Phian-chiá : Chit phiⁿ Sòng Phok-sū toān ê oā-ke̍k sı̄ Tâi-lâm Tang-mn̂g ê Chhoà Ài-gı̄ Tiúⁿ-ló só͘ phian ê.
Sòng Phok-sū tı̄ 25 nı̂ chêng lâi Tâi-lâm hùn-heng ê sı̂ sı̄ toà tı̄ Chhoà Tiúⁿ-ló in tau. Chhoà Tiúⁿ-ló kàu hit tia̍p iáu m̄-bat tng-chit, Chóng-sı̄ khoàⁿ Sòng Phok-sū i ê hêng-ûi kèng-khiân,sı̀n-gióng jia̍t-lia̍t, chin siū kám-tōng,chū án-ni kı̀m hun, iā soà tùi kàu-hoē ke chin jia̍t-sim, liáu-āu tng tiúⁿ-ló, taⁿ iā í-keng teh-beh 20 nı̂ lah.
Choè-kūn Chhoà Tiúⁿ-ló koh ka-jı̍p Ki-tiân-hoē, thâu pái tı̄ Ki-tiân-hoē choè kiàn-chèng ê sı̂, ū ēng tùi Sòng Phok-sū ê hoê-kò͘ choè toê-ba̍k lâi kóng-khí, chāi chō pún Pò kı̀-chiá put-chí kám-tōng, ke̍k-le̍k kó͘-bú i chiong chiah ê hoê-kò͘ siá lâi lo̍h kong-pò. Chhoà Tiúⁿ-ló chêng bat phian kúi-nā pái ke̍k-pún, chhin-chhiūⁿ Pa Phok-sū toān, Lân I-seng toān, kı̂-û kúi-nā phiⁿ lóng chin chhut-miâ. Só͘-í chit chhù tú-tio̍h Tang-mn̂g kàu-hoē teh-beh khèng-chiok 60 chiu-nı̂, chiū koh chiong Sòng Phok-sū toān phian choè oā-ke̍k, chún-pı̄ tı̄ 10 ge̍h 13 hō àm tı̄ Tang-mn̂g kàu-hoē piáu-ián. Chit chhù ián-oân oē chhiau kè 30 goā lâng, sı̂-kan tio̍h oá nn̄g tiám poàⁿ cheng. Sòng Phok-sū pún-sin sı̄ Khó͘ Heng-jı̂n Tiúⁿ-ló beh chú-ián, í-goā Au Chı̀n-an Bo̍k-su beh ián Ông Bêng-tō Bo̍k-su. Tân Kim-jiân Bo̍k-su hu-hū beh ián Sòng Phok-sū ê pē-bú. Niû Siù-tek Bo̍k-su beh ián Sòng Phok-sū ê tiūⁿ-lâng, tiūⁿ-ḿ, kı̂-û choē-choē sı̄ ha̍k-sū, tāi-ha̍k seng, sı̂n-ha̍k seng beh piáu-ián, kàu sı̂ ún-tàng oē chin cheng-chhái. Chit chhù oē siu jı̍p tiûⁿ liāu, múi lâng 10 kho͘, teh kiaⁿ-liáu kàu sı̂ oē bô kàu chē-ūi thang siu-iông. Chiàu só͘ kè-e̍k ǹg-bāng oē thang tit-tio̍h 15,000 gûn ,thang kià-hù Āu-kah chi-hoē, hō͘ in thang to̍k-lı̍p choè tông-hoē. Chhoà Sian-siⁿ só͘ phian ê ke̍k, bûn sû loē-iông siong-tong ū te̍k-sek, só͘-í chiap-soà chhut tı̄ chia, ǹg-bāng hō͘ tho̍k-chiá iā soà tit-tio̍h lı̄-ek.
Ián-oân
Sòng Bo̍k-su, Sòng Phok-sū ê lāu-pē.
Sòng Bo̍k-su-niû.
Sòng Siōng-liâm (toā hiaⁿ).
