Kó͘-chá, ū chı̍t ê a-pô, i ê tiōng-hu chá chiū koè sin, só͘-í seng-oa̍h chin khùn-khó͘. I ū 2 ê kiáⁿ, tē 2 ê, sió-tı̄ kam-goān hi-seng ka-kı̄ pang-chān lāu-bú chò khang-khoè, lâi ı̂-chhı̂ seng-oa̍h, hō͘ a-hiaⁿ thang choan-sim tha̍k-chheh. Jı̍t-chí teh koè chin kín, a-hiaⁿ keng-koè kúi-nā pái ê giâm-keh khó-chhı̀, chiū tit-tio̍h chham-ka tiān-chhı̀ ê chu-keh (Hông-tè chhin-chū kā i khó-chhı̀). A-pô tit-tio̍h chit-ê siau-sit, iā hoaⁿ-hí iā hoân-ló, in-ūi tùi chhù-nı̍h khı̀ kàu Pak-kiaⁿ khó-chhı̀, lō͘-tô͘ chin hn̄g, tio̍h keng-koè 2 ge̍h jı̍t ê lú-thêng, lō͘-tiong chia̍h kap toà tio̍h ēng chin choē chı̂ⁿ. Chóng-sı̄ ūi-tio̍h toā-kiáⁿ ê chiân-tô͘, chiong teh ı̂-chhı̂ seng-oa̍h ê chı̍t tè-á chhân boē khı̀ hō͘ toā-kiáⁿ chò lú-hùi. Toā-kiáⁿ kó-jiân keng-koè khó-chhı̀ liáu-āu chiū khó tio̍h chiōng-goân (tē 1 miâ). Cháiⁿ-siòng in-ūi khoàⁿ i ê ha̍k-būn iu-siù, chiū chiong i ê cha-bó͘-kiáⁿ kè hō͘ i choè bó͘.
A-pô thiaⁿ-tio̍h chit-ê siau-sit liáu, chin hoaⁿ-hí, hoaⁿ-hí kàu lâu ba̍k-sái. I chiū chhoā tē 2 kiáⁿ poâⁿ soaⁿ koè niá koè hô, lâi kàu toā-kiáⁿ só͘ toà ê chiōng-goân-hú beh chhoē i. Chóng-sı̄ oē-peng m̄-khéng hō͘ in jı̍p-khı̀, in-ūi khoàⁿ in sı̄ chháu-tē lâng. Tē 2 kiáⁿ chiū kā ı̀n kóng, chiōng-goân sı̄ i ê a-hiaⁿ, i kap i ê lāu-bú beh lâi thàm-chhin, oē-peng poàⁿ-sı̀n poàⁿ-gı̂ chhoā in jı̍p-khı̀, chò chiōng-goân ê a-hiaⁿ thiaⁿ-tio̍h lāu-bú kap sió-tı̄ lâi chhoē i ê siau-sit, chiū chún-pı̄ beh khı̀ ngiâ-chih in. Chit sı̂ i ê hū-jı̂n-lâng tùi thang-á khoàⁿ, chiū ēng chhiú kí in, kā i mn̄g “hit-ê lāu-pô kiám sı̄ lí ê lāu-bú?” I hō͘ i mn̄g liáu, chiū tùi thang-á khoàⁿ chı̍t ē, sim-lāi siūⁿ kóng “chiōng-goân ê lāu-bú nā-sı̄ chhēng hiah-nı̍h bái, koh chháu-tē-sông oē hō͘ lâng thí-chhiò”. Chiū chhut-khı̀ tùi oē-peng toā-siaⁿ hoah kóng “hit-ê khit-chia̍h-pô kín kā koáⁿ-chhut--khı̀”. Chit-ê a-pô hō͘ i koáⁿ-chhut--khı̀, chiū khı̀ kàu phoà-pı̄ⁿ. Tē 2 kiáⁿ beh chhiáⁿ i-seng lâi khoàⁿ lāu-bú chóng-sı̄ bô chı̂ⁿ, chiū koáⁿ-kín khı̀ khioh chhâ lâi boē, beh ēng hiah-ê chı̂ⁿ boé io̍h-á. Ū chı̍t jı̍t lo̍h-hō͘ thiⁿ, i taⁿ chı̍t tàⁿ chhâ tùi soaⁿ-téng lo̍h-lâi, hut-jiân tak chı̍t ē poa̍h-tó, i kā i chı̍t ē khoàⁿ, chiū-sı̄ chı̍t tè kim-á. I chin hoaⁿ-hí koáⁿ-kín the̍h tńg-khı̀ chhù-nı̍h, siūⁿ kóng taⁿ ū chı̂ⁿ thang boé io̍h-á lah, chóng-sı̄ i sim-lāi siūⁿ “che sı̄ pa̍t lâng ka-la̍uh ê, goá nā kā i the̍h khı̀ chiū-sı̄ thau-the̍h pa̍t lâng ê mı̍h-kiāⁿ, só͘-í goá tio̍h the̍h lâi khı̀ khǹg tı̄ goân-ūi, nā phah-m̄-kı̀ⁿ ê lâng lâi chhoē thang hêng i”. I chiū koh kiâⁿ tò-tńg, tiàm hia thèng-hāu. Hut-jiân-kan āu-piah ū lâng teh chhiò, i tio̍h chı̍t kiaⁿ oa̍t-thâu khoàⁿ, chiū-sı̄ chı̍t ê pe̍h chhùi-chhiu ê lāu a-kong khiā tı̄ hia, chhiò-chhiò tùi i kóng “Lí sı̄ chin koai ê gín-ná, chin iú-hàu koh láu-sı̍t, chit tè n̂g-kim sàng lí, goá koh sàng lí chı̍t téng bō-á. Lí nā ài sím-mı̍h, lí tı̀ chit téng bō-á, chiū oē tit-tio̍h”. I chiap-tio̍h bō-á chiū kūi tı̄ thô͘-kha kha̍p-thâu soeh-siā, chı̍t ē gia̍h-thâu khí-lâi, lāu a-kong í-keng bô khoàⁿ-kı̀ⁿ lah.
