Tē 8 Chiuⁿ
“Chú ah! Lí bô-lūn khı̀ tá-lo̍h, goá iā beh tè Lí”.
Chia sı̄ Chi-ka-ko siâⁿ, Hui-lí kap Lô-su khı̀ hù im-ga̍k-hoē, tı̄ in tò-lâi ê lō͘-tiong, Nn̄g-lâng tı̄ chhia-lāi teh tâm-lūn.
“Lí siông-siông chò kı̂-koài ê sū, tú-á beh tńg-lâi, lí iā beh koh the̍h hoe khı̀ hō͘ hit-ê sàn-hiong gín-ná, hit-ê khah toā-hàn ê toā-chí Lô-su hián-jiân sı̄ teh chek-pı̄ i ê sió-moē Hui-lí. In sı̄ pún-chhı̄ hù-ong Sú-tek sian-siⁿ ê chhian-kim.”
“Goá án-ni chò sı̄ kı̂-koài mah?” “Sı̄ nò͘! M̄ nā sı̄ kı̂-koài, sı̄ toā kı̂-koài. Pài-thok lí m̄-thang chhoā hit-khoán khit-chia̍h gín-ná lâi chhù nih hàⁿ! Lí m̄-thang siūⁿ lí beh kái-liông siā-hoē, pa̍t-lâng sàn-hiong bô thang chia̍h, pèng m̄-sı̄ lán ê chek-jı̄m, lán chí-ū hoaⁿ-hí lán chhut-sı̀ chò hó-gia̍h lâng chiū-sı̄.” Toā-chí ê Lô-su ài hong-liû, ài kau-chè, kap chit-ê chong-kàu sim khah tāng ê sió-moē chin boē ha̍h.
“Án-ni, lí siūⁿ Iâ-so͘ tı̄ sè-kan iā án-ni koè mah?” Sió-moē iā m̄-goān su, siông-siông hó-táⁿ pâi chhut i ê ı̀-kiàn. “Chêng nn̄g lé-pài Pò͘ bo̍k-su só͘ tha̍k ê Sèng-keng lí boē kı̀-tit mah?”
“Só͘-í lín tio̍h chai lán ê Chú ê un. I pún sı̄ pù-ū, ūi-tio̍h lán chiâⁿ-chò pı̂n-kiông, tùi I ê pı̂n-kiông hō͘ lán chiâⁿ-chò pù-ū.” “Goá oē kı̀-tit nò͘! chóng-sı̄ bo̍k-su mā kóng sui-jiân hó-gia̍h nā chhin-chhiat chû-siān chiū bô thang hiâm. Lí khoàⁿ bo̍k-su pún-sin iā sı̄ koè chin hù-jū ê seng-oa̍h. Goá khoàⁿ lí tùi La̍h-kiat siá phoe hō͘ lí liáu, pı̀ⁿ chin koài-jı̂n. Lâng m̄ sı̄ tú-tú tio̍h án-ni. La̍h-kiat iā chin kı̂-koài, hı̀-ke̍k-thoân beh chhiàⁿ i, iā m̄ lâi.” Hui-lí bı̄n ǹg thang-á goā, m̄ ài koh ı̀n. Bé-chhia iā tú-tú kàu in ê chhù. He sı̄ chı̍t-keng chhin-chhiūⁿ kiong-tiān ê bí-lē tông-hông ê chhù.
Chit keng chhù ê chú-lâng Cha-lí Sú-tek sı̄ sin hoat-châi ê, iok ū 200 bān châi-sán. I ê hū-jı̂n-lâng kap La̍h-kiat sı̄ chí-moē, put-hēng i kú-kú tó pēⁿ-chhn̂g. Hui-lí kap Lô-su sı̄ in pó-poè ê nn̄g ê cha-bó͘-kiáⁿ. Toā-chí 21 hoè, sió-moē 19 hoè, nn̄g ê sèng-chit siong-chha chin choē. Hui-lí kap La̍h-kiat saⁿ chhin-chhiūⁿ, chong-kàu sim chin kiông, koh sı̄ su-sióng-ka, siū lāu-pē khah thiàⁿ, chóng-sı̄ lāu-bó oàn i chò koài-jı̂n.
In jı̍p-mn̂g, lāu-pē chiū tùi tē-á lāi the̍h chı̍t tiuⁿ phoe chhut-lâi.
“Hui-lí, lí ê phoe, La̍h-kiat kià-lâi ê, ū sím-mı̍h hó siau-sit mah?” Lāu-pē Sú-tek ēng i pêng-siông ê sı̍p-koàn, kek sè-lúi ba̍k-chiu khoàⁿ Hui-lí. Hui-lí chiap lâi tha̍k-liáu.