Sòng Chú-un (Siōng-chiat).
Sòng ka chí-bē 3, 4 ê.
Heng-hoà Tiong-ha̍k ê hāu-tiúⁿ.
Sòng Siōng-chiat hu-jı̂n(Kím-hoâ).
Sòng Phok-sū tióng-lú.
Sòng Phok-sū Tiong-ha̍k ê tâng-o̍h nn̄g ê.
Sòng Phok-sū tiūⁿ-lâng hu-hū.
Hoa Kàu-siū hu-hū.
Sòng Siōng-chiat Bí-kok ê pêng-iú.
Sı̂n-ha̍k-ı̄ⁿ tông-o̍h 3 ê.
Hia̍p-hô Sı̂n-ha̍k-ı̄ⁿ ê ı̄ⁿ-Tiúⁿ.
Cheng-sı̂n pı̄ⁿ-ı̄ⁿ ê i-seng.
Hō͘-sū lâm lú kok chı̍t miâ.
Hok-le̍k Phok-sū.
Ohio Tāi-ha̍k Hoà-ha̍k-hē chú-jı̄m.Jı̍t-pún, Tek-kok, Se-pan-gâ liû-ha̍k seng kok chı̍t miâ.
Hui-lı̍p-pin Hoâ-kiâu.
Sin-ka-pho Hoâ-kiâu.
Tâi-oân chí-bē.
Ông Bêng-tō Bo̍k-su.
The̍h Iû-piān ê.
Tē It Bō͘: Sòng Bo̍k-su kheh-thiaⁿ
Pò͘-tı̀ : Kau-í 6 liâu, sı̀-kak toh 1 tè. ı̂ⁿ-toh-á kúi-nā tè, piah-téng tiàu 10 tiâu kài kap Iâ-so͘ ê Siōng.
Chhut ián jı̂n-oân: Sòng Bo̍k-su hu-hū, Gô͘ Hāu-tiúⁿ, Sòng ka hiaⁿ-tı̄ chí-bē kap Chú-un(Siōng-chiat) ê tâng-o̍h. Lı̂m chhin-ke hu-hū.
Bō͘-āu hòng-sàng: Che sı̄ Heng-hoà siâⁿ Sòng Bo̍k-su ê ke-têng, 1917 nı̂ 6 ge̍h 10 hō, Sòng Bo̍k-su ūi-tio̍h tē 3 kiáⁿ Chú-un beh chhut kok liû-ha̍k, teh kú-hêng sàng-pia̍t lé-pài . (Choân-oân khiā khí--lâi, gı̂m Sèng-si 63 siú 1 chat, gı̂m-si tiong pò͘-bō͘ chiām-chiām khui khí--lâi, gı̂m liáu choân-oân chē--lo̍h-lâi.)
