Tē 1 Chiuⁿ
Lâng pâi tê piáⁿ tı̄ koe-lō͘ piⁿ
Tāi Eng-kok, Lûn-tun kiaⁿ-siâⁿ sı̄ thiⁿ-ē tē-it toā, tn̂g saⁿ-phò͘ goā, khoah nn̄g-phò͘, chha-put-to Ē-mn̂g hái-sū ê toā, lâng teh khiā-khí iok-lio̍k ū sı̀-pah bān. Koe-lō͘ put-chí choē tiâu, ia̍h ū hé-hun-chhia ê lō͘, hé-hun-chhia kiâⁿ ke̍k kín, kiaⁿ-liáu oē gāi-tio̍h koe-lō͘ ê lâng, só͘-í ū-ê tùi thô͘-kha khui, ū-ê choh-khí pí koe-lō͘ khah koâiⁿ, beh kè koe-lō͘ ê só͘-chāi ēng kiô saⁿ-chiap. Kiô-ē, lâng khiā-khí boé-boē. Hit tè ê hong-sio̍k ū lâng tiàm tı̄ koe-lō͘ piⁿ, á-sı̄ tı̄ kiô-ē pâi mı̍h-chia̍h teh boē, iok-lio̍k chhin-chhiūⁿ Tiong-kok koe-lō͘ piⁿ ê khoán-sit.
Taⁿ ū chı̍t ê lâng kiò-choè Tàn-lí, tiàm tı̄ kiô-ē teh boē ko-phi-tê kap piáⁿ, só͘ ēng ê tê-poe chin chheng-khı̀, tê ia̍h hó, koh sio-sio, piáⁿ ia̍h phang, koh so͘-so͘, ēng pe̍h pò͘ choè jia-iûⁿ. Chit ê só͘-chāi chin chheng-khı̀ an-chēng, só͘-í choē-choē lâng tiàm chit-tè thêng-kha chia̍h-tê, chia̍h-piáⁿ choè tiám-sim.
Chí kúi nı̂ lâi, chit ê Tàn-lí ū thàn chı̂ⁿ, nā-sı̄ i só͘ choè ê seng-lí, m̄-sı̄ thàu-chá kàu àm, sı̄ ta̍k jı̍t tùi thiⁿ-kng ê sı̂, iok-lio̍k gō͘ tiám cheng, chiū lâi chit-tè pâi, kàu poeh tiám ê sı̂, i chiū siu tò-khı̀. Che sı̄ in-ūi hit-tè ê hong-sio̍k thiⁿ chhím-chhím kng ê sı̂, ta̍k ūi ê hiuⁿ-siā beh jı̍p siâⁿ-lāi boé-boē; kiâⁿ kàu chit-tè hioh-khùn, kā Tàn-lí boé tiám-sim; só͘-í ta̍k jı̍t kàu poeh tiám cheng, chiū thang siu tò-khı̀.
Chit ê Tàn-lí sı̄ poàⁿ-ló-lāu ê lâng, seng-khu put-chí toā-hàn, sán-lò, sán-lò, hán-tit chhiò, hán-tit kóng-oē. Tiàm hia kúi-nā nı̂, ia̍h bô lâng chai i ê miâ-sı̀ⁿ, i ê chhù-the̍h; chí-ū chai, i chiong só͘ boē ê mı̍h kap ke-si siu tı̄ keh-piah ê lāi-bı̄n. Beh tò-khı̀ ê sı̂, kiâⁿ kàu koe-lō͘ tiong, ba̍k-chiu sı̀-koè khoàⁿ, kiaⁿ-liáu se̍k-sāi ê lâng khoàⁿ-kı̀ⁿ.
