Mô͘-sı̄

 Tı̄ Lûn-tun-siâⁿ ê tang-pêng ū chē-chē Iû-thài-lâng chò-hoé tı̄-hia khiā-khí, khah toā bı̄n sı̄ teh chò seng-lí; chóng-sı̄ oh-tit thàn-chia̍h. Bó͘-jı̍t ū chı̍t ê lāu-lâng miâ Mô͘-sı̄ tı̄ ke-lō͘ teh kiâⁿ, chin koáⁿ, ná chhin-chhiūⁿ phoà-pı̄ⁿ, pún sin ka-tı̄ teh liām kóng, thiⁿ-khı̀ bô kàu loā koâⁿ, ū chhut-jı̍t, goá thài-thó koâⁿ kàu án-ni. Tān m̄-chai beh án-choáⁿ ? kiaⁿ-liáu bô la̍t thang kiâⁿ kàu chhù. Kin-á-jı̍t chò che m̄ chiâⁿ seng-lí, koh bô siáⁿ-lâng bé, lı̄ bô siaⁿ thang o; lâng thiaⁿ-liáu iā m̄ chai i teh bē sáⁿ-hoè. Pak-tó͘ iau kàu phah-kiat-kiû, chin chiàⁿ khó-lı̂n tāi-ah ! Éng koè nā thàn bô chia̍h i ê chhù-piⁿ ū the̍h tām-po̍h chān i, taⁿ chit moá bô, in-ūi tı̄ in ê tiong-kan sit thé-biān, chı̍t hāng bô hāu-seⁿ, koh toā cha-bó͘-kiáⁿ khı̀ kè Ki-tok-tô͘. Chhù-piⁿ lóng hiâm i, chún i ê cha-bó͘-kiáⁿ khı̀ kè ı̄ⁿ-pang-lâng; kı̂-sı̍t bô iáⁿ, i pún-sin chin m̄ goān, tı̀-kàu bô beh jı̄n i chò kiáⁿ. Sui-jiân kàu hiah kan-khó͘, iā bô beh hō͘ i ê kiáⁿ-sài chān i. 
 Iû-thài-lâng pún gâu saⁿ chān, chóng-sı̄ in ū-ê nā khı̀ kap ı̄ⁿ-pang-lâng kè-chhoā, in chiū bô boeh pang-chō͘ i. Iû-thài-lâng ê koè-nı̂ kàu lah, chiàu in ê hong-sio̍k tio̍h chò koè-nı̂ cheh, iā tio̍h khı̀ hoē-tn̂g lé-pài. Kin ê-hng lāu-lâng siūⁿ bē tit-thang chò án-ni, sim chin iu-būn. Chá-chêng i toà tı̄ Ngô͘-lô-su-kok chò chhâi-hông, khah ū thàn, m̄ bián khoà-lū chhin-chhiūⁿ kin-á-jı̍t ê bô kàu. Chit ê chhám sı̄ tùi hō͘ Ngô͘-lô-su koáⁿ. Taⁿ lâi Eng-kok hut-jiân bô thâu-lō͘, lâng koh lāu lah ! chhù-piⁿ khoàⁿ-khin ēng thí chhiò ê oē kā i kóng, Taⁿ tio̍h khah sè-jı̄ kò͘ lí ê sè cha-bó͘-kiáⁿ leh ! bián tit i iā khı̀ kè hit-hō bô chheng-khı̀ ê lâng. Chit-hō oē thiaⁿ-liáu Sim-koaⁿ bē bián-tit toā kan-khó͘. 
 Koh chı̀n-chêng kiâⁿ bô loā-hn̄g, khoàⁿ-kı̀ⁿ i ê cha-bó͘-kiáⁿ lâi ngiâ chih i. Cha-bó͘-kiáⁿ khoàⁿ lāu-pē bān-bān á kiâⁿ, chiū khan i ê chhiú, bong tio̍h léng-ki-ki, sim-lāi kiaⁿ, lâu ba̍k-sái kóng, Án-pē ah, lí nā kàu chhù, goá chiū cháu-khı̀ bé chhâ khí-hoé hō͘ lí hang, bé tām-po̍h bah kā lí chú thng, chhin-chhiūⁿ goá ê lāu bó iáu oa̍h teh tı̄ Ngô͘-lô-su-kok só͘ chú ê. Lāu-pē kóng, sim-koaⁿ-kiáⁿ Lō͘-tek, m̄-thang bé hiah ê, kim mê-hng ū kúi-nā hāng khah iàu-kín tio̍h bé, chiū-sı̄ nn̄g ki la̍h chek, tām-po̍h-á bı̍t, nn̄g lia̍p-á pin-kó (in-ūi sim-koaⁿ lāi teh liâu-bāng Bí-sái-a phah-sǹg ê-hng ē kàu), lán tio̍h pı̄-pān siông-siông kı̀-tit Iâ-hô-hoa sèng ê sū sı̄ khah iàu-kín lán ê kı̀m-chia̍h. Lō͘-tek chai lāu-pē só͘ tùi-tiōng sı̄ hiah ê, só͘-í tiām tiām ı̀n i, Hó. 