Sòng bo̍k-su: Gô͘ Hāu-tiúⁿ, Lı̂m Sian-siⁿ kap hu-jı̂n, Chú-un ê tông-ha̍k. Kim mı̂-hng ūi-tio̍h Chú-un chhut-kok kú-hêng sàng-pia̍t-lé-pài, tit-tio̍h chu-ūi poah-kà kong-lı̂m, put-tān sı̄ Chú-un ê kong-êng, tông-sı̂ sı̄ hân-ka choân ka-cho̍k ê kám-kek kap êng-hēng, chhim-chhim seh-siā. Lūn khí Chú-un chhut-kok liû-ha̍k ê sū, oân-choân sı̄ chhut tı̄ Siōng-tè te̍k-pia̍t ê un-sù. Goá choè bo̍k-su cha̍p sò͘ nı̂, iúⁿ-chhı̄ kiáⁿ-jı̂ 6,7 ê, só͘ chek-chū ê m̄ chiūⁿ 100 kho͘, Chóng-sı̄ Chú-un ka-kı̄ ài khı̀ Bí-kok liû-ha̍k, it-bı̄ kı̂-tó, Siōng-tè kó-jiân thiaⁿ i ê kı̂-tó, nn̄g ge̍h jı̍t chêng tùi Pak-kiaⁿ chı̍t ūi Bí-kok soan-kàu-su bô sio-bat ê Khng Ko͘-niû, kià chı̍t tiuⁿ phoe lâi kóng, i í-keng thè Chú-un tı̄ Bí-kok Ohio chiu Oē-su-lí Tāi-ha̍k chhéng chióng-ha̍k-kim kap jı̍p-ha̍k ê sū, koh iā tit-tio̍h Tāi-ha̍k tiúⁿ phoe-chún lah. Jı̂-chhiáⁿ Chú-un nā kàu Bí-kok í-āu, chia̍h, toà ê sū, i iā thoè Chú-un siat-hoat pang-bâng. Sui-jiân chiap tio̍h chı̍t tiuⁿ phoe, tān-sı̄ chûn chı̂ⁿ thái ū pān-hoat neh? Chóng-sı̄ keng-kè Chú-un kap goán ê kı̂-tó, tùi Bí-kok lán kàu-hoē ê hiaⁿ-tı̄ iā ū lâng kià chı̂ⁿ lâi, koh lán ê hoē-iú ê chián-pia̍t, hiān-chāi chı̂ⁿ í-keng kàu-gia̍h lah,só͘-í koat-tēng bı̂n-á-chài beh chhut-hoat khı̀ Siōng-hái, tùi Siōng-hái chē chûn khı̀ Bí-kok, sı̍t-chāi sı̄ chin kám-siā Siōng-tè ê só͘-chāi (kóng liáu chē--lo̍h-lâi).
Gô͘ Hāu-tiúⁿ: (Khiā--khí-lâi). Sòng Bo̍k-su, Bo̍k-su-niû kap Chú-un chin kiong-hí, chit pang Chú-un lí oē thang chhut kok liû-ha̍k, goá sı̀n lí ê chiân-tô͘ sı̄ êng-kng chhàn-lān ê,chiong-lâi it-tēng sı̄ chhut lūi poa̍t chūi ê jı̂n-bu̍t, jı̍t-āu nā tńg-lâi,it-tēng oē ūi lán ê bı̂n-cho̍k toā-toā kòng-hiàn. Goá hoê-sióng poàⁿ nı̂ chêng, Chú-un pit-gia̍p Heng-hoà Tiong-ha̍k ê sı̂, tong-jı̍t i ê êng-iāu m̄-sı̄ sió-khoá, tāi-piáu choân-thé pit-gia̍p seng niá pit-gia̍p chèng-su kap tı̀-sû, tùi goá niá hāu-tiúⁿ siúⁿ, tùi koān-tiúⁿ niá iu-téng siúⁿ kap chióng-chn̄g, sı̍t-chāi sı̄ chin kiong-hí ê sū. Chú-un sı̄ pún-hāu iú-sú í-lâi choè iu-siù, choè hó ê ha̍k-seng. Nā m̄-sı̄ tong-sı̂ i ê sı̀ ché kè-sin, Chú-un hòng-khı̀, bô khı̀ khó Kim-lêng Tāi-ha̍k; kin-á-jı̍t í-keng sı̄ Kim-lêng Tāi-ha̍k ê ha̍k-seng. Chóng-sı̄ sui-jiân bô tı̄ kok-lāi tha̍k Tāi-ha̍k, khı̀ Bí-kok liû-ha̍k goá sı̀n tùi Chú-un sı̄ koh khah ū lı̄-ek, bāng Chú-un chhut-kok tiong pó-tiōng sin-thé,ló͘-le̍k iōng-kong, sı̄ goá choè hi-bāng ê só͘-chāi. (kóng liáu chē lo̍h-lâi chia̍h tê).
