-bóng bē bat kàu hia, taⁿ thâu-chı̍t-pái kàu chit tè, goá tú-tio̍h lâng ūi-tio̍h Chú ê miâ siū toā kan-khó͘, ū-ê sit-lo̍h i-ê miâ, ū-ê hō͘ koaⁿ-hú hián-bêng lêng-jio̍k i , ū-ê sit-lo̍h ke-gia̍p , ū chı̍t lâng hō͘ i-ê bó͘ lı̄-khui i, in-ūi m̄-ài kap pài Siōng-tè ê lâng saⁿ-kap khiā-khí. Goá kàu pa̍t-séng tú-tio̍h pa̍t lâng siū tāng chhı̀ -liān, ū chı̍t lâng hō͘ lâng koah i-ê hı̄-á , chha-put-to hiám sí , siū chân-jím ê phah, koh ū lēng-goā ê lêng-jio̍k , chit-hō lâng iáu-kú hoaⁿ-hí sio̍k Chú. In ū an-sim chı̀n-pō͘ tō-tek , pò-iông Ki-tok ê hok-im . Hāiⁿ ! Goá ê sim kám-un, chin ài pêng-iú lín oē tit -thang thiaⁿ--kı̀ⁿ goá só͘ thiaⁿ-kı̀ⁿ, cha̍p hūn chı̍t hūn ê kan-chèng. Koh khoàⁿ-kı̀ⁿ hiah-ê lâng ê bı̄n kng-kng hoaⁿ -hí , nā oē khoàⁿ-kı̀ⁿ in, tek-khak ke-thiⁿ lín ê hó-táⁿ, heng-khí toā ǹg-bāng , Tiong-kok bô kú oē tit-tio̍h toā un.

(Tâi-lâm Hú-siâⁿ Kàu-hoē-pò, Tē 31 tiuⁿ, 1888 nı̂ 1 ge̍h)