N̂g Chip-sū ê Sió-toān

Ùi Wiki Tô·-su-kóan
N̂g kun miâ Tiòng. Tâi-lâm Tang-mn̂g kàu-hoē ê Chip-sū; Sin-lâu Chheh-pâng Ìn-soat-pō͘ ê Chú-jı̄m--lah. Goân-che̍k sı̄ Pak-mn̂g-kūn, Ka-lí-chng, Po͘-téng-liâu N̂g-sèng ê tāi-cho̍k. Tng Bêng-tı̄ 36 nı̂ (28 nı̂ chêng), lâi Sin-lâu kā Kam Bo̍k-su chò kang. In-ūi i un-sûn khı̂n-bián, put-chí hō͘ Kam Bo̍k-su o-ló, chiah kú-chiàn i jı̍p Chheh-pâng chò khioh jı̄ ı̀n soat ê kang. Tùi án-ni chiah poaⁿ-chhiáⁿ i ê lāu-bú lâi toà Tâi-lâm, kiàn-lı̍p ke-āu, soà chiap kàu chit-tia̍p, beh kàu saⁿ-cha̍p nı̂. 
N̂g kun tùi siū Kam Bo̍k-su ēng tō-lí ín-chhoā liáu-āu, chiū pàng-sak i í-chêng ké ê sı̀n-gióng, choan-sim lâi kui-ho̍k tı̄ Chú. In-ūi i só͘ chò ê kang, iā pí pa̍t-lâng ke tit-tio̍h chē-chē tō-lí ê kà-sı̄. Múi lé-pài-jı̍t chiū pang-chān Tang-mn̂g kàu-hoē Chú-jı̍t-o̍h ê kang, āu-lâi soà jı̄m Tang-mn̂g Kàu-hoē ê Chip-sū. 
Put-hēng tı̄ kin-nı̂ gō͘-goe̍h boé jiám-pēⁿ, chı̍t-jı̍t chı̍t-jı̍t khah-tāng, āu-lâi kiám-cha, chai kiò sı̄ jiám-tio̍h Tiông-chit hû-su ê chèng, chiū khı̀ jı̍p Tâi-lâm I-ı̄ⁿ, in-ūi i ū chı̍t ê cha-bó͘-kiáⁿ, tı̄ hit I-ı̄ⁿ chāi-chit, thang lı̄-piān lâi chiàu-kò͘ i. 
Chóng-sı̄ Chú ê chí-ı̀ í-keng chiâⁿ, ài hioh I sè-kan ê kang, só͘-í lâng ê cheng-sı̂n, io̍h ê khùi-la̍t lóng bô kong-hāu, soà tı̄ 6 goe̍h 23 jı̍t ngó͘-hō͘ 7 tiám lı̄-khui sè-kan, hō͘ Chú ín-chhoā jı̍p Thian-tông, hióng siū 48 hoè, pàng hē kè-sek kap kiáⁿ-jı̂ cha̍p-lâng. Lâm 6 ê, lú 4 ê. I ê toā kong-chú hiān-chāi tı̄ Hōng-thian Boán-chiu I-kho Tāi-ha̍k tha̍k-chheh. Toā lēng-ài tı̄ Chiang-hoà Ki-tok-kàu I-ı̄ⁿ jı̄m khàn-hō͘ ê chit; iā chhù lēng-ài tı̄ Tâi-lâm I-ı̄ⁿ chò khàn-hō͘; kı̂-û 4 ê iáu tı̄ Kong-ha̍k-hāu; iā ū ê sè-hàn tı̄ ka-têng, lóng boē hun-phoè. 
Chiàu lán chai i ê chò lâng, ū kúi-nā hāng khó-chhú, chiū-sı̄ phoh-sı̍t tiong-hō͘ koh khı̂n-khiām. I chò lâng chin phoh-sı̍t, sı̄ hoân sı̄, hui hoân hui, bô ēng kan-chà ê pō͘ khoán-thāi lâng, iā chin tiong-hō͘, só͘-í tı̄-chia beh oá saⁿ-cha̍p nı̂ bô thiaⁿ-kı̀ⁿ pêng-iú hiâm kóng sím-mı̍h sū. Koh chin gâu khı̂n-khiām. I ū 9 ê kiáⁿ-jı̂, chiàu khoàⁿ sı̄ khah ū siū thoa-lūi, chóng-sı̄ i khı̂n-khı̂n khiām-khiām lâi ín-chhoā chèng kiáⁿ-jı̂, só͘-í tùi tı̄ keng-chè-chiūⁿ m̄-nā bô siū táⁿ-kek, hoán-tńg sı̄ iu-iû chū-chāi, í-keng poê-iúⁿ saⁿ ê kiáⁿ-jı̂ jı̍p siā-hoē khó-í chū-lı̍p. Khó-kiàn lâng nā goān khéng khı̂n-khiām, chı̄n-la̍t lâi kiâⁿ, bô-lūn sím-mı̍h ûi-lân ê koan-ài, to khó-í phah-phoà. 
Taⁿ chhiáⁿ khoàⁿ Pò siong-ti ê pêng-iú, thè in ka-cho̍k lâi kı̂-tó, hō͘ in chiong-lâi kè-e̍k sūn-sū, ē soà-chiap lâi chò Chú ê kang, thang êng-kng I ê miâ. 
(Tâi-oân Kàu-hoē-pò tē 544 koàn, 1930 nı̂ 7 goe̍h)