Lí Chhân-lê
Tâi-oân Miâu-le̍k ū kheh-chng,
khiân-liog5 nı̂ kan kiàn ka-hn̂g.
Bô hiâm lō͘-tô͘ chhian-lí hn̄g,
Tn̂g-soaⁿ koè hái lái thok-hng.
Chám-keng-phek-chhı̀ khai san-lı̂m,
tai-tē ūi chhn̂g chio̍h ūi chím.
Phi-seng-tài-goa̍t sin khai khún,
hong-po͘ sêng tiân ı̀m kiáⁿ-sun.
Tiōng-chêng tiōng-gı̄ hó cho̍k-sèng,
Jı̄m-lô jı̄m-oàn ti thian-bēng.
Khı̂n-khiām chhı̂ ka thoân mn̂g-hong,
hêng-sim siú gia̍p tāi-tāi tông;
hiat-me̍h saⁿ lo̍k sim saⁿ liân,
lo̍h-tē-siⁿ-kun ı̀-chı̀ kian.
Tun-chhin-bo̍k-lı̂m chō hiong-lí,
sù-hái-it-ka khai sin ki.
Tāi-soat-san lo̍k choē hô-chhoan,
chhoan-chhoan koè-hóng Miâu-le̍k koān.
Chhiong chek thó͘-tē chiâⁿ pı̂ⁿ-goân,
koàn-ak chhân-hn̂g lông-ka hoan.
Chhoan tiong chi chùn Āu-liông-khe,
liû koàn choân kéng ná tōng-me̍h.
Khoàⁿ chı̄n khe-piⁿ jı̂n-kan-sè,
ūi lí liû-thoân Lí Chhân-lê.
Chhân-lê pún-che̍k Hok-ki chhun,
chu chá pháiⁿ miā sit thian-lûn.
Pē-bú siang bông bô lâng sioh,
sàn kah ná kúi lia̍h-lia̍h-tio̍h.
Ta̍k-jı̍t chhut mn̂g khioh chhân-lê,
taⁿ khı̀ ke-lō͘ lâi kiò bē.
Chı̍t-tǹg koè-liáu sǹg chı̍t-tǹg,
tan-i chháu-liâu tō hân-sng.
Siâng chhun chı̍t-ē Tiuⁿ goân-goē,
ba̍k-chiu khoàⁿ koân bô khoàⁿ kē.
Chhek-hā iok ū sam chhian-kim,
jû-hoa-sù-gio̍k lâng-lâng him.
Toā--ê jı̄--ê lóng chhut kè,
kè hō͘ mn̂g tong hó chhin-ke,
chí chhun iau-lú Tiuⁿ Gio̍k-chu,
kàu taⁿ iáu-boē tiāⁿ chhin-sū.
Chhin-sū m̄-sı̄ bô teh chò͘,
tá phoà hō͘-tēng moâi-lâng pô͘;
saⁿ jı̍t chı̍t-choā lâi thê chhin,
khah-su Gio̍k-chu m̄ kı̀ⁿ bı̄n.
Chit-pêng iân-tâu siàu-liân ke,
hit-pêng hó-gia̍h choē chhù-thé;
jı̄m i kóng phoà moâi-lâng chhùi,
Gio̍k-chu sim-thâu chēng jû chúi.
Goân-goē ná tán sim ná kip,
khǹg i m̄-thang siuⁿ kò͘-chip;
iân-tâu hó-gia̍h lí m̄ kè,
táu-tí siáⁿ khoán li chiah beh.
Gio̍h-chū chhiò-chhiò ı̀n a-tia,
iân-tâu iā boē chún pn̄g chia̍h;
hó-gia̍h nā sı̄ m̄ tín-tāng,
kim-soaⁿ gı̂n-khò͘ chiàu siông khang.
Pı̂n-chiān hù-hùi lóng sı̄ miā;
in-iân nā kàu chū-jiân chiâⁿ,
Lâng nā láu-sı̍t khéng phah-piàⁿ,
koh khah sàn goā mā m̄ kiaⁿ.
Gio̍h-chū oē to kóng boē liáu,
goân-goē í-keng tòng boē tiâu.
Lí nā hó bái m̄ chai kang,
chiong lí kè hō͘ sòng-hiong lang.
Goân-goē ná mē ná siū khi,
chhin-chhiūⁿ ngiâ-sı̂n bú tâng-ki.
Siang-chhiú iap toà ka-chiah āu,
chı̍t-lō͘ tiô chhut mn̂g-kha-kháu.
Chhàu-khám gū-tio̍h Lí Chhân-lê,
iân-lō͘ taⁿ-tàⁿ teh kiò bē.
Sūn chhùi mn̄g i “siàu-liân-ê!”
kin-nı̂ kúi hoè chhoā bó͘ boē,
Chhân-lê chı̍t-sı̂ tńg boē koè,
m̄-chai i teh siūⁿ siáⁿ-hoè;
goân-goē koh chai mn̄g chit-pái,
Chhân-lê chiah chai sı̄ siáⁿ-tāi;
chek-sı̂ hı̄ⁿ-jia̍t bı̄n hoat-hông,
pháiⁿ-sè pháiⁿ-sè ı̀n siaⁿ kóng.