Ū chı̍t jı̍t, hit-sı̂ ê tiong-kan chio lâng chia̍h tiám-sim, Tàn-lí hut-jiân kia̍h-thâu khoàⁿ-kı̀ⁿ ū chı̍t ê cha-bó͘ gín-á khiā tı̄ toh-piⁿ, ba̍k-chiu kim-kim, liâm-piⁿ khoàⁿ i seng-khu, liâm-piⁿ khoàⁿ i só͘ pâi ê tiám-sim, chhin-chhiūⁿ iau ê niáu-chhú ài chia̍h mı̍h ê khoán-sit. Bı̄n-sek chhiⁿ-sán, thâu-mn̂g sàm-sàm, chhēng chı̍t niá phoà té-saⁿ, bô khàm keng-thâu, kha bô chhēng oê. Tàn-lí àⁿ-lo̍h-khı̀ the̍h mı̍h, chiū khoàⁿ-kı̀ⁿ chit ê gín-á ê kha saⁿ-thia̍p kiaⁿ koâⁿ ê khoán-sit, tiāⁿ-tiāⁿ teh khiā, lóng bô kóng-oē; ba̍k-chiu tı̍t-tı̍t khoàⁿ hiah ê tiám-sim, chhùi teh cha̍p-cha̍p-háu, chhin-chhiūⁿ ài chia̍h.
Boé tiám-sim ê lâng í-keng soàⁿ liáu-liáu, to̍k-to̍k chhun chı̍t ê ta-po͘ gín-á teh chia̍h. Tàn-lí chiū àⁿ toh-chêng soè-siaⁿ kóng, “Lí soè cha-bó͘ gín-á kiám m̄ tò-khı̀, tiàm chia siuⁿ kú, lí chai mah?”
Chit ê cha-bó͘ gín-á kóng, “Goá tit-beh khı̀.” Teh ı̀n ê sı̂, nn̄g ê keng-thâu chiong ām-kún-niá chhēng khah koâiⁿ khí-lâi, koh kóng, “In-ūi hō͘ chin toā, goá ê lāu-bú chhut-mn̂g khı̀, kin-mı̂ bô tò-khı̀, só-sı̂ soà toà-khı̀; goá khiā chit ê só͘-chāi kéng-chhat ia̍h bô lâi koáⁿ goá, i phah-sǹg goá beh kā lí boé tiám-sim”. Chiah ê oē kóng liáu, chiū tı̀ⁿ chhı̀n-chhiò, in-ūi i ka-kı̄ chai, i ê khoán-sit m̄-sı̄ boé tiám-sim ê lâng. Tàn-lí koh àⁿ-lo̍h soè-siaⁿ kóng, “Goá phah-sǹg lí chá-khí lóng bô chia̍h.”
I ı̀n kóng, “Bô; chiū kàu jı̍t-tàu ia̍h bô thang chia̍h; pak-tó͘-lāi iau-iau kan-khó͘, lí káⁿ m̄-bat án-ni; chit sı̂ pak-tó͘ iáu-bē iau kàu phah-kat-kiû, khah-thêng chiū oē án-ni, chin siong-tiōng.” Kóng chiah ê oē chiū iô-thâu hoan-sin khı̀; kiâⁿ kúi pō͘ hut-jiân thiaⁿ-kı̀ⁿ ka-chiah-āu Tàn-lí teh kiò; i chiū tò-tńg--lâi.
Tàn-lí chiū kā i kóng, “Lí jı̍p chí toh-āu, goá ū chhun tām-po̍h piáⁿ kap tê, hō͘ lí chí-ki; í-āu m̄-thang koh-chài lâi. Goá m̄-bat ēng mı̍h hō͘ khit-chia̍h, siat-sú lí kin-á-jı̍t nā ū khui-chhùi thó-chia̍h, goá chiū kiò kéng-chhat lia̍h--lí. Lí ê kha tio̍h hang-hé, taⁿ ū khoàiⁿ-oa̍h mah?”
Chit ê cha-bó͘ gín-á chē tı̄ khang-láng-téng, teh hang-hé, sio ê ko-phi-tê khoà tı̄ kha-thúi-téng, teh chia̍h-piáⁿ, pō͘ toā-bú-chhùi hit-tia̍p boē tit thang ı̀n, to̍k-to̍k thı̀m-thâu, bı̄n hoaⁿ-hí.
Hit-sı̂ Tàn-lí teh siu tiám-sim kap ke-si; siông-siông khoàⁿ hit ê gín-á; sim-lāi thoè i khó-lı̂n iô-thâu. Chiū mn̄g hit ê cha-bó͘ gín-á, kóng, “Lí kiò sím-mı̍h miâ? Chóng-sı̄ m̄-sái kóng lí ê miâ-jı̄, lí kap goá bô kan-sia̍p.”
