Liáu-boé-á

e̍k Goá tē-it-pái chhēng ê-á, sı̄ tı̄ sió-ha̍k gō͘-nı̂ ê sı̂. Tng-sı̂ choân-hāu ê ha̍k-seng lóng mā thǹg-chhiah-kha khı̀ ha̍k-hāu, chún khı̀ kau-iû, á-sı̄ chham-ka hiong--lı̀n ê ūn-tōng-hoē, mā bô-lâng chhēng-ê. Ūi-tio̍h goá beh koān-siâⁿ chham-ka choân-koān ê káng-ián pí-sài, chiah te̍k-pia̍t boé chı̍t-siang kiû-ê. Chham-ka pí-sài tńg-lâi, in-ūi kha thiàⁿ, tı̄ poàⁿ-lō͘ tō thǹg ê-á koāⁿ toà chhiú--lı̀n. Kı̀-jiân choân-hāu bô-lâng chhēng-ê khı̀ tha̍k-chheh, goá iā pháiⁿ-sè chhēng, iā m̄-kam chhēng, kan-nā hit-kang chhēng-liáu, tō chhiūⁿ pó-poè án-ne siu--khí-lâi. Kàu seng khit-hı̀ la̍k-nı̂-kip, koh beh chham-ka choân-koān ê káng-ián pí-sài, í-keng boē-chhēng--tit ah. Choè-kı̄n kúi-nı̂, ê-á iā tı̄ chng-kha chiām-chiām liû-hêng. Goá ê tē 2 sió-moē chı̀n-jı̍p siā-hoē kang-chok liáu āu, put-toān chiap-siū to͘-chhı̄ bûn-bêng, chhù-lāi ta̍k-chióng ê ê-á iā lú lâi lú choē. chiam-thâu--ê, koân-tah--ê, hoe-âng-liú-le̍k--ê, sı̂-siông ín-khí a-bú siū-khı̀: “Ū pêⁿ-té ê pò͘-ê thang chhēng, séng-chı̂ⁿ koh khin-sang, í-keng chiok-hoa̍h, kan-kan-á beh chhēng hiah-ê a-lí-put-tap ê sam-pat-ê, liân kiâⁿ-lō͘ to boē-chāi. Tō-sı̄ siuⁿ-koè êng, chiah ū chiah-choē chhut-thâu lah.” Koè-nı̂-chêng toā piàⁿ-sàu, goán-bó͘ khêng kúi-nā siang, kū--ê ê-á chhut-lâi beh hiat-kak, hō͘ goán hit-ê chho͘-kha chho͘-chhiú, ta̍k-jı̍t kap thô͘-moâi-á chò-phoāⁿ, kui-nı̂ thàng-thiⁿ bô-kúi-kang ū ki-hoē chhēng pò͘-ê ê a-bú khoàⁿ--tio̍h, chiū ná piàⁿ-sàu, ná tı̍t-tı̍t liām: “Chiah-ê liáu-boé-á, chiâⁿ lōng-hùi, chiah-ê liáu-boé-á, chin boē-hiáu thiàⁿ-sioh, iáu-boē chhēng-pháiⁿ, chı̍t-siang bé liáu koh chı̍t-siang. Che siáⁿ-mı̍h ê-á ah ?” Mē--leh mē--leh, a-bú koh siūⁿ tio̍h téng-pái khı̀ Hoa-liân ê tāi-chı̀, koh khah siū-khı̀: “Chiah-ê liáu-boé-á, liân chı̍t-poe 40 kho͘ lim bô-nn̄g-chhùi ê ka-pi, bô tāi-chı̀ to lim ē-lo̍h-khı̀, koh ū sím-mı̍h chı̂ⁿ khai boē-lo̍h ? Ā bô siūⁿ khoàⁿ, cha-bó͘-lâng kang thàu-chá lâu-koāⁿ lâu kah àm, mā bô-kàu thang lim saⁿ, sı̀ poe hit-khoán ê ka-pi, chiah-ê liáu-boé-á lim kah chiah khin-sang.” He sı̄ in-ūi goá-ê sió-tı̄ sió-moē lóng tı̄ Hoa-liân kang-chok, chin-chió tńg-lâi, ū chı̍t-pái a-bú khı̀ kā in khoàⁿ-khoàⁿ leh. A-bú chin hán-tit chhut-goā, goá chiū seng siá-phoe kiò in hó-hó-á khoán-thāi a-bú, chhoā a-bú khı̀ kiàn-sek chı̍t-ē-á bûn-bêng leh. Só͘-í a-bú chı̍t-ē lo̍h-chhia, sió-tı̄ sió-moē chiū chhoā a-bú khı̀ A-sū-to͘ pn̄g-tiàm lim ka-pi. A-bú chı̍t-ē tńg-lâi, thê khí chit-kiāⁿ sū liân-soà mē kúi-nā kang. Goá sim-lāi iú-sò͘, m̄-káⁿ chhut poàⁿ-siaⁿ. Āu--lâi sió-moē tńg-lâi kā goá thau-kóng, a-bú chı̍t-ē chai-iáⁿ kè-chı̂ⁿ, tng-tiûⁿ chiū kí in toā-siaⁿ chek-mā, ín-khí ta̍k-ê-lâng lóng teh khoàⁿ--in. Tit-tio̍h chit-ê kà-sı̄, sió-tı̄ sió-moē tong-jiân m̄-káⁿ koh chhoā a-bú khı̀ kiàn-sek sím-mı̍h bûn-bêng. (Hong-hiòng Tē 15 kı̂, 1992 nı̂ 3 goe̍h)