Chú-un ê tông-ha̍k: (khiā--khí-lâi). Sòng Bo̍k-su, Sòng bo̍k-su-niû (hu-jı̂n) chin kiong-hí! Goá kap Chú-un tâng-o̍h 5 nı̂, goá oē sı̀n Iâ-so͘ kàu sı̄ siū Chú-un hiaⁿ ê ín-chhoā kap kó͘-lē, goán saⁿ lâng pit-gia̍p āu sı̂-siông khı̀ chhân-chng pò͘-tō, múi pái káng-tō liáu to ū 3,5 ê, ū sı̂ 10 sò͘ ê chı̀-goān beh sı̀n Iâ-so͘, lâng-lâng to sı̄ chheng-ho͘ Chú-un hiaⁿ choè sió bo̍k-su, sı̍t-chāi sı̄ chin kám-siā Chú. Chit pái Chú-un hiaⁿ chhut-kok khı̀, goán sı̍t-chāi chin bô phoāⁿ, ǹg-bāng i chiong lâi tńg-lâi ê sı̂ koh siū i ê kà-sı̄, chhian bāng Chú-un hiaⁿ bô pàng-sak goán chiah ê bô tióng chı̀ ê hiaⁿ-tı̄, (kóng liáu chē lo̍h-lâi chia̍h tê).
Sòng Bo̍k-su: In-ūi chit pang Chú-un chhut-kok,kim āu kúi nı̂ chiah oē thang koh tńg-lâi, sı̍t-chāi sı̄ chin oh-tit liāu ê sū. Tān-sı̄ hiān-chāi goá ài hoat-piáu chı̍t koan-hē Chú-un chiong-sin ê tāi-sū, chiū-sı̄ Chú-un ê chhin-sū, (tāi-ke lóng phah chhiú). Chú-un chū tı̄ nn̄g hè ê sı̂,chiū í-keng tit-tio̍h Lı̂m Sian-siⁿ kap sian-siⁿ-niû bô khı̀-hiâm goá choè bo̍k-su ê chheng-hân, chiong i ê chhian-kim sió-chiá beh phit-phoè hō͘ Chú-un, sı̍t-chāi sı̄ chin kám-siā ê sū. Chū kim-jı̍t khí Lı̂m Sian-siⁿ sı̄ goá ê chhin-ke, Lı̂m hu-jı̂n sı̄ goá ê chhiⁿ-ḿ, Kím-hoâ sı̄ goá ê sim-pū, Chú-un lí nā khı̀ Bí-kok, tek-tek khak-khak tio̍h khó͘-sim ēng kang, m̄-thang khı̀ kau-poê, khı̀ ài Bí-kok ê lú-chú, in-ūi lí ê hun-in sı̄ pē-bú chú-hun, sı̄ Siōng-tè phoè-tiāⁿ ê, só͘-í tio̍h choa̍t-tùi chun siú Siōng-tè kap pē-bú ê bēng-lēng, chiong-lâi kiat-hun kàu pek-liân kai-ló chiah hó.