“Ah! kóng lán ê Pò͘ bo̍k-su khı̀ Lē-bûn-chhı̄ ê Tē-it kàu-hoē toà nn̄g lé-pài. I tùi Má bo̍k-su ê kái-kek ūn-tōng chin chù-ı̀. Iā La̍h-kiat iáu tı̄ Khek-thàn-chng teh gı̂m-si pang-chān pò͘-tō, thèng-hāu Poē-ní ê kiàn-tio̍k-bu̍t nā hó chiū beh poaⁿ khı̀.”
“Hò͘ⁿ, án-ni ò͘! Goá tio̍h lâi kiò La̍h-kiat lâi Chi-ka-ko, m̄-thang bô chhái i ê siaⁿ tiàm hit hō o͘-àm ke chiūⁿ.” Sú-tek ná kóng ná suh hun. “Chóng-sı̄ goá siūⁿ La̍h-kiat m̄ káⁿ ûi-poē sē-iok.” Hui-lí thêng tia̍p-á-kú án-ni kóng.
“Sím-mı̍h sē-iok?” “Oh! goá siūⁿ tio̍h là! Má bo̍k-su hit khoán sē-iok ò͘! Lē-bûn-chhı̄ tùi án-ni ū hoat-seng chin choē koài-sū. Lán ê Pò͘ bo̍k-su tùi che m̄ chai sı̄ sím-mı̍h khoàⁿ-hoat?” Sú-tek thàm i ê kiáⁿ ê bı̄n-sek.
“Bı̂n-á-chài, lé-pài, i tāi-khài oē kóng chit-ê sū. Goá ǹg-bāng i iā oē hoat-khí chit khoán sē-iok tı̄ lán ê kàu-hoē.” Hui-lí soè-siaⁿ án-ni kóng.
“Hm̀! he sı̄ boē-tàng sı̍t-hêng ê sū.” Sú-tek chin bô tông-ı̀ ê khoán. Àm-tǹg ê tiān-lêng teh tân, in chiū jı̍p khı̀ pn̄g-thiaⁿ.
Sú-tek sian-siⁿ chí-ū chia̍h tām-po̍h, chiū kóng ū tāi-chı̀ chhut-khı̀.
“Lí khoàⁿ lāu-pē chiah kú m̄ chai ū sím-mı̍h khoà-lū ê sū!?” Hui-lí khoàⁿ lāu-pē chhut-khı̀ chiū mn̄g toā-chí.
“Goá khoàⁿ bô, ē-hng lí beh khı̀ khoàⁿ hı̀ bô?” Lô-su sûi-sı̂ oāⁿ tê-ba̍k.
“Goá lóng hó.” Sı̂-kan iáu boē kàu Hui-lí jı̍p-khı̀ lāu-bó ê pâng-keng, chóng-sı̄ lāu-bó lóng m̄ chhap i, chiū koh chhut-lâi.
Hit àm lı̄-khui hı̀-hn̂g ê sı̂, Hui-lí ū toā-toā ê kám-khài khoàⁿ-tio̍h hit-ê só͘ ián-chhut pı̂n-bı̂n-khut ê chêng-hêng kap hù-ong ê ka-têng siong-chha hiah toā, i ê sim chin tı̂m-tāng. Kàu-chhù, i sûi-sı̂ beh chiūⁿ khı̀ ka-kı̄ ê pâng, hut-jiân thiaⁿ-tio̍h lāu-bó teh kiò, chiū oat jı̍p-khı̀.
I kūi-lo̍h tı̄ lāu-bó ê chhn̂g-piⁿ, chù-ı̀ lāu-bó ê bı̄n-sek, kiaⁿ-liáu i sı̄ seng-khu kan-khó͘ chiah kiò i.
“Hui-lí, lí oē hiáu kı̂-tó hò͘ⁿ?” Tùi lāu-bó ê chhùi thiaⁿ-tio̍h kı̂-tó ê sū sı̄ chin hán-tit. Hui-lí tio̍h chı̍t-kiaⁿ.
“Sı̄ là! goá oē hiáu kı̂-tó. Ma-ma lí siáⁿ-sū mn̄g án-ni?”
“Hui-lí, goá ê sim chin bô pêng-an. Lí ê lāu-pē chiah kú chin koh-iūⁿ ê khoán, ná chún sı̄ sū-gia̍p boē sūn-sū ê khoán, chhiáⁿ lí thè i kı̂-tó.”
“Beh tiàm chia kı̂-tó mah?”
