Niû Tı̂m Sian-seⁿ Sió-toān

Sian-seⁿ sı̄ sio̍k Chiang-hoà Kàu-hoē Siù-chúi chng ê lâng. Chhut-sı̀ tı̄ Bêng- tı̄ 11 nı̂. Lāu-pē sı̄ choh-sit lâng, só͘-í Sian-seⁿ chū-sè iā sı̄ choh-sit, m̄ bat tha̍k chheh. Kàu 16 hoè ê sı̂ tit-tio̍h tō- lí, sı̄ in-ūi sit-tiûⁿ kap sı̀n Chú ê lâng ê sit-tiûⁿ chò hoé; tùi án-ni thiaⁿ-tio̍h Ki-tok ê hok-im chiū hoán-hoé lâi pài Siōng-tè. Jı̄-cha̍p hoè jı̍p Kàu-hoē, 21 hoè chhoā Sian-seⁿ-niû. Tı̄ kàu-hoē put- chí jia̍t-sim, soà hō͘ hoē-iú kéng i tng tiúⁿ-ló ê chit.

Āu-lâi lâng khoàⁿ i chin oa̍h-tāng, chiū kí-chiàn i jı̍p Toā-o̍h. Tı̄ o̍h-lāi siū kà-sı̄ 3 nı̂ chiū chhut lâi chò Oân-lí ke kàu-hoē thoân tō-lí kap kà o̍h ê kang chı̍t nı̂ kú; iā put-chí ū lı̄-ek kàu-hoē kap hia ê ha̍k-seng-á. Chū koh jı̍p Toā-o̍h chı̍t nı̂ kú, chiah chut-gia̍p khı̀ chò Kheⁿ-kháu kàu-hoē ê Sian-seⁿ. Toà hia nı̂ poàⁿ kú chiū jiám-tio̍h hı̀-pēⁿ, chia̍h io̍h bô sáⁿ kong-hāu. Kàu-su-hoē phài i khı̀ toà Lo̍k-káng, sı̄ hái-kháu ê só͘-chāi; in-ūi teh ǹg-bāng i ê pēⁿ ē hó; chóng-sı̄ pēⁿ-sè ná siong-tiōng, chiū chiām-sı̂ thêng kang tńg-khı̀.

Kàu kin-nı̂ 2 goe̍h 23 hō chiū hō͘ Chú tiàu tò-khı̀. Taⁿ i thoat-lı̄ sè-kan ê kan- khó͘, thang kap Chú saⁿ-kı̀ⁿ; m̄-kú i ū saⁿ ê gín-á iáu sè-hàn, Sian-seⁿ-niû beh kâⁿ kàu toā, chin-chiàⁿ sı̄ ûi-lân. Taⁿ chhiáⁿ khoàⁿ pò ê lâng thè in kı̂-tó Siōng-tè, hō͘ hiah ê gín-á kàu toā-hàn ē tit chò I ê kng-teng.

(Tâi-lâm Kàu-hoē-pò tē 290 koàn, 1909 nı̂ 5 ge̍h)