Lūn lı̄-ek chhiⁿ-mı̂ lâng

【Kū-nı̂ Kam Bo̍k-su ū chhut “Lı̄-ek chhiⁿ-mı̂-lâng ê kò-pe̍h”. Taⁿ ū chhú nn̄g phiⁿ thâu-miâ . Hiān-chāi chı̍t phiⁿ ı̀n tı̄ Sèng-hoē-pò ; koh chı̍t phiⁿ ı̀n tı̄ chit ē-té .】

Lūn kàu-goā ê chhiⁿ-mı̂ lâng . Chiàu goá só͘ chhâ-mn̄g goán Ē-mn̂g ê chhiⁿ-mı̂ lâng kiōng ū 300 goā lâng; tùi cháiⁿ-iūⁿ oē chai ? Sı̄ ū chhâ-mn̄g hiah ê khoàⁿ-miā ê chhiⁿ-mı̂ lâng, chiàu in kóng sı̄ ū pah sı̀ gō͘ ê teh khoàⁿ-miā ; koh ū mn̄g hiah ê teh choè khit-chia̍h--ê, kóng ū gō͘ la̍k cha̍p lâng , kı̂-tiong ū chı̍t-poàⁿ sı̄ hū-jı̂n-lâng. Koh ū jı̂n-ke ê chhiⁿ-mı̂ lâng , bô teh khoàⁿ-miā , ia̍h bô choè khit-chia̍h--ê , tāi-iok káⁿ ia̍h ū chiâⁿ pah goā lâng, chiū án-ni thang chai káⁿ ū 300 goā ê chhiⁿ-mı̂ lâng .

Lūn só͘ choè ê thâu-lō͘ . Chiàu goá khoàⁿ sı̄ chhin-chhiūⁿ ū hun choè saⁿ sı̀ téng-hō ê lō͘ ; thâu chı̍t-téng sı̄ khoàⁿ-miā--ê, tē-jı̄ téng sı̄ choè cháu-chhiùⁿ kap khit-chia̍h; tē-saⁿ téng sı̄ choè kang kap choè seng-lí--ê ; tē-sı̀ téng sı̄ chē-teh chia̍h sí bí--ê; án-ni tāi-iok ū chit sı̀ téng-hō ê chhiⁿ-mı̂ lâng .

Taⁿ chit sı̀ téng-hō ê kan-kí thâu-lō͘ , khiok m̄-sı̄ ū lâng kā in hun-hat ê , sı̄ chiàu hiah ê chhiⁿ-mı̂ lâng só͘ oē choè ê lâi kiâⁿ . Chhin-chhiūⁿ thâu chı̍t-téng sı̄ khoàⁿ-miā; lūn chit-ê khoàⁿ-miā-e-5 khiok tio̍h ū tām-po̍h ê kháu-châi , koh ia̍h tio̍h ū kı̀-sı̀ⁿ, chiah oē o̍h-tit; in-ūi chit-ê kan-kí sǹg-sı̄ in chhiⁿ-mı̂ lâng tē-it hó thàn ê thâu-lō͘. Lâng nā oē o̍h khoàⁿ-miā tit, chiū chı̍t-jı̍t oē thàn tit kúi-nā pah chı̂ⁿ, ū sı̂ chiâⁿ kho͘ gûn ia̍h káⁿ thàn , chı̀ chió ia̍h ū pah-goā chı̂ⁿ .