Lı̂m Chhiⁿ-ḿ: (Khiā--khí-lâi). Sòng Bo̍k-su, Bo̍k-su-niû kap chu-ūi,lūn khí chit chân chhin-sū , chú-tōng sı̄ goá. Goân-lâi goán oē sı̀n Chú jı̍p-kàu sı̄ Bo̍k-su ê khoàn-bián lâi tit-tio̍h ê, goá khoàⁿ Bo̍k-su goân-lâi sı̄ chı̍t ūi siù-châi, ka-têng iā chin hù-jū. Tān-sı̄ choè Bo̍k-su í-āu, chiām-chiām pı̂n-hân,thoân-tō iā chin chia̍h khó͘. Put-kò goá sı̀n. Siōng-tè tek-khak oē pó-pı̀ i ê ka-têng. Chú-un nn̄g hè ê sı̂ goá khoàⁿ i toā thâu, toā khok-khok, hı̄-á bok-bok, bı̄n sı̄ chin o͘-hng, chı̍t mı̂ khàu kàu kng, Sòng Bo̍k-su chhiò Bo̍k-su-niû,kóng thái oē siⁿ chit ê gín-ná bái koh khiap-sı̀, Chóng-sı̄ goá khoàⁿ liáu chin kah-ı̀, só͘-í kap goá ê tiōng-hu siong-liông, chiong Kím-hoâ lâi phoè hō͘ Chú-un khoàⁿ cháiⁿ-iūⁿ. Goá ê tiōng-hu chàn-sêng, í-āu goá chiah tùi Bo̍k-su-niû kóng khí chit chân sū. Bo̍k-su-niû kap Bo̍k-su siong-liông liáu-āu,iā chàn-sêng, chit ê sū keng-kè 15 nı̂,kin-á-jı̍t Bo̍k-su chiū-sı̄ chhin-ke, sı̍t-chāi sı̄ chin ha̍p-sı̂ koh ū ı̀-gı̄. Tùi kin-á-jı̍t Chú-un sı̄ goán ê kiáⁿ-sài, Chú-un,lí chhut-goā tio̍h gâu pó-tiōng sin-thé choè iàu-kín. (Kóng liáu chē lo̍h-lâi chia̍h tê).
Bo̍k-su-niû:(Khiā--khí-lâi). Lı̂m chhin-ke, chhiⁿ-ḿ, chin to-siā, chiong lí ê chhian-kim lâi sàng goá ê kiáⁿ Chú-un. Tùi kim-jı̍t khí goá oē chin thiàⁿ Kím-hoâ, chhin-chhiūⁿ thiàⁿ ka-kı̄ ê cha-bó͘-kiáⁿ.
Lı̂m chhin-ke: Chú-un kiáⁿ-sài, Lí kiû ha̍k kiû kong-bêng siōng-chı̀n, sı̍t-chāi chin kiong-hí, Kím-hoâ goá iā tek-khak koán-kàu chek-tok, kiò i kim-āu tio̍h o̍h khı̂m, o̍h chhâi-hông kap liāu-lí, téng-téng. Ǹg-bāng chiong-lâi oē chiâⁿ-choè chı̍t ê hiân-chhe liông-bú, che chı̍t tiám-á kā lí sūn-hong (sàng âng-pau). goān Siōng Chú chiàu-kò͘ lí pêng-an kàu Bí-kok. (Kóng liáu chē--lo̍h-lâi chia̍h piáⁿ).
Chú-un:A-pa, a-bú, tiūⁿ-lâng, tiūⁿ-ḿ, Gô͘ Hāu-tiúⁿ kap chu-ūi tông-ha̍k, tāi-ke chin to-siā. Goá chū soè-hàn tit-tio̍h lín ióng-io̍k, thiàⁿ-sioh ê chêng chhin-chhiūⁿ soaⁿ hiah koân, hái hiah chhim, ēng oē kóng boē liáu, kim-āu chhut-goā, eng-kai ka-kı̄ chim-chiok sin-thé , ló͘-le̍k tha̍k-chheh, hi-bōng bô koh ko͘-hū lín ê un-chêng, iā tông-sı̂ chhiáⁿ lín pó-tiōng sin-thé, chiong-lâi pêng-an saⁿ-kı̀ⁿ (kóng liáu koh chē--lo̍h-lâi).
Nn̄g ūi tông-ha̍k: (Khiā--khí-lâi). Sòng Bo̍k-su, Î Sian-siⁿ lín lióng-ka kiong-hí, goán kap Chú-un hiaⁿ tông-chhong 5 nı̂ kú, lóng iáu bē bat thiaⁿ tio̍h chit chân hí-sū. Kim-jı̍t thiaⁿ tio̍h sı̍t-chāi chin hoaⁿ-hí. lı̂m-sı̂ bô pı̄-pān lé-mı̍h, Chí-ū goán nn̄g lâng lâi chhiùⁿ chı̍t chat si chiok-hok lín nn̄g ūi bı̄ hun ê hu-hū chiân-tô͘ hēng-hok khoài-lo̍k !(Gı̂m Sèng-si 216 siú tē 4 chat, gı̂m kàu bé-chām pò͘ bō͘ chiām pàng--lo̍h-lâi. Lán koat-ı̀ saⁿ-thiàⁿ ê koa iáu ū thiaⁿ-kı̀ⁿ).
