Jı̍t-goa̍t thâm
Tâi-oân sù-kùi chiàu thiⁿ-sı̂,
san-bêng-chúi-siù hó tē-lí.
Le̍k tāi siàn-chó͘ tàu jı̂n hô,
chı̄n-la̍t khai-khún chiâⁿ pó-tó.
San-tē pō͘-lo̍k Goân-chū-bı̂n,
sim-sèng hô-māi lâng sûn-chin.
Chêng jû si-koa ài ūi choâⁿ,
tāi-chū-jiân tiong lâi tióng toā.
Chiūⁿ soaⁿ phah-la̍h ke̍k kiau-ióng,
hô té lia̍h hı̂ ná kau-liông.
Lo̍h chhân chò-sit ū chı̍t thò,
pó-chûn seng-thài in siōng hó.
Chiàⁿ jû tiong-pō͘ Jı̍t-goa̍t-thâm,
Chô-cho̍k liû-thoân ê kı̂-tâm.
Tāi-chiam ko kap Chúi-siā só,
sià sin hō jı̍t kham o-ló.
San-tē piàn tó ū pō͘-lo̍k,
A-lí-san hē toà Chô-cho̍k;
tāi-tāi seng-oa̍h phoāⁿ san-hô,
bû-iu-chū-chāi ná san-ko.
Put-hēng nn̄g pái ê tē-tāng,
chai-ē hiông-hiông tùi thiⁿ kàng.
Jı̍t-thâu ge̍h-niû lóng sit lo̍h,
khong ū liông tiân lân chèng-choh;
ióng-kám chheng-liân Toā-chiam ko,
chhoā i ê bó Chúi-siā-só.
Koat-sim lı̍p-chı̀ chhut ka-mn̂g,
chiong jı̍t kap ge̍h chhoē tò-tńg.
Chhiú kia̍h hoē-pé io hâ toà,
ta-niû lāi-to keng-thâu koāⁿ;
it-chhè ke-si khoán chiâu-pı̄,
sûi sı̂ tōng sin bô iân-tı̂.
Poâⁿ-soaⁿ koè-niá liâu khe-kàn,
bô hiâm hong sng iā-ú hân.
Chám-keng-phi-chhı̀ tı̍t hiòng chêng,
lâi kàu tiong-pō chı̍t soaⁿ téng;
hioh-khùn thêng-chhoán teh chia̍h-pn̄g,
àm-khong siā chhut nn̄g tō kng.
Tiám tio̍h hoé-pé chı̄n ba̍k khoàⁿ,
khoàⁿ-kı̀ⁿ hit pêng tùi bı̄n soaⁿ.
Nn̄g khut thâm-chúi chin-chiàⁿ súi,
ná chún jı̍t-goa̍t iāu kong-hui.
Koáⁿ-kín sio chhoā lo̍h thân piⁿ,
siông-sè chı̍t khoàⁿ kó-jiân sı̄.
Goân-lâi nn̄g chiah toā ok-liông,
chiōng jı̍t kap ge̍h kā jı̍p kiong.
Hē tı̄ thâm tiong sı̀-koè kō,
tòng chò hoé-kiû teh thit-thô.
Nn̄g lâng khoàⁿ liáu sim bêng-pe̍k,
thè āu chham-siông siūⁿ kè-chhek.
Ok-liông siⁿ chò hiah-nı̄ béng,
iōng la̍t kiông chhiúⁿ bô khó-lêng.
Nńg kiû khióng kiaⁿ m̄-sı̄ pō,
siūⁿ kah thâu-hı̂n toā-khùi chho.
Chhoē chit soaⁿ chio̍h chiām-sı̂ chē,
sim ná chio̍h-bō tı̍t-tı̍t-se̍h.
Hut-jiân chio̍h phang ū ian khí,
pe̍h-bū pe̍h-bū chin koài-kı̂;
soá khui soaⁿ-chio̍h chı̍t--ē thàm,
chı̍t tiâu tē-tō tn̂g koh àm.
Nn̄g lâng chòng-táⁿ lo̍h khı̀ kiâⁿ,
kiâⁿ kàu bū lông kiàn hoé-iáⁿ.
Liam-pō͘ kūn-oá thàm khoàⁿ māi,
chı̍t ê a-pô teh chú chhài.
A-pô khoàⁿ-kı̀ⁿ in nn̄g lâng,
tio̍h-kiaⁿ soà chiong chian-sı̂ pàng.
Khui chhùi mn̄g in tó-ūi lâi,
cháiⁿ-iūⁿ kiâⁿ jı̍p chit tōng lāi?