Tē-jı̄ téng sı̄ cháu-chhiùⁿ kap choè khit-chia̍h. Chit-hō cháu-chhiùⁿ ê kan-kí khiok ia̍h sı̄ ū thàn-chı̂ⁿ ê thâu-lō͘ ; put-lūn sı̄ ta-po͘ á-sı̄ cha-bó͘, to͘ lóng oē o̍h-tit . Chhin-chhiūⁿ goán Ē-mn̂g ê pháiⁿ hong-sio̍k , kı̀ⁿ-nā ū chhiⁿ-mı̂ ê cha-bó͘ gín-ná , ū-ê hō͘ khit-chia̍h boé khı̀ kà chhiùⁿ khek ; kà nā oē chhiùⁿ khek koh hó siaⁿ, chiū chı̍t ê-hng oē thàn-tit sı̀-gō͘ pah chı̂ⁿ; sı̄ pí hiah ê chhiⁿ-mı̂ ta-po͘ lâng khah sı̂-kiâⁿ, in-ūi sı̄ pháiⁿ hong-sio̍k ê iân-kò͘. Lâng khah tùi-tiōng hiah ê siâ-ı̂m hı̀-hiok ê tāi-chı̀ , cha-bó͘ gín-ná lâi chhiùⁿ hit-hō ê siaⁿ , khah ha̍p lâng ê su-io̍k , só͘-í in oē put-chí thàn chı̂ⁿ .

Siat-sú nā boē o̍h-tit chit-ê chhiùⁿ khek ê thâu-lō͘ , chiū o̍h kiò-koe kiò-lō͘ ; á-sı̄ sı̀-koè kā lâng kiû-khit . Nā oē kut-la̍t kiò , kut-la̍t thó , chiū chı̍t-jı̍t ia̍h oē thó-tit pah-goā chı̂ⁿ , chı̀-chió ia̍h ū kúi-cha̍p chı̂ⁿ .

Tē-saⁿ téng sı̄ choè seng-lí kap choè kang--ê . Goá khoàⁿ tı̄ goán Ē-mn̂g ê koe-lō͘ ū chı̍t-ê chhiⁿ-mı̂ lâng, i ta̍k jı̍t teh boē mı̍h; só͘ boē ê chiū-sı̄ lo̍k-kha-seng , ( ū lâng kiò choè thô͘-tāu ), ū sı̂ sı̄ boē bé-khí-tāu , ū-sı̂ boē sio hu-lin-tāu, ū-sı̂ boē ah-nn̄g kap chhài-pó͘; chı̍t-jı̍t ū-sı̂ oē thàn-tit chı̍t-pah goā chı̂ⁿ ; chóng--sı̄ tio̍h ū chı̍t-ê gín-á khan i . Nā-sı̄ choè kang--ê khah bô hiah ū thàn chı̂ⁿ, goá bat thiaⁿ-kı̀ⁿ chhiⁿ-mı̂ lâng teh so chı̂ⁿ-kǹg , kap so chúi-hun choá-lián , chı̍t-jı̍t oē thàn-tit sı̀-gō͘ cha̍p chı̂ⁿ nā-tiāⁿ ; khah boē choè ê thàn chiah ū jı̄-saⁿ cha̍p chı̂ⁿ nā-tiāⁿ .

Tē-sı̀ téng sı̄ tiāⁿ-tiāⁿ chē-teh chia̍h sí bí ê . Chóng--sı̄ chit hō ê chhiⁿ-mı̂ lâng , khah siông sı̄ ke-sū iáu hó , ū-ê sı̄ pē-kong ū ke-hé tı̀-ı̀m i ; só͘-í chiah bián chhut lâi kiâⁿ chiah ê lō͘-kèng. Ū-ê sı̄ ài chiàu-kò͘ miâ-siaⁿ , kam-goān hō͘ i kan-khó͘ ; ū-ê ia̍h sı̄ in-ūi beh o̍h khoàⁿ-miā boē-lâi , choè khit-chia̍h kiàn-siàu , choè seng-lí m̄-chai-iáⁿ , choè kang bô la̍t, só͘-í ko͘-put-chiong tio̍h chē-teh chia̍h sí bí .

Lūn chêng-hêng . Lán khoàⁿ chhiⁿ-mı̂ lâng ê chêng-hêng sı̍t-chāi chhiⁿ-chhám, chhin-chhiūⁿ kiâⁿ-choè á-sı̄ lâi-óng to͘ boē pí-tit ba̍k-kng ê khoài-piān; koh chı̍t-sı̀-lâng kiám khoàⁿ joā-choē kong-kéng, chiū i-ê kan-khó͘ ê chêng-hêng thang chai .