Cha-bó͘ gín-á ı̀n kóng, “Goá ê miâ sı̄ Lek-sı̄-ka; goá ê lāu-bú, chhù-piⁿ thâu-bé kiò goá choè Lek; siông-siông chhe goá sı̀-koè khı̀, koh ēng chhiú liàm--goá, phah, ēng kha that, hiān-chāi chhiú--nih ū o͘-chhiⁿ ê siong.”
Tàn-lí khoàⁿ-kı̀ⁿ Lek-sı̄-ka chhiú--nih ê siong ba̍t-ba̍t, iô-thâu, siūⁿ che káⁿ sı̄ in-ūi iau koâⁿ, á-sı̄ hō͘ lâng phah.
Lek-sı̄-ka khoàⁿ-kı̀ⁿ Tàn-lí thoè i siong-sim, chiū koh kóng, “Goá ài tit siông-siông tiàm chia, iáu-kú chai lí tit-beh tò-khı̀, í-āu goá m̄-káⁿ koh lâi; hō͘ lí kiò kéng-chhat lâi lia̍h goá.”
Tàn-lí kín-kín ı̀n kóng, “Chiàⁿ-sı̄.” Sı̀-koè khoàⁿ bô pa̍t ê gín-á, chiū soè-siaⁿ kā Lek-sı̄-ka kóng, “Lí nā thèng-hāu chı̍t lé-pài kú chiah koh lâi, ia̍h bô kā pa̍t lâng kóng, goá chiū koh chı̍t pái hō͘ lí chia̍h; lí oē ín án-ni á bô? Taⁿ lí tio̍h kín-kín khı̀.”
Lek-sı̄-ka chiū ı̀n kóng, “Goá beh khı̀, lí nā ū sím-mı̍h ke-si, goá pang-chān lí siu, hó--mah?” Tàn-lí kóng, “M̄-sái, m̄-sái; lí kín-kín cháu--khı̀, chiū-sı̄ koai ê cha-bó͘ gín-á. Lí tio̍h kı̀--tit, nā bô kàu chı̍t lé-pài, chhian-bān m̄-thang lâi.”
Lek-sı̄-ka chiū ı̀n, “Hó, hó;” hoan-sin chiū khı̀, kín cháu chhin-chhiūⁿ hoaⁿ-hí ê khoán-sit.
Tàn-lí chiah siu mı̍h tı̄ keh-piah lāi-bı̄n, tò-khı̀.
Tē 2 Chiuⁿ
Lek-sı̄-ka tú-tio̍h chhı̀-liān
Tùi hit-tia̍p Lek-sı̄-ka tò-khı̀, í-āu Tàn-lí ta̍k-jı̍t lâi pâi tiám-sim, ba̍k-chiu sı̀-koè khoàⁿ, chhin-chhiūⁿ kiaⁿ Lek-sı̄-ka koh-chài lâi ê khoán-sit; nā-sı̄ Lek-sı̄-ka tú-tú thàn Tàn-lí ê oē, kó-jiân kè chı̍t lé-pài chiah lâi. Hit-tia̍p khoàⁿ-kı̀ⁿ toh-téng lóng sı̄ tiám-sim, koh lâng-kheh choē-choē, chiū m̄-káⁿ kūn-oá, kiaⁿ-liáu oē hō͘ Tàn-lí m̄ hoaⁿ-hí, tı̍t-tı̍t thèng-hāu kàu thiaⁿ-kı̀ⁿ sı̂-cheng phah poeh ē, boē tiám-sim ê lâng chha-put-to lóng-chóng soàⁿ-khı̀, chiah káⁿ kiâⁿ-oá. Tàn-lí khoàⁿ-kı̀ⁿ Lek-sı̄-ka lâi liáu, chiū chiong chhiú ia̍t i jı̍p--lâi, chē tı̄ tiám-sim toh-āu ê láng-téng. Tàn-lí khoàⁿ i seng-khu ê i-chiûⁿ pí chêng koh-khah phoà, bı̄n-sek koh-khah siau-sán; sim-lāi it-hoat thoè i khó-lı̂n, chiū the̍h toā-tè piáⁿ, phâng tê hō͘ i chia̍h.
