Ka pı̂n kap lâng bô pí-phēng
An-hūn siú-kí tio̍h chèng-keng
Kiaⁿ goán iau-gō bô saⁿ chhēng
Chiong-jı̍t tio̍h-boâ bô-sı̂-êng.
Lāu-pē keng-lông lâi thàn chı̂ⁿ
Ǹg-bāng khoàⁿ-oa̍h chhut-thâu-thiⁿ
Thoa-boâ koè-thâu soà tı̀-pı̄ⁿ
Bô sí ba̍k-chiu pı̀ⁿ chhiⁿ-mı̂.
Lāu-pē chhiⁿ-mı̂ bô siá-sı̀
Lō͘-boé kap lâng o̍h chhiam si
Hit sı̂ goá iā lóng oē kı̀
Nı̂-kí tú-hó káu-hoè sı̂.
Siūⁿ khí tong-sı̂ chin khó-lı̂n
Sàn-chhiah sin-hūn lâng khoàⁿ-khin
Ūi-tio̍h soè-kiáⁿ chı̍t toā-tı̄n
Beh chhiâⁿ kiáⁿ toā tio̍h jı̄n-chin.
Goá tio̍h khan pē khı̀ chhut-goā
Māi-pok sǹg-miā tō͘ seng-oa̍h
Mı̂-sı̂ khı̀ kā lâng chioh toà
Sı̍t-chāi kan-khó͘ bô khoàⁿ-oa̍h.
Ū sı̂ iā tio̍h jı̍p lāi-soaⁿ
Siū hong siū hō͘ siū iau koâⁿ
Sin-khu phah-tâm bô saⁿ oāⁿ
Chí-ū chı̍t niá pò͘-tē moa.
Kóng-khí soè-hàn kan-khó͘ tāi
Nā bô kóng chhut lín m̄ chai.
Ū sı̂ thı̂-khàu lâu ba̍k-sái
Iā tio̍h bóng jím chiah eng-kai.
Múi pái khan pē khı̀ chhut-goā
Soaⁿ-lō͘ pháiⁿ kiâⁿ iân-lō͘ poa̍h
Lāu-pē siū-khı̀ chiū mā goá
Ham-bān nńg-chiáⁿ bô khoàⁿ-oa̍h.
Lāu-pē sit-bêng bô siá-sı̀
Chhoā khı̀ thiu-chhiam lâi thàn-chı̂ⁿ
Àm-sı̂ hioh tı̄ goán toā-chí
Toā-chí tiàm tı̄ Khah-jı̄-khiⁿ.
Thàu-chá khí-lâi kín kiâⁿ lō͘
Beh khı̀ Chhim-ò chhoē a-ko͘
Lō͘-bé gū-tio̍h chò hong-hō͘
Seng-khu ak kah tâm kô͘-kô͘.
Siang-kha kiâⁿ kàu ko͘ chhù-lāi
A-ko͘ khoàⁿ-kı̀ⁿ i tio̍h chai
A-ko͘ khoàⁿ tio̍h lâu ba̍k-sái
Kín-kín saⁿ-khò͘ the̍h chhut lâi.
Saⁿ-khò͘ hō͘ goán pē-kiáⁿ oāⁿ
Khó-lı̂n pē-kiáⁿ lín ē koâⁿ
Chiah nı̍h pháiⁿ-bēng beh án-choáⁿ
A-ko͘ hoân-ló tı̄ sim-koaⁿ.
Khı̀ kap a-ko͘ tiàm chı̍t mı̂
Tio̍h lín tı̄-sı̂ chhut-thâu thiⁿ
A-ko͘ ba̍k-sái chhap-chhap tih
Lâu che cha-bó͘ sı̄ beh nı̂.
Cha̍p-hoè kā goá boē chhut-khı̀
Boē hō͘ Lı̂m kà khı̀ chhiâⁿ tı̂
Phèng-kim siu i poeh-cha̍p-jı̄
Hit sı̂ ê chı̂ⁿ khah toā-ı̂ⁿ.