I tńg-khı̀ chhù-nı̍h, khoàⁿ-kı̀ⁿ i ê lāu-bú teh kan-khó͘, siūⁿ beh khı̀ chhiáⁿ i-seng chiah siūⁿ tio̍h hit téng bō-á. I chiū tı̀ hit téng bō-á kı̂-tó kóng, “chhiáⁿ hō͘ goá ê lāu-bú ê pı̄ⁿ hó”. I ê lāu-bú ê pı̄ⁿ chiū liâm-piⁿ hó khı̀. I koh khoàⁿ-kı̀ⁿ hō͘-chúi tùi chhù-téng teh tih lo̍h-lâi, chiū koh kı̂-tó kóng “chhiáⁿ hō͘ goá ê chhù piàn-choè chng-chō o͘-hia̍h ê chhù”. Hōng! Chı̍t siaⁿ chháu-chhù chiū piàn-choè chng-chō ê chhù lah. I chin hoaⁿ-hí bong hit téng bō-á. I koh tı̀ hit téng bō-á kı̂-tó, kóng “chhiáⁿ hō͘ goá chı̍t chiah gû, kap chı̍t hù lê-chhân ê khı̀-kū, hō͘ goán ka-têng ê seng-oa̍h oē an-tēng, goá iā hi-bāng ū chı̍t ê hó ê hū-jı̂n-lâng, thang chú-pn̄g sé-saⁿ, thang hō͘ lāu-bú hioh-khùn m̄ bián choè kang”. Hut-jiân kng-kng ná-nà, mn̂g-goā chı̍t chiah gû, lāi-bı̄n chı̍t hù lê-chhân ê khı̀-kū, chàu-kha iā ū chı̍t ê chin hó ê hū-jı̂n-lâng tı̄ hia teh chú-pn̄g. I chiū chin phah-piàⁿ choè chhân, i ê hū-jı̂n-lâng chin iú-hàu teh su-hāu i ê lāu-bú, chı̍t ke chin khoài-lo̍k koè-jı̍t.
Ū chı̍t jı̍t, choè chiōng-goân ê a-hiaⁿ thiaⁿ tio̍h chit-ê siau-sit, chē chı̍t téng kiō lâi beh khoàⁿ hit téng bō-á. A-hiaⁿ chiū mn̄g sió-tı̄ kóng “Thiaⁿ kóng lí ū chı̍t téng kı̂-koài ê bō-á, ài sím-mı̍h chiū ū sím-mı̍h, ū iáⁿ bô?” Sió-tı̄ ı̀n kóng“ū”, a-hiaⁿ kóng“Hō͘ goá khoàⁿ-māi! ” Sió-tı̄ chiū khı̀ lāi-bı̄n ê siuⁿ-á lāi the̍h-chhut--lâi. A-hiaⁿ chiong bō-á tı̀-teh kóng “nā ū iáⁿ oē, hō͘ goá hit téng kiō piàn choè kim ê.” Hiah-ê kng-kiō ê lâng soà kng lóng bô hoat. I koh khí pháiⁿ ê liām-thâu, siūⁿ kóng “nā hō͘ goá ê lāu-bú kap sió-tı̄ lóng sí, chit téng bō-á chiū sio̍k goá ê.” Hut-jiân bō-á sok-ân, a-hiaⁿ soà tó-lo̍h thô͘-kha hoah kóng, “Thâu-khak chin thiàⁿ, thâu-khak chin thiàⁿ.” Bō-á liâm-piⁿ soà piàn bô khı̀, a-hiaⁿ soà sí tı̄ hia, hit téng kiō koh piàn-choè kap í-chêng siâng-khoán.
Sió pêng-iú, lín m̄-thang chhin-chhiūⁿ chit-ê a-hiaⁿ, chū-su kò͘ ka-tı̄, koh khí pháiⁿ-sim beh kā sió-tı̄ chhiúⁿ mı̍h-kiāⁿ. Thiⁿ-téng ê Siōng-tè teh khoàⁿ lán ê só͘ siūⁿ só͘ kiâⁿ, lán tio̍h chò hó gín-á, i chiah hoaⁿ-hí lán.
(Ka-têng ê pêng-iú tē 55 kı̂, 1962 nı̂ 9 ge̍h)