Lán khoàⁿ Siōng-tè chhòng-chō lâng sı̄ chiâu-chn̂g , khah hán-tit tùi chhut-sı̀ chiū chhiⁿ-mı̂ ; siat-sú ū ia̍h sı̄ chió-chió . Taⁿ chhiⁿ-mı̂ lâng cháiⁿ-iūⁿ oē chiah-choē? Sı̄ oē kóng-tit saⁿ-hāng ê iân-kò͘. 1.Chiū-sı̄ tùi ka-kı̄ chio--lâi-ê . 2. Sı̄ tùi pē-bú só͘ liân-lūi--ê . 3.Sı̄ lâng í-keng kàu nı̂-hè lāu , khah-siông oē tı̀ ba̍k-chiu hoe, bô khoàⁿ-kı̀ⁿ .

Thâu chı̍t hāng, lâng ê chhiⁿ-mı̂ cháiⁿ-iūⁿ kóng sı̄ ka-kı̄ chio--lâi-ê ? Lán khoàⁿ chiah ê ka-kı̄ chio--lâi-ê chhiⁿ-mı̂ lâng , khah-choē sı̄ jı̄-cha̍p-goā hè kàu saⁿ-cha̍p-goā--ê, in-ūi tı̄ chiah ê nı̂-hè ê tiong-kan, lâng khah-siông choè pháiⁿ-kiáⁿ, tùi-tiōng lú-sek kè-thâu, ka-kı̄ chiau-that sin-miā, siông-siông tı̀ to̍k-chhng ê chèng-thâu , tı̀-kàu ba̍k-chiu chhiⁿ-mı̂ ê sı̄ chin-choē . Koh sı̄ ū-ê tùi choè-chha̍t hāi-lâng, hō͘ lâng khí-put-goān, chiū lia̍h lâi phah-ba̍k, hō͘ i chhiⁿ-mı̂ ; che hō͘ lán thang chai bêng-bêng ka-kı̄ chio lâi ê chhiⁿ-mı̂ .

Tē-jı̄, cháiⁿ-iūⁿ sı̄ tùi pē-bú liân-lūi--ê ? Lán khoàⁿ ū-ê chhut-sı̀ bô joā-kú chiū chhiⁿ-mı̂, ū-ê sı̀-gō͘ hè chiū chhiⁿ-mı̂ , ū-ê cha̍p-sò͘ hè chhiⁿ-mı̂, ū-ê kàu cha̍p-goā hè chiah chhiⁿ-mı̂; chiū án-ni hō͘ lán thang chai , chiah ê gín-ná m̄-sı̄ chhin-chhiūⁿ hiah ê tiong-liân--ê pháiⁿ, lâi tı̀ chhiⁿ-mı̂, bêng-bêng sı̄ tùi in pē-bú só͘ jiám lâi ê to̍k. Lūn chit téng-hō ê chhiⁿ-mı̂ lâng, lán sı̍t-chāi tio̍h put-chí khó-lı̂n; in-ūi i chhut-sı̀ bô joā-kú thang khoàⁿ-kı̀ⁿ Siōng-tè só͘ chhòng-chō ê êng-kng, koh siông-siông sı̄ hō͘ lâng khoàⁿ-khin m̄-tı̍h, bô-i bô-oá, ū-ê sak-lo̍h khit-chia̍h iâⁿ, chhiⁿ-chhiⁿ chhám-chhám sı̄ kóng só͘ boē-chı̄n--ê .

