Oē-Ke̍k Sòng Siōng-chiat Phok-sū 02

 Tē 4 Bō͘ : Ohio chiu lı̍p tāi-ha̍k mn̂g-kháu. 
 Pò͘-tı̀ : Tāi-ha̍k kiàn-tio̍k-bu̍t oán-kéng 
 Bō͘-āu hòng-sàng: Sòng Chú-un 27 hè pit-gia̍p. Ohio chiu-lı̍p tāi-ha̍k tông-sı̂ tit-tio̍h hoà-ha̍k phok-sū. 
 (Sòng Phok-sū chhiú the̍h phok-sū bûn-pı̂n. Hoâ Kàu-siū, Su-bí-su kap Sòng Phok-sū in toā-hiaⁿ, 4 lâng tâng-kiâⁿ). 
 Su-bí-su : Sòng Phok-sū, goá kin-á-jı̍t sı̍t-chāi chin hoaⁿ-hí khoài-lo̍k ah, kap lí choè pêng-iú, siū lí chiau-thāi chham-ka lí ê pit-gia̍p tián-lé, thiaⁿ hāu-tiúⁿ ê pò-kò, chiah chai lí sı̄ chı̍t ūi choa̍t-sè ê kı̂-châi, tùi Ohio tāi-hak3 siat-lı̍p í-lâi,bē-bat ū lâng pí lí ê pit-gia̍p sêng-chek khah hó, lí chiàm 3 pah ê ha̍k-seng tiong ê tē it miâ. Iū-koh lí ê hoà-ha̍k lūn-bûn, kàu-siū hoē-gı̄ tit-tio̍h thong-kè, tāi-ha̍k siū-ú lí hoà-ha̍k phok-sū, sı̍t-chāi lí ê êng-iāu, lí ê hoaⁿ-hí, m̄-sı̄ goá só͘ oē hêng-iông oē piáu-hiān tit, kim-āu lí ê miâ-siaⁿ lēng lâng him-soān put-chı̄n, sı̍t-chāi chin kiong-hí. 
 Sòng Phok-sū: Su-bí-su hiaⁿ, siū lí ê o-ló sı̍t-chāi tng boē khí, bān-sū lóng sı̄ Siōng-chú ê an-pâi kap un-sù, chí-ū kám-siā nā-tiāⁿ. Put-kò goá hiān-chāi só͘ khoà-sim ê, sı̄ kim-āu ê hong-chiam boē tēng ah. Chóng-sı̄ choè-kūn thàu-mı̂ gián-kiù kap siá lūn-bûn, kám-kak chin ià-siān, choè hó ū sı̂-kan khùn chı̍t lé-pài siōng-hó . 
 Sòng Sūn-lí: Hiân-tē, goá pêng-sò͘ chai lí ài chia̍h koe, só͘-í goá í-keng pı̄-pān chı̍t chiah jı̂n-sam koe, lán tńg-lâi siok-sià chiū ū ke thang chia̍h. Kin-á-jı̍t beh sı̄ lán pē-bú lâi khoàⁿ-tio̍h lí ê pit-gia̍p tián-lé m̄-chai beh cháiⁿ-iūⁿ ê hoaⁿ-hí leh, te̍k-pia̍t beh sı̄ Sūn-bí ū tı̄ lé-tn̂g leh, tek-khak hō͘ lâng thoa khí-lâi chim ! 
 Hoâ Phok-sū: Sòng Phok-sū, chin kiong-hí, sı̍t-chāi chin kiong-hí, lí ê khó͘-kang í-keng tit-tio̍h pò-siúⁿ lah, lí thâu-náu ê iu-siù, kè tit lín Tiong-kok lâng tāng-put-tāng chiū khoa-kháu kóng lín sı̄ N̂g-tè ê kiáⁿ-sun, kóng lín Tiong-kok bı̂n-cho̍k chiū-sı̄ chhut-sı̀ tı̄ sè-kài ê tiong-ng, só͘-í chiah kiò-choè Tiong-kok. Taⁿ lí ū piáu-hiān lín ê bı̂n-cho̍k ê iu-siù, sı̍t-chāi chin kiong-hí. 
