Kiám-chhái hō͘ tō͘-tiám chìn chi̍t-ūi, chīu pún-siàu pìⁿ-tsòe 123·45678, chīu-sī chió 10 pē; khó-kiàn ōaⁿ tō͘-tiám hō͘-i chìn chi̍t-ūi sī ná chhin-chhīuⁿ ēng 10 lâi pun hit-ê siàu.
Sió-sò͘ ê iū-pêng lâi thiⁿ khòng, i-ê gia̍h iā bô ke-thiⁿ, iā bô kiám-chió: nā-sī tsó-pêng lâi thiⁿ khòng, chió siàu ê gia̍h 10 pē, ná chhin-chhīuⁿ ēng 10 lâi pun-i chi̍t-iūⁿ.
Siat-sú ū sió-sò͘ ·3, chīu-sī tsa̍p-hūn ê saⁿ-hūn. Iū-pêng lâi thiⁿ 0, chīu tsòe ·30, chīu-sī pah-hūn ê 30 hūn = tsa̍p-hūn ê 3 hūn, chīu-sī = ·3. Tsó-pêng lâi thiⁿ 0, chīu tsòe ·03, chīu-sī pah-hūn ê saⁿ-hūn, pí tsa̍p-hūn ê saⁿ-hūn chió 10 pē.
Thang hō͘ ha̍k-seng liān ê siàu.
- 1・1, ・3, ・00125, 1・01. Che sì-tiâu-siau, sûi-tiâu tio̍h ēng 100, 1000, 10000, 1000000 lâi sêng-i, chīu-sī tio̍h chiàu-hoat ōaⁿ tō͘-tiám lâi kì-siàu. Tek 110, 1100, 11000, 1100000, 30, ûn-ûn.
- Iā tio̍h ēng 100, 1000, 10000, 1000000 lâi pun-i, chīu-sī tio̍h ōaⁿ tō͘-tiám lâi kì-siàu. Tek ・011, ・0011, ・00011, ・0000011, ・003 ûn-ûn.
SIÓ-SÒ͘ Ê KA-HOAT, KIÁM-HOAT
Kiám-chhái ū sió-sò͘ kúi-nā tiâu siàu, ài siong-ka khòaⁿ ha̍p-kiōng jōa-tsōe, chīu hi̍t-ê hoat-tō͘ kap tōa-siàu ê hoat-tō͘ saⁿ-tâng. Pâi-lia̍t siàu ê sî iàu-kín tio̍h hō͘ tō͘-tiám lóng tsòe it-ti̍t lo̍h-lâi, chīu toaⁿ-ūi ōe tùi toaⁿ-ūi, tsa̍p-hūn ê ūi ōe tùi tsa̍p-hūn ê ūi, pah-hūn ê ūi ōe tùi pah-hūn ê ūi, í-hā lóng án-ni. Kiám-chhái ū siàu bô sió-sò͘ chīu tio̍h ēng khòng lâi that i-ê ūi, khah ōe chiàu chhù-sù.
Siat-sú ū la̍k tiâu siàu, 2・8146, ・0938, 8, ・875, 31・2788, 4・0087. Tio̍h pâi-lia̍t chhin-chhīuⁿ piⁿ-thâu, hō͘ tō͘-tiám tsòe it-ti̍t lo̍h-lâi, chiōng 0 lâi that tē-saⁿ tiâu kap tē sì-tiâu ê khang ūi. Lâi siong-ka tī tú-á chhin-chhīuⁿ tōa-siàu chi̍t-iūⁿ, iā só͘ tit-tio̍h ê siàu hit-ê tō͘-tiám tioh kap lóng-tsóng ê tō͘-tiám tsòe it-tit lo̍h lâi.