Nn̄g lâng tùi thâu lâi kóng khı̀,
a-pô thiaⁿ kah sim siong-pi;
thó͘-khùi ia̍h kóng i ê sū,
kóng i pún sı̄ lông-ka-lú.
Ok-liông lia̍h i koaiⁿ tı̄ chia,
kiò i chú-pn̄g hō in chia̍h.
M̄-chún ta̍h-chhut chit tû-pâng,
í-keng chin kù bô kı̀ⁿ lâng.
Lín nā beh cháu thàn chit-chūn,
liân-piⁿ ok-liōng oē lâi sûn.
Nn̄g lâng thiaⁿ liáu chin hùn-khài,
koat-sim beh chiong ok-liông thâi.
A-pô khoàⁿ in chin ióng-kám,
chiū kóng goá bat thiaⁿ lâng tâm.
Ok-liông beh thâi su lióng pō,
kim pó͘-thâu kap kim ka-to.
Chiam-ko Siā-só chiū mn̄g i,
lióng pó jû-kim chāi ná-lí.
A-pô hoê-tap A-lí-san,
beh chhoē tio̍h i chin khùn-lân.
Nn̄g lâng ı̀n kóng goán m̄ sı̀n,
khah khó͘ iā tio̍h kiâⁿ kàu chı̄n.
Kóng soah phun ǹg A-lí-san,
kiàn thô͘ chiū ó͘ sim-thâu bân.
Chit-khut ó͘ liáu iū chı̍t-khut,
bô-mı̂-bô-jı̍t tı̍t-tı̍t ku̍t.
Jiû-sim kong-chı̀ kám san-hô,
kó-jiân hō in tit-tio̍h pó.
Pó͘-thâu ka-to chı̍t--ē khí,
má-put-thêng-tê hoê thâm piⁿ.
Khoàⁿ-kı̀ⁿ ok-liông thâm tiong sô,
Siā-só sian tı̀m kim ka-to.
Ka-to khong-tiong bú chı̍t lı̀n,
chhiòng oá chián tn̄g ok-liông sin.
Ok-liông siū siong khí siáu-kông,
thiàu lı̄ chúi-bı̄n sı̀-koè chông.
Chiam-ko chài hui kim pó-thâu,
pheh-khui liông-siú hiat chı̄n lâu.
Liông tû kong sêng sim-hoe khui,
jı̍t-goa̍t tı̍t pàng lo̍h thâm chúi.
Nn̄g lâng jı̍p tōng kiù a-pô,
chhut--lâi hoaⁿ-hí ia̍h hoân-ló;
jı̍t-goa̍t sui-jiân chāi gán chiân,
khiok bô pān-hoat sòng hoê thian.
A-pô chai-iáⁿ koh hiàn chhek,
thiaⁿ kóng liông-gán ū hoat-le̍k.
Chiah liáu lâng oē pı̀ⁿ koân toā,
khùi-la̍t ná gû sin ná soaⁿ.
Nn̄g lâng sûi-sı̂ chhú liông-chu,
thun jı̍p pak-lāi bô loā-kú.
Chı̍t-chhùn chı̍t-chhùn tı̍t-tı̍t koân,
koân kàu thâu-hia̍h jı̍p hûn-toan.
Chhun-chhiú hiòng thian chı̍t--ē pí,
iû-goân bô kàu ū kū-lı̄.
A-pô kiò in bán toā chhiū,
phau jı̍t kap ge̍h ná siù-kiû;
iōng chhiū thuh jı̍t bān-bān sak,
sak kàu thiⁿ-piⁿ bô koh lak.
Jı̍t-thâu sak liáu sak ge̍k-niû,
thian sı̂ ho̍k-goân iāu tē-chiūⁿ.
Jı̍t-goa̍t tńg se̍h taⁿ kui-chèng,
Ou-àm tāi-tē hòng kong-bêng.
San-ko chài hiáng chhun-lûi tân,
thian-lûn hô-lo̍k moá jı̂n-kan.
A-pô hoê-tńg kò͘-hiong khı̀,
Chiam-ko Sia-só lâu thâm piⁿ;
chō-sin sêng-san siú jı̍t-goa̍t,
bián hō ok-liông koh lâi toa̍t.
Kheh-koan ū-êng khı̀ iû-lám,
nā kàu tiong-pō͘ jı̍t-goa̍t thâm.
Chhiáⁿ lín liû-sim siang-pêng hoāⁿ,
Toā-chiàm soaⁿ kap Chúi-siā soaⁿ.
Hâm-chhiàu chù-sı̂n khoàⁿ sè-kan,
thê-hông ok-liông chài hoan-pán.
Hiàn-sin hō͘-jı̍t tı̀n san-hô,
kı̂ iū kiáⁿ-sun tāi tāi hó.
