Chia̍h-chiú ê lâng.
Bô lim sio-chiú phı̂-phı̂ chhoah,
tú-tio̍h sio-chiú sı̄ lim boē soah.
Bô lim lâng gōng-gōng,
chiú lim lâng khong-khong.
Kóng-oē soah toā chı̍h,
iû-koh tı̍t-tı̍t thı̂.
Ba̍k-chiu soah khí-hoe,
kiâⁿ-lō͘ tı̍t beh poe,
Pû-á khoàⁿ chò sı̄ chhài-koe.
Kiâⁿ-lō͘ kha Ńg-Ńg,
chhù-lāi boē-hiáu tńg.
Tó teh poàⁿ-lō͘ khùn,
koâⁿ-kah sı̀-sı̀ chùn.
Ū-ê tó tı̄ toā-thiaⁿ thâu,
ū-ê chiú-chùi ná tio̍h-kâu.
Ū-ê chiú-chùi ba̍k bui-bui,
khoàⁿ-tio̍h pêng-iú chhùi khui-khui.
Chiú-chùi kóng oē soah làu-hong,
lāu-pē khoàⁿ chò sı̄ á-kong.
Ū-ê chiú-chùi kō thô͘-soa,
sái hit-lō gû-chhia lâi kā thoa.
Ū-ê kan-khó͘ ı̍t-tı̍t thò͘,
pêng-iú kui-tı̄n lâi chiàu-kò͘.
Chiú-chùi phû-phû kha khin-khin,
chhùi-noā-chúi sı̄ tha̍p-tha̍p tin.
Chiú-chùi lô-so kāu oē sái,
chı̍t-kù oē kóng kúi-lō-pái.
Ū-ê chiú-chùi chin gâu hoe,
chiú-chùi-ê loān tio̍h khah boē soe.
Ū-ê chiú-chùi chı̄n gâu-jû,
chı̍t-ê khám-khám ná chhiūⁿ gû.
Ū-ê chiú-chùi oē khí-kông,
sio-phah lı̀n-lòng kho̍k-kho̍k chông.
Ū-ê chiú-chùi chı̄n-chiàⁿ béng,
í-á toh-á koh loān-loān péng.
Ū-ê chiú-chùi sit lí-tı̀,
loān chò tāi-chı̄ koh tı̍t-tı̍t khı̀.
Hiō-kó sı̍t-chāi ài khó-lı̄,
tú-tio̍h chı̍t-pái tio̍h boē chhı̄.
Lim-chiú chı̄n-liōng sı̄ m̄-thang kek,
kiông kek lim-chiú sı̄ bı̄n le̍k-sek.
Lim hō͘-i sóng-sóng sı̄ khah tú-hó,
chiú-chùi kan-khó͘ sı̄ oē hoân-ló.
Hiaⁿ-tı̄ pêng-iú teh thit-thô,
Chùi-āu thiam-poe sı̄ put jû bô.
(Tâi-oân Gú-bûn goe̍h-pò tē 1 hō, 1977 nı̂ 5 goe̍h)