 Sòng Phok-sū: Hoâ Phok-sū, chin sit-lé, chin sit-lé. Sū-sı̍t goán Tiong-kok Kó͘-tāi í-keng chhut chin-choē sèng-jı̂n, hiân-jı̂n, tia̍t-sū, pí kı̂-thaⁿ ê bı̂n-cho̍k kok-ka bûn-hoà khah chá hoat-ta̍t, chóng-sı̄ lūn-khí kūn-tāi goán Tiong-kok sı̍t-chāi chin lo̍k-hō͘, put-pí Au Bí. Kim-āu chin-choē hong-biān su-iàu Au Bí kok-ka lâi oān-chō͘, sè-kài ê jı̂n-lūi nā khéng chiap-la̍p Ki-tok ê thiàⁿ, hō͘-siong saⁿ lí-kái, saⁿ-thiàⁿ, sè-kài chiah ū sı̍t-chāi ê hô-pêng, jı̂n-lūi chiah ū hēng-hok khoài-lo̍k. Hoâ Kàu-siū, goá ū kin-á-jı̍t ê êng-ū, oân-choân sı̄ lí poê-iúⁿ ê kong-lô, chhim-chhim kám-siā. 
 Hoâ Kàu-siū: Sòng Phok-sū, goá āu-ge̍h-jı̍t chiū beh khı̀ Au-chiu, iok-lio̍k chı̍t nı̂ kú, ǹg-bāng mê-nı̂ tńg-lâi chiah koh saⁿ-kı̀ⁿ, chhiáⁿ lí pó-tiōng sin-thé, ū sím-mı̍h khùn-lân ê sı̂ chiah kap su-bú chham-siông. Lí chhiáⁿ. 
 Sòng Phok-sū: To-siā, chài-hoē. (Hoâ Phok2-sū thè-tiûⁿ hoà-ha̍k-hē chú-jı̄m kàu-siū teng-tiûⁿ). 
 Hoà-ha̍k-hē chú-jı̄m: Sòng Phok-sū kiong-hí, chin kiong-hí, tú-tú siūⁿ beh khı̀ pài-hāu lí, bô phah-sǹg tı̄ chia tú-tio̍h lí. 
 “Tho̍k-chiá ê phoe” 
 Chú-pit sian-siⁿ hūi-kàm. Tang-mn̂g kàu-hoē ê 60 chiu-nı̂ kı̀-liām kap Chhoà Ài-gı̄ Sian-siⁿ phian-ke̍k ”Sòng Phok-sū toān” ê ián-chhut. Goá tùi Kong-pò ū tha̍k-tio̍h, kám-kak put-chí hoâi-liām , iā boē-tit khı̀ him-sióng sı̍t-chāi chin ûi-hām. In-ūi Tang-mn̂g kàu-hoē sı̄ goá siū chiap-la̍p jı̍p kàu-hoē ê só͘-chāi. Sòng Phok-sū ê hùn-heng iā hō͘ goá put-chí siū kám-tōng. Goá tong-sı̂(1935）ū boé i ê Soat-kàu-chı̍p kap i ê “Goá ê kiàn-chèng”, chóng-sı̄ goá ū hoâi-gı̂ i ê chhiau-jı̂n ê tı̀-hūi kap poa̍t-kûn ê sêng chek, kap tı̄ Bí-kok Tāi-ha̍k thiàu-kip seng-liân ê tāi-chı̀. 
 Chóng-sı̄ ū chı̍t jı̍t, goá ū tı̄ bô phah-sǹg ê tiong-kan tit-tio̍h kái-tap. Só͘-í goá phah-sǹg lí nā kā goá lo̍h tı̄ Chhoà Ài-gı̄ Sian-siⁿ ê Sòng Phok-sū toān ê āu-bı̄n choè chı̍t ê hù-thiam soat-bêng , kiám-chhái tùi hiah ê kap goá sio-siāng ū hoâi-gı̂ ê lâng choè chı̍t ê chin hó ê chèng-bêng. 
