Ma-ma kóng hō͘ gín-ná thiaⁿ Chhâ-hu kap Pah-lêng-niáu

Í-chêng ū chı̍t ê chhâ-hu (chhò chhâ ê lâng) chhù-nı̍h chin sòng-hiong, ta̍k-jı̍t tio̍h khı̀ soaⁿ-téng chhò-chhâ, chiong chhâ taⁿ khı̀ ke-nı̍h bē, chiah ē-thang bé bí, bé chhài lâi chia̍h. Ū chı̍t jı̍t i chiàu-siông chin chá chiū khı̀ soaⁿ-nı̍h beh chhò chhâ, hut-jiân-kan khoàⁿ-kı̀ⁿ chı̍t chiah pah-lêng-niáu (chiáu lūi ê chı̍t chéng), tı̄ chhiū téng ǹg i háu chin toā siaⁿ － “Chiuh; chiuh”. Chhâ-hu mn̄g i kóng, “Lí sı̄ teh háu sím-mı̍h ah?” Pah-lêng-niáu ı̀n kóng, “Oh! Lāu a-peh-à, goá khoàⁿ lí chin kan-khó͘ ê khoán, ta̍k-jı̍t tio̍h lâi chhò-chhâ, bô lūn hó thiⁿ á-sı̄ lo̍h-hō͘ lí lóng lâi. Siat-sú lí nā ài sím-mı̍h, goá thang pang-chān lí.” “Aih! Án-ni chin hó, goá chin ài chē chhâ, í-āu goá chiū m̄ bián koh lâi chia chhò chhâ lah.” Pah-lêng-niáu ı̀n kóng, “Hó lah, lí thang tńg khı̀!” Chhâ-hu tńg-khı̀ kàu chhù-nı̍h, kó-jiân khoàⁿ-kı̀ⁿ chhù-lāi ū chı̍t toā tui ê chhâ, i ê sim-lāi chin hoaⁿ-hí, ka-kı̄ kóng hō͘ ka-kı̄ thiaⁿ kóng, “Ah, í-āu goá lóng m̄ bián koh khı̀ chhò-chhâ lah.” Āu-lâi i siūⁿ lâi siūⁿ khı̀, kóng, goá sui-jiân ū chiah chē ê chhâ, chóng-sı̄ tio̍h ka-kı̄ taⁿ khı̀ ke-nı̍h bē, mā sı̄ chin kan-khó͘, pah-lêng-niáu to ū kóng beh pang-chān goá, goá khah hó kiò i chū án-ni chiong chı̂ⁿ hō͘ goá, goá khah séng koh taⁿ khı̀ bē .......” Só͘-í tē-jı̄ jı̍t, chhâ-hu chiū koh peh soaⁿ khı̀ chhoē hit chiah pah-lêng-niáu. Pah-lêng-niáu kóng, “Lāu a-peh-à, goá kiám bô chiong chhâ hō͘ lí, lí koh lâi chhòng sím-mı̍h ah?” Chhâ-hu tùi i kóng, “Pah-lêng-niáu, lí hō͘ goá chin chē chhâ goá chin kám-siā, chóng-sı̄ tio̍h taⁿ chhut-khı̀ bē, chin kan-khó͘, lí khah hó hō͘ goá chı̂ⁿ.” Pah-lêng-niáu thiaⁿ liáu chin bô hoaⁿ-hí kóng, “Chhâ-hu, lí thài bô ti-chiok, í-chêng lí tio̍h ta̍k chá-khí lâi chhò chhâ, āu-lâi tio̍h koh taⁿ khı̀ bē; hiān-chāi goá hō͘ lí chin chē chhâ, lí m̄ bián koh lâi chhò chhâ, lí chiū siūⁿ beh chē-teh m̄ bián chò kang, liân taⁿ khı̀ bē to pı̂n-toāⁿ chò. Hó, lí tńg-khı̀.” Chhâ-hu khí-thâu lia̍h-chò chit pái pah-lêng-niáu koh tah-èng i ê iau-kiû, sim-tiong toā hoaⁿ-hí, bô phah-sǹg tńg khı̀ chhù-nih, chı̍t ē khoàⁿ, só͘ ū ê chhâ lóng bô khı̀ lah; chit sı̂ i chiah hō͘-hoé ka-kı̄ sı̍t-chāi thài tham-sim. (Ka-têng ê Pêng-iú tē 59 kı̂, 1963 nı̂ 1 ge̍h)