 Chin khó-sioh ah ! Kiù-chú í-keng kàng-seng chheng goā nı̂ kú, Iû-thài-lâng iáu-kú m̄-chai, tāi-ke gōng-gōng chhin-chhiūⁿ Mô͘-sı̄ teh ǹg-bāng Bí-sài-a ē lı̂m-kàu hián-chhut toā koân-lêng. Chı̍t-chê chhoā i sı̀-soàⁿ ê peh-sèⁿ tùi ta̍k pang kok tò-khı̀ Iâ-lō͘-sat-léng ê kiaⁿ-siâⁿ. Nı̂ koè nı̂, chı̍t ê cheh koh chı̍t ê cheh, Bí-sài-a lóng bô lâi, chiàu in só͘ phah-sǹg, Mô͘-sı̄ lóng bô sit-bāng, tiāⁿ-tiāⁿ kóng, Taⁿ ǹg-bāng āu ê cheh. 
 In kiâⁿ koh chı̍t tè-á lō͘ chiū tú-tio̍h sio-bat ê chhù-piⁿ, sı̄ bē hı̂ ê hū-jı̂n-lâng, miâ kiò Lı̄-pek-ka. I chiū thêng kha, chheng-ho͘ i kóng, Mô͘-sı̄ peh ah ! lí chiah-kú chin toā tè; goá kiò lí lâi goán tau chē, lí lóng m̄, Lō͘-tek ah, lí iā sı̄ án-ni, káⁿ-sı̄ siūⁿ, lí ê ché-hu teh khui tiàm pí goán khah thé-biān, Mô͘-sı̄ kia̍h chhiú kóng, Lı̄-pek-ka ah, lí m̄ thang kóng chit-hō khau-siah ê oē, goá lāu leh, hı̄-khang tāng, Lō͘-tek it tio̍h ài thàn kúi-ı̂ⁿ, put-sı̂ koan-sim khoà-lū. Goán ū toā chhut-la̍t ài tòng Má-lı̄-a, i m̄ thiaⁿ khó͘ khǹg, chò i khı̀ kè hit-hō lâng, goán chiū bô hoat--tit. 
 Lı̄-pek-ka tèⁿ-chheⁿ kóng, Lín siáⁿ-sū hiah gōng thiaⁿ lâng ke-kóng-oē, chiū sit-chı̀ kàu án-ni. Kóng, chò in kóng, siat-sú nā kóng tio̍h goá, goá chiū tèⁿ bô thiaⁿ-kı̀ⁿ. Á-sı̄ kóng, káu teh pūi ! Lâng gê-sé ê oē bô iàu-kín, chò lí pàng-sim. Goá khoàⁿ lí ê kan-khó͘ hián-chhut tı̄ bı̄n, kin-á-jı̍t ū seng-lí bô ? Lō͘-tek thè i kóng, Bô, chí ū bē nn̄g tiâu-toà, 40 chı̂ⁿ nā-tiāⁿ. Beh án-choáⁿ pān cheh koè-nı̂, Lı̄-pek-ka kóng, Chin-chiàⁿ khó-liân tāi-ah ! Taⁿ ê hng tio̍h hō͘ goá chhiáⁿ, hı̂ kap ko-pi nā-tiān, sı̄ piān chhài m̄ thang khı̀ hiâm, Lō͘-tek hoaⁿ-hí ı̀n hó, sim-lāi siūⁿ, tek-khak ē chia̍h kàu pá-pá, koh hı̂, kap ko-pi lóng-sı̄ ha̍h goán pē seng-khu só͘ khiàm ê. Mô͘-sı̄ iā siūⁿ siàu-liām chá-chêng boē ū kàu chiah kan-khó͘, iā ū án-ni thang chia̍h.