 Tı̄ 1939 nı̂ tang-thiⁿ, goá ū khı̀ chham-ka Jı̍t-pún Tiông-kiā chhı̄ ê Jı̍t-pún Ki-tok-kàu-thoân liân-ha̍p lé-pài tı̄ Tāi-po͘-teng Jı̍t-pún Ki-tok kàu-hoē ê sı̂, goá tı̄ Sèng-keng kap Chàn-bí-koa í-goā iáu ū chı̍t pún Sòng Siōng-chiat tō-chı̍p. Hit pún ê āu-bı̄n ū Sòng Phok-sū ê siōng, chóng-sı̄ bô ı̀n i ê miâ tı̄ hia. Ū chı̍t ê Jı̍t-pún Bo̍k-su Chhian-ia̍p Īn-hiông. I sı̄ Methodist kàu-hoē ê Bo̍k-su kap goá chē choè-hé, ū khoàⁿ-tio̍h hit tiuⁿ siōng. Ná chhin-chhiūⁿ kám-kak chin kı̂-koài. Kàu lé-pài soah, i chiah mn̄g, “che sı̄ sím-mı̍h chheh?”goá kóng,”sı̄ chı̍t ê Tiong-kok lâng ê Soat-kàu-chı̍p,” “chit ê lâng goá chin bı̄n-se̍k, sı̄ Sòng Phok-sū?”goá kóng, “Sı̄. Lí thài bat i ?”I kóng“Bat, goá kap i tı̄ Bí-kok Tāi-ha̍k tông-ha̍k, chóng-sı̄ i sı̄ tha̍k Hoà-ha̍k, goá sı̄ tha̍k Sı̂n-ha̍k.”goá mn̄g i,”Sòng Phok-sū tı̄ ha̍k-hāu ū gâu tha̍k-chheh bô?”I ı̀n kóng, “Hó͘, chit ê lâng chin lı̄-hāi, ha̍k-seng ta̍k ê bat i. Beh kang-tha̍k koh the̍h thâu-miâ, sı̍t-chāi chin iu-siù. Tńg-khı̀ Tiong-kok liáu-āu teh choè sím-mı̍h koaⁿ.” Goá ı̀n kóng, “Bô-ah! I bô choè koaⁿ, sı̄ teh thoân-tō, sı̄ Tiong-kok chhut-miâ ê Hùn-heng-ka, chit pún sı̄ i ê soat-kàu-chı̍p.” Chhian-ia̍p Bo̍k-su chiah kóng,”Siōng-tè beh ēng lâng sı̍t-chāi kı̂-biāu, án-choáⁿ Hoà-ha̍k-ka oē pı̀ⁿ Thoân-tō lâng.”Khó-sioh Chhian-ia̍p tı̄ 1945 nı̂ 8 ge̍h 9 jı̍t ê goân-chú chà-tân lı̄-pia̍t sè-kan. 
 Khng Ka-im siá 
 Sòng Phok-sū: Hok-le̍k Bo̍k-su, lí Khoàⁿ goá ê bı̄n chhin-chhiūⁿ thoân-tō lâng ê bı̄n, sı̄ sū-sı̍t mah? Cha-àm goá beh khùn ê sı̂, goá kı̂-tó liáu, ū siaⁿ tùi goá kóng, lâng nā sit-lo̍h sı̀ⁿ-miā tit-tio̍h- thong sè-kài ū sím-mı̍h lı̄-ek ah? Che siaⁿ kap lí só͘ kóng, khoàⁿ goá ê bı̄n chhin-chhiūⁿ thoân-tō lâng, sı̍t-chāi sı̄ saⁿ hû-ha̍p. Hó͘ ! Goá koat-ı̀ beh choè Siōng-tè ê kang-lâng, goá koat-ı̀ beh lâi khı̀ jı̍p Liú-iok Hia̍p-hô Sı̂n-ha̍k-ı̄ⁿ lah. Goá goān-ı̀ hòng-khı̀ sè-kan ê êng-hoâ hù-kùi, it-bı̄ choè Siōng-tè ê pok-jı̂n lah. 
 Hok-le̍k Bo̍k-su: (Ak-chhiú). Sòng Phok-sū kiong-hí, lí oē-hiáu soán-te̍k chit tiâu oa̍h-miā lō͘, sı̍t-chāi kiong-hí. Goān Chú chiok-hok lí tı̍t-kàu éng-oán, goá beh khı̀ lah, lí chhiáⁿ. 
 (Pı̀-bō͘) 
 Tē 5 Bō͘: Àm-mı̂ lō͘-chiūⁿ. 
