Lı̂m Láu-sı̍t
Tâi-oân kó͘-chá chin ū bı̄,
bı̂n-hong sûn-phok kāu chêng-ı̀.
Chhù-piⁿ kè-piah hó chò-hoé,
ke-thâu bat kàu hāng-á boé.
Toà sı̄ tek-lı̂ thô͘-chhù-hiāⁿ,
êng--lâi khoàⁿ-hı̀ sái gû-chhia.
Ti-á gô-á tàu-tı̄n kiâⁿ,
ke-á ah-á ná chhin-chiâⁿ.
Thàu-chá chhut-mn̂g oē sio-chio,
jı̍t-àm siu-kang oē sio-kiò.
Chhiū-kha hap-sian sı̄ siông-sū,
tiâⁿ-chêng ha-tê chı̍t-po͘ kú.
Sàn-pō͘ tò-chhù ū chháu-po͘,
thit-thô sı̀-koè choân sı̄ thô͘.
Kiâⁿ-lō͘ bô ê chhēng ba̍k-kia̍h,
koè-hô bô kiô khò chûn-chiah.
Kóng tio̍h chûn-chiah boē kı̀m--tı̍t,
siūⁿ khí pak-pō͘ Lı̂m Láu-sı̍t.
A-niâ chá-chá chiū koè-sin,
lâu in A-tia siú ko͘-bı̂n.
Pē-kiáⁿ nn̄g-tāi koàn chûn-hō͘,
Tām-chúi hô-kı̂ⁿ lâi the-tō͘.
Kū chûn chı̍t-chiah saⁿ i-oá,
tâng-tiⁿ tâng-khó͘ tâng tio̍h-boâ.
Hù-kı̄n chng-thâu ū tāi-chı̀,
sûi-kiò-sûi-kàu bô iân-tı̂.
Chhân-hn̂g siu-koah nā khiàm-kang,
chhoē in pē-kiáⁿ siōng ún-tàng.
Ū lâng koè-hô bô toà chı̂ⁿ,
pe̍h-chiap pe̍h-sàng chhiò-bi-bi.
Jia̍t-sim kong-ek chù kah-téng,
ti-chiok-siông-lo̍k sim-koaⁿ chheng.
The-tō͘ chit-hâng bô khùiⁿ-oa̍h,
put-pí pa̍t-hâng hó siu-soah.
Lâng-kheh siông ū kip-sū chhoē,
saⁿ-khiⁿ-poàⁿ-mı̂ ia̍h tio̍h the;
chı̍t-jı̍t chóng thàn bô kúi kho͘,
chí-ū kàu-gia̍h pá pak-tó͘.
Seng-oa̍h sè-kài nn̄g-pêng hoāⁿ,
kheh-lâi kheh-khı̀ iáⁿ sêng toaⁿ.
Hit-nı̂ A-tia iā lāu-khı̀,
pàng i chı̍t-lâng chin hi-bı̂.
Pún-lâi siūⁿ beh lı̄-khui hô,
cho͘ chı̍t-khu-chhân thang chèng-choh.
M̄-koh hoan-thâu siuⁿ tò-tńg,
hù-kı̄n the-tō͘ ko͘-chı̍t-mn̂g.
Chhun-bı̂n koè-hô tan khò i,
û-sim-put-jím pak boē lı̄.
Chı̍t-jı̍t hô-piⁿ teh tán kheh,
chı̍t-ūi hoê-siūⁿ chiân lâi chhoē.
Sin chhēng phoà-siùⁿ pek-la̍p i,
beh khı̀ tùi-hoāⁿ pān tāi-chı̀.
Láu-sı̍t chiong chûn the-koè hô,
khò-hoāⁿ tú beh chhiáⁿ i lo̍h.
Hut-jiân hit-ê hoê-siūⁿ kheh,
kóng i mı̍h-kiāⁿ boē-kı̀ the̍h.
Láu-sı̍t lóng bô tē-jı̄ kù,
sûi-sı̂ chiong chûn tò-thè lu.
chûn-chiah lu-kàu beh khò-hoāⁿ,
hoê-siūⁿ oē-thâu iū hoan-soa.
Kóng mı̍h bô the̍h bô iàu-kín,
chhiáⁿ i chiong chûn oa̍t-tńg-sin.