 Kiâⁿ kàu chhù, Lō͘-tek khı̀ bé chhâ khí-hoé hō͘ lāu-pē hang; chiū khı̀ Hoē tn̂g the̍h tām-po̍h sèng ê mı̄-pau chı̍t tiám phû-tô chiap, bı̍t kap pin-kó chiàu in ê lē. Khó-sioh Mô͘-sı̄ lóng bē sio, ná-hang ná koâⁿ, chiū kā Lō͘-tek kóng, goá káⁿ-sı̄ kám-tio̍h, bē tit thang khı̀ hō͘ Lı̄-pek-ka khoán-thāi, lí ka-tı̄ khı̀ hó mah ? Lō͘-tek khoàⁿ i hiah kan-khó͘ sim put an kóng, án-pē ah ! Ê-hng goá m̄ kam lı̄ lí. Chiū khan i khı̀ tó, chhiáⁿ chhù-piⁿ chı̍t ê khı̀ kā Lı̄-pek-ka kóng. Lı̄-pek-ka thiaⁿ tio̍h chiū kià mı̍h hō͘ in chia̍h. Lō͘-tek khoàⁿ pē teh khùn m̄ káⁿ phah chhéⁿ, chiū pâi-toh, lēng-goā pâi chı̍t-ūi ǹg-bāng Bí-sài-a ē lâi tâng chē toh. Tú teh pâi ê sı̂ ū lâng the̍h chı̍t tiuⁿ phoe, sı̄ in A-ché kià-ê, chhiat-chhiat kiû pē sià-bián iā kóng, Goá ū thé-thiap lāu-pē kap sió-moē iau, koâⁿ, kiû lín lâi kap goá toà, hō͘ goá chiàu-kò͘ hó mah ? Nā m̄, tio̍h chún kiáⁿ-sài the̍h mı̍h kap chı̂ⁿ hō͘ lín koè-nı̂, Lō͘-tek tha̍k liáu m̄ káⁿ kā lāu-pē kóng, Mô͘-sı̄ khùn tāng-bı̂n kàu thiⁿ-kng lóng m̄ chai Hoē-tn̂g pûn hō-thâu chò koè-nı̂ ê siaⁿ-im. Khùn chhéⁿ, Lō͘-tek oá i ê sin-piⁿ mn̄g an, soà kiong-hí koè-nı̂, kā i kóng, Lí chin hó khùn. Pē chiū ēng Iû-thài ê oē kā i chiok-hok. Lō͘-tek chin kı̂-koài i ê lāu pē bô chhin-chhiūⁿ téng-nı̂, iàu-kín koè sin-nı̂. I teh pı̄-pān ko-pi ê sı̂ lâu ba̍k-sái hoân-ló lāu-pē sit cheng-sı̂n, pı̄-pān bêng-pe̍k kiò lāu-pē lâi chia̍h, i kóng, koai-kiáⁿ ah, lí ū pı̄-pān Bí-sài-a ê ūi, chin hó ah, soà sè-á siaⁿ kóng, mn̂g iā tio̍h khui. Goá chai I kin-á-jı̍t tek-khak ē lâi. 
 Chē lo̍h kı̂-tó, kı̂-tó liáu, Lō͘-tek khoàⁿ lāu-pē ê bı̄n, hut-jiân ū toā kng, I chiū khí-lâi kóng, Bí-sài-a lâi lah. Seng-khu gı̂-gı̂ chhoah, koh kóng, Lō͘-tek ah ! Bí-sài-a lâi lah ! I ê miâ chò Sèng !
 Koh liân-liân kiò Lō͘-tek, Lō͘-tek ah, Lâi lah ! Sı̄-tı̀, tı̀ Ai ah ! Ai ah ! Sı̄ tı̀; chhı̀-á bián-liû, Kóng liáu poa̍h-tó tı̄ thô͘-kha, Lō͘-tek toā siaⁿ thı̂-khàu. Chhù-piⁿ thiaⁿ-kı̀ⁿ cháu lâi hû i khí-lâi,tāi-ke chai sı̂n-hûn í-keng khı̀ lah ! Ū lâng khı̀ pò i ê A-ché, in liâm-piⁿ lâi. Lō͘-tek kóng A-ché ah ! Chin khó-sioh, lí bô khoàⁿ tio̍h Án-pē ê bı̄n, ū chhut toā kng teh chiò. Má-lı̄-a kóng, Khoàⁿ, hó sı̄ hó, chóng-sı̄ i khoàⁿ Chú tı̀ chhı̀-á bián-liû chin kı̂-koài, ná chhin-chhiūⁿ i sı̄ Ki-tok-tô͘, sı̍t-chāi; káⁿ m̄ sı̄. I ê tiōng-hu kóng, I beh sí ê sı̂ bô thang kóng bêng, chiàu goá phah-sǹg i bêng-pe̍k chai Bí-sài-a sı̄ Iû-thài-lâng só͘ tèng-sí ê Iâ-so͘ chò Iû-thài ı̄ⁿ-pang ê Kiù-Chú (Í-hut-só͘ 2:14). Lō͘-tek kóng, Án-pē khoàⁿ-oa̍h leh ! I chai Chú lâi liáu ah. Goān Iâ-hô-hoa khui Iû-thài-lâng ê sim-ba̍k hō͘ in chai Siōng-tè ū chhe to̍k-seⁿ ê Kián Iâ-so͘ ài kiù in kàu I só͘ thè in pı̄-pān ê Sûn-siâⁿ. 
 Iû-thài-lâng pún-sı̄ Siōng-tè só͘ kéng ê peh-sı̀ⁿ, ūi-tio̍h khı̀-sak Kiù-chú Iâ-so͘, Siōng-tè chiū hêng-hoa̍t in, hō͘ in sı̀-soàⁿ moá thiⁿ-ē. Sui-jiân án-ni, Siōng-tè ún-tàng iáu teh thiàⁿ in, chhiáⁿ khoàⁿ pò ê lâng, tio̍h thoè Iû-thài-lâng kı̂-tó, hō͘ in ū ki-hoē thang thiaⁿ-tio̍h Iâ-so͘ ê Hok-im, iā-oē hoaⁿ-hí sı̀n-jı̄n Iâ-so͘ choè Bí-sài-á.

(Tâi-lâm Kàu-hoē-pò tē 270 koàn,1907 nı̂ 9 ge̍h)