N̂g Táiⁿ ê Sió-toān

Lâ-lí-sàn ê kàu-hoē ū chı̍t-ê hoē-iú N̂g Táiⁿ. I sı̄ toà tı̄ Un3-á-chng, lı̄ Lâ-lí-sàn ū 8 lí lō͘. N̂g Táiⁿ kàu 72 hoè chiah hoán-hoé lâi sı̀n Chú. I ū chia̍h a-phiàn-hun chin toā, tı̀-kàu lóng bē kiâⁿ-lō͘, hit-sı̂ nā lâi lé-pài tio̍h oá-khò koáiⁿ-á chiah ē kiâⁿ. Āu-lâi i ū koat-ı̀ ài ké a-phiàn; lóng bô koh chia̍h. Iā koat-ı̀ ài o̍h pe̍h-oē-jı̄ ; koh bô loā-kú chiū ē hiáu tha̍k pe̍h-oē-jı̄ ê Sèng-chheh. Tùi ké hun liáu chiū lóng bô chia̍h. Hit-sı̂ sin-thè sǹg sı̄ ióng-kiāⁿ, nā bô lo̍h toā-hō͘ thàu toā-hong ê chó͘-tòng, khah siông ta̍k lé-pài-jı̍t ū lâi siú an-hioh, lóng m̄-bián kia̍h koáiⁿ-á. Ta̍k-ê lé-pài-jı̍t i chò hoē-iú ê thâu-chêng lâi pài-tn̂g. I sı̄ chin hui-siông ê jia̍t-sim ho̍k-sāi Chú ê lâng, iā ài ín-chhoā i ê kiáⁿ-sun pài Siōng-tè, iā siông-siông ài ín-chhoā pa̍t lâng lâi sı̀n Chú.

I pún-sin sui-jiân sı̄ lāu-lâng, iáu-kú ē chò ba̍k-kang tàu thàn-chı̂ⁿ, lâi chhut tı̄ kàu-hoē ê iân-kim. Chin thang chò sı̀n Chú ê hó bô͘-iūⁿ. I chia̍h kàu 82 hoè, iáu-kú siông-siông ài tha̍k Sèng-chheh kau-poê Chú. Nā bô chó͘-tòng khah siông ta̍k lé-pài ū kàu pài-tn̂g, i kàu ūi bô chhin-chhiūⁿ pa̍t-ê hoē-iú ài kóng êng-oē, chiū sı̄ choan-sim khoàⁿ Sèng-keng. Put-hēng tı̄ pún-nı̂ 8 goe̍h 18 jı̍t jiám-tio̍h pēⁿ; chiū hō͘ Siōng-tè tiàu i lı̄-khui sè-kan; kàu Thian-tông hióng-hok.

(Tâi-lâm Kàu-hoē-pò tē 356 koàn,1914 nı̂ 11 ge̍h)