Láu-sı̍t oàn-giân bô poàⁿ siaⁿ,
siūⁿ i sū hoân sim bô-tiāⁿ.
Jı̄-chhù lâi kàu tùi-bı̄n hoāⁿ,
hoê-siūⁿ iū-koh tńg sim-koaⁿ.
Kóng i tāi-chı̀ bô hiah kip,
lēng-khó hoê biō chiong keng sı̍p.
Láu-sı̍t chài-chhù oa̍t tò-tńg,
the kah io sng kha-chhiú nńg.
Siàⁿ-chai hoê-siūⁿ lāu-thian-thó,
iū kóng tāi-chı̀ pān khah hó.
Án-ni lâi-hoê kiōng gō͘-choā,
chóng-soàn chiong i sàng-koè hoāⁿ.
Lo̍h-chûn liān chı̂ⁿ ia̍h bô the̍h,
khí-kha chiūⁿ-lō͘ tı̍t-tı̍t-lê.
Láu-sı̍t toā-khùi chhoán-boē-tiāⁿ,
hit-thâu iū kı̀ⁿ hoê-siūⁿ iáⁿ.
Siang-keng kok kng chı̍t chio̍h-bō,
chài-chhù chhiáⁿ i the-koè hô.
Lo̍h-chûn ba̍k-chiu khoàⁿ Láu-sı̍t,
kóng i sim-hó lâng tiau-tı̍t.
Goá ê sin-piⁿ bô toà chı̂ⁿ,
nn̄g-tè chio̍h-bō sàng hō͘ lí.
Chio̍h-bō sı̂n-kı̂ hui siông-mı̍h,
lí tio̍h hó-hó pó-sioh i.
Seng-oa̍h nā-sı̄ ū khiàm-khoeh,
thang chiong chio̍h-bō thia̍p chò-hoé.
Chhùi liām tang-sai-lâm-pak-hong,
chiong lí só͘ ài tùi i kóng;
chài liām kim-bo̍k-chúi-hoè-thó͘,
sim bô cha̍p-liām tı̍t-tı̍t ho͘;
bô-lūn bí iû chiùⁿ chhò chhâi;
i oē thè lí bō chhut--lâi,
kóng soah chiong bō kau-hō͘ i,
hui-chhiú kò-pia̍t lâi saⁿ-sı̂.
Phı̂ⁿ-chó͘ khoat-chí siàu hoè-siū,
Siông-ngô͘ chiàu-kiàⁿ hiâm iông-chhiú.
Chio̍h-chông i-sı̍t koàn sù-lı̂n,
iū-oàn miā tiong peh-jı̄ khin.
Būn kun tàu-tí sı̄ hô in?
kóng phoà m̄-ta̍t saⁿ-sián-gı̂n.
Pò-chai pı̂n-khó ū lâng pı̄,
êng-hoâ-hù-kùi siáⁿ-lâng sı̂.
Jı̂n-kan lân-tit Lı̂m-láu-sı̍t,
tām-phok kham-tit kı̀ chı̍t-pit.
Sui-jiân châi-pó sàng-jı̍p mn̂g,
iû-goân the-chûn tō͘ saⁿ-tǹg.
Tû-liáu kiù-pı̂n chō͘ koáⁿ ló,
m̄-bat ūi kí thia̍p chio̍h-bō.
Kha-ta̍h-sı̍t-tē pō͘-pō͘ tiāⁿ,
Tām-chúi hô-kı̂ⁿ liû hong-miâ.
Khu Bóng-sià
Chá ū chı̍t-lâng Khu Bóng-sià,
thiaⁿ kóng chêng-sı̀ moâ-hı̂ chiaⁿ;
siu-liān tō-hēng kúi-à nı̂,
put-hēng hō͘ lâng thāu-thāu--sí.
Sim hoâi put-pêng lâi choán-sè,
tâu-thai Khu-sı̀ⁿ goân-goē ke.
Chhin-chhiūⁿ teh pò chhân-lê oan,
ài chhòng-tı̄ lâng kò lâng oàn.
Sè-hàn chhong-bêng gâu tha̍k-chu,
koè-ba̍k put-bōng hó kang-hu.