“Sı̄ là! chit chūn kı̂-tó.”
Hui-lí chhun-chhiú khan lāu-bó ê chhiú kı̂-tó. I ê kı̂-tó ū kóng-chhut lāu-bó ê sim-ı̀, kı̂-tó soah lāu-bó chhiⁿ-chhám háu. Hui-lí koh kap i tiàm tia̍p-á-kú chiū kóng:
“Chhiáⁿ hioh-khùn, seng-khu nā khah kan-khó͘ chiah kiò goá.”
“Hó, lí thang khı̀ hioh-khùn.”
Lé-pài chá-khí Hui-lí kap Lô-su chiàu-siông chē bé-chhia khı̀ lé-pài. Pò͘ bo̍k-su chiàu-siông chú-lí lé-pài-sek, chóng-sı̄ tng i kı̂-tó ê sı̂, chèng-lâng kám-kak ū koh-iūⁿ, che sı̄ 12 nı̂ lâi boē bat ū ê jia̍t-chêng. Bo̍k-su beh khai-sí káng-tō í-chêng, seng kóng-khí Lē-bûn-chhı̄ ê kái-kek ūn-tōng.
“Goá sò͘-jı̍t chêng tùi Lē-bûn-chhı̄ tńg-lâi, goá ài chiong goá tı̄ hia só͘ tit-tio̍h ê kám-tōng kóng hō͘ lín thiaⁿ.” I thêng teh koan-khoàⁿ hoē-iú ê sı̂, i ê sim boē an-sim. “Chiah-ê ài hióng-hok ê hó-gia̍h lâng kiám beh thiaⁿ chit khoán ê sū mah?” I sim-lāi án-ni siūⁿ. Chóng-sı̄ kiù-kèng i tek-khak ài chiong chit hāng sū kóng chhut, put-koán hoán-èng jû-hô. I kóng liáu ê sı̂, koh ke-thiⁿ jia̍t-chêng kóng ē-bı̄n chit toāⁿ lâi chò kiat-sok.
“Só͘-í hiaⁿ-tı̄ chí-moē, goá iā hi-bōng lán kàu-hoē ê hoē-iú, oē goān-ı̀ lâi chham-ka chit-ê sē-iok. Goá chai-iáⁿ sı̍t-hêng chit-ê sē-iok oē siū choē-choē hong-bı̄n ê sún-sit, chiū-sı̄ oē tú-tio̍h kan-lân, chhin-chhiūⁿ chá-sı̂ ê sù-tô͘ ūi-tio̍h kun-tè Ki-tok só͘ siū ê khó͘, chóng-sı̄ lán ài tè Chú ê kha-pō͘ chiū put-koán chiah-ê.” I koan-khoàⁿ thiaⁿ-chiòng, tùi in ê bı̄n chai-iáⁿ Sèng Sı̂n í-keng teh chò-kang, ū cheng-chiàn ê kan-khó͘ piáu-hiān tı̄ in ê bı̄n-iông, choè-āu i chhiáⁿ ài chham-ka sē-iok ê lâng lé-pài soah tı̄ hoē-gı̄-sek chū-chı̍p, chiū chiap-soà káng-tō, tê-ba̍k chiū-sı̄ “Chú ah! lí bô-lūn khı̀ tá-lo̍h goá iā beh tè Lí” (Má-thài 8:19).Chhin-chhiūⁿ chit jı̍t ū la̍t ê káng-tō sı̄ in boē bat tùi i thiaⁿ-tio̍h ê.
Lé-pài soah, hoē-iú bô sûi-sı̂ sı̀-soàⁿ, Lô-su khoàⁿ-tio̍h Hui-lí iáu chē leh, chiū chio i beh tńg-khı̀. “Goá beh lâu teh.” Lô-su khoàⁿ tio̍h i kian-koat ê thāi-tō͘, chai-iáⁿ khó͘-khǹg iā bô chhái kang, chiū chin siū-khı̀ tùi i kóng:
“Hui-lí, chham-ka he bô ı̀-sù là! lí sı̄ oē chò sím-mı̍h? Ke bak chı̍t ê miâ nā-tiāⁿ, lí m̄ kiaⁿ lāu-pē mē mah?”
Hui-lí thêng tia̍p-á-kú chiū iô-thâu tùi toā-chí kóng, “Goá beh lâu-teh, goá beh siú-iok, goá bô-lūn jû-hô beh chham-ka sē-iok.” I chhiat-chhiat ı̀n i. Lô-su chin siū-khı̀ kā gı̂n chı̍t-ē chiū ka-kı̄ tńg-khı̀.