Tē-saⁿ, lâng í-keng kàu lāu, khah-siông oē tı̀ chhiⁿ-mı̂ , ba̍k-chiu hoe. Chóng--sı̄ chit-hō ê chhiⁿ-mı̂ khah bián tio̍h kiaⁿ, in-ūi lâng í-keng kàu lāu, khah-siông ū i-ê kiáⁿ-jı̂ thang chiàu-kò͘, só͘-í tı̄ chit-sı̂ khah bián hoân-ló; siat-sú lóng bô lâng thang chiàu-kò͘--ê sı̄ khah chió . Án-ni hō͘ lán thang chai só͘ tio̍h thoè in siat-hoat--ê , sı̄ tah-lo̍h chı̍t téng-hō ê chhiⁿ-mı̂ lâng , lán tio̍h chı̄n sim lâi thoè in siūⁿ siat-hoat , hō͘ in oē siú tō-lí , koh bô kan-khó͘ .

Taⁿ ài beh lı̄-ek chiah ê chhiⁿ-mı̂ ê sū , sı̍t-chāi sı̄ put-chí hó ê kú-gı̄, ū thé-thiap Kiù-chú ê sim ài kiù chiah ê lâng só͘ khoàⁿ bô-ê , lâi êng-kng Siōng-tè hó ê chí-ı̀; goá chiah bô kiaⁿ kiàn-siàu, lâi siá kúi-nā hō ê hoat-tō͘, chiū pâi-lia̍t tı̄ ē-toé.

Thâu chı̍t hāng, tio̍h hō͘ in oē siú tō-lí , lâi êng-kng Siōng-tè . Tē-jı̄ hāng , tio̍h thoè in siat-hoat kiù-oân ê thâu-lō͘ . Taⁿ beh hō͘ in oē siú tō-lí lâi êng-kng Siōng-tè ê hoat-tō͘, tek-khak tio̍h chhin-chhiūⁿ Tâi-oân-hú-siâⁿ kap Choân-chiu só͘ siat ê hoat-tō͘, hō͘ in tāi-seng ēng bong ê hoat lâi tha̍k-chheh kàu lóng oē tha̍k Sèng-chheh , chhim-bat tō-lí , ia̍h chai ka-kı̄ ê pún-hūn ; sui-sı̄ ū Bo̍k-su Ko͘-niû ê poê-ióng , iáu-kú ka-kı̄ ia̍h tio̍h kiâⁿ in ê pún-hūn, lâi choè só͘ oē choè ê kang , bián liân-lūi kong-hoē ê só͘-hùi .

Tē-jı̄ tio̍h thoè in siat-hoat kiù-oân ê kan-kí thâu-lō͘ . Taⁿ ū sím-mı̍h ê lō͘ thang hō͘ in lâi choè ? Chiàu goá siūⁿ ū kúi-nā hō . 1 . Chiū-sı̄ choè thoân tō-lí ê lâng. 2 .Chiū-sı̄ choè chho͘-tāng ê kang . 3. Chiū-sı̄ choè khin-khó ê kang . Chóng--sı̄ chit saⁿ téng-hō--ê ia̍h tio̍h soè-jı̄ lâi chhâ-khó ; sı̄ tāi-seng tio̍h kéng sím-mı̍h hō ê lâng kham-tit hō͘ i choè thoân tō-lí ê lâng, sím-mı̍h téng-hō lâng oē-kham-tit choè chho͘-kang, sím-mı̍h téng-hō sı̄ tio̍h hō͘ i choè khin-khó--ê ; nā oē án-ni soè-jı̄ séng-chhat siūⁿ , chiū ta̍k lâng chiah oē chı̄n in ê pún-hūn .