Toā-hàn kim-chı̂ⁿ khoàⁿ bô tāng,
chiàⁿ-chhiú the̍h--lâi tò-chhiú pàng.
Chhut miâ hui-hō͘ pāi-ka-chú,
chò chı̄n thian-hā bô-liâu sū.
Ná-chún liû-chhiⁿ ūi gán koè,
khong lâi jı̂n-seng kiâⁿ chı̍t-hoê.
Hit-nı̂ Bóng-sià tú cha̍p-jı̄,
ke-ke hō͘-hō͘ koè sin-nı̂.
Tiuⁿ-teng kat-chhái hó kiat-tiāu,
phàu-siaⁿ liân-liân chiūⁿ hûn-siau.
Ke-thâu hāng-boé nāu-chhı̄-chhāⁿ,
toā-keng sè-keng âng-liân tah.
Lāng-lêng lāng-sai jia̍t-kún-kún,
hoaⁿ-thâu-hí-bı̄n ngiâ sin-chhun.
Chí-ū chok-gia̍t Khu Bóng-sià,
chún-pı̄ moâ-saⁿ kúi-à niá;
sı̀-koè khı̀ kho͘ gín-á lâi,
àm-tiong chhoā-jı̍p pâng-keng lāi.
Chı̍t-lâng nn̄g-niú gûn hō͘ in,
phiàn in moâ-saⁿ chheng chiūⁿ sin.
Chiong gûn kat-toà ka-chiah āu,
soà chiong gín-á siàn hō͘ háu.
Gín-á tio̍h kiaⁿ tı̍t-tı̍t-cháu,
chhin-chhiūⁿ hàu-lâm tńg in tau.
Toā-lâng khoàⁿ tio̍h khı̀-soa̍h-soa̍h,
mn̄g khoàⁿ tàu-tí sı̄ àn-choáⁿ.
Gín-á chhiú pí Khu Bóng-sià,
tāi-ke bián siūⁿ chiū chai-iáⁿ;
iū-sū chit-chiah té pı̀ⁿ-kúi,
siūⁿ beh cháu khı̀ chiong i tûi.
Oa̍t chı̍t-lı̀n-tńg khoàⁿ tio̍h chı̂ⁿ,
khı̀ siau chı̍t-poàⁿ bı̄n tńg ı̂ⁿ.
Kín chiong moâ-saⁿ thǹg--khit--lâi,
phé! phé! chı̂ⁿ lâi lâng bô-tāi.
Khó-thàn Bóng-sià tú cha̍p-jı̄,
chiū chai jı̂n-sim hó chhòng-tı̄.
Hoân-sū kı̀ⁿ-nā tham chhut-thâu,
bı̄n-chú théng hó lo̍h tē sàu.
Toā-hàn chı̍t-pái tı̄ ke-lō͘,
bô-liâu kap lâng lâi táⁿ-tó͘.
Kóng i m-bián poàⁿ-sian chı̂ⁿ,
oē-thang chia̍h-mı̄ chiōng thâu thı̀.
Sui-jiân bat i Khu Bóng-sià,
chèng-lâng iû-goân m̄ sı̀n siâ.
Saⁿ-tó͘ tāi-chı̀ nā ū chiâⁿ,
pêng-iú chhut-bı̄n pān toh chhiáⁿ.
Kóng hó Bóng-sià kiâⁿ thâu-chêng,
tāi-ke toè āu khoàⁿ hun-bêng.
Khoàⁿ i iô-iô koh pái-pái,
toā pō͘ ta̍h-jı̍p tiàm-á lāi.
Khui-chhùi kiò lâi mı̄ chı̍t-oáⁿ,
saⁿ-nn̄g-ē-chhiù hò͘ chı̍t-poàⁿ.
Gia̍h-thâu ia̍t-chhiú kiò thâu-ke,
pò i àⁿ-thâu khoàⁿ oáⁿ-té.
Hô͘-sı̂n báng-á kok chı̍t-chiah,
chit-khoán mı̄ beh cháiⁿ-iūⁿ chiah.
Thâu-ke liân siaⁿ chhē sit-lé,
chhin sàng chhut mn̂g chı̂ⁿ bián the̍h.
