NIÛ-TIÂN
Siat-sú ū chi̍t-tè-toh A B C E, tn̂g 6 chhioh, khoah 4 chhioh.
Pun A B tsòe 4 hūn, pîⁿ-tn̂g, A E tsòe 6 hūn, iā pîⁿ-tn̂g, chīu sûi-hūn chi̍t-chhioh; koh, tùi só͘-tiám ê só͘-tsāi tio̍h khan-sòaⁿ thán-hoâiⁿ, thán-ti̍t, chīu toh-bīn pun-tsòe keng-keh, lóng tâng-khoán pîⁿ-tōa.
Lâi-kóng chi̍t-keng A S O P. A S = chi̍t-chhioh, A P = chi̍t-chhioh, chīu A S O P chi̍t-chhioh sù-hong: khó-kiàn keng-keh lóng chi̍t-chhioh sù-hong. Taⁿ, keng-keh ê gia̍h chīu-sī 4 × 6 = 24, só͘-í A B C E = 24 keng, sûi-ê chi̍t-chhioh sù-hong. Chit-hō-keng thang kiò-tsòe pêng-hong-chhioh.
Só͘-niû-ê, he̍k-sī chhân-hn̂g, he̍k-sī chhù-the̍h, tsai hit-ê tn̂g-khoah, put-koán, chhioh, chhùn, pō͘, lí, lâi-siong-sêng-i, chīu tit-tio̍h chhioh, chhùn, pō͘, lí sù-hong-keng ê gia̍h. Che-gia̍h kiò tsòe pêng-hong-chek.
Chi̍t-keng chhù ū thiaⁿ kap gō͘-ê pâng-keng, lóng pho͘-tsng. Thiaⁿ chīu-sī tn̂g 18 chhioh 4 chhùn, khoah 12 chhioh-pòaⁿ, pâng-keng, sûi-ê, tn̂g 12 chhioh 8 chhùn, khoah 9 chhioh 5 chhùn, pho͘ sì-kak-tsng chi̍t-chhioh sù-hong, tio̍h kúi-tè? Pâng-keng ê tn̂g-khoah lâi siong-sêng, tit-tio̍h 121·6, koh, ēng 5 lâi-sêng, in-ūi pâng-keng 5 ê, chīu tit-tioh 608 pêng-hong-chhioh, chīu pho͘ 5 ê pâng-keng tio̍h 608 tè-tsng.
