Ma-ma ê kàu-hùn

Sūi-lı̂m í-keng pit-gia̍p khı̀ ta̍k só͘-chāi teh chhoē thâu-lō͘, khó-sioh lóng chhoē bô. In tau sı̄ sòng-hiong su-iàu chı̂ⁿ, só͘-í hō͘ i koh khah kip. Ū chı̍t jı̍t thàu-chá, Sūi-lı̂m tāi-seng kı̂-tó chiū chhut-khı̀ chhoē kang-chok. Kàu ta̍k ê tiàm mn̄g khoàⁿ ū lâng beh chhiàⁿ kang bô. Choè-āu lâi kàu chı̍t-keng boē to, ka-to téng-téng ngó͘-kim-hâng, khoàⁿ-kı̀ⁿ tiàm-lāi ū chı̍t ê hoé-lô͘, tiàm-oân chiong thih hiat lo̍h-khı̀ hoé-tiong, jiân-āu the̍h chhut-lâi chhut-la̍t teh phah-thih. Tiàm-chú khoàⁿ-kı̀ⁿ Sūi-lı̂m khiā tı̄ hia kú kú bô cháu, chiū mn̄g i kóng, “Lí siūⁿ ài thâu-lō͘ bô? Goán tú-tú khiàm chı̍t ê ta-po͘ gín-ná pang-bâng boâ to kap ka-to, goán sı̄ sǹg kiāⁿ ê.” Hit lâng chiū chhoā Sūi-lı̂m kàu tiàm-lāi ê āu-tiâⁿ, kau hō͘ i chı̍t-bı̄n-tháng chúi kap chı̍t toā láng to, ka-to í-kı̍p chı̍t koá phoà-pò͘ kap lù ho͘ kim ê hún. Sūi-lı̂m hoat-hiān lēng-goā í-keng ū chı̍t ê ta-po͘ gín-ná tı̄ hia teh choè kap i tâng chı̍t-iūⁿ ê kang. Sūi-lı̂m khai-sí kang-chok. Múi oân-sêng chı̍t ki, chiū the̍h khí-lâi siông-sè khoàⁿ, sim-lāi siūⁿ kóng án-ni choè ma-ma m̄-chai oē hoaⁿ-hí boē. I ná-chún ē-thang thiaⁿ tio̍h ma-ma kā i kóng, hoān-sū tio̍h chı̄n-la̍t chı̄n-tiong, in-ūi Siōng-tè teh chhat-giām, Iâ-so͘ só͘ kau-tāi lí choè ê tio̍h hó-hó khı̀ choè. Sūi-lı̂m múi chı̍t ki boâ hó chiū siūⁿ tio̍h chit ê oē. Chóng-sı̄ i khoàⁿ-tio̍h hit ê ta-po͘ gín-ná khiok choè tio̍h chin kín, kā i kóng, “Lí choè tāi-chı̀ thài jı̄n-chin, nā chhin-chhiūⁿ lí hit khoán ê boâ hoat, múi chı̍t-ki to tio̍h ài chin choē sı̂-kan, án-ni thài choè ū thâu-lō͘? Lí khoàⁿ goá choè tio̍h chiah nih kín.” Sūi-lı̂m khoàⁿ-kı̀ⁿ hit ê ta-po͘ gín-ná só͘ boâ ê to iáu chin chē o͘-pan kap sian. Kàu hā-pan ê sı̂, tiàm-chú lâi kap in sǹg-siàu, àn-chiàu Ta̍k-lâng só͘ choè ê hō͘ in kang-chı̂ⁿ. Tiàm-chú hoat kang-chı̂ⁿ liáu-āu tùi hit ê ta-po͘ gín-ná kóng, “Lí bı̂n-á-chài m̄-bián koh lâi”. Āu-lâi kā Sūi-lı̂m kóng, “Bı̂n-á-chài lí goān-ı̀ koh lâi choè kang bô? Goá hoan-gêng lí lâi, in-ūi lí choè sū jı̄n-chin, goá só͘ ài ê sı̄ chit khoán lâng.” Sūi-lı̂m ū chı̂ⁿ thang toà tò-khı̀ hō͘ ma-ma lah, i hoaⁿ-hí ná kiâⁿ tò-khı̀, sim-lāi ná kı̂-tó kám-siā Siōng-tè hó ê an-pâi, iā kám-siā Siōng-tè siúⁿ-sù ū hó ê ma-ma thang kà-sı̄ i kiâⁿ Siōng-tè só͘ ài ê lō͘. Sūi-lı̂m tùi án-ni chiū tı̄ hit ê tiàm tit-tio̍h kú-tn̂g ê kang, āu-lâi chiū seng choè tiàm-chú só͘ tiōng-iōng ê niá-pan. (“Kı̂-biāu ê Iâ-so͘”, Ia̍h 15-16 )