Nn̄g chióng sim-chêng

Saⁿ-goe̍h té, chiūⁿ A-lí-san siúⁿ eng-hoe, sūn-soà khı̀ San-bí-chhoan ê Tâ-ná-i-kû chhit-thô. San-bí-chhoan sı̄ goân-chū-bı̂n Cho͘-cho̍k ê pō͘-lo̍h, Tâ-ná-i-kû goân-chū-bı̂n-gí ê ı̀-sù chiū-sı̄ Bōng-iu-kok, sı̄ oá tı̄ Chan-bûn-khoe goân-thâu ê só͘-chāi, iā-sı̄ Tâi-oân kok-pó-hı̂ ”kò͘-hı̂ “ ê kò͘-hiong. Koè-khı̀, San-bí-chhoan sı̄ oá-khò chèng-chō lâi ı̂-chhı̂ seng-oa̍h, hui-siông sàn-chhiah. 15 tang chêng, chhoan-bı̂n lı̄-iōng thian-jiân chu-goân, choè hô-chhoan pó-io̍k ê khang-khoè. Ūi-tio̍h beh pó-hō͘ chit-tiâu khoe-á, jı̍t kap mê lóng ū lâng teh sûn-lô. Keng-koè tāi-ke ê phah-piàⁿ, chit-tiâu khoe-á koh oa̍h--khí-lâi-lah, kui-tiâu khoe-á-chúi chheng-chheng-chheng, goā-á-nı̍h chē ê hı̂-á chū-iû-chū-chāi siû-lâi-siû-khı̀, hō͘ lâng khoàⁿ-tio̍h chin kám-tōng, koan-kong-kheh jú-lâi jú-chē, in ê seng-oa̍h tit-tio̍h chin toā ê kái-siān. Koè bô joā-kú tı̄ Lâm-tâu ê Tan-tāi-khoe hoat-hiān 30 chiah chúi-lo̍k-á ê si-thé, khoe-á-chúi, khoe-á-piⁿ, kui-phiàn ê hoeh-jiah, lo̍k-jiông kap lo̍k-pian chá chiū hō͘ lâng koah--lo̍h-lâi, the̍h--khı̀-lah. Tâi-oân chúi-lo̍k-á sı̄ Tâi-oân siōng toā hêng ê chia̍h chháu ê tōng-bu̍t, sin-koân ū 178 kong-hun, keng-thâu koân 120 kong-hun, thé-hêng koân-toā, mn̂g ê sek-chúi kim koh súi, kò-sèng un-sûn tı̄ chúi-piⁿ bān-bān-á, chı̍t-chhùi chı̍t-chhùi teh chia̍h chháu-á, nn̄g-lia̍p ba̍k-chiu ı̂ⁿ-lı̀n-lı̀n, thâu khi-khi, lia̍h lâng kim-kim-khoàⁿ, chin siān-liông koh chin kó͘-chui. M̄-kú, lo̍k-á--ah lo̍k-á, lí kiám m̄-chai lí ê kak chiok pó͘, chiok ta̍t-chı̂ⁿ? Lí kiám m̄ chai chin-chē ê Tâi-oân cha-po͘-lâng lóng hoâi-gı̂ ka-kı̄ pāi-sı̄n tó-iông, ài oá-khò lí ê toā ki pian lâi chòng-iông? Tâi-oân ê chheng-san le̍k-súi kā lí phiàn lâi chia, liáu-āu, siah lí ê kak, koah lí ê pian. Lo̍k-á--ah, lo̍k-á, lí nā beh tâu-thai, ba̍k-chiu ài peh khah kim--leh, m̄-thang koh lâi chit-ê chèng-hú bô-lêng peh-sèⁿ iá-bân ê só͘-chāi--ah! (Tâi-oân-jı̄ Cha̍p-chı̀ tē 8 kı̂, 2001 nı̂ 7 ge̍h)