Kàu chhù, khoàⁿ-kı̀ⁿ lāu-pē tı̄ hoé-lô͘-piⁿ teh suh-hun.
“Hui-lí cháiⁿ-iūⁿ bô tńg-lâi.”
“Koh lâu--teh beh chū-hoē.”
“Sím-mı̍h chū-hoē?”
“Soà m̄ chai Pò͘ bo̍k-su khı̀ Lē-bûn-chhı̄ poaⁿ hit-ê sē-iok tńg-lâi, chiū beh kiò lâng chham-ka!”
“Hò͘ⁿ! goá bô siūⁿ-tio̍h Pò͘ bo̍k-su iā oē án-ni. Ū loā choē lâng chham-ka?”
“Goá m̄ chai”, Lô-su chò i peh chiūⁿ lâu-téng.
Hui-lí tńg-lâi ê sı̂, lāu-pē chē tı̄ the-í m̄ chai teh siūⁿ sím-mı̍h, thâu-khak chhih-chhih, khoàⁿ-tio̍h Hui-lí chiū peh khí-lâi.
“Ū pah-goā lâng.” Hui-lí in-ūi chū-hoē āu kám-tōng moá-moá, bô ài kóng-oē chiū beh khı̀ lâu-téng.
“Lí chin-chiàⁿ beh siú hit-ê iok mah?” Lāu-pē mn̄g. Hui-lí bı̄n âng, oa̍t kè lâi ı̀n kóng,“Pa-pa, lí kin-á-jı̍t nā ū chham-ka hit-ê chū-hoē, chiū boē án-ni mn̄g goá là!”
Hui-lí chiū peh khı̀ lāu-bó ê pâng-keng. I kap lāu-bó ê tâm-oē bô lâng chai sı̄ kóng sím-mı̍h, chóng-sı̄ chhui-sióng cha-mê iau-kiû i kı̂-tó ê lāu-bó, ún-tàng oē hoaⁿ-hí thiaⁿ chit-ê chū-hoē ê chêng-hêng.
Jı̍t-thâu í-keng lo̍h-soaⁿ, tiān-hoé tiám moá chit keng chhù, tı̄ Hui-lí ê pâng-keng ū chı̍t ê cha-bó͘ gín-ná kūi teh kı̂-tó, i peh-khí-lâi ê sı̂, tı̄ i sı̍p-tâm ê bı̄n thang khoàⁿ-chhut ū toā koat-sim ê bı̄n-sek. Hui-lí í-keng koat-tēng i seng-oa̍h ê hong-chiam là!
Tē 9 Chiuⁿ
“Tio̍h chek-chū châi-pó tı̄ thiⁿ-nih, tı̄ hia bô thâng oē chia̍h, bô chha̍t iah-khang thau-the̍h ê só͘-chāi.”
Lé-pài àm Pò͘ bo̍k-su tı̄ i ê su-chai kap i ê hū-jı̂n-lâng teh tâm-lūn hit chá-khí só͘ thê-chhut sē-iok ê sū. Ū lâng phah mn̂g, bo̍k-su khui-mn̂g khoàⁿ-kı̀ⁿ lâng-kheh sı̄ i ê pêng-iú Ài-tek-hoâ kam-tok chiū chhut hoaⁿ-hí ê siaⁿ.
“Oh! sı̄ lí, chhiáⁿ jı̍p-lâi, chhiáⁿ jı̍p-lâi.” Ài-tek-hoâ kam-tok ū chin hó ê thé-keh, hō͘ khoàⁿ-tio̍h i ê lâng oē him-siān i ê kiān-khong-thé.
“Pò͘ Ní-su, lí kin-á-jı̍t ū chò hui-siông ê sū, hò͘ⁿ! Goá ē-po͘ chiah thiaⁿ-tio̍h chit-ê sū só͘-í chin ài lâi kap lí tâm-oē”. I chē lo̍h í chiū sûi-sı̂ thê-chhut só͘ beh kóng ê.
“Oh! hit-ê sē-iok ê sū mah? Lí ū bêng-pe̍k hit-ê ı̀-sù bô?” Pò͘ bo̍k-su hoāⁿ chhiú tı̄ pêng-iú ê keng-thâu, án-ni mn̄g.
“Goá ū bêng-pe̍k, sı̄ là! goá sı̍t-chāi ū bêng-pe̍k” i bān-bān ı̀n. Tı̄ i hit-ê piáu-hiān chı̄n-tiong kap chû-ài ê bı̄n, chit sı̂ ū iu-būn ê khoán-sit.
