Liâm Bo̍k-su-niû ê Sió-toān

Téng-jı̍t ū siu-tio̍h Ka-ná-tāi ê phoe, kóng Liâm Bo̍k-su-niû tı̄ kin-nı̂ chiaⁿ-ge̍h chhoe-it, í-keng siū Siōng Chú ê kéng-tiàu. Tı̄ chiaⁿ-ge̍h chhoe-saⁿ ū bâi-chòng tı̄ To-lûn-to, i ê pún só͘-chāi. Choē-choē lâng khı̀ hù hit jı̍t ê chòng-sek, lāi-tiong ū la̍k ê Soan-kàu-su, hó-ı̀ kng i ê koan-bo̍k. Liâm Bo̍k-su-niû chiū-sı̄ kan-ná-tāi ê lâng, chhut-sı̀ tı̄ On-thé-lı̄-o séng. I ê pē-bú khiā-khí tı̄ To-lûn-to chhı̄. Liâm Bo̍k-su-niû sı̄ put-chí oa̍h-tāng kap hò͘ⁿ-ha̍k ê lâng. I sı̄ To-lûn-to Sèng-keng Ha̍k-hāu ê chut-gia̍p-seng. I iā bat tı̄ Bí-kok liû-ha̍k chı̍t nı̂ kú. Kàu tı̄ 1919 nı̂ kap Liâm Bo̍k-su choè-tı̄n lâi Tâi-oân. Nn̄g-lâng kap tāi-ke chin hô-hó, chin chhin-chhiat; iā chin gâu choè lâng. Khó-sioh tı̄ Tâi-oân ê sı̂, sin-thé bô sím-mı̍h ióng-kiāⁿ, put-tek-í tı̄ 1923 nı̂ koh-chài tò-tńg khı̀ pún-kok. Chóng-si kàu chhù iā siông-siông tú-tio̍h phoà-pı̄ⁿ, kàu chit pang pı̄ⁿ ná siong-tiōng, sin-thé ná loán-jio̍k, tı̄ chiaⁿ-ge̍h chhoe-it Chú kéng-tiàu i. I ū lâu saⁿ ê hāu-siⁿ, chı̍t ê cha-bó͘-kiáⁿ, tāi-ke soè-hàn. Tı̄ chit ê iu-būn ê tiong-kan, goān lán ê Chú pó-hō͘, chiàu-kò͘ Liâm Bo̍k-su kap i ê kiáⁿ-jı̂. (Tâi-oân Kàu-hoē-pò tē 516 koàn, 1928 nı̂ 3 ge̍h)