 Bō͘-āu hòng-sàng: 1926 nı̂ 9 ge̍h, Sòng Phok-sū jı̍p Hia̍p-hô Sı̂n-ha̍k-ı̄ⁿ hoat-kiàn-tio̍h chāi-ha̍k ê ha̍k-seng bô kàu-gia̍h kèng-khiân ê thài-tō͘, í-kı̍p sin-phài Sı̂n-ha̍k ê tan-tiāu bô bı̄, soà tùi sı̀n-gióng hoat-seng hoâi-gı̂. Tùi án-ni khai-sí hoan-e̍k Hu̍t-keng, Tō-tek-keng, chı̍t hong-bı̄n iā chē-siân, liām-keng . Tān-sı̄ sí-chiong sim-lāi boē thang tit-tio̍h pêng-an. Ū chı̍t mı̂ kap 3, 5 ê tông-o̍h choè-tı̄n khı̀ Chı̀m-sı̀n-hoē ê Kok-kok-thaⁿ kàu-hoē hù Hùn-heng-hoē, hui-siông kám-kek, hoē soah tńg-lâi kàu poàⁿ-lō͘. 
 Sı̂n-ha̍k-iⁿ tông-o̍h: Kim-mı̂-hng ê chū-hoē hó-chhiò kàu-ke̍k ah, kan-ta chı̍t ê 15 hè ê cha-bó͘ gín-ná ê káng-tō, kui chheng lâng, iā ū pe̍h thâu-mn̂g ê sin-sū, iā ū ha̍k-chiá, to lóng lâu ba̍k-sái hoán-hoé jı̄n-choē. Kun-pún sı̄ hó-chhiò kàu ke̍k ah. 
 Sı̂n-ha̍k-ı̄ⁿ tông-o̍h: Tāi-chiòng sim-lí sı̍t-chāi thang kiaⁿ kàu-ke̍k. Kan-ta chı̍t ê 15 hè cha-bó͘ gín-ná, chiū oē chho-chhiòng kui-chheng ê thèng-chiòng, hō͘ in ū ê thı̂, ū ê chhiò, kun-pún bı̂n-chiòng sı̄ gōng-toā-thâu, bô chı̍t ê thé-thóng, sı̍t-chāi khó-lı̂n kàu ke̍k, m̄-chai Sòng Phok-sū lí sím-mı̍h kiàn-kái ? Goân-lâi lí sı̄ kho-ha̍k-ka phok-sū, ūi sím-mı̍h lí-iû lí lâi jı̍p Sı̂n-ha̍k . 
 Sòng Phok-sū: Ah! Khó-lı̂n ê Sı̂n-ha̍k-seng ah. Hit ê lú-chú kim-mı̂-hng só͘ kóng ê, kù-kù to sı̄ tùi Sèng-keng lâi ê, i kóng Iâ-so͘ ê thiàⁿ, Iâ-so͘ ê sı̍p-jı̄-kè, oân-choân sı̄ ūi-tio̍h kiù-sio̍k jı̂n-lūi , hō͘ kı̀ⁿ-nā sı̀n I ê lâng bián tı̂m-lûn-hoē tit-tio̍h éng-oán-oa̍h, liân che oē lí to iā m̄-sı̀n mah? 
 Saⁿ ê Sı̂n-ha̍k-seng: Sòng Phok-sū, lí iā sı̄ hō͘ hit ê lú-chú bê-khı̀ ê chı̍t ê. Sū-sı̍t hit ê lú-chú siⁿ-choè chin súi, hoa̍t-phoat, Sòng Phok-sū, lí ê miâ-siaⁿ piàn thoân Bí-kok, chin-choē lâng bat lí, lí nā-sı̄ ài hit ê lú-chú, goá lâi khı̀ thàm-thiaⁿ, thoè lí pháu-cháu, khó-lêng hó-sū ū sêng-kong ê ǹg-bāng. Ha̍h ! Ha̍h ! .......... 
 Saⁿ ê Sı̂n-ha̍k-seng lı̄-khui Sòng-Phok-sū ka-kı̄ tńg-khı̀ kūi tı̄ chhn̂g-chêng piàⁿ-miā kı̂-tó, āu-tâi ū siaⁿ teh hòng-sàng. 
 Hòng-sàng ê siaⁿ: 1927 nı̂ 2 ge̍h 10 hō poàⁿ mı̂ āu, Sòng Phok-sū kūi tı̄ bı̂n-chhn̂g chêng kı̂-tó. 