Bóng-sià tek-ı̀ koh-chài kiâⁿ,
kiâⁿ jı̍p tùi-bı̄n lí-hoat-thiaⁿ.
Chē chiūⁿ í-téng chhiú pí thâu,
sai-hū sûi-sı̂ kiâⁿ kha-kàu.
Khoàⁿ i chhùi-tûn nn̄g-phiat chhiu,
mn̄g khoàⁿ beh thı̀ á-sı̄ siu.
Bóng-sià kheh-ba̍k ı̀n siaⁿ kóng,
“m̄-thı̀ lâu tè beh hióng-hok!”
Sai-hū thiaⁿ i siaⁿ-tiāu koân,
èng-kai sı̄ beh thı̀ ê khoán.
Chiū tı̄ tāng chhiú siu-bı̄n sı̂,
soà chiong nn̄g-phiat chhùi-chhiu thı̀.
Thı̀ liáu Bóng-sià ba̍k-chiu khui,
bong bô chhùi-chhiu siaⁿ ná lûi.
Goá kóng láu tè beh hióng hok,
cháiⁿ-iūⁿ bô chiàu goá iok-sok.
Sai-hū khoàⁿ i kho̍k-kho̍k hoe,
chı̂ⁿ m̄-káⁿ theh chū jı̄n soe.
Bóng-sià àm chhiò kúi-à siaⁿ,
pêng-iú iô-thâu pān-toh chiáⁿ.
Chhin chhiūⁿ chit-khoán bô-liâu sū,
chhı̀n-chhái khioh-lâi chı̍t ka-chù.
Nā-sı̄ beh chiong sûi tiâu siá,
théng hó chng moá chı̍t gû-chhia.
Bóng-sià khiā ke pháiⁿ chhù-piⁿ,
pêng-iú chhut-jı̍p chiú-bah tı̂ⁿ.
Ū êng chiū ài chhòng-tı̄ lâng,
boán-kéng chhe-liâng siang thâu khang.
Sin-piⁿ chí chhun kúi niú gûn,
pêng-iú sı̀-soàⁿ bô kiáⁿ-sun.
Khoàⁿ phoà sè-sū liāu âng-tı̂n,
siūⁿ beh thiàu hô khı̀ chū-chı̄n;
lân-lō͘ bô-lūn gū tio̍h sûi,
chiū mn̄g: “Goá beh khı̀ tó-ūi?”
Siūⁿ kóng siáⁿ-lâng ioh oē tio̍h,
chiong gûn sàng i khı̀ chia̍h-io̍h.
Chı̍t-ê mn̄g liáu koè chı̍t-ê,
mn̄g ka̍h sim hoân khí oàn-chheh.
Cháiⁿ-iūⁿ chit chng bô gâu-lâng,
oē chai goá beh chiōng miā pàng.
Chhàu-khám chı̍t-ê a-pô lâi,
āiⁿ-sun taⁿ-chúi chhoán-ha̍ihⁿ-ha̍ihⁿ,
Bóng-sià khui chhùi iā mn̄g i,
kiām chai goá beh tó-ūi khı̀.
A-pô thêng-chhoán ba̍k-chiu chhiâ,
khoàⁿ tio̍h mn̄g--ê sı̄ Bóng-sià.
Sûi-sı̂ pı̀ⁿ bı̄n tńg siū khı̀,
toā siaⁿ mē kóng “Lí khı̀ sí!”
Bóng-sià poàⁿ chhiò poàⁿ thı̂-khàu,
“sè-kan bô lâng lí siōng gâu.”
Kóng soah chiong gûn lâu hō͘ i,
tâu-sin jı̍p-hô bô koh khí.
Chhiàu-tâm jı̂n-seng jı̂n-siōng-jı̂n,
khin khoàⁿ sı̀-miā miā chū khin.
Bóng-sià chok-gia̍t chı̍t-si-lâng,
kàu-boé liân sí iā hí-lāng,
It-seng oa̍h tı̄ hı̀-pı̂ⁿ tiong,
khiok-chiong-jı̂n-sàn khong tiû-tiòng.
Chhong-bêng hoán pı̄ chhong-bêng gō͘,
èng-giām chit-kù thoân chhian-kó͘.