In Nn̄g-lâng sui-jiân kàu-phài bô tâng, chóng-sı̄ tùi tông-ha̍k sı̂-tāi ê iú-chêng bô piàn-oāⁿ. In Nn̄g-lâng saⁿ kèng, saⁿ thiàⁿ, saⁿ pang-chān, sı̄ hó ê pêng-iú. Thêng tia̍p-á kú kam-tok seng khui chhùi kóng:
“Lí hoat-khí hit-ê sū, tùi tı̄ lí sı̄ chin gûi-hiám. Lí nā beh chiàu Chú só͘ kiâⁿ ê lâi siú sē-iok, tı̄ kàu-hoē lāi oē seⁿ khí choē-choē nāu-tōng, che sı̄ bêng-hián liāu oē kàu ê sū.” I kia̍h thâu khoàⁿ bo̍k-su chiū koh kè-sio̍k kóng: “Goá iā ū sı̀n Ki-tok-kàu nā beh tit oân-choân ê hoat-tián tio̍h kàu-chit-chiá kap chèng hoē-iú lóng sı̍t-hêng chit-ê sē-iok, chóng-sı̄ che sı̄ chin khùn-lân. Te̍k-piat tı̄ goán ê kàu-hoē, oē-thang chun-siú ê lâng, chha-put-to bô, Ki-tok-tô͘ chí-ū ài an-lo̍k, hióng-hok tùi tı̄ giâ sı̍p-jı̄-kè chit hāng sū sı̄ tē-it bô ài ê. Chóng-sı̄ nā beh kun-tè Chú, bô giâ sı̍p-jı̄-kè beh cháiⁿ-iūⁿ kun-tè nih?” Kam-tok chhin-chhiūⁿ teh kóng hō͘ pún-sin thiaⁿ.
Bo̍k-su hut-jiân chhéⁿ-gō͘ khí-lâi, sim-lāi siūⁿ, siat-sú kam-tok pún-sin nā siū kám-tōng goān-ı̀ chham-ka sē-iok, ún-tàng oē-thang pang-chān khah chē iú-sek kai-kip ê lâng iā chham-ka. I tú-á siūⁿ beh chiong chit-ê ı̀-sù kóng chhut lâi ê sı̂, hut-jiân bo̍k-su-niû chông jı̍p-lâi, chin tio̍h-kip kóng:
“Ah! hāi! hāi là! Sú-tek sian-siⁿ......ah! goá kóng boē chhut-lâi ah! khó-lı̂n hit nn̄g ê cha-bó͘-kiáⁿ.”
Pò͘ bo̍k-su peh-khí-lâi “Cháiⁿ-iūⁿ?” Hit sı̂ Sú-tek ke ê chhiàⁿ-kang iā toè jı̍p-lâi, iáu phēⁿ-phēⁿ chhoán.
“Ah! thâu-ke......thâu-ke chū-sat là! sı̄ là! ēng té-chhèng...tı̄ i ê pâng...koh thâu-ke-niû iā......”
“Hó, goá sûi-sı̂ beh lâi khı̀. Ài-tek-hoâ lí beh saⁿ-kap khı̀ mah?”
Kam-tok ê bı̄n chheⁿ sún-sún, i chēng-chēng hiòng bo̍k-su ê bı̄n tia̍p-á-kú.
“Hó, goá beh kap lí khı̀, m̄ nā khı̀ Sú-tek ke iā beh kap lí saⁿ-kap kiâⁿ tı̄ sè-kan moá ū pi-chhám ê lō͘”.
Ah! chit sı̂ bo̍k-su í-keng bêng-pe̍k kam-tok lāi-sim ū sím-mı̍h koat-tēng là!
Pò͘ bo̍k-su kap kam-tok Nn̄g-lâng kín kiâⁿ kàu Sú-tek ke. Pêng-sı̂ an-chēng ê chhù, chit sı̂ khiok chin hūn-cha̍p. Ai-khàu ê siaⁿ, chông-lâi chông-khı̀ ê kha-pō͘ siaⁿ saⁿ chham-cha̍p hō͘ lâng ê sim jû-loān.