Ka-kı̄ saⁿ-tǹg chia̍h boē pá,
ná ū khùi-la̍t thang hó-chhoā.
Bô siūⁿ goân-goē hó bı̄n-sı̂n,
hoê kóng bô chı̂ⁿ bô iàu-kín;
goán tau Gio̍k-chu iáu boē kè,
i siōng kà-ı̀ chit-khoán-ê.
Lí kín khı̀ choē moâi-lâng-pô,
jit-kı̂ sı̂-sı̂n tiāⁿ hō hó.
Bián siu phèng-kim bián lô-kó͘,
thān chá chhoā-chhoā khı̀ chò bó͘.
Chhân-lê thiaⁿ liáu kiaⁿ chı̍t-tiô,
ı̀n kóng goân-goē mài kún-chhiò.
Kùi-hú chhian-kim súi ū miâ,
toā-toā sè-sè lóng chai-iáⁿ.
Chng nāi siàu-liân chı̍t-toā-tui,
chhù-chêng chhù-āu teh pâi tūi.
Sàn kah chhiūⁿ goá chit-chióng lâng,
poàⁿ-mı̂ mā boē chò͘ bı̂n-bāng.
Goân-goē sûi-sı̂ tńg bı̄n-sek,
goá bô kap lí teh chhiùⁿ khek.
Oē kóng chhut chhùi chiū-sı̄ oē,
lí kín khı̀ chiong moâi-lâng choē.
Chhân-lê khoàⁿ i chin chèng-keng,
chit-lia̍p sim-koaⁿ pho̍k-pho̍k-chhéng.
Saⁿ-pō͘ oāⁿ chò͘ nn̄g-pō͘ cháu,
khı̀ chhoē moâi-lâng lâi in tau.
Moâi-lâng chı̍t kàu chhiáⁿ jı̍p chhù,
tng-thâu-tùi-bı̄n mn̄g Gio̍k-chu.
Lân-tit Gio̍k-chu m̄ nā súi,
chin-chiàⁿ iā bô tham hù-kùi.
Khoàⁿ i Chhân-lê lâng tiau-tı̍t,
jı̄n-chin phah-piàⁿ koh láu-sı̍t.
Hoê kóng nā bô saⁿ khı̀-hiâm,
goān-ı̀ thok sin kap i tiàm.
Goa̍t-hā-ló-jı̂n hó khan-sêng,
toà lâi chhun-hong jı̍p chhù-keng.
Chiông-chhú hân-mn̂g chhoe-ian khí,
hoa-khai-pèng-tè liân-lí-ki.
Chhân-lê chiàu siông khioh chhân-lê,
ta̍k-jı̍t taⁿ khı̀ ke-lō͘ bē.
Sui-jiân chóng thàn bô loā-choē,
chı̄n só͘-ū-ê kau hiân-chhe.
Gio̍k-chu chhı̂-ka chin khı̂n-khiām,
thāi kun un-jiû koh thé-thiap.
Chhù-kak ke-thı̂ chiū khí-chhn̂g,
lo̍h-tû chhin chhiú khoán chá-tǹg.
Bô-hiâm sàn lâi bô-hiâm khó͘,
bô-hiâm pe̍h-pn̄g phoè chhài-pó͘.
Hoaⁿ-hoaⁿ-hí-hí sàng chhut mn̂g,
khoài-khoài-lo̍k-lo̍k ngiâ kun tńg.
Chı̍t-pái hong-thai lâi koè kéng,
toā-hō͘ soà-chiap lo̍h boē thêng.
Chı̄n-ba̍k só͘-khoàⁿ sı̀-chiu-ûi,
chhân-hoâⁿ khe-kau lóng tiòng chúi.
Chhân-lê tiàm chhù tı̍t-tı̍t tán,
tán-hāu hó-thiⁿ thang sûn-chhân.
Hó-put-iông-ı̄ⁿ thiⁿ pàng chheng,
koáⁿ-kín chhut-mn̂g khı̀ bô-êng.
Tang sai lâm pak si-koè sûn,
sûn kah jı̍t-àm kı̄n hông-hun.
M̄-bián kóng-tio̍h khioh chhân-lê,
liân hô͘-sı̂n to bô teh chhoē.
Thiⁿ-sek chı̍t-hun chı̍t-hun àm,
ná àm Chhân-lê sim ná tam.
Khioh bô poàⁿ-lia̍p thang hó bē,
m̄-káⁿ tńg-khı̀ kı̀ⁿ hiân-chhe.
Jı̂n-seng chō-gū lân ū-liāu,
lâng teh tô͘-bô͘ thiⁿ teh chhiâu.
Sim-koaⁿ chheng-khı̀ kha pō͘ chiàⁿ,
téng-koân ū ba̍k oē chai-iáⁿ.
Chhân-lê sı̀-koè kho̍k-kho̍k-se̍h,
se̍h kau hù-kı̄n Āu-liông khe.
