--hiàn hō͘ pı̄ⁿ-chhn̂g tiong ê lāu-bú
Sim-lāi bái ê kám-kak 1-chūn 1-chūn,
ná chhin-chhiūⁿ hioh-khùn ê sàu-kak siaⁿ,
tùi hn̄g-hn̄g ê só͘-chāi chiām-chiām kı̄n,
siaⁿ-im iā jú lâi jú toā siaⁿ.
Seⁿ goá, chhı̄ goá, kà goá, phoāⁿ goá 50-nı̂ kú ê lāu-bú.
Lí kiông-kiông beh ian-siau hûn-sàn, piàn-chiâⁿ khin-khin ê ian.
Sı̄ Chú ê thiàⁿ ê sı̄ I ho͘-tiàu, bô-kú beh tńg-khı̀ thian-ka?
Siáng ia̍h tòng bē tiâu,
tı̄ sè-chiūⁿ ê hêng-thé, chiong beh lı̄-khui.
Pē-bú koè-sin āu goá ē koh khah ko͘-toaⁿ.
Sè-sio̍k ê táⁿ-kek, oa̍h--teh ê ap-le̍k.
Chí-ū kā chhùi-khí-kin, taⁿ--khí--lâi.
Pah! Mah ! tio̍h tı̄ thiⁿ--nı̍h pang-chān, hō͘ goá ū khùi-la̍t.
Choa̍t-tùi bē tô-siám, choa̍t-tùi bē khut-lı̄.
Ngē-khı̀ tiām-tiām ū loē-hâm ê lāu-pē.
Lí ê ngē-kut sı̄ goán ê bô͘-iūⁿ.
Chhiong-moá châi-hoâ koh kian-kiông ê lāu-bú.
Goán ū iūⁿ o̍h iūⁿ soà o̍h bô chhin-chhiūⁿ.
M̄-kú goán chin phah-piàⁿ beh kap lâng pí-phēng.
Tiām-tiām jia̍t-sim pang-chān lâng kı̂-thāi bı̄-lâi.
Má-mah lí ê ba̍k-chiu m̄-bat koh thí-kim.
Tùi hūn-bê kàu kin-á-jı̍t iā í-keng 15 jı̍t--lah!
Iáu ū joā-chē iáu boē soah kap iáu boē kóng ê oē.
Siá kàu chia soà tòng-bē-tiâu lâi lâu chhut ba̍k-sái.
Lí ná m̄ sái-1-ē ba̍k-boé á-sı̄ ēng chhiú sió tēⁿ--1--ē.
Chò sió-khoá-á ê kau-tāi?
2-nı̂ chêng lāu-pē koè-sin, 2-nı̂ āu ê kin-á-jı̍t.
Kiám ē-tàng thoa-kàu mê-nı̂?
Thê-sim tiàu-táⁿ!
Chin kiaⁿ tùi tiān-oē thoân-lâi pháiⁿ siau-sit.
Hn̄g-hn̄g ê sí-sı̂n--ah!
Chhiáⁿ Lí m̄-thang hiah kín lâi.
Hō͘ goán bó-á-kiáⁿ ū khah chē ê sı̂-kan, sió-khoá saⁿ-sı̂--leh.
Má-mah ! Chhiáⁿ lí m̄-thang tiām-tiām m̄ kóng-oē.
Chiok hi-bāng lí kā goá nih--chı̍t--ē tio̍h-hó.
M̄-kú,lí khiok.... !
Ná kiâⁿ ná hn̄g ! Ná kiâⁿ ná hn̄g.
(Tâi-oân-jı̄ cha̍p-chı̀ tē 15 kı̂, 2003 nı̂ 3 ge̍h)
