Le̍k-sek teh ho͘-hoàn,
Ho͘-hoàn piàn-sek ê Tâi-oân,
Hêng goán chhiⁿ-chhùi ê san-hô,
Hêng goán bí-lē ê pó-tó,
Hō͘ goán tāi-tāi ê kiáⁿ-sun; hó-khùn,
Hó-chia̍h, hó thit-thô.
Le̍k-sek teh ho͘-hoàn,
Ho͘-hoàn phoà-pēⁿ ê tâi-oân,
Hêng goán sin-sian ê khong-khı̀,
Hêng goán chheng-khı̀ ê hái-piⁿ,
Hō͘ goán tāi-tāi ê kiáⁿ-sun; hó-khùn,
Hó-chia̍h, hó khiā-khí.
Mı̂ tńg jı̍t, jı̍t tńg mı̂,
Liû choán ê soè-goa̍t nı̂-nı̂ ngiâ chhun-thiⁿ,
Koah tn̄g tham-lâm ê tō͘-châi,
Kiâⁿ chhut chêng-io̍k ê sè-kài,
Le̍k-sek ê ho͘-hoàn,
Chio lí khı̀ bong thiⁿ-téng ê hûn-chhái.
(Tâi-oân Kàu-hoē Kong-pò tē 2117 kı̂, 1992 nı̂, 9 goe̍h)
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