“Sı̄--là! Hui-lí sió-chiá tı̄--i lāu-bó ê sin-piⁿ”. Tùi lâu-téng lo̍h-lâi ê chhe-ēng thuh chin kú chiah ı̀n chhut-lâi, ı̀n liáu chiū ná háu ná cháu chhut-khı̀. Nn̄g-lâng peh kàu lâu-téng chiū tú-tio̍h Hui-lí, bo̍k-su tiām-tiām khan i ê chhiú, kam-tok so i ê thâu-khak, kam-tok tùi Hui-lí soè-hàn ê sı̂ chiū bat i. I tāi-seng táⁿ-phoà saⁿ-lâng tiong ê an-chēng kóng:
“Sı̍t-chāi chin put-hēng ê sū, kiû Siōng-tè lı̂n-bín lí ê lāu-bó?” Kóng kàu chia chiū tiām khı̀. Ah! i tı̄ beh lâi chı̍t-lō͘ kiám bô hoê-sióng kàu siàu-liân ê sū mah! Tong-jiân che sı̄ i pún-sin ê pı̀-bit. Ah! chheng-chhun sı̂-tāi, Hui-lí ê lāu-bó kiám m̄ sı̄ bat hiàn ài-chêng hō͘ i ê lú-chú mah? Chóng-sı̄ i soán-te̍k chit-ê khah hó-gia̍h ê Sú-tek.
Chit sı̂ Hui-lí jı̍p-khı̀ i lāu-bó ê pâng-keng, chı̍t-sı̂-á chhut-lâi ēng ba̍k-chiu piáu-sı̄ ı̀-sù kiò in jı̍p-khı̀. In khoàⁿ-tio̍h chhn̂g-téng ê Sú-tek hu-jı̂n chū-chāi ê khoán-sit hoán-tńg hō͘ in tio̍h-kiaⁿ, chóng-sı̄ tı̄ chhn̂g-piⁿ ū Lô͘-su kap chhe-ēng ê Khek-lah háu kah chin chhiⁿ-chhám.
Lâu-kha chit sı̂ ū thiaⁿ-kı̀ⁿ chin-choē lâng ê kha-pō͘ siaⁿ, chiū-sı̄ kiám-giām i-su, kéng-chhat, sin-bûn kı̀-chiá kap chhù-piⁿ ê lâng. In lóng peh-chiūⁿ lâu-téng, chóng-sı̄ bo̍k-su chí-ū iông-ún pit-iàu ê lâng chiūⁿ-khı̀. Kéng-chhat tiâu-cha sū-kò͘ ê keng-koè sı̄ chhin-chhiūⁿ ē-bı̄n.
Sú-tek sian-siⁿ chā-àm 9 tiám goā jı̍p i ê khùn-pâng, keng-koè bô 30 hun in chiū thiaⁿ-tio̍h chı̍t-mn̂g chhèng-siaⁿ, chhiàⁿ-kang-lâng chông jı̍p-khı̀ khoàⁿ ê sı̂, i í-keng tó tı̄ tē-pán téng, khùi tn̄g là! Hui-lí hit-sı̂ tı̄ lāu-bó ê sin-piⁿ teh khàn-hō͘, Lô͘-su tı̄ tha̍k-chheh ê pâng-keng thiaⁿ-tio̍h, iā chông-jı̍p lāu-pē ê pâng, khoàⁿ-tio̍h chit-ê chêng-hêng chiū ná ai ná cháu jı̍p lāu-bó ê pâng hūn-tó tı̄ chhn̂g-piⁿ. Sú-tek hu-jı̂n thiaⁿ-tio̍h ê sı̂, sim-chōng phok-phok chhéng, chóng-sı̄ bô kú chiū hoê-ho̍k, chiū kiông-kiông iau-kiû lâng hû-chhah khı̀ khoàⁿ tiōng-hu, m̄ thiaⁿ Hui-lí ê chó͘-tòng. I khiā tı̄ sí-si piⁿ-a chēng-chēng khoàⁿ tia̍p-á-kú chiū tò-tńg-lâi chiàu kū tó tı̄ chhn̂g-téng. Bo̍k-su kap kam-tok jı̍p-lâi hit sı̂, i í-keng sı̄ lı̄-khui sè-kan ê lâng là!
Cháiⁿ-iūⁿ put-hēng ê sí-sit hut-jiân oē lı̂m-kàu chit-ê hù-ong ê ke-têng? Nā m̄-sı̄ í-āu ū po̍k-lō͘ loē-iông, chiū bô lâng oē chai.
Chit goe̍h-jı̍t Sú-tek só͘ tâu-chu ê sū-gia̍p oân-choân sit-pāi, só͘-í i biān-lı̂m phò-sán ê chhám-kéng. Tùi tı̄ i sı̄ pí sèⁿ-miā khah iàu-kín ê châi-sán beh tùi i ê chhiú-tiong oân-choân siau-bô, i khoàⁿ-tio̍h chit-ê teh beh lı̂m-kàu ê chai-hō chiū chı̄n-la̍t beh bán-hoê. Siat-sú boē-thang pı̄-bián phò-sán, chı̀-chió i iā ài beh iân-tiông hit-ê put-hēng ê jı̍t-chí bān kàu. Chóng-sı̄ bô chhái i ê hùn-tò͘, kiù-kèng chit-ê put-hēng sı̄ lı̂m-kàu là! I tı̄ lé-pài ē-po͘ chiap-tio̍h choa̍t-bāng ê siau-sit.
