M̄ thiaⁿ oē ê thò͘-á

Tı̄ chá-chêng ū chı̍t chiah m̄ thiaⁿ oē ê thò͘-á, i ê miâ kiò-choè Pí-tek. I kap i ê ma-ma, saⁿ ê hiaⁿ-ko toà tı̄ chı̍t ê chhiū-nâ-lāi. Ū chı̍t jı̍t thò͘-á ma-ma kā i kap i saⁿ ê hiaⁿ-ko kóng, “Ma-ma beh khı̀ boé mı̍h, lín tio̍h koai-koai tiàm chhù, m̄-thang cháu chhut-khı̀ goā-bı̄n thit-thô, iā m̄-thang khı̀ chhài-hn̂g-á, lín ê pa-pa, chiū-sı̄ cháu-khı̀ chhài-hn̂g, chiah hō͘ chèng chhài ê a-peh lia̍h khı̀ choè bah-piáⁿ, só͘-í lín lóng m̄-thang khı̀.” Thò͘-á ma-ma kóng liáu, chiū the̍h nâ-á chhut-khı̀. Pí-tek ê saⁿ ê hiaⁿ-ko, lóng chin gâu thiaⁿ ma-ma ê oē, tı̄ chhù-nih thit-thô, chí-ū Pí-tek, i khoàⁿ-kı̀ⁿ ma-ma chhut-khı̀, i chiū tùi āu-bı̄n ê mn̂g cháu chhut-khı̀, tùi lı̂-pa-piⁿ cháu khı̀ chhài-hn̂g nih. I tı̄ chhài-hn̂g nih khoàⁿ-kı̀ⁿ chin-choē hó chia̍h ê tāu-á, chhài-thâu, chhài, i chin hoaⁿ-hí, chiū bán tāu-á chia̍h, chia̍h liáu chiū koh bán chhài-thâu, tng i beh koh bán chhài lâi chia̍h ê sı̂, tú-hó hō͘ chèng chhài ê a-peh-ah khoàⁿ-kı̀ⁿ. Hit ê a-peh-ah chin siū-khı̀, chiū chı̍t chhiú the̍h pê-á, chı̍t bı̄n toā siaⁿ hoah, koh cháu chin kín beh lia̍h Pí-tek. Pí-tek khoàⁿ chı̍t-ē chin kiaⁿ, koáⁿ-kín tı̍t-tı̍t cháu, m̄-kú cháu-lâi cháu-khı̀ khah cháu to cháu bô lō͘, iā chhē bô chhut mn̂g, cháu chı̍t-ē liân i ê sin oê-á, iā cháu kàu bô khı̀. I koh cháu chin kín. A-peh-ah iā tùi āu-bı̄n tı̍t-tı̍t jip--lâi, bô phah-sǹg, Pí-tek soà khı̀ lòng tio̍h chı̍t ê thih-bāng-á. I hit niá sin ê saⁿ soà hō͘ thih-bāng-á kê-tiâu lah! Pí-tek chin kiaⁿ, in-ūi a-peh-ah tùi āu-bı̄n jip-lâi lah! I chiū toā siaⁿ háu. I háu ê siaⁿ hō͘ saⁿ chiah chiáu-á thiaⁿ tio̍h, hit saⁿ chiah chiáu-á chiū pe lâi kā i kóng, “M̄-thang háu, lí khah toā la̍t chı̍t-ē, saⁿ chiū oē giú khí-lâi lah.” Pí-tek chiū koáⁿ-kín khah toā la̍t giú chı̍t-ē, tú-hó a-peh-ah cháu kàu ūi ê sı̂, Pí-tek giú i ê saⁿ khí-lâi lah! M̄-kú i ê sin saⁿ, giú chı̍t-ē soà phoà-phoà khı̀. A-peh-ah lia̍h i bô tio̍h, chin siū-khı̀ chiū beh koh lia̍h, chóng-sı̄ Pí-tek í-keng cháu chin hn̄g lah! I khoàⁿ-kı̀ⁿ chı̍t ê tháng-á, hit ê tháng-á lāi-bı̄n ū toé chúi, in-ūi a-peh-ah tùi āu-bı̄n jip-lâi lah! Bô hoat-tō͘. I chiū thiàu jı̍p-khı̀ tháng-á lāi-bı̄n bih. Hit ê a-peh-ah oa̍t chı̍t-ē thâu, soà m̄-chai Pí-tek cháu khı̀ sím-mı̍h só͘-chāi. I chiū sı̀-koè chhē, chhē-lâi chhē-khı̀ lóng chhē bô, kè chı̍t-ē-á, a-peh-ah thiaⁿ-kı̀ⁿ ha-chhiùⁿ, ha-chhiùⁿ ê siaⁿ, in-ūi Pí-tek tı̄ tháng-á-lāi hō͘ chúi chı̀m chin kú lah! I chin koâⁿ. A-peh-ah thiaⁿ-tio̍h ha-chhiùⁿ ê siaⁿ, chai-iáⁿ i bih tı̄ tháng-á lāi-bı̄n, chiū oa̍t-tńg-sin beh lia̍h i, chóng-sı̄ Pí-tek í-keng thiàu-cháu lah! A-peh-ah lia̍h bô tio̍h. I í-keng chin siān, i chiū bô ài koh jip Pí-tek, Pí-tek chiū-sı̄ koh cháu chin kín, nā-sı̄ i lóng chhē bô chhut lō͘. Āu-lâi i tú-tio̍h chı̍t chiah niáu-chhú-á, i chiū mn̄g i, mn̂g tı̄ sím-mı̍h só͘-chāi. Niáu-chhú iô-thâu kóng, “M̄-chai.” I koh tú-tio̍h chı̍t chiah niau-á, niau-á iā kóng m̄-chai, Pí-tek thiaⁿ chı̍t-ē soà háu chhut-lâi. I m̄-chai án-choáⁿ tńg-khı̀ i ê chhù, āu-lâi chiah chhē tio̍h chı̍t ê lı̂-pa khang, i chiū tùi hit ê lı̂-pa khang nǹg kè-khı̀, kiâⁿ tńg-khı̀ i ê chhù, i chin siān, chhin-chhiūⁿ bô la̍t thang kiâⁿ lah! I tńg-khı̀ kàu chhù, ma-ma khoàⁿ tio̍h Pí-tek bô chhēng oê-á, koh hit niá sin ê saⁿ iā phoà-phoà khı̀ lah. Ma-ma chin siū-khı̀, in-ūi Pí-tek í-keng bô khı̀ chin-choē ê saⁿ kap oê lah! Hit ê-hng Pí-tek soà phoà-pı̄ⁿ, koh hoat sio, ma-ma chiū hō͘ i tó tı̄ chhn̂g-nih hioh-khùn, koh ēng io̍h-á hō͘ i chia̍h. Tng Pí-tek teh chia̍h io̍h-á ê sı̂, i saⁿ ê hiaⁿ-ko tú-tú teh chia̍h ma-ma boé ê hó-chia̍h mı̍h, in lóng chia̍h kàu chin hoaⁿ-hí, chí-ū Pí-tek bô chia̍h. Pí-tek chai i sı̄ bô thiaⁿ ma-ma ê oē chiah oē án-ni, tùi hit pái khí, Pí-tek chiū m̄-káⁿ koh bô thiaⁿ ma-ma ê oē, i chiū choè chı̍t ê chin koai koh thiaⁿ oē ê lah. （Lú-soan Ge̍h-khan Tē 78 kı̂, 1966 nı̂ 6 ge̍h)