Lek-sı̄-ka beh chia̍h ê sı̂, in-ūi koâⁿ tio̍h ēng siang-chhiú phâng. Hut-jiân kia̍h-thâu khí-lâi mn̄g Tàn-lí kóng, “Lí sím-mı̍h miâ-sı̀ⁿ?”
Tàn-lí ı̀n kóng, “Lí mn̄g goá mih-tāi-chı̀?” Chhin-chhiūⁿ m̄ kóng ê khoán-sit. Tiap-á-kú chiū kā Lek-sı̄-ka kóng, “Goá miâ Tàn-lí.”
Lek-sı̄-ka koh mn̄g, “Lí ê chhù tı̄ ta̍h-lo̍h?” Tàn-lí ı̀n kóng, “Lí nā beh mn̄g chit ê tāi-chı̀, khı̀ khah hó; goá kap lí bô sím-mı̍h kan-sia̍p; goá ia̍h m̄-ài chai lí ê só͘-chāi.”
Lek-sı̄-ka chiū ēng khiam-sùn ê khoán, kóng, “Goá m̄-sı̄ beh hō͘ lí siū-khı̀, sı̄ khoàⁿ lí gâu choè lâng, só͘-í ài chai lí ê só͘-chāi.” Chiū koh kóng, “Tàn-lí, a-peh-ah, lí kiám m̄-sı̄ ke̍k hó ê lâng--mah?”
Tàn-lí ı̀n kóng, “Goá ê choè lâng m̄-chai sı̄ hó á-bô; kiaⁿ-liáu m̄-sı̄.”
Lek-sı̄-ka kóng, “Sı̍t-chāi sı̄ hó-lâng, lí só͘ choè ê tê piáⁿ chin hó; goá siông-siông tùi chia keng-kè, lí m̄-bat khoàⁿ-kı̀ⁿ goá, goá tiāⁿ-tiāⁿ khoàⁿ-kı̀ⁿ lí, kàu kúi-nā pah pái. Kéng-chhat, ia̍h bô lâi koáⁿ--lí, chek-pı̄--lí, chhin-chhiūⁿ án-ni só͘-í goá chai lí sı̄ hó-lâng.”
Tàn-lí thiaⁿ chiah ê oē, chiū thó͘-khùi, ka-kı̄ siu boē tiám-sim ê toh kap lóng-chóng ê ke-si; sim-lāi siūⁿ, “Goá kó-jiân chí kúi nı̂ tiàm chit-tè lóng-chóng bô chhò, só͘ pān ê tê-piáⁿ kó-jiân hó. Lek-sı̄-ka khoàⁿ goá só͘ choè hó-tê, hó-piáⁿ, chiū o-ló goá sı̄ hó-lâng.” Tàn-lí chı̍t-bı̄n sim-lāi siūⁿ, chı̍t-bı̄n ēng chhiú siàu chı̂ⁿ, siàu liáu chiū khoán lo̍h tē-á-lāi, koh-chài thó͘-khùi. Chhiú the̍h chı̍t ê toā-chı̂ⁿ pàng ka-la̍uh tı̄ thô͘-kha, tı̀ⁿ m̄-chai, beh chhı̀ Lek-sı̄-ka ê sim-koaⁿ.
Lek-sı̄-ka khoàⁿ chı̍t ê chı̂ⁿ tı̄ thô͘-kha, chı̍t-bı̄n kap Tàn-lí kóng-oē, chı̍t-bı̄n ēng kha khàm hit ê chı̂ⁿ. Tàn-lí khoàⁿ-kı̀ⁿ án-ni-siⁿ, sim-lāi thoè i khó͘, koh hoaⁿ-hí chai, chit ê lâng sı̄ chha̍t; chiah siūⁿ beh tò-khı̀ ê sı̂, tio̍h ēng sím-mı̍h hoat-tō͘ hō͘ i chit ê chı̂ⁿ hiān--chhut-lâi, chiū thang chek-pı̄ i, hō͘ i āu-lâi m̄-thang koh-chài lâi. I ia̍h bô siūⁿ kúi-nā nı̂ bô lâng hó khoán-thāi--i, goá nn̄g pái ēng tê-piáⁿ hō͘ i chia̍h, i káⁿ-lâi án-ni choè.