Tē Jı̄ Bō͘: Sòng Chú-un ê pâng-keng
Pò͘-tı̀: Chı̍t tâi bı̂n-chhn̂g, 3 liâu í,chı̍t tè toh, toh-téng ū chheh, tiān-teng tâi, chı̍t tè chia̍h-toh, toh-téng ū poe-poâⁿ, ké-chí. Chú-un tı̄ sek-lāi kiâⁿ-lâi kiâⁿ-khı̀, chhiùⁿ “ So͘ Bú bo̍k-iông” ê koa.
Bō͘-āu hòng-sàng: Chú-un tı̄ Bí-kok Oē-su-lí Tāi-ha̍k tha̍k-chheh, tit-tio̍h Hoa Kàu-siū, chiū-sı̄ Dr. Walker chin gâu ài-kò͘, chin gâu pang-chō͘.
Hoa Kàu-siū: (Phah-mn̂g). Chú-nu, gâu chá.
Chú-un: Hoa Kàu-siū gâu chá, chhiáⁿ lâi saⁿ-kap chia̍h chá-tǹg, chhiáⁿ chē!（Hoa Kàu-siū chē--lo̍h-lâi, Chú-un phâng poe, oáⁿ hō͘ Hoa Kàu-siū).
Hoa Kàu-siū: Goá í-keng chia̍h pá,to-siā. Chú-un, goá kin-á-jit lâi pò lí chı̍t ê hó siau-sit, cha-hng ū kàu-siū hoē-gı̄, chèng kàu-siū to chheng-chàn lí ê sêng-chek iu-siù. Pún-lâi ta̍k lâng to tio̍h tha̍k 4 nı̂ chiah oē tit-tio̍h ha̍k-sū pit-gia̍p, Chóng-sı̄ lí tha̍k 3 nı̂ chiū oē tit-tio̍h pit-gia̍p lah, chin kiong hí. Goá thoè lí siūⁿ, lí pit-gia̍p liáu-āu iáu sı̄ tı̄ lán ê Chiu-lı̍p Tāi-ha̍k kè-sio̍k tha̍k se̍k-sū khah hó, goá iā í-keng thoè lí sin-chhéng chióng-ha̍k-kim lah, jı̂-chhiáⁿ lán chit ê só͘-chāi tùi lí ê kiān-khong sı̄ chin hó, beh chhē kang-chok ê ki-hoē iā chin-choē. Chı̍t-bı̄n goá kap goá ê hū-jı̂n-lâng iā oē sı̂-siông kap lí kı̀ⁿ-bı̄n, goá iā oē thang kap lí sı̂-siông kè-sio̍k choè thoân tō-lí ê kang, in-ūi lí ê káng-tō chin ū le̍k-liōng, chin siū Bí-kok lâng ê hoan-gêng.
