O̍h Pe̍h-oē-jı̄

Ùi Wiki Tô·-su-kóan
Kà kap o̍h Pe̍h-oē-jı̄ ū hó hoat-tō͘ iā ū m̄ hó hoat-tō͘. Hó hoat-tō͘ m̄-nā ē hō͘ ha̍k-seng khah khoài se̍k koh ē chiâⁿ hó kàu-io̍k chéng-chéng ê bo̍k-tek, chhin-chhiūⁿ hō͘ gin-ná o̍h sūn-thàn, tı̀-ı̀ kap choan-sim. M̄-hó ê hoat-tō͘ m̄-nā hō͘ gin-ná chin oh se̍k, koh ē hō͘ in o̍h bô thàn, bô tı̀-ı̀, kap pı̂n-toāⁿ. 
Tı̄ Chú-jı̍t O̍h kà pe̍h-oē-jı̄ ê èng-iōng sı̄ beh hō͘ ha̍k-seng thang bat Sèng-keng, āu-lâi tı̄ Sèng-chheh pan lâi káng-kiù Siōng-tè ê kà-sı̄. Chiah-ê ha̍k-seng chē-chē tı̄ in chhù bô siū kà-sı̄, chí-ū chı̍t lé-pài chı̍t pái nā-tiāⁿ. Só͘-í kà ê lâng tio̍h chin chhiat-ı̀ hō͘ in lâi khah khoài chı̀n-pō͘ bián-tit kan-ta sô. Taⁿ tı̄ ē-té kı̀ chit ê kà-hoat hō͘ tāi-ke lâi chham-khó. 
I.Kà Tâi-lâm ê jı̄-bú (chı̍t pún chı̍t chiam). 
Bo̍k-tek: hō͘ ha̍k-seng jı̄n-jı̄. Pı̄-pān jı̄-bú tô͘ tiàu tı̄ ha̍k-seng ê bı̄n-chêng, chò-hoé kà. Kí tô͘, liām chı̍t jı̄ chı̍t jı̄ hō͘ in thiaⁿ, kiò in liām kàu se̍k. Ū sı̂ kiò ha̍k-seng khí-lâi ka-tı̄ kí jı̄ tı̄ tô͘-nı̍h, pa̍t lâng tio̍h chù-sı̂n khoàⁿ ū tio̍h á m̄ tio̍h. Í-keng kà kúi-nā jı̄ kàu se̍k-se̍k, chiah hō͘ ha̍k-seng khoàⁿ ka-tı̄ ê jı̄-bú lâi jı̄n hiah-ê. Sian-siⁿ tio̍h sûn, lō͘-boé chò-hoé khoàⁿ tô͘ lâi liān-sı̍p. 
II.Kà Ē-mn̂g ê Pe̍h-oē jı̄-bú (chı̍t pún chı̍t chiam). 
Bo̍k-tek: hō͘ ha̍k-seng ē jı̄n im kap tàu-kù. Í-keng ē hiáu jı̄n-jı̄ thang ēng Ē-mn̂g ê jı̄-bú lâi chò tho̍k-pún. M̄-bián tùi thâu, khah hó tio̍h tùi tē-jı̄ bı̄n ē-té hiah-ê pat-im lâi o̍h khí. Che tio̍h ha̍k-seng sûi lâng khoàⁿ i ê chheh. Chóng-sı̄ nā ū o͘-pâi, ha̍k-seng iáu-boē lâi ê tāi-seng, sian-siⁿ thang ēng ı̀n-pán jı̄ lâi siá só͘ beh kà-ê tı̄ o͘-pâi, iû-goân chiàu téng-bı̄n ê hoat-tō͘ lâi kà. Chit ê jı̄-bú nā tha̍k se̍k, ha̍k-seng chiū ē hiáu tàu-kù. 
III. Kà-tō Būn-tap(Chı̍t pún saⁿ chiam). 
Bo̍k-tek: hō͘ ha̍k-seng tha̍k ē khah sūn, iā ē chai ı̀-sù. Chit pún Chin-tō Būn-tap ū thang khó-chhú sı̄ (1) Jı̄ chin bêng, kù té-té, ū chia̍p-chia̍p teh liū, bô liâm-piⁿ oāⁿ chheⁿ-ê. (2) Ēng mn̄g ēng ı̀n hō͘ tha̍k ê lâng khah khoài chai ı̀-sù. (3) Tùi chit pún thang chiām-chiām-bat tō-lí. 
Tio̍h tı̀-ı̀ hiah-ê bé-chí, liân-oe̍h, toā pún-jı̄, tiám-kù, hō͘ ha̍k-seng chai-iáⁿ. Nā m̄-ài lóng-chóng tha̍k iā thang tiah chām. 
Iáu ū kúi-nā hāng tı̀-ı̀: 
(1) Nā-sı̄ chı̍t pan ê tiong-kan ū saⁿ-kúi-ê khah ē, chóng-sı̄ iáu-boē ē kham-tit chı̀n chı̍t pan ê chu-keh, tio̍h siat-hoat lâi pang-chān i ē tit koè pa̍t pan, m̄ bián thèng-hāu kàu nı̂-tō͘. 
(2) Nā ū lâng chin ham-bān toè bē tio̍h, tek-khak m̄-thang ta̍uh-ta̍uh hiâm; khah hó tio̍h khoàⁿ ū sím-mı̍h hiaⁿ-tı̄ á-sı̄ chí-moē thang ke kà i bián-tit hō͘ i sit-chı̀ m̄-ài lâi. (Thài 18:5,6). 
(3) Kan-ta jı̄n-jı̄ kap tàu-kù bē ē poê-iúⁿ lêng-hûn, só͘-í ta̍k pái teh kà ê sı̂ khah hó tio̍h poah 10 hun kú ēng khah khoài bêng ê si á-sı̄ Chú-jı̍t Sı̂n-liông hit chat lâi kà, á-sı̄ soat-bêng Chú ê lâi-le̍k hō͘ in tùi sè-hàn ē chai thang chiū-kūn Chú. 
(4) Bô lūn sím-mı̍h lâng, sui-jiân bô lâi jı̍p Chú-jı̍t O̍h, iā thang chiong chit ê hoat-tō͘ khı̀ gián-kiù. 
(5) Jı̄-bú tha̍k liáu bô liâm-piⁿ tha̍k si sı̄ in-ūi hit tiong-kan ū-ê khah chhim ê ı̀-sù, khah hó tio̍h iû chhián jı̍p chhim, chóng-sı̄ teh lé-pài ê sı̂ nā hian ka-tı̄ ê si-chheh khí-lâi khoàⁿ, chiū ná ē hiáu-tit bián lēng-goā kà. 
(Tâi-oân Kàu-hoē-pò tē 379 koàn, 1916 nı̂ 10 ge̍h)