Tàn-lí án-ni siūⁿ, hut-jiân khoàⁿ-kı̀ⁿ Lek-sı̄-ka moá-bı̄n âng, ba̍k-sái lâu, àⁿ-lo̍h khioh chit ê chı̂ⁿ, ēng ka-kı̄ ê saⁿ teh chhit, lak tı̄ toh-téng, ia̍h bô kóng chı̍t kù oē. Tàn-lí ba̍k-chiu siòng--i, chiū toā siaⁿ kóng, “Chit ê tá-lo̍h lâi?”
Lek-sı̄-ka kóng, “A-peh--ah, chit ê sı̄ lí phah ka-la̍uh, lí m̄-chai.”
Tàn-lí chiū pı̀ⁿ-bı̄n kóng, “Che tāi-chı̀ tio̍h bêng-bêng kóng.”
Lek-sı̄-ka chiū thó͘-khùi kóng, “Goá tùi chhut-sı̀ kàu chit-tia̍p, bat chı̍t pái ū chı̍t ê toā-chı̂ⁿ, í-goā éng-éng bô hiah choē; taⁿ chit ê chı̂ⁿ phah ka-la̍uh tı̄ thô͘-kha, kūn tı̄ goá ê sin-piⁿ, ēng kha khàm--teh; nā-sı̄ goá siūⁿ lí khoán-thāi goá put-chí hó, ēng hé hō͘ goá hang, ēng piáⁿ, tê hō͘ goá chia̍h, nā the̍h chit ê chı̂ⁿ, goá ê sim-lāi lóng bô pêng-an; só͘-í khioh khí-lâi hō͘ lí. Taⁿ goá chit-tia̍p siūⁿ í-āu lí m̄ hō͘ goá koh-chài lâi.”
Tàn-lí thiaⁿ chiah ê oē bı̄n ǹg pa̍t-tè, khı̀ siu tê-poe, piáⁿ-poâⁿ chham tek-láng; nā-sı̄ Lek-sı̄-ka teh khiā, seng-khu ngia̍uh-ngia̍uh-chhoah, ba̍k-sái tı̍t-tı̍t lâu, sim-lāi siūⁿ chit tè chin hó ê só͘-chāi, goá choè chit hō tāi-chı̀, í-āu bô hé thang hang, bô tê-piáⁿ thang chia̍h, ia̍h bô pêng-iú ê só͘-chāi thang khı̀; sim-lāi chin khó͘.
Tàn-lí bı̄n tú-tú oa̍t-kè--lâi, khoàⁿ-kı̀ⁿ Lek-sı̄-ka ba̍k-sái teh lâu, sim-lāi hoán-hoé, thoè i khó-lı̂n; chiū kiò Lek-sı̄-ka, kóng, “Goá boē chhin-chhiūⁿ lí án-ni; taⁿ ta̍k lé-pài pài-saⁿ lí iû-goân koh lâi thang hang-hé, chia̍h tê, chia̍h piáⁿ.”
Tàn-lí kóng, “Goá boē chhin-chhiūⁿ lí án-ni,” ı̀-sù sı̄ beh o-ló Lek-sı̄-ka tiong-hō͘, chiong chı̂ⁿ lâi hêng; nā-sı̄ Lek-sı̄-ka phah-sǹg sı̄ chek-pı̄ i ēng kha khàm-chı̂ⁿ lâi phiàn lâng. Lek-sı̄-ka hit-tia̍p chiū khı̀, chı̍t-bı̄n hoaⁿ-hí thang koh lâi, chı̍t-bı̄n iu-būn sı̄ hō͘ Tàn-lí hiâm.
Tàn-lí tò-khı̀ ê sı̂, lō͘--nih teh kiâⁿ, sim-lāi siūⁿ chit ê cha-bó͘ gín-á ê tāi-chı̀; iô-thâu kóng, “Goá boē chhin-chhiūⁿ i tiong-hō͘ kàu án-ni, goá boē chhin-chhiūⁿ i tiong-hō͘ kàu án-ni.”