Taⁿ thâu chı̍t hāng, chhiⁿ-mı̂ lâng nā oē choè thoân tō-lí ê lō͘-ēng, sı̍t-chāi oē put-chí lı̄-ek lâng. Cháiⁿ-iūⁿ thang chai ? In-ūi chá goán Ē-mn̂g ū chı̍t-ê hiaⁿ-tı̄ chhiⁿ-mı̂, i pún sı̄ teh choè kang-hu ê lâng ; āu-lâi tı̀ ba̍k-chiu chhiⁿ-mı̂ , kàu-hoē ū pang-chān i chia̍h , i chiū ta̍k jı̍t kàu I-koán khı̀ kóng tō-lí hō͘ hiah ê phoà-pı̄ⁿ lâng thiaⁿ , lóng bô kiaⁿ pı̄ⁿ-lâng ê chhàu-bı̄ , sı̄ tı̍t-tı̍t ài ēng thiàⁿ i ê sim khoán-thāi i, siông-siông thoè phoà-pı̄ⁿ lâng kı̂-tó, ín-chhoā in lâi lé-pài-tn̂g thiaⁿ Kiù-chú ê tō-lí , só͘ ín-chhoā ê ta̍k lâng lóng sı̄ sêng-sı̍t--ê khah choē . Chiàu goá khoàⁿ-i choè chhiⁿ-mı̂ ê thoân-tō sı̄ pí hiah ê ba̍k-kng--ê ín-chhoā lâng khah choē. Só͘-í goá chiah kóng chhiⁿ-mı̂ lâng thang hō͘ i tam-tng thoân-tō ê chit , chiū-sı̄ tùi chit-ê ê kám-kek . Chóng--sı̄ hit lâng i tı̄ Ē-mn̂g ê koe-lō͘ put-chí se̍k, kı̀ⁿ-nā Ē-mn̂g ê hiaⁿ-tı̄ chí-bē ê chhù, nā-sái kā i kóng tı̄ tah-lo̍h , chiū chai thang khı̀ thàm-bāi in, put-lūn sin kū ê hiaⁿ-tı̄ á-sı̄ sin thiaⁿ tō-lí ê pêng-iú, in ê só͘-chāi i ia̍h lóng oē kàu, ia̍h lóng m̄-sái tio̍h lâng khan i, hoán-tńg oē chhoā m̄-chai lō͘ ê pêng-iú . Chóng--sı̄ lūn chit ê hiaⁿ-tı̄ choè kàu-hoē ê kang, put-chí ū kong-hāu , in-ūi i ū ín-chhoā lâng lâi choè Kiù-chú ê ha̍k-seng ; che sı̄ chiàu goá só͘ khoàⁿ-kı̀ⁿ--ê lâi kóng nā-tiāⁿ .

Koh chá goá bat khoàⁿ-kı̀ⁿ chı̍t pún ê goā chheh, sı̄ hō-choè “Kó͘-bo̍k khoàn-koan .” Chit-pún ê tāi-ı̀ , sı̄ teh lūn chı̍t ê chhiⁿ-mı̂ Bo̍k-su put-chí gâu khǹg lâng toê-iân hiàn hō͘ Chú , sı̄ put-chí ū kong-hāu i só͘ choè ê kang . Só͘-í tùi chiah ê pı̂n-kù , sı̄ hō͘ lán thang chai chhiⁿ-mı̂ lâng nā oē choè thoân-tō ê kang sı̄ ū lō͘-ēng .

Tē-jı̄ hāng, lūn choè kang . Goá siūⁿ ū kúi-nā hō ê chho͘-kang thang hō͘ chhiⁿ-mı̂ lâng lâi choè . 1 . Chiū-sı̄ liâu-kù ê kang. 2 . Chiū-sı̄ cheng-bí . 3 . Phah soh-á. 4 . Chiū-sı̄ khah khin-khoah--ê , chhin-chhiūⁿ o̍h chhiah-be̍h , á-sı̄ chhiah bō-á . Chóng--sı̄ tı̄ chit sı̀ hō ê kang , tāi-seng tek-khak tio̍h ū kàu-lāi ê lâng lâi siat, chiah oē choè-tit ; in-ūi khah oē chı̄n-la̍t kà, ia̍h oē tām-po̍h ê thé-thiap ; kàu oē choè ta̍k-hō ê kang , chiū ta̍k-lâng oē thàn chı̂ⁿ choè i ka-kı̄ ê só͘-hùi .

