Pı̄ⁿ-peng ê ióng-béng

Kó͘-chá Hi-lia̍p kok ū chı̍t-ūi toā chiong-kun, miâ kiò An-thê-ko͘-lô; liāu-lí peng put-chí chhù-sū. Pō͘-hā ê peng ke̍k choē. Ū bó͘ chı̍t ê peng hoān-tio̍h tāng-pı̄ⁿ, thàng-thiàⁿ kàu-ke̍k; i ê pı̄ⁿ sı̄ sio̍k tı̄ lāi-lı̂ m̄ sı̄ goā-bı̄n ê, chin oh-tit chhē-chhut sı̄ sím-mı̍h pı̄ⁿ-chèng, só͘-í bô thang chhéng-ká tò-khı̀ tiau-ióng, ko͘-put-chiong tio̍h bián-kióng tng-peng. Hit miâ peng lia̍h choè án-ni oa̍h tı̄ sè-kan, m̄ ta̍t-tio̍h kín sí chiah thang kiám-chió i ê thòng-khó͘, só͘-í ta̍k-pái tú-tio̍h kap tùi-te̍k kau-chiàn ê sı̂, chiū phe-miā hiòng-chêng, lóng bô iàu-kín ka-kı̄ ê seng-khu, nā m̄-sı̄ phah pāi tùi-te̍k chiū bô thêng-chhiú. Chèng peng-teng khoàⁿ-kı̀ⁿ i chiah chhut-la̍t kau-chiàn, chai sı̄ chı̍t ê ióng-kám bô pí ê peng-sū, nā kó-jiân pı̄ⁿ sí, sı̍t-chāi thang khó-sioh, chiū saⁿ-kap pang-chān i tùi An-thê-ko͘-lô͘ kiû chêng. An-thê-ko͘-lô͘ iā thiàⁿ-sioh i ê sı̀ⁿ-miā, chek-khek bēng-lēng lâng khı̀ chhiáⁿ chhut-miâ ê i-seng, i hó i ê pı̄ⁿ. Tùi án-ni pı̄ⁿ chiū chiām-chiām hó lah. Nā-sı̄ i ê ióng-kám soà kap pı̄ⁿ saⁿ-kap lı̄-khui, í-āu lóng bô chı̄n-la̍t thâi tùi-te̍k ê lêng-le̍k. I iā bat tùi lâng kóng: “Goá hiān-chāi sin-thé pêng-an, koh ū ko-koàn, koat-toàn boē thang khoàⁿ-khin goá ê sı̀ⁿ-miā.” Chiàu án-ni khoàⁿ, lán tı̄ hoān-lān ê tiong-kan ho̍k-sāi Siōng-tè, chiū oē chin sim chı̄n-la̍t, kàu tit-tio̍h khoài-lo̍k ê sı̂, tùi tı̄ ho̍k-sāi Siōng-tè ê tāi-chı̀ chiū léng-tām khı̀, che iā-sı̄ kap chit ê peng-teng ê sim-lí saⁿ tâng. “Oa̍h tı̄ hoān-lān, sí tı̄ an-lo̍k.” Kó͘-chá lâng só͘ kóng chit nn̄g kù, chin-chiàⁿ ū iáⁿ. (Oa̍h-miā ê Bí-niû tē 66 kı̂, 1959 nı̂ 11 ge̍h)