Chú-un: Hoa Kàu-siū, chin to-siā! Chū goá lâi Oē-su-lí Tāi-ha̍k, tit-tio̍h lí kap su-bú ê ài-kò͘ kap khoán-thāi, bû-bı̂ put-chı̀, cheng-sı̂n-chiūⁿ, bu̍t-chit-chiūⁿ ê an-ùi chin toā, thang kóng lí sı̄ goá tı̄ Bí-kok tiong ê pē-bú. Goá oē chun-chiàu lí thoè goá só͘ an-pâi, chı̍t-bı̄n kong-tho̍k se̍k-sū ha̍k-ūi, chı̍t-bı̄n iā oē tùi kàu-siū tit-tio̍h Sèng-keng tiong ê kà-sı̄ chin-lí, tông-sı̂ iā oē kap Su-mi-su téng-téng ê pêng-iú cho͘-chit pò͘-tō-tūi khı̀ lông-chhoan thoân-tō. In-ūi goán ê pò͘-tō-tūi hui-siông siū hoan-gêng. Ah ! Hoa Phok-sū, goá cha-hng ū chiap-tio̍h goá ê bı̄-hun chhe tùi Tiong-kok kià lâi ê phoe, goá tha̍k hō͘ lí thiaⁿ:
『Chhin-ài ê Chú-un ! Goá ta̍k pái chiap tio̍h lí ê phoe, chhim chai lí ê thiàⁿ goá, chin to-siā kám-kek lí ê phoe, tāi ke to sı̄ hui-siông hoaⁿ-hí heng-hùn khoài-lo̍k, te̍k-pia̍t toā-ko͘ hoaⁿ-hí kàu peh khí-lâi thiàu. Lí tı̄ Bí-kok chı̍t-bı̄n iōng-kong tha̍k-chheh, sêng-chek iu-siù; chı̍t-bı̄n chia̍h khó͘ choè kang, tit-tio̍h Bí-kok choē-choē hó-sim lâng ê pang-chō͘, kan-ta chı̍t ê hioh-joa̍h chiū oē thang thàn 600 kho͘ thang choè chı̍t nı̂ ê seng-oa̍h hùi, jı̂-chhiáⁿ iā ū 300 kho͘ thang kià tńg-lâi hō͘ toā-ko khı̀ Bí-kok liû-ha̍k, choân-ke sı̍t-chāi hui-siông hoaⁿ-hí kám-siā Siōng-tè. Toā-ko kūn jı̍t tiong oē chhut-hoat, chit tiuⁿ phoe lí chiap-tio̍h ê sı̂, tāi-khài toā-ko iā í-keng kàu Bí-kok lah. Hiān-chāi pa-pa in-ūi sió bo̍k-su bô tı̄-teh, só͘-í kàu-hoē ê kang hui-siông bâng, goá ta̍k jı̍t liān khı̂m, pang-chān lé-pài ê toâⁿ khı̂m, ǹg-bāng lí chiong-lâi tńg-lâi ê sı̂, lí chhiùⁿ, goá toâⁿ, oē thang khı̂m-sek hô-bêng .hu chhiòng hū sûi, ka-têng hô-pêng khoài-lo̍k. Hiān-chāi pa-pa, ma-ma kap ke-lāi toā-soè to lóng pêng-an, chhiáⁿ lí hòng-sim, te̍k-pia̍t thoè pa-pa, ma-ma chhéng-an Hoa Phok-sū kap hu-jı̂n, iā thoân-ta̍t choân-ke ê kám-siā. Chiok lí kiān-khong kap khoài-lo̍k.』
The̍h iû-piān ê: (Hut-jiân phah-mn̂g).Oé! Oé! Sòng Sian-siⁿ tı̄ chhù-nih bô? Tiān-pò! Tiān-pò! (Chú-un chiap tiān-pò tha̍k).
Chú-un: Téng-po͘ 10 tiám, chhiáⁿ lâi chhia-thâu chiap goá, Sòng Sūn-lí. Hoa Kàu-siū, goán toā hiaⁿ 10 tiám chiū oē kàu chhia-thâu, goá beh lâi-khı̀ chiap i.
Hoa Phok-sū: Chin kiong-hí ! chin kiong-hí ! Sı̂-kan kè tit chin kín, lí iā beh chhut-hoat lah, goá seng sit-lé, lēng-jı̍t chiah kap lín lēng-heng lâi goán tau chē. Lí chhiáⁿ－－（pı̀-bō͘)－－
Tē 3 Bō͘ : Kok-chè ha̍k-seng siok-sià boán-hoē.
Pò͘-tı̀: Tn̂g toh nn̄g tè, í-á 10 liâu,ián-oân ū ê chhēng Jı̍t-pún saⁿ, Tiong-kok saⁿ, se-chong téng.
