Pōng-khang kap hông-khong-hô

Goán chhù āu-piah-kau ū nn̄g-khang hông-khong-hô, che sı̄ goán a-cho͘ tı̄ Jı̍t-pún sı̂-tāi ó͘--ê. Hông-khong-hô ê chok-iōng ta̍k-ê lóng chai-áⁿ, che sı̄ Jı̍t-pún chèng-hú thóng-tı̄ Tâi-oân boé-kı̂, Bí-kok hui-nn̄g-ki lâi sàu-siā Tâi-oân, Tâi-oân-lâng ūi-tioh cháu khong-sı̍p chiah sán-seng--ê. Hông-khong-hô chit-ê mı̍h-kiāⁿ tı̄ Tâi-oân choân-tó ta̍k só͘-chāi it-tēng lóng ū. M̄-koh Tâi-oân-lâng hit-chióng “sı̂ kàu sı̂ tam-tng, bô bí chú han-chı̂-thng” ê sèng-keh, kā Tâi-oân ê hông-khong-hô m̄ sı̄ thūn--khí-lâi, bô, tō sı̄ kā am--khí-lâi. Sui-bóng hông-khong-hô sı̄ 1-chióng jı̂n-chō kang- têng, m̄-koh kian-kò͘ koh sı̍t-iōng, tı̄ hit-ê sı̂-tāi, hông-khong-hô siōng toā ê kong-lêng, tō sı̄ kiù-tio̍h goán a-cho͘ ê miā. Ah nā pōng-khang tō bô-kâng. Pōng-khang 2-khang sı̄ sio-thong--ê, siōng kài ū-miâ ê 1-tiâu-koa sı̄: “Chē hoé-chhia koè pōng-khang, sim-chêng chin khin-sang......” Pōng-khang koh sı̄ sè-hàn sńg bih-sio-chhoē ê hó-só͘-chāi. Goán chhù thâu-chêng hit-lia̍p soaⁿ tō ū 1-ê pōng-khang, goá sè-hàn tō lóng hām goán chhù-piⁿ ê gín-á tı̄ hia bih-sio-chhoē, sńg kàu jı̍t-thâu beh lo̍h-soaⁿ chiah ū tńg-khı̀ chia̍h-pn̄g. (TGB Thong-sı̀n tē 12 kı̂, 2000 nı̂ 9 goe̍h)