1.Lūn liâu-kù ê kang sǹg sı̄ chho͘-tāng. Nā sı̄ chhiⁿ-mı̂ lâng kam-goān choè, ia̍h tio̍h ū ba̍k-kng--ê thang kap i khan, chı̍t lâng chı̍t-thâu ; khí-thâu kan-khó͘, m̄-kú nā kàu āu-lâi se̍k, chiū chı̍t-jı̍t oē thàn-tit pah-goā chı̂ⁿ . Chóng--sı̄ choè chit hō ê thâu-ke, pún-chı̂ⁿ ia̍h tio̍h ū tit sı̀-gō͘ pah gûn, chiū kham-tit iông-ún kúi ê chhiⁿ-mı̂ lâng choè kang ; nā beh iông-ún khah choē lâng ia̍h sı̄ oē choè-tit, Chóng--sı̄ pún-chı̂ⁿ ia̍h tio̍h khah choē , chiah ū kàu-gia̍h ê kang thang hō͘ in choè .

2 . Lūn cheng-bí. Lūn chit ê cheng-bí ê kang sǹg ia̍h sı̄ put-chí tı̍t ê kang-hu; chhiⁿ-mı̂ lâng nā kam-goān chhut i kha ê la̍t lâi cheng , chiū chı̍t-jı̍t ia̍h sı̄ oē thàn-tit pah-goā chı̂ⁿ , nā sı̄ chit hō kang chiàu goá siūⁿ sı̄ pí liâu-kù khah khoah, ia̍h sı̄ khah choē thang thàn chia̍h: lâng nā kam-goān chı̄n in ê la̍t, chiū choē-choē só͘-chāi oē thàn-chia̍h-tit . Chhin-chhiūⁿ hiān-kim goán Ē-mn̂g ū kúi-nā keng ê bí-tiàm, sı̄ kàu-hoē ê hiaⁿ-tı̄ só͘ khui-ê . Nā siat-sú ū hit-hō ê chhiⁿ-mı̂ lâng kam-goān cheng-bí , goá phah-sǹg chit keng bí-tiàm oē iông-ún-tit kúi-ê chhiⁿ-mı̂ lâng . Phı̀-jū chı̍t-tiuⁿ tùi , pêng-siông sı̄ nn̄g ê lâng teh cheng , gō͘-tiuⁿ chiū tio̍h cha̍p lâng ; taⁿ nā beh oāⁿ chhiⁿ-mı̂ lâng , chiū cha̍p-ê oē ēng-tit chhit-ê chhiⁿ-mı̂ lâng , in-ūi boē lóng ēng-tit , sı̄ ū-ê tio̍h ū khoàⁿ-kı̀ⁿ chiah oē choè-tit . Siat-sú nā bô , chiū tı̄ kàu-goā ê tiong-kan ia̍h oē choè-tit , in-ūi ū kut-la̍t cheng , bô sǹg-hēng hō͘ lâng khah ū phiⁿ , chiū ū lâng beh chhiàⁿ . Siat-sú kong-hoē nā oē siat chı̍t toā keng chhin-chhiūⁿ “ Toā-chhiúⁿ “ sı̄ oē lı̄-ek lâng chin choē . Lūn chit hō bí-tiàm ê pún-chı̂ⁿ , oē toā ia̍h oē soè ; chı̀ choē-ê kúi-nā chheng kho͘, chı̀ chió-ê chı̍t pah-goā gûn chiū kàu-gia̍h choè thâu-ke .

3. Chiū-sı̄ phah soh-á , lūn chit ê thâu-lō͘, khiok ia̍h oē thàn choè ka-kı̄ ê só͘-hùi , nā sı̄ khah bô khui-khoah , m̄-kú chhú i khah khin-khó , put-kò nā sái chē-teh ēng chhiú lâi chhia , ia̍h ba̍k-kng--ê lâi phah chiū oē choè-tit, nā oē chı̍t-jı̍t oē thàn-tit chhit-poeh-cha̍p chı̂ⁿ. Chóng--sı̄ thàn-chió, chiū pún ia̍h chió , téng-chió sı̀-gō͘ cha̍p gûn chiū oē choè-tit thâu-ke .