Sòng Chú-un: Kim-mı̂ lán tāi-ke tı̄ chia khui Kok-chè ha̍k-seng boán-hoē, sió-tı̄ choè chú-pān jı̂n kap chú-se̍k,kám-kak chin êng-hēng, lán tāi-ke oē thiaⁿ tio̍h ta̍k kok ê im-ga̍k, sı̍t-chāi sı̄ lân tit ê ki-hoē chhiáⁿ chu-ūi chı̄n-liōng hoat-hui ta̍k lâng ê im-ga̍k châi-lêng lâi piáu-ián, hō͘ lán oē tit cheng-ka kok-chè kan ê chhin-bo̍k kap iú-gı̂. Chhiáⁿ chu-ūi goân-liōng goá chí-miâ ê lâi chhiùⁿ in ê kok-ka ê chhut-miâ ê koa-khek. Tē it hoan chhiáⁿ Jı̍t-pún ko͘-niû lâi chhiùⁿ.
Jı̍t-pún ko͘-niû: (Chhēng Jı̍t-pún saⁿ)(Chhiùⁿ Jı̍t-pún koa, chhiùⁿ liáu tāi-ke hat-chhái phah-chhiú).
Chú-un: Tē jı̄ hoan chhiáⁿ Tek-kok lāu tông-ha̍k Schubert Sian-siⁿ lâi chhiùⁿ lí ka-kı̄ choè ê sè-kài bêng-khek.
Schubert: (Chhiùⁿ Linden-Baum, chhiùⁿ oân toā hat-chhái)
Chú-un: Tē 3 hoan chhiáⁿ Se-pan-gâ ko͘-niû chhiùⁿ.
Se-pan-gâ ko͘-niû: (Chhiùⁿ Se-pan-gâ ko͘-niû khek, chhiùⁿ oân phah-chhiú).
Chú-un: Choè-āu chhiáⁿ toā hiaⁿ chhiùⁿ Tiong-kok khek.
Sòng Sūn-lí: Chu-ūi ! Goá beh chhiùⁿ--ê kiò-choè”So͘ Bú bo̍k iông,” So͘ Bú sı̄ chı̍t ūi Hàn-tiâu ê bêng chiòng, chhut-cheng khı̀ Hoan kok, hō͘ Hiong-lô͘ lia̍h khı̀ koaiⁿ tı̄ Pak-hái, tı̄ hia kò͘ iûⁿ 19 nı̂ kú, i ê bó͘ tı̄ chhù-lāi su-liām i ê tiōng-hu ê khek chiū-sı̄ “So͘ Bú bo̍k iông.”Goá ê sió-tı̄ tı̄ kok-lāi iā ū chı̍t ê bı̄ hun chhe, tāi-khài iā sı̄ sı̂-siông teh siàu-liām, sı̂-siông chhiùⁿ chit tiâu koa chiah tio̍h. (Chhiùⁿ liáu tāi-ke hat-chhái phah-chhiú).
Chú-un: Kim-mı̂ lán sı̍t-chāi chin khoài-lo̍k, sui-jiân sı̄ bô siāng ê bı̂n-cho̍k, oē tit tāi-ke saⁿ-kap chia̍h ta̍k kok put-tông ê san-tin hái-bı̄, thiaⁿ ta̍k kok ê bêng-khek, sı̍t-chāi chin hēng-hok. Chóng-sı̄ jı̂n-seng chóng ū sı̂ ū lı̄-sàn ê thòng-khó͘, ki-hoē boē tàng koh lâi, lán tāi-ke nā khéng sı̀n Iâ-so͘, jı̄n I choè lán ê Kiù-chú, goá sı̀n chiong-lâi lán beh tı̄ thian-tông saⁿ-kı̀ⁿ, hióng-siū éng-oán ê hok-khı̀ sı̂-kan í-keng bô chá, kim-mı̂ kàu chia pı̀-hoē. Chiok tāi-ke boán-an.
