Liām-hiong
Lán chó͘ Tn̂g-soaⁿ koè Tâi-oân,
bô hiâm lō͘-tô͘ chin iâu-oán.
Poâⁿ-soaⁿ koè-niá tu hong-lōng,
ūi tio̍h beh chhoe chū-iû hong.
Lâi kàu Tâi-oân thâu chı̍t hāng,
chiū- sı̄ koáⁿ cháu âng-mn̂g pang.
Jiân-āu tāng chhiú lâi khai-khún,
tı̀-ı̀m āu-tāi chèng kiáⁿ-sun.
Lán kong khiā-khí tı̄ Tâi-oân,
kè-sêng a-chó͘ ê sim-goān.
Chiūⁿ-soaⁿ thó-hái kiam lo̍h-chhân,
pho͘-lō͘ chō-kiô chiong chhı̀ sán.
Put-hēng hiong-thó͘ siū chhut-bē,
bē hō͘ Jı̍t-pún pháiⁿ lâng-kheh.
Hoán-kheh-ūi-chú gō͘-cha̍p tang,
sńg-tn̄g chı̍t-tiûⁿ ná ok-bāng.
Lán tia chhut-sı̀ tı̄ Tâi-oân,
siàu-liân gū-tio̍h toā-chiàn loān.
Chiàn āu tú-tú tháu sim-kat,
iū-koh sı̂n-tio̍h Jı̄-jı̄-pat.
It-seng oán-jû hiong-thó͘-sú,
lūi-hiat kau tı̂ⁿ choē àm-bū.
Moá sin siong-hûn chı̀ bô sit,
kı̂ bāng poah hûn kín kiàn jı̍t.
Taⁿ lán siⁿ chò Tâi-oân-lâng,
sı̂-tāi sú-bēng m̄ thang pàng.
Lán kong lán chó͘ sı̄ hó-hàn,
ûi-ài liû hong chāi jı̂n-kan.
Khı̂n-lô ūi pún sūn thian-bēng,
Chû-pi ūi hoâi hô jı̂n-sèng.
Kong-gı̄ chin-lí siông loân-bō͘,
loán-jio̍h sòng-hiong saⁿ chiàu-kò͘.
Siūⁿ tio̍h kò͘-hiong ê khó͘-lān,
chı̍t-chân koè liáu koh chı̍t-chân.
Sim-iu-jû-hûn to̍h boē soah,
moá pak chhı̀-thiàⁿ ná to koah.
Lán nā ū sim kiù Tâi-oân,
sian siau thian-lō͘ tû jı̂n-oàn.
Put-sı̂ kia̍h bak koan thian-ı̀,
hoān sū bô sian siūⁿ ka-kı̄.
Khoân-kéng pó-hō͘ tio̍h koáⁿ kín,
ho̍k-bū jı̂n-kûn tio̍h in-khı̂n.
Sim chûn lı̂n-bín thiⁿ tang kiâⁿ,
phoà-pak siong thāi sū oē chiâⁿ.
Koân-le̍k miâ-siaⁿ phû-hûn koè,
êng-hoâ-hù-kùi nih-ba̍k hoe.
Jı̂n-gı̄ sū-chèng bān-sè chûn,
saⁿ-hô saⁿ-thiàⁿ tāi-tē chhun.
A-chhàn ê Kò͘-sū
Tâi-oân iân hoāⁿ choân hı̂-káng,
chū chá toà ū thó-hái lâng.
Tāi-tāi kiâⁿ-chûn tō͘ seng-oa̍h,
lâng-lâng phah-piàⁿ sim-heng khoah.
Chhı̂ⁿ-hong tu-éng phoê sı̀ⁿ-miā,
hùn-kàu sim-sèng chū-jiân chiâⁿ.
Ē-bı̄n chhiáⁿ thiaⁿ sió hı̂-hu,
chhàn phah-piàⁿ ê kò͘-sū.
Chı̍t-ê gín-ná miâ A-chhàn,
hái-chiáu khoàⁿ i lâi toā hàn.
Ou ê phoê-hu kāu koh chho͘,
hái-hong khàm ı̀n choè kı̀-hō.
Sui-jiân lūn siòng m̄ chiūⁿ-bak,
ha̍k-hāu chheh iā bô gâu tha̍k.
Iáu-kú a-bú sim-ba̍k tiong,
A-chhàn koai-khiáu koh siān-liông.
Pàng-o̍h kap niâ tiàm chhù-lāi,
o̍h pó͘ phoà-bāng o̍h chú-chhài.
Chhut-mn̂g toè tı̄ tia sin-piⁿ,
o̍h kò chûn-á o̍h lia̍h-hı̂.
Ta̍k-jı̍t khoàⁿ hái hái liân thiⁿ,
kà i kap lâng bô saⁿ-chiⁿ.
Hái-hong hái-chiáu chò pêng-iú,
seng-oa̍h khoài-lo̍k koh chū-iû.
Khó-sioh bû-siông sè-kan sū,
pı̂ⁿ-tē tân lûi khí hong-ú.
A-tia chı̍t-pài chûn chhut-phâng,
poàⁿ lō͘ hoān hong bô jı̍p káng.
Khó-lı̂n bó-kiáⁿ kho̍h-kho̍h tán,
chhun-khı̀ chhiu-chı̄n put ti hân.
Hái-piⁿ sı̀-koè lâu kha-jiah,
saⁿ-tǹg ba̍k-sái chún pūn chia̍h.
Jı̍t-tán koè mı̂ mı̂ tńg jı̍t,
A-tia choân-jiân bô siau-sit.