I ēng put-chèng-tong só͘ tit ê chı̂ⁿ lâi boé chit-ê súi ê chhù-the̍h, ka-kū, châi-pó, só͘-í i ê châi-sán chhin-chhiūⁿ sı̄ kiàn-siat tı̄ thô͘-soa ê tē-ki téng chı̍t-iūⁿ. Taⁿ i kiâⁿ kàu phò-sán ê hām-kheⁿ ê sı̂, iā siūⁿ ài koh ēng put-chèng ê hong-hoat lâi tô-thoat, chóng-sı̄ kàu-boé i só͘ tit ê kiat-lūn chiū-sı̄ “goá taⁿ sı̄ khit-chia̍h”. I jı̄n-chin siūⁿ chit-ê beh lı̂m-kàu i sin-chiūⁿ ê miā-ūn ê sı̂, i chí-ū chı̍t-tiâu lō͘ thang kiâⁿ, chiū-sı̄ chū-sat. Tùi tı̄ pài kim-chı̂ⁿ chò ngó͘-siōng ê lâng tı̄ sit-lo̍h kim-chı̂ⁿ ê sı̂, oē soán-te̍k chit-tiâu lō͘ sı̄ pit-jiân ê kiat-kó, só͘-í hù-ong Cha-lí Sú-tek chiū án-ni chū-sat.
Che sı̍t-chāi sı̄ chin gû-gōng ê sū. Kim-chı̂ⁿ ê sún-sit kap éng-oán put-bia̍t ê oa̍h-miā ê sún-sit oē saⁿ pí-tit mah? Sú-tek hu-jı̂n hián-jiân sı̄ tùi táⁿ-kek lâi sí. I sò͘-lâi tùi tiōng-hu ê châi-sán kám-kak chin put-an, chóng-sı̄ i kú-kú tó-chhn̂g iā boē thang pang-chān i chò sím-mı̍h. Taⁿ hit-ê pēⁿ-jio̍k ê seng-khu boē kham-tit chit pái ê táⁿ-kek, iā kiat-sok i ê seng-oa̍h, lêng-hûn lı̄-khui i khı̀ là!
Chit-pang saⁿ-têng ê táⁿ-kek lāu-pē chū-sat, lāu bó sí kap phò-sán--hō͘ nn̄g ê cha-bó͘-kiáⁿ hui-siông ê thòng-khó͘. Te̍k-piat Lô-su kúi-nā lé-pài chí-ū sı̂n-sı̂n, boē hoê-ho̍k cheng-sı̂n. I boē thang liáu-kái cháiⁿ-iūⁿ oē tı̀-kàu jı̂n-bông, châi-sán, liân chhù-the̍h iā sit-lo̍h, pún-sin koh tio̍h liû-lōng khı̀ chhin-chiâⁿ ê chhù siū pang-chān. Nā-sı̄ Hui-lí, i chin kín chiū liáu-kái cháiⁿ-iūⁿ oē tı̀-kàu án-ni, tı̄ chòng-sek ê nn̄g, saⁿ-jı̍t āu i chiū kap La̍h-kiat chham-siông í-āu ê hong-chiam.
“Hui-lí, lí tio̍h kap Lô-su lâi-khı̀ goán tau. Ma-ma bô chàn-sêng lí kàu pa̍t-ūi”, La̍h-kiat tùi i kóng. I kap Hui-lí tùi chham-ka sē-iok í-lâi it-hoat saⁿ liáu-kái saⁿ thiàⁿ. I ê bı̄n hoat-chhut thiàⁿ ê kong-hui.
“Sı̄ là! tiàm chia nā bô kang-chok iā sı̄ bô lō͘-ēng.” Hui-lí chēng-chēng ı̀n.
“Lí oē hiáu chò sím-mı̍h kang?”
“Goá lóng boē, in-ūi kàu-taⁿ lóng boē bat chò sím-mı̍h. Bat o̍h tām-po̍h im-ga̍k, chóng-sı̄ m̄-sı̄ oē-hiáu kà lâng ê thêng-tō͘, iā ū o̍h tām-po̍h chú-chia̍h ê hoat-tō͘.” Hui-lí chhiò-chhiò ı̀n.