Tē 3 Chiuⁿ
Lek-sı̄-ka khoàⁿ-kı̀ⁿ Tàn-lí tı̄ lō͘--nih
Cha̍p ge̍h, cha̍p-it ge̍h, cha̍p-jı̄ ge̍h ta̍k lé-pài pài-saⁿ, Lek-sı̄-ka kàu Tàn-lí ê só͘-chāi, thèng-hāu boé tiám-sim ê lâng teh soàⁿ. Hit sı̂ Tàn-lí the̍h tê-piáⁿ hō͘ i chia̍h. Í-āu Tàn-lí hō͘ i tàu-poaⁿ ke-si, m̄ hō͘ i chai i ê chhù, ia̍h bô kap i kóng-oē; beh tò-khı̀ ê sı̂, ba̍k-chiu sı̀-koè khoàⁿ, chhin-chhiūⁿ kiaⁿ Lek-sı̄-ka tè i ê khoán-sit; kiâⁿ ū kúi-pō͘ chiū oa̍t-thâu kè-lâi khoàⁿ.
Lek-sı̄-ka ê chhù sı̄ phoà-lâu, lâu-ē sı̄ bé-tiâu, chin kiaⁿ-lâng, nā beh chiūⁿ-lâu ê sı̂, tio̍h tùi bé-tiâu keng-kè, tùi lâu-thui hian-khui lâu-koà, chiah oē tit chiūⁿ-khı̀. I ê lāu-bú chin ài chia̍h-chiú, chiong chhù-lāi ê ke-si ta̍k-hāng tǹg-liáu, liân í-toh ia̍h boē-liáu, to̍k-to̍k chhun chı̍t niá phoà-chhio̍h, chhu tı̄ lâu-pang choè bı̂n-chhn̂g; lóng bô chiàu-kò͘ Lek-sı̄-ka, chhut-chāi i khı̀ choè khit-chia̍h. Chhù-piⁿ thâu-bé ia̍h phah--i, mē--i, khi-hū--i; to̍k-to̍k kàu pài-saⁿ khı̀ Tàn-lí ê só͘-chāi chia̍h tê-piáⁿ, sǹg sı̄ tē-it khoàiⁿ-oa̍h ê jı̍t-chí.
Ū chı̍t jı̍t beh àm ê sı̂, i lāu-bú chia̍h chiú-chùi, bô sím-mı̍h tāi-chı̀ phah, koáⁿ i chhut-khı̀. Lek-sı̄-ka ba̍k-sái lâu, bóng-kiâⁿ hn̄g-hn̄g, hut-jiân khoàⁿ-kı̀ⁿ Tàn-lí, seng-khu só͘ chhēng ê i-chiûⁿ chin sı̄ thé-biān, kap boē tiám-sim ê sı̂ bô sio-tâng. Lek-sı̄-ka kı̂-koài, ia̍h m̄-káⁿ mn̄g--i, àm-chı̄ⁿ tè i kiâⁿ, kàu chı̍t keng ê toā-chhù, chiū-sı̄ lé-pài-tn̂g, mn̂g-kháu ê goā-mn̂g sı̄ thih--ê, Tàn-lí thêng-kha ēng só-sı̂ khui mn̂g jı̍p-khı̀.
Lek-sı̄-ka lóng m̄-bat jı̍p lé-pài-tn̂g, taⁿ chiū àm-chı̄ⁿ tè Tàn-lí jı̍p kàu tē-jı̄ têng ê mn̂g. Tàn-lí koh ēng só-sı̂ khui jı̍p. Lāi-bı̄n àm-àm, Lek-sı̄-ka tiàm tı̄ hō͘-tēng ngia̍uh-ngia̍uh-chhoah, thèng-hāu Tàn-lí tiám chı̍t pha teng, chiū káⁿ tām-po̍h chı̀n-chêng. Mn̂g-lāi ū chu-âng ê pò͘-lı̂, Lek-sı̄-ka lio̍h-lio̍h-á hian-khui, thau-khoàⁿ lāi-bı̄n; tia̍p-á-kú hó-táⁿ jı̍p--khı̀ khin-khin kiâⁿ. Hit-sı̂ lāi-bı̄n bô sím-mı̍h kng, ná kú teng tiám choē pha kàu chin kng.