 Sòng Phok-sū: Goá ê Siōng-tè, goá ê Thiⁿ-pē, goá ê sim-lêng ê tāng-tàⁿ jı̍t-jı̍t chiām-chiām ke-thiⁿ, goá ê choē-ok-tiông-tiông thia̍p-thia̍p hō͘ goá bô hoat-tō͘ thang thâi-iâⁿ Mô͘-kúi. Goá soè-hàn ê sı̂ ê kı̂-tó, múi chhù to ū tit tio̍h Lí ê èng-ún, goá sui-jiân kéng-soán chit tiâu beh ūi Lí thoân hok-im ê lō͘, lâi tha̍k Sı̂n-ha̍k-ı̄ⁿ, chóng-sı̄ tı̄ chia kàu-siū só͘ kà ê Sèng-keng chhin-chhiūⁿ sı̄ siâ-su̍t ı̄ⁿ-toan, hō͘ goá kám-kak tha̍k Sı̂n-ha̍k chin bô ı̀-gı̄. Goá bô niá-siū Lí ê lêng kap Lí ê pó-huih lâi soé goá ê choē, hoán-tńg hoâi-gı̂ Chú Iâ-so͘ Lí ê kàu-hùn, chiū-sı̄ Sèng keng. 
 In-ūi tiòng liáu Mô͘-kúi ê khúi-kè, hoan-e̍k Hu̍t-keng, Tō-tek-keng, jı̂-chhiáⁿ khı̀ chē-siân, siōng-keng, siūⁿ beh kiû kái-thoat. Tān-sı̄ kiat-kio̍k sı̄ ke-thiⁿ goá ê thòng-khó͘ kap ba̍k-sái jı̂-í, Chú Iâ-so͘ kiû Lí khó-lı̂n Lí ê kiáⁿ-jı̂. Goá sı̄ hòng-tōng chú. Goá í-keng koat-ı̀ hoán-hoé jı̄n-choē lah. Kiû Lí iōng Lí ê pó-huih soé-tû goá ê choē,hō͘ goá chiâⁿ-choè têng-thâu-siⁿ ê lâng. Kiû Lí ê Sèng Sı̂n éng-oán tiàm tı̄ goá sim-lāi, choè goá ê Chú. 
 Goá nā bô tit-tio̍h Chú ê Sı̂n tiàm tı̄ Goá sim-lāi, goá beh cháiⁿ-iūⁿ ū lêng-le̍k thang choè thoân-tō ê lâng. Chú ah, kiû Lí hián-chhut Lí ê toā chû-pi, toā lı̂n-bín, khoàⁿ-kò͘ thòng-khó͘ lâu ba̍k-sái kàu beh sí ê kiáⁿ-jı̂, hō͘ goá ū têng-thâu-siⁿ ê un-tián, chiong-sin lâi hōng-hiàn hō͘ Lí, choè Lí chı̄n-tiong ê lô͘-po̍k (Hut-jiân sek-lāi ū toā-kng). 
 Hòng-sàng ê siaⁿ: Soè-kiáⁿ, lí ê choē sià lah, chū kin-á-jı̍t khí, Goá kā lí kái miâ choè Iok-hān, in-ūi kiâⁿ soé-lé ê Iok-hān it-seng ūi goá choè kan-chèng,lí it-seng iā beh ūi goá choè kiàn-chèng thoân hok-im. 
 Sòng Phok-sū: Goá ê Chú, goá kám-siā Lí, o-ló Lí. Lí ê un-tián sù goá Pêng-an. À-bēng. 