“Án-ni oē-thang pang-bâng chú-chia̍h, in-ūi Ma-ma siông bô êng thang chú-chia̍h.” La̍h-kiat án-ni ı̀n.
“Goá m̄ chai oē koàn-sı̀ boē? Goá àn-sǹg ūi-tio̍h beh chi-chhı̂ goán nn̄g chí-moē ê seng-oa̍h, bô-lūn siáⁿ-kang lóng hoaⁿ-hí choè.” Hui-lí jı̄n-chin ı̀n.
“Sı̄ là! lâi goán hia ê sı̂ chiah koh chim-chiok māi”. La̍h-kiat khoàⁿ Hui-lí ū chū-lı̍p ê cheng-sı̂n, sim chin hoaⁿ-hí.
Keng-koè kúi-lé-pài sı̄ là! Hui-lí kap Lô-su chiū poaⁿ-khı̀ Lē-bûn chhı̄ A-ı̂ ê chhù. Lô-su tùi ka-têng hoat-seng put-hēng ê sū í-lâi, cheng-sı̂n lóng boē siū an-ùi, taⁿ lâi kàu chia iā bô sím-mı̍h kang thang chò, koh in-ūi i ê pháiⁿ sèng-tē ta̍uh-ta̍uh lô-hoân Hui-lí kap La̍h-kiat.
Nā-sı̄ Hui-lí chhin-chhiūⁿ tı̄ thian-kok ê khoán-sit. I kap La̍h-kiat tı̄ sı̀n-gióng-siōng tâng ı̀-chı̀, chiâⁿ-chò chı̀ chhin-iú. Ta̍k-jı̍t i jı̄n-chin tı̄ chú-chia̍h, tı̀-kàu bô kú chiū chin liān-ta̍t, La̍h-kiat chin ǹg-bāng i chiong-lâi oē-thang pang-chān Poē-ní tı̄ Khek-thàn-chng só͘ beh khai-siat o̍h chú-chia̍h ê ha̍k-hāu. Tı̄ chia i thâu chı̍t pái thé-giām tio̍h ūi pa̍t-lâng ê hēng-hok chò kang ê khoài-lo̍k. “Nā-sı̄ Chú beh cháiⁿ-iūⁿ choè?” chit-ê phiau-gú toā-toā kek-tōng i ê sim, hō͘ i tit-tio̍h toā chı̀n-pō͘. Liân i ê a-ı̂ Ui-su-ló hu-jı̂n iā jı̄n-tēng i ê phín-keh iu-siù, sı̄ chin ū lō͘-ēng ê gín-ná. Ū-sı̂ khoàⁿ-tio̍h i hiah phah-piàⁿ chiū m̄ koè-sim kóng “Hui-lí, lí m̄-thang kan-taⁿ chò chú-chia̍h ê kang, goá iā m̄-kam lí án-ni.”
“Chóng-sı̄ A-ı̂, che sı̄ goá hoaⁿ-hí choè ê kang nè! Goá chú ê kiám bô chin hó chia̍h?”
“Chin hó chia̍h sı̄ chin hó chia̍h, chóng-sı̄ lí kiám siūⁿ beh án-ni kú-tn̂g chò to͘-chí siông-siông chí-ū chò tû-pâng-su-mah?” A-ı̂ chı̍t-bı̄n kóng chı̍t-bı̄n siòng i ê bı̄n.
“Goá chiàⁿ sı̄ án-ni siūⁿ. Goá bat bāng-kı̀ⁿ goá tı̄ chı̍t ê toā to͘-chhı̄ teh kà hū-jı̂n-lâng chú-chia̍h, Pò͘ bo̍k-su tı̄ káng-tō ê sı̂ bat kóng sàn-hiong lâng pi-chhám ê chı̍t-hāng sū, chiū-sı̄ bô hó ê chia̍h-mı̍h thang chia̍h, che iā-sı̄ in hoān-choē ê chı̍t-hāng goân-in. Goá nā khui chú-chia̍h ê ha̍k-hāu goá kap toā-chí oē-tàng seng-oa̍h, pa̍t-lâng iā ū hó chia̍h-mı̍h thang chia̍h.” A-ı̂ ná kám-sim i chū-lı̍p ê ı̀-chı̀, chóng-sı̄ piáu-bı̄n siōng iû-goân bô chàn-sêng i chò chit-ê kang.
“Nā-sı̄ Chú beh cháiⁿ-iūⁿ choè?” Tùi chit-ê būn-tê i chı̀-goān ài beh ū sêng-sı̍t ê hoê-tap, Hui-lí chiū ná kı̂-tó, ná chò kang, ná kè-oē chiong-lâi ê kang-chok.