Bōng-chhoan-chhiu-súi lân tò-tńg,
moá pak khó͘-thàng chhoan sim-tn̂g.
Kia̍h-thâu bû giân būn chheng-thian,
àⁿ-thâu kám-thàn siaⁿ liân-liân.
Put-chhek hong-hûn chhian-bān piàn,
tān-sek hō-hok piàn bān-chhian.
Thian-hā bû-kè pē-bó sim,
bān-kim lân oāⁿ hàu-chú gı̂m.
Chū-chiông a-tia sí liáu āu,
A-chhàn seng-oa̍h taⁿ keng-thâu.
Thàu-chá chhut-mn̂g lu hı̂-chai,
chan-chı̂m hô͘-hê ta̍k hāng lâi.
Boé-àm kap lâng khı̀ khan-ko͘,
jı̍p-mn̂g m̄-bat kiò kan-khó͘.
Ūi-tio̍h thàn-chı̂ⁿ chhı̄ a-niâ,
thàu-hong lo̍h-hō͘ ia̍h tio̍h kiâⁿ.
Koāⁿ lâu moá-bı̄n bô oàn-thàn,
chí-kiû koáⁿ-kín lâi toā-hàn.
Jı̄n-chin phah-piàⁿ khı̂n chò-kang,
ǹg-bāng āu-jı̍t oē chiâⁿ-lâng.
Kè-sêng a-tia ê sim-chı̀,
koh-chái thó-hái khı̀ la̍h-hı̂.
Chiū-sı̄ Hok-peh-à Chit-chióng Lâng
Tâi-oân thó͘-tē pûi koh nńg,
pı̂ⁿ-goân khòng-khoah choē chhân-hn̂g.
Kut-la̍t khı̂n-khiām chò-sit lâng,
phah-piàⁿ hō͘ lán hó koé tang.
Nāi-hô nı̂-nı̂ ū hong-thai,
ngó͘-kok siông-siông siū sún-hāi.
Kı̂-tiong khó͘ siap kiâm sng tiⁿ,
lâi-khı̀ Hok-peh-à in tau phı̄ⁿ.
Hok-peh-à chhoā bó͘ hit chı̍t nı̂,
hô-chúi im koè kau-á kı̂ⁿ.
Kiông-hong tı̍t sàu bô lâng iáⁿ,
toā-hō͘ tı̍t chhiâng moá soaⁿ-phiâⁿ.
Hok-peh-à ba̍k-chiu kim-kim khoàⁿ,
Hok-m̀-à àm-àm tûi sim-koaⁿ.
Siáⁿ-sū nn̄g lâng hó jı̍t-chí,
phian-phian gū tio̍h pháiⁿ tāi-chı̀.
Ka-chài Hok-peh-à bô khiàn-sńg,
iû-goân chiong ḿ-à chhoā koè mn̂g.
Jı̍p chhù lâng-kheh chı̍t-ē cháu,
sûi-sı̂ sio-chhoā sûn chhân thâu.
Kia̍h-ba̍k chı̍t khoàⁿ bı̄n chiâu o͘,
tiū ná chhài-pó͘ chhân ná kô͘.
Chı̍t-hoan sin-khó͘ chóng phàu-thng,
kiò lâng cháiⁿ-iūⁿ sim boē sng.
Lâng kóng chhiū-thâu nā-sı̄ chāi,
m̄-kiaⁿ chhiū-boé chò hong-thai.
Phah chí chhiú-kut nā tò ióng,
m̄-kiaⁿ sim-goān thian put-chiông.
Hok-peh-à siáu-liân sin ióng-kiāⁿ,
Hok-ḿ-à un-sûn khéng phah-piàⁿ.
Nn̄g lâng liân sim tâng hùn-hoat,
chhân-thâu chhân-boé tō͘ bı̍t-goa̍t.
Thiⁿ sek boē kng chiū chhut-mn̂g,
bô-hiâm thian-hân lō͘-chúi sng.
Hoan-thô͘ iā-chéng so chhân-chháu,
hong-chhoe jı̍t-pha̍k koāⁿ ná lâu.
Ìm-pûi lia̍h-thâng ta̍h chúi-chhia,
jı̍t-chhut chò kàu jı̍t sai-chhiâ.
Jı̂n-seng hong-pho sui bô tiāⁿ,
gû-chhia-lián piⁿ oan-iuⁿ kiâⁿ.
Hông-thian put-hū iú-sim jı̂n,
khı̂n-lô hó-bāng oē sêng-chin.
Hit-nı̂ chhiu-thiⁿ au sim-hiat,
keh-chhun tiū-sūi lia̍p-lia̍p kiat.
Chhân-hn̂g ngó͘-kok ū siu-sêng,
siâng-sı̂ chhù-lāi ia̍h thiam teng.
Hok-peh-à khui mn̂g ngiâ siang-hí,
Hok-ḿ-à khó chı̄n kam lâi tiⁿ.
Chûn--nı̂ Hok-peh-à chò gō͘-cha̍p,
tng-jı̍t ti-thâu iáu-teh khap.
Kin-nı̂ oāⁿ kàu Hok-ḿ-à koè,
siang-chhiú iû-oân hoāⁿ chhân-lê.
Chiū-sı̄ Hok-peh-à chit-chióng lâng,
hō͘ lán nı̂-nı̂ hó koè-tang.
Kut-la̍t phah-piàⁿ koh khı̂n-khiām,
saⁿ-tǹg chē-toh tio̍h siàu-liām.
