Hut-chı̀-tek sı̄ 19 sè-kí, Eng-kok ê toā kho-ha̍k-ka. I ê êng-ū bô kái-piàn; sı̄ in-ūi i tı̄ bu̍t-lí-ha̍k, hoà-ha̍k kap tiān-chú-ha̍k, lóng-ū ke̍k tiōng-iàu úi-tāi ê hoat-bêng. Kàu tı̄ hiān-chāi; tı̄ bu̍t-lí-ha̍k ê khò-pún, iáu oē-thang khoàⁿ-tio̍h i ê siòng-phı̀ⁿ kap sió-toān. Siat-sú nā-bô i chiah-ê hoat-bêng, kin-á-jı̍t ê sè-kài iáu-bô hiān-chāi ê khoán-sit.
Ū chı̍t-pái, Eng-kok Hông-ka-chhı̀-giām-só͘ ê toā-lé-tn̂g, chē-moá chhut-miâ ê kho-ha̍k-ka; liân Eng-kok Hông-thài-chú iā tı̄-hia teh-chē. In í-keng chēng-chēng thiaⁿ Hut-chı̀-tek chı̍t-tiám-cheng kú ê kho-ha̍k ián-káng.
Tng ián-káng teh-beh kiat-sok ê sı̂, Hut-chı̀-tek choè-chhut chı̍t-hāng, sı̂n-kı̂ te̍k-pia̍t ê chû-tiān chhı̀-giām. Hit-sı̂ tāi-ke khoàⁿ-kàu chhut-sı̂n; koè chı̍t-chūn sı̂-kan liáu-āu, chiah toā-siaⁿ phah-phok-á, piáu-sı̄ khim-phoè him-sióng. Tng-sı̂ ê Hông-thài-chú, chiū-sı̄ āu-lâi ê Ài-tek-hoâ chhit-sè; khiā-khí-lâi kiàn-gı̄, beh khèng-chiok Hut-chı̀-tek kàu-siū ê sêng-kong. Tāi-ke koh toā-siaⁿ phah-phok-á, pí tē-it-pái koh-khah jia̍t-lia̍t.
Hut-jiân-kan tāi-ke lóng thêng-chí, toā-lé-tn̂g lóng chēng-chēng bô-siaⁿ; teh tán-hāu chit-ūi kho-ha̍k-ka, koh khí-lâi tâi-téng kóng tap-siā ê oē. Bô phah-sǹg, tán chin-kú, chit-ê lāu-kàu-siū lóng-bô koh chhut-lâi. In-ūi Hut-chı̀-tek ián-káng liáu, chá chiū liu-chhut-khı̀. I sı̄ liu-khı̀ tó-ūi? Goân-lâi i sı̄ kèng-khiân ê ki-tok-tô͘; i kèng-jiân liu-khı̀ chı̍t-keng sè-keng lé-pài-tn̂g; khı̀ hù i kàu-taⁿ m̄-bat khiàm-se̍k ê kı̂-tó-hoē.
(Tâi-oân Kàu-hoē Kong-pò tē 2092 kı̂, 1992 nı̂ 4 goe̍h)
