Mô͘-kúi pek lâng chiūⁿ Thian-tông
40 goā nı̂ chêng, tı̄ Tâi-lâm ē, ū chı̍t siā kiò-chò Hái-po͘. Chit chng chē-chē lâng lâi pài Siōng-tè, kóng sı̄ ūi-tio̍h ū kâu-kúi tı̄ hia chin heng, lâng hō͘ i lêng-tı̄ liáu bô pān-hoat, tòng-bē-tiâu, chiū lâi jı̍p Ki-tok-kàu.
Ū chı̍t pái, chı̍t ê chí-moē ê cha-bó͘-kiáⁿ iā khı̀ hoān-tio̍h kâu-kúi, hoat-jia̍t chin siong-tiōng. Hit ê chí-moē chiū khı̀ chhiáⁿ Thoân-tō Tân Tiâu-bêng Sian-siⁿ beh lâi kı̂-tó koáⁿ-kúi. Boē kàu ê sı̂, hit ê cha-bó͘ gín-ná hō͘ kâu-kúi chiūⁿ-sin, toā mē Thoân-tō Sian-siⁿ. Tân Sian-siⁿ kàu-ūi, chiū mn̄g hō͘ kâu-kúi chiūⁿ-sin ê cha-bó͘ gín-ná kóng, “Lí ū kiaⁿ Siōng-tè bô ?” Hit ê hoān-tio̍h kâu-kúi ê cha-bó͘-gín-ná ı̀n kóng, “Kiaⁿ!” Thoân-tō Sian-siⁿ kóng, “Nā kiaⁿ, chit ke sı̄ pài Siōng-tè ê lâng, lí án-choáⁿ káⁿ lâi chok-lōng--i ?” Hō͘ kâu-kúi hū-sin ê cha-bó͘ gín-ná kóng, “I pài Siōng-tè, to ná ū, ná bô--teh, goá chiū lâi ko̍h!”
Thoân-tō sian-siⁿ chiū thè hit ke kı̂-tó, kı̂-tó liáu, hit ê cha-bó͘ gín-ná chiū cheng-sı̂n, m̄-chai i tāi-seng teh mē thoân-tō sian-siⁿ, kap só͘ ı̀n-tap ê oē.
M̄-bat Sèng-keng, kı̀ⁿ Chú kiàn-siàu.
Tı̄ 45 nı̂ chêng, Tân Tiâu-bêng Sian-siⁿ kap goá khı̀ Hêng-chhun thoân-tō ê sı̂, tı̄ Pe̍h-soa ū Chúi-choâⁿ Khu-tiúⁿ,Tân Kim-lêng hiaⁿ, in chı̍t ke lâi pài Siōng-tè (Āu-lâi Ko-hiông Pak-iá-teng kap Chiân-kim ê Tiúⁿ-ló Tân Chúi-seng sı̄ i ê sió-tı̄). I ê lāu-bó ta̍k lé-pài kap kiáⁿ-sun kiâⁿ khı̀ Hêng-chhun lé-pài. Ū chı̍t pái phoà-pı̄ⁿ chin siong-tiōng, ka-tı̄ teh siūⁿ i káⁿ ē lı̄-khui sè-kan? teh khoà-lū i pài Siōng-tè chē-chē nı̂-kú, bô jia̍t-sim o̍h tha̍k Sèng-keng, nā lı̄-khui sè-kan, khı̀ kı̀ⁿ Chú sı̄ chin kiàn siàu! Só͘-í tı̄ pēⁿ-chhn̂g tiong, kı̀ⁿ-nā khoàⁿ-tio̍h i ê sun tùi ha̍k-hāu tńg-lâi, chiū kiò in oá lâi kà i jı̄-bó. Āu-lâi phoà-pēⁿ hó khí-lâi, soà ē-Hiáu tha̍k Sèng-keng.
Goá iáu ū iûⁿ
Tı̄ 40 goā nı̂ chêng, Táu-la̍k Chu-tan-oan, ū chı̍t ê bô-oē bô kù ê láu-sı̍t lâng; chāi-lâi kap siā-hoē sı̄ bô kau-poê, tùi ki-tok-tô͘ iā sı̄ bô siáⁿ óng-lâi, m̄-bat khı̀ lé-pài.
Teh-beh lı̂m-chiong ê sı̂, hoan-hù i ê bó͘, tio̍h chiàu kàu-hoē ê khoán kā i táⁿ-pān; iā tio̍h chhiáⁿ ki-tok-tô͘ lâi kā i chò chòng-sek.
Choè-āu kap i ê ka-cho̍k saⁿ-sı̂, chin hoaⁿ-hí kóng, “Chú kap nn̄g ê thiⁿ-sài chhēng pe̍h-saⁿ, tı̄ tiâⁿ-boé teh tán beh chhoā goá khı̀ lah!
(Tâi-oân Kàu-hoē Kong-pò tē 822 hō, 1957 nı̂ 6 goe̍h)
