Siàu-liân lı̍p-chı̀ chhut ka-mn̂g,
Siū hong siū hō͘ bô lâng mn̄g.
Thiⁿ-piⁿ-hái-kak sı̀-koè chǹg,
Bú kah io sng kha-chhiú nńg.
Jû-kim toà tio̍h pe̍h-thâu-mn̂g,
Bōng-chhoan-chhiu-súi lân tò-tńg.
Hoê-hiong ê lō͘ tn̂g koh hn̄g,
Khong liû moá-pak khó͘ sim-tn̂g.
Nı̂-koan iū koh pek-kı̄n, siūⁿ tio̍h choē-choē liû-lōng tı̄ hái-goā ê hiong-chhin, chiong sim pí sim, tông-chêng ê ba̍k-sái, boē-kı̀m--tit ūi in chı̍t-tih chı̍t-tih lâu chhut--lâi. Ou-miâ-toaⁿ ah! Ou-miâ-toaⁿ! Bih tı̄ lín āu-piah ê hit-lia̍p pháiⁿ sim-koaⁿ, beh kàu tı̄-sı̂, lí chiah oē thiaⁿ-tio̍h jı̂n-sèng ê ho͘-hoàn hō͘ ū sim lo̍h-hio̍h-kui-kin ê han-chı̂, tò-tńg-lâi in mı̂-jı̍t siàu-liām ê Tâi-oân.
(Tâi-oân Kàu-hoē Kong-pò tē 2081 kı̂, 1992 nı̂, 1 goe̍h)