4 .Chiū-sı̄ o̍h chhiah-be̍h kap chhiah bō-á. Chit hō ê kang sǹg tē-it khin-khó , chiū nā toā lâng soè-kiáⁿ hū-jı̂n-lâng lóng oē choè-tit , Chóng--sı̄ ū khah tı̂ⁿ-kang, ia̍h khah bı̂-boa̍t , ia̍h khah oh-o̍h, put-kò sı̄ chhú i khah séng pún, ia̍h oē ka-kı̄ chū-chú-tit , tiàm ka-kı̄ ê chhù ia̍h oē choè-tit . Nā beh siat “ chhiúⁿ ” ia̍h oē choè-tit , chı̍t lâng khó-í koán-tit kúi-cha̍p lâng ê choè kang . Chóng--sı̄ kàu oē choè chit hō kang, chı̍t-jı̍t sı̄ oē thàn-tit sı̀-gō͘ cha̍p chı̂ⁿ nā-tiāⁿ . Nā beh ēng chit hō ê kang , tāi-seng tek-khak tio̍h ū kúi-lâng seng-kà seng-o̍h, chhı̀-khoàⁿ oē o̍h-tit boē ; āu-lâi chiū thang kú-hêng.

Koh chı̍t-hāng ê sı̍t-sū, sı̄ í-keng ū lâng le̍k-kè--ê; chá Chiong-chiu ū chı̍t-ê hiaⁿ-tı̄ chhiⁿ-mı̂, ta̍k-jı̍t i sı̄ teh boē tām-po̍h ê lêng-seng-mı̍h, chiū-sı̄ choá-nı̂, hong-lô͘-sı̀ⁿ, sàu-chhiú, ke-mo͘-chhéng, chiah ê ka-lāi pêng-siông ēng ê mı̍h, téng-téng. Chı̍t-jı̍t oē thàn-tit chhit, peh-cha̍p chı̂ⁿ, án-ni kàu-gia̍h choè chı̍t-lâng ê só͘-hùi, iā koh oē lı̄-ek pa̍t-lâng.

Iū-koh chı̍t hāng sı̄ hiān-kim ê tāi-chı̀ ; tı̄ Sin-koe-á ū chı̍t-ê hiaⁿ-tı̄ chhiⁿ-mı̂ , ū teh boâ ka-to, ta̍k-jı̍t oē thàn-tit pah-goā chı̂ⁿ , sı̄ in-ūi i put-chí gâu boâ . Lūn i-ê gâu boâ m̄-sı̄ tùi chhiⁿ-mı̂ liáu chiah o̍h boâ-ê, sı̄ i pún bē chhiⁿ-mı̂ ê sı̂ chiū teh boâ, só͘-í kàu chit-tia̍p ia̍h sı̄ choè chit hō ê kang; i ta̍k-jı̍t chhut-mn̂g lóng bián hō͘ lâng khan, ia̍h koh oē taⁿ-tàⁿ ; sı̄ choè put-chí jia̍t-sim ê hiaⁿ-tı̄ , siông-siông tı̄ boâ ka-to ê sı̂ , teh pò-iông tō-lí .

Án-ni goá chiong só͘ khoàⁿ-kı̀ⁿ--ê lâi kı̀ ; kı̂-tiong lóng sı̄ ín-kó͘ pí-kim ê sı̍t-sū ; ǹg-bāng lia̍t-ūi sian-siⁿ chhâi-chiàⁿ .

(Tâi-oân Hú-siâⁿ Kàu-hoē-pò tē 124-126 koàn, 1895 nı̂ 7-9 ge̍h)