 Phian-chiá chù: Sòng Phok-sū tı̄ Hia̍p-hô Sı̂n-ha̍k-ı̄ⁿ tha̍k liáu boē thang moá-ı̀, sim-lāi ū hoân-būn, che sı̄ ū-iáⁿ; in-ūi bô lūn sím- mı̍h só͘-chāi, kı̀-jiân sı̄ lâng só͘ pān ê, tō ū thang hoān-hiâm ê só͘-chāi; chóng-sı̄ Hia̍p-hô Sı̂n-ha̍k-ı̄ⁿ iā ū i ê kòng-hiàn kap ek-chhù. Só͘-í nı̂-nı̂ tùi lán ê kàu-hoē iā ū chin toā ê pang-chān. Chū tı̄ chá-chêng Lâu Chín-hong Bo̍k-su khı̀ liû-ha̍k, chiū-sı̄ chit keng Sı̂n-ha̍k-ı̄ⁿ ê chiân-sin. Kàu tı̄ chiàn-āu, N̂g Chú-gı̄, Khó͘ Heng-jı̂n, N̂g Chiong-hui, Lâu Hoâ-gı̄, Sòng Choân-sēng, Tiuⁿ Tek-hiong, Ko Chiau-liông, Tân Sek-chong chiah ê bo̍k-su á-sı̄ sian-siⁿ, kap Pún-pò chú-pit lóng sı̄ tı̄ chia tit-tio̍h chióng-ha̍k-kim siū chō-chiū ê. Chiah ê lâng só͘ choè sui-jiân m̄-sı̄ chiâu-pı̄ oē hō͘ lâng moá-ı̀, iáu-kú tùi lán kàu-hoē iā sı̄ ū ēng sim ēng kang beh chiong tı̄ Hia̍p-hô Sı̂n-ha̍k-ı̄ⁿ só͘ chiap-siū tio̍h ê hó-chhù thang lâi lı̄-ek lán ê kàu-hoē. Só͘-í chhin-chhiūⁿ Sòng Phok-sū ê úi-tāi kap kòng-hiàn lán tio̍h to-to ha̍k-sı̍p, siāng sı̂ tùi Hia̍p-hô Sı̂n-ha̍k-ı̄ⁿ oē thang kòng-hiàn ê ek-chhù, iā ǹg-bāng tho̍k-chiá iā ha̍k-sı̍p oē tio̍h, sı̄ só͘ ǹg-bāng. 
 Tē 6 Bō͘: Hia̍p-hô Sı̂n-ha̍k-ı̄ⁿ ê hāu-mn̂g. 
 Pò͘-tı̀: Pò͘-kéng, Tāi-ha̍k ê oán-kéng. 
 Bō͘-āu hòng-sàng: Sòng Phok-sū thiaⁿ-tio̍h Chú ê siaⁿ kóng, Soè-kiáⁿ, lí ê choē sià lah. lí ê miâ kái choè Iok-hān. Í-āu sim-tiong ê khoài-lo̍k boē tàng hêng-iông. Chóng-sı̄ tı̄ Hia̍p-hô Sı̂n-ha̍k-ı̄ⁿ ê hoân-būn iáu-kú boē siau-soàⁿ. 
 Hia̍p-hô Sı̂n-ha̍k-ı̄ⁿ-tiúⁿ: Sòng Phok-sū, goá khoàⁿ lí kūn-lâi sin-thé chin soe-jio̍k. Lí jı̍p-o̍h í-lâi poàⁿ-nı̂ kú, lí chı̍t lâng sı̍t-chāi choè liáu 3 ê lâng ê kang, tha̍k liáu 3 lâng hūn ê chheh. Ūi-tio̍h thé-liām lí cheng-sı̂n jio̍k-thé ê phı̂-lô, goá ū thè lí pān-lí siâⁿ-goā chı̍t keng pı̄ⁿ-ı̄ⁿ hō͘ lí khı̀ hiu-sek chēng-ióng. 
 Sòng Phok-sū: Kiám ū che sū mah ? 
 Īⁿ-tiúⁿ: Sı̍t-sı̍t chāi-chāi lah, lí khı̀ hiu-sek chı̍t lé-pài, tán-hāu cheng-sı̂n pá-chiok í-āu chiah koh tńg-lâi tha̍k-chheh. 
 Sòng Phok-sū: To-siā ı̄ⁿ-tiúⁿ ê pang-bâng, goá jı̍p-lâi khı̀ the̍h goá ê jı̍t-iōng-phín. 
 Īⁿ-tiúⁿ: Pı̄ⁿ-ı̄ⁿ it-chhè oē chioh lí, bô su-iàu, bô su-iàu, chit ūi pêng-iú oē kap lí khı̀. 
 Tē 7 Bō͘: Cheng-sı̂n pı̄ⁿ-ı̄ⁿ. 
 Pò͘-tı̀: Pı̄ⁿ-sek-lāi bı̂n-chhn̂g chı̍t tiuⁿ, í-á 3 liâu, toh chı̍t tè, toh-téng ū io̍h-chúi kan-á, tê-koàn, tê-au.(I-seng kap hō͘-sū kiâⁿ jı̍p pâng-keng). 