Lek-sı̄-ka khoàⁿ-kı̀ⁿ thiaⁿ--nı̍h ê thiāu ū khek hoe-chháu, tiong-kan pâi kau-í, koà í-chū, thô͘-kha chhu ngó͘-sek ê chiⁿ-tiâu. Tàn-lí hit-sı̂ chiūⁿ-tâi tiám-teng. Lek-sı̄-ka khoàⁿ tâi-āu ū pâi toā khı̂m chı̍t tiuⁿ. Tàn-lí tiám-teng liáu chiah jı̍p pa̍t keng pâng. Lek-sı̄-ka kiâⁿ kūn-oá teh khoàⁿ khı̂m.
Tàn-lí chhut-lâi kiâⁿ kàu tâi-āu. Lek-sı̄-ka khoàⁿ Tàn-lí ū chhēng o͘ ê tn̂g-saⁿ lâi lah, sim-lāi put-chí gông-ngia̍h, liâm-piⁿ oāⁿ chit hō saⁿ. Tàn-lí hut-jiân khoàⁿ-kı̀ⁿ Lek-sı̄-ka tı̄ chit-tè khiā, ba̍k-chiu kim-kim khoàⁿ, chiū pháiⁿ siaⁿ-sàu kóng, “Taⁿ lí tio̍h kín khı̀; chit só͘-chāi m̄-sı̄ hō͘ khit-chia̍h ê lâng toà, sı̄ hù-kùi ê lâng teh óng-lâi; thàn chit-tia̍p iáu-bē lâi, lí tio̍h koáⁿ-kín khı̀; taⁿ mn̄g lí cháiⁿ-iūⁿ oē lâi kàu chia?” Chiū kūn-oá àⁿ Lek-sı̄-ka ê hı̄-khang-piⁿ, chhin-chhiūⁿ beh soè-siaⁿ kóng-oē ê khoán.
Lek-sı̄-ka chiū kóng, “Goá sı̄ in-ūi lāu-bú phah, mē, koáⁿ-tio̍k, chhut-mn̂g kiâⁿ koe-lō͘, khoàⁿ-kı̀ⁿ lí, chiah àm-chı̄ⁿ tè lí lâi; khoàⁿ chit só͘-chāi chin sı̄ hó, lí m̄-sái siū-khı̀; hō͘ goá mn̄g chı̍t kù, chiū beh khı̀. Hù-kùi ê lâng, lâi chit-tè choè sím-mı̍h tāi-chı̀?”
Tàn-lí chiū kóng, “Sı̄ lâi kı̂-tó.”Lek-sı̄-ka chiū koh mn̄g, “Kı̂-tó sı̄ sím-mı̍h tāi-chı̀?”
Tàn-lí thiaⁿ chiah ê oē, ū gı̄n-sı̂n ê khoán-sit, chiū kóng, “Lí sı̄ gōng--mah? In lâi chit só͘-chāi kūi-lo̍h thok bo̍k-su thoè i kiû Siōng-tè.”
Lek-sı̄-ka thiaⁿ chiah ê oē lóng-chóng boē hiáu--tit. Tàn-lí khoàⁿ-kı̀ⁿ Lek-sı̄-ka boē bêng-pe̍k, bı̄n-sek chiū lio̍h-lio̍h-á chhiò. Lek-sı̄-ka chiū koh mn̄g kóng, “A-peh ah, Siōng-tè sı̄ sím-mı̍h mı̍h? Bo̍k-su sı̄ sím-mı̍h mı̍h? Hù-kùi ê lâng mı̍h-kiāⁿ ta̍k-hāng ū, mı̍h-sái tio̍h kiû.”
Tàn-lí chiū kóng, “M̄-sái mn̄g kàu chiah siông-sè. Hù-kùi ê lâng tit-beh lâi, khoàⁿ lí chhēng phoà-saⁿ, oē m̄ hoaⁿ-hí; tio̍h kín-kín khı̀. Chit ê tâi-téng sı̄ bo̍k-su teh kóng tō-lí, tâi-āu chit tiuⁿ khı̂m sı̄ gı̂m-si ê sı̂ teh toâⁿ, chiah ê kau-í sı̄ hù-kùi ê lâng teh chē; lí m̄-thang koh-chài lâi, tek-khak sı̄ m̄-thang.”
