Tâi-oân Sı̄ Pó-tó
Tâi-oân hó! Tâi-oân hó !
Tâi-oân lâng kóng sı̄ pó-tó,
kam-chià tiⁿ, tiū-á ı̂ⁿ,
phang-hoe koé-chí moá-moá sı̄.
Ông-lâi, si-koe, poa̍k-á, nāi-chi,
phû-tô, kin-chio, soaiⁿ-á, chı̀m-khı̄;
chhiáⁿ lín ta̍k-hāng chia̍h khoàⁿ māi,
chia̍h-liáu pau lín chhiò-hai-hai.
Tâi-oân hó ! Tâi-oân hó !
Tâi-oân lâng kiò Bí-lē-tó,
soaⁿ-niá chhiⁿ, chhân-iá pı̂ⁿ,
sù-kùi-jû-chhun hó kéng-tı̀.
A-lí-san téng, Jı̍t-goa̍t-thâm piⁿ,
Thian-siông choa̍t kéng, Hêng-chhun hái kı̂ⁿ;
chhiáⁿ lín ta̍k-ūi lóng khı̀ se̍h,
se̍h-liáu pau lín chhiò-he-he.
Tâi-oân hó! Tâi-oân hó!
Tâi-oân tiám-sim thong lâng po,
thng-thâu tiⁿ, sió kè-chı̂ⁿ,
chiūⁿ toh toā oáⁿ koh moán-kı̂ⁿ.
Oáⁿ-koé, bí-ko, bah-chàng, hı̂-kiⁿ,
kòng-oân, bí-hún, ō-chian, táⁿ-mı̄;
chhiáⁿ lín ta̍k-hāng lóng lâi chhí,
chhı̀-liáu pau lín chhiò-bi-bi.
Tâi-oân hó! Tâi-oân hó!
Tâi-oân lâng kiò Bí-lē-tó,
hó chèng-choh ! hó thit-thô !
Sı̍t-chāi kham chheng sı̄ pó-tó.
Sı̄ ! Pó ! Tó !
Kong-im Tio̍h Pó-sioh !
Iô à iô ! Iô koè kiô!
Kiô piⁿ chı̍t-châng chhiū,
chhiū-kha chı̍t-tè chio̍h;
ū lâng khiā teh khoàⁿ,
ū lâng chē teh hioh;
téng-koân bı̂-hong chhoe chhiū-hio̍h.
Kı̄n hông-hun, jı̍t sai chiò,
chhin-chhiūⁿ ko͘-niû jı̍p toā-kiō;
bûn-bûn-a chhiò, khin-khin-a kiò,
kiò goán kong-im tio̍h pó-sioh,
tio̍h ! pó ! sioh !
Liam Chhân-ne !
Liam chhân-ne! Liam chhân-ne!
Chhân-ne kı̀ⁿ lâng kho̍k-kho̍k poe,
poe-koè-lâi, poe-koè-khı̀;
hāi goán jiok ka̍h chhoán-boē-lı̄.
Liam chhân-ne! Liam chhân-ne!
Chhân-ne kı̀ⁿ lâng kho̍k-kho̍k-poe,
poe-kàu-tang, po͘e-kàu-sai,
hō͘ goán lia̍h--tio̍h lí tio̍h chai.
Kan-lo̍k !
Kan-lo̍k! Kan-lo̍k! Tit-tit se̍h,
ke-thâu se̍h-kàu hang-á-boé,
gín-á khoàⁿ-tho̍h chin ài toè,
A-kong-a khoàⁿ-tio̍h chhiò-he-he !
Kan-lo̍k! Kan-lo̍k! Tit-tit lı̀n,
chı̍t-pō͘ lı̀n pí chı̍t-pō͘ kín,
tang-thiⁿ lı̀n-liáu chhun-thiⁿ kı̄n,
bān-mı̍h it-chhè lóng oāⁿ sin.
Ku Chhiò Pih Bô Boé
Chı̍t-chiah pih, sô-à-sô,
sô chiūⁿ soa téng beh thit-thô;
hāⁿ-chı̍t-pō, siak-chı̍t-tó,
sı̀-kha-tiâu-thiⁿ sa lóng bô.
Chı̍t-chiah ku, cháu lâi khoàⁿ,
khoàⁿ i tàu-tí sı̄ àn-choáⁿ;
thâu tn̂g-tn̂g, chhùi choân soa,
siang-kha siang-chhiú bô teh hoāⁿ.
Há! Há!
Pih bô boé! Pih bô boé!
Bô boé tong-jiân péng-boē-koè.
Péng-boē-koè! Péng-boē-koè!
Chí-ū toà hiā kho̍k-kho̍k-seh.
Ná siūⁿ ná ài chhiò,
ná chhiò ná toā siaⁿ,
chhin-chhiūⁿ beh pò lâng chai-iáⁿ;
Pih bô boé! Pı̍h bô boé!
Chí-ū toà hia kho̍k-kho̍k-seh.
Bô phah-sǹg, chhū-chı̍t-tó,
ku iā péng sin kho̍k-kho̍k kō,
kō-koè-lâi ! Kō-koè-khı̀,
khah kō to-sı̄ kha tiâu-thiⁿ;
m̄ kam-goān, koh chhut la̍t,
chhut kah tn̂g-á phah sí-kat,
phah sí-kat, phah sí-kat!
Phah kah sí mā bô pān-hoat!
Chhūn-thâu chı̍t ē khoàⁿ,
khoàⁿ chı̍t-ē chin pháiⁿ-sè,
Goân-lâi ka-tı̄ iā bô boé!
Há! Há!
Ku chhiò pih bô boé.