 I-seng: Sòng Phok-sū, cha-mı̂ hó khùn bô? Lí ū chhut toā-siaⁿ gı̂m-si bô ? 
 Sòng Phok-sū: Chin hó khùn, goá bô toā siaⁿ gı̂m-si. 
 I-seng: Sòng Phok-sū, lí ê pē-bú, hiaⁿ-tı̄ chí-bē u

7 bat lâng hoān tio̍h cheng-sı̂n-pı̄ⁿ bô?

 Sòng Phok-sū: I-seng, lí sı̄ khoàⁿ goá choè siáu-lâng sı̄ m̄ ? Chhiáⁿ lí chhek-giām goá ê thâu-náu, chiū oē bêng-pe̍k. Lí thang tiāu-cha goá só͘ tha̍k kè-khı̀ ê tāi-ha̍k kàu-siū, iā thang khoàⁿ goá ê phok-sū lūn-bûn kap goá hoan-e̍k ê Hu̍t-keng, Tō-tek-keng kap goá só͘ tù Eng-kok Ko͘-jı̂-ı̄ⁿ ê le̍k-sú, kap kū-iok Iâ-lı̄-bí ê chù-kái. 
 I-seng: Sòng Phok-sū, lí sı̍t-chāi chin chhong-bêng, tān-sı̄ su-iàu hiu-sek chēng-ióng. 
 Sòng Phok-sū: I-seng, sím-mı̍h sı̂-chūn chiah oē tàng chhut-ı̄ⁿ?
 I-seng: Tāi-khài 40 jı̍t chiū kàu-gia̍h,chhiáⁿ m̄-thang tio̍h-kip. (Nn̄g lâng chhut-khı̀, Sòng Phok-sū toā siaⁿ tha̍k Sèng-keng, tha̍k 2,3 pái. I-seng kap hō͘-sū koh lâi). 
 I-seng: Sòng Phok-sū, kin-á-jı̍t cheng-sı̂n ū sóng-khoài bô? Cha-àm hó-khùn bô? 
 Sòng Phok-sū: I-seng, lí cheng-sı̂n Sóng-khoài bô? lí cha-mı̂ hó-khùn bô? I-seng lí sı̍t-chāi chin bô lé, lí iáu-kú khoàⁿ goá choè siáu-lâng, moá chhùi pe̍h-chha̍t, goá lâi pı̄ⁿ-ı̄ⁿ hit jı̍t, lí kóng 40 jı̍t chiū oē hō͘ goá chhut-ı̄ⁿ, hiān-chāi í-keng 150 jı̍t, iáu-kú m̄-chún goá chhut-ı̄ⁿ, tàu-tí sím-mı̍h sı̂ chiah beh hō͘ goá chhut-ı̄ⁿ? 
 I-seng: Sòng Phok-sū, chêng-jı̍t lí nā bô thau cháu chhut-khı̀, hō͘ lâng lia̍h tńg-lâi, tāi-khài í-keng hō͘ lí chhut-ı̄ⁿ lah. 
 Sòng Phok-sū: I-seng, goá toà chit keng pı̄ⁿ-pâng, kun-pún bô hoat-tō͘ thang oa̍h lah. Kúi jı̍t chêng tú-hó goá jı̍p-ı̄ⁿ 126 jı̍t, goá siūⁿ beh chū-sat, tháu liáu khò͘-toà, siūⁿ beh tiàu tāu ê sı̂,hut-jiân Siōng-tè ê siaⁿ lı̂m-kàu goá kóng,”Soè-kiáⁿ, lí sı̄ goá ēng pó-huih sio̍k-hoê ê, cháiⁿ-iūⁿ beh kiâⁿ té-lō͘ chū-sat neh?”Tùi hit jı̍t khí, goá chiū ka-pē kèng-ùi Siōng-tè, khûn tha̍k Sèng-keng. Hiān-chāi Sin kū-iok í-keng tha̍k 30 piàn lah, Siōng-tè an-ùi goá kóng tio̍h jím-nāi, kàu 193 jı̍t goá só͘ pē ê sı̍p-jı̄-kè chiū oē kái-tû, só͘-í goá ê sim í-keng pêng-an lah. 
 I-seng: Sòng Phok-sū, chin kiong-hí,ǹg-bāng lí ê Siōng-tè pı̀-iū lí, hit jı̍t thang kiong-hí chhut-ı̄ⁿ.