Lek-sı̄-ka thiaⁿ Tàn-lí só͘ kóng ê oē lóng boē bêng-pe̍k, chiū kóng, “A-peh ah, goá sı̍t-chāi boē hiáu-tit lí ê oē; goá ài tiàm ba̍t-ba̍t ê só͘-chāi, hō͘ goá khoàⁿ chheng-chhó.”
Tàn-lí chiū ut-chut, ı̀n kóng, “Lí i-chiûⁿ phoà, oê be̍h iū bô, thâu-mn̂g sàm-sàm; hiān-sı̂ hù-kùi ê lâng beh kàu lah, lí taⁿ tio̍h khı̀.”
Lek-sı̄-ka chai Tàn-lí tek-khak beh koáⁿ i chhut-khı̀, chiū bān-bān kiâⁿ oa̍t-thâu khoàⁿ, kiâⁿ kàu toā mn̂g ê só͘-chāi, tú-tú khoàⁿ-kı̀ⁿ chı̍t ê hó-gia̍h lâng lâi, koh khoàⁿ-kı̀ⁿ kéng-chhat khiā tı̄ mn̂g-goā. Hit sı̂ Lek-sı̄-ka sim-koaⁿ kiaⁿ kéng-chhat lia̍h i khı̀, koh kiaⁿ hó-gia̍h lâng khoàⁿ-kı̀ⁿ i, chiū koáⁿ-kín siám jı̍p mn̂g-sı̀ⁿ āu. Koh tia̍p-á-kú hù-kùi ê lâng tāi-ke kàu lah, só͘ chhēng i-chiûⁿ chin sı̄ súi; Lek-sı̄-ka àm-chı̄ⁿ chhiú thau chhun chhut-lâi, khin-khin bong-tio̍h hū-jı̂n-lâng ê saⁿ, chin iù, chin ku̍t.
Hit-sı̂ Tàn-lí khoàⁿ-kı̀ⁿ hù-kùi lâng tāi-ke jı̍p--lâi, koáⁿ-kín khı̀ chih in, chin-chiàⁿ bô êng, nā-sı̄ sim-lāi teh kiaⁿ Lek-sı̄-ka koh-chài lâi; ba̍k-chiu siông-siông khoàⁿ mn̂g-goā, koh chı̍t pái chhut-khı̀ mn̄g kéng-chhat kóng, “Lí ū khoàⁿ-kı̀ⁿ chı̍t ê chhēng phoà-saⁿ ê cha-bó͘ gín-á bô?”
Koh tia̍p-á-kú Lek-sı̄-ka thiaⁿ-kı̀ⁿ toâⁿ-khı̂m ê siaⁿ-im, sim-lāi chiū toā hoaⁿ-hí, in-ūi lóng m̄-bat thiaⁿ-kı̀ⁿ; chiū tiàm tı̄ mn̂g-sı̀ⁿ āu khû--teh, chēng-chēng teh thiaⁿ, thiaⁿ kàu ba̍k-iû lâu, tih tı̄ thô͘-kha, ēng chhiú ng bı̄n; koh thiaⁿ-kı̀ⁿ gı̂m-si ê siaⁿ-im, lóng-chóng boē hiáu--tit. Gı̂m-si bêng-pe̍k, koh thiaⁿ-kı̀ⁿ lâng teh kóng-oē, m̄-chai kóng sím-mı̍h mı̍h; chiū àⁿ-thâu chhut-lâi thau-khoàⁿ. Khoàⁿ-kı̀ⁿ kéng-chhat bô tı̄-teh, chiū koáⁿ-kín chhut-lâi, nā-sı̄ sim-koaⁿ lāi teh siūⁿ chit ê só͘-chāi chin sio, chin hó-khoàⁿ, chin kng, lóng m̄-ài lı̄-khui; ko͘-put-chiong kiâⁿ kàu koe-lō͘, àm koh koâⁿ, ûn-ûn kiâⁿ kàu i ê chhù, sim-koaⁿ lāi chin sı̄ iu-būn. Chit-jı̍t chiū-sı̄ lé-pài-jı̍t.