Chē tiàm chhiū-kha teh hioh-khùn,
tiám chı̍t-ki hun tháu sim-būn.
Suh liáu sūn chhiú tı̀m lo̍h khe,
hiông-hiông to̍h chhut chı̍t-pha hoé.
Chhân-lê hòⁿ-kı̂ kı̄n chêng khoàⁿ,
khe-tiong chı̍t-khut o-chúi-choâⁿ.
Tng-sı̂ ô͘-chúi chin hi-hán,
beh chhoē tio̍h i bô kán-tan.
Chhân-lê ı̀-goā lâi hoat-kiàn,
seng-oa̍h khò i tit kái-siān.
Chiông-chhú tû liáu khioh chhân-lê,
iā taⁿ o-chúi khı̀ kiò bē.
Chı̍t-hun chı̍t-sián ta̍uh-ta̍uh chek,
chek kàu khe-chhoan chiâⁿ hái-he̍k.
Hit-nı̂ goân-goē chò toā-siū,
iau chhiáⁿ chhin-lâng kap pêng-iú.
Nn̄g lâng siū chhiáⁿ chin hoaⁿ-hí,
kàu sı̂ iā toà lé-mı̍h khı̀.
Lé-mı̍h kiōng gı̂n chit-chheng niú,
hun-khui tē-tı̄ nn̄g-kha siuⁿ.
Téng-koân iû-goân pho chhân-lê,
iōng tàⁿ taⁿ-khı̀ chò hō-lé.
Lēng-goā chún-pı̄ chı̍t-bān biú,
oāⁿ chō gı̂n-phiò khǹg sin-chiūⁿ.
Siūⁿ kōng nā-sı̄ ū ki-hoē,
thang ǹg chhin-lâng bé thó-tē.
Khoán hó chhân-lê kap Gio̍k-chu,
sio-chhoā tò-tńg āu-thâu-chhù,
nn̄g-ê liân-kín tāi-siag kàu,
tı̄ hia kap lâng teh phò-tāu.
Khoàⁿ-kı̀ⁿ Chhân-lê taⁿ-tàⁿ lâi,
tiau-kang phı̀-siùⁿ pò lâng chai.
Chhân-lê chhiò chhiò bô ı̀n siaⁿ,
Gio̍k-chu iā ké m̄ chai-iáⁿ.
Tán-hāu ûi toh chē chò-hoé,
Chhàn-lê khui chhùi mn̄g tāi-ke.
Siaⁿ-lâng ū tē thang hó bē,
goá kap Gio̍k-chu siūⁿ beh bé.
Liân-kín thiaⁿ-tio̍h khí ài-chhiò,
chhiò kah sin-khu tı̍t-tı̍t iô.
Nā lí Chhân-lê beh bé tē,
goán goān sǹg lí poàⁿ-chiat kè.
Khoàⁿ-lâng bô-tit toā-sè ba̍k,
lám-bé lâu ū chı̍t-pō͘ that.
Khi-liông-khin-siān chhian m̄-thang,
nńg-soh iā oē phoa̍h-tó lâng.
Chhân-lê mn̄g kóng kiám ū-iáⁿ,
nn̄g-ê liân-kín tâng ı̀n-siaⁿ.
Lí nā chı̂ⁿ sûi the̍h-chhut--lâi,
goán chiū chiàu iok saⁿ khoán-thāi.
Chhân-lê chek-sı̂ kiâⁿ chı̀n-chêng,
pài-thok tiūⁿ-lâng lâi chò-chèng.
Sı̀-lâng chhiam-jı̄ kiam khàm-ı̀n,
bián-tit āu-jı̍t pháiⁿ khoàⁿ bı̄n.
Chhiam-liáu Chhân-lê chhiú jı̍p hoâi,
the̍h-chhut gı̂n-phiò toh-téng pâi.
Gı̂n-chhut hoè-tiāⁿ chiàu iok-sok,
liân-kín gêng-kah thâu sio-kho̍k.
Tit-tio̍h thó͘-tē sim hoaⁿ-hí,
Chhân-lê tāng-kang bô iân-tı̂.
Siòng-tio̍h tng-sı̂ ê hâng-chhı̄,
sûi-sı̂ lo̍h-khı̀ chèng âng-khı̄.
Chı̍t-châng chèng-liáu koh chı̍t-châng,
chı̍t-tang siu-liáu koh chı̍t-tang.
Chhun-khı̀ chhiu-lâi bô liáu sı̂,
kàu-boè gô-chhut chı̍t-phiàn thiⁿ.
Jı̂n-seng chāi-sè ná bı̂n-bāng,
sı̂-kan chı̍t-kàu chúi lâu tang.
Sêng-pāi tit-sit mài kè-kàu,
pó lí sim-chheng chia̍h kàu lāu.
Bô loân hù lâi bô oàn pı̂n,
chho-chhài jı̍p-chhùi ná san-tin.
Chiū boē ko-hū Āu-liông khe,
ūi lí liû-thoân Lí Chhân-lê.