Goá jı̍p Lı̂m kà kúi-nā nı̂
Kai-chài ta-koaⁿ thàn tio̍h chı̂ⁿ
Thàn-chı̂ⁿ tiàm-á chiū lâi khí
Thâu-boé khui ū sı̀-gō͘ nı̂.
Hit sı̂ kiàn-siat hoé-chhia lō͘
Tiàm, khui tı̄ Cha̍p-hun-liâu po͘
Koè-jı̍t to iā boē kan-khó͘
Chia̍h-chhēng kap ēng lóng chin so͘.
Chū goá jı̍p liáu Lı̂m kà lāi
Beh kóng hun-in hō͘ lín chai
Lâm-lú nā bô saⁿ ı̀-ài
Pē-bú m̄ thang kiông chú-chhâi.
Tiōng-hu m̄ bat siū kan-khó͘
Chı̂ⁿ nā ū thàn oē-hiáu so͘
Hòng-tōng lim-chiú khai cha-bó͘
Boē-hiáu thang siūⁿ ê ta-po͘.
Pháiⁿ-miā tú-tio̍h pháiⁿ ang-sài
Chhut-mn̂g cha-bó͘ loān-loān khai
Kú-kú hán-tit tńg chı̍t pái
Thàn-chı̂ⁿ bô siūⁿ the̍h tńg-lâi.
Tiōng-hu sio-chiú nā chia̍h chùi
Sı̂-siông kā goá lia̍h lâi tûi
Phah kah o͘-chhiⁿ kap kek-huih
M̄-bat tō-lí chin khek-khui.
Goá kóng ê oē sı̄ sı̍t-chāi
Sèng-tē nā khí i chiū sai
Huih-khı̀ kek tı̄ thâu-khak lāi
Sūn-soà tı̀-pı̄ⁿ boē khí-lâi.
Un7-miā ná ē chiah nı̍h pháiⁿ
Sin-khu koh-chài lâi siū thai
Kóng kàu siⁿ kiáⁿ chhiⁿ-chhám-tāi
Boē kàu chiok-goe̍h lâu chhut-lâi.
Boē bat keng-koè m̄ chai-iáⁿ
Pak-tó͘ teh thiàⁿ iā tio̍h kiâⁿ
Io hâ tê-khah chiūⁿ soaⁿ-niá
Kap lâng bán tê sı̀-koè kiâⁿ.
Pa̍t lâng khoàⁿ goán khó-lı̂n-tāi
Chiū khı̀ hoan-hù goán bú chai
Goán bú chhoā goá tńg chhù-lāi
Gín-ná chı̍t-sı̂ lâu chhut-lâi.
Chhut-sı̀ chiū sí chin bô chhái
Sí-khı̀ saⁿ-jı̍t bô lâng tâi
Ke-koaⁿ iā bô lâi khoàⁿ-bāi
Soà hō͘ chek-kong the̍h khı̀ tâi.
M̄ sı̄ óng-khut loān-loān kóng
Siū i po̍k-chêng chin bô thong
Sı̄ goá hoè chió ū khah gōng
Kap i kè-kàu iā èng-tong.
Tāi-chı̀ chin choē kóng boē chı̄n
Boē oē thiat-toé lūn kàu chin
Sió-bē lâi kap lín kı̀ⁿ-bı̄n
Beh kóng sı̀n Chú ê goân-in.
Saⁿ-cha̍p-gō͘ hoè kiáⁿ koh siⁿ
Ui-toà bô lo̍h thiàⁿ kui-mı̂
Pı̄ⁿ kàu sı̍t-chāi hiám-hiám sí
Ke-lāi chhòng kàu lóng bô chı̂ⁿ.
Hoān tio̍h chit khoán gûi-hiám pı̄ⁿ
Liân chhiáⁿ cha̍p saⁿ ūi sian-siⁿ
Sai-kong thiàu-tâng chhiáⁿ put-lı̄
Iā bô kong-hāu kàu poàⁿ-si.
Kim-choá sio kàu moá-moá sı̄
Chhiáⁿ bô khah gâu ê sian-siⁿ
Chèng-lâng kóng goá ún oē sí
Sı̀ⁿ-miā hiám khı̀ kui im-si.
Saⁿ-cha̍p-la̍k hoè pı̄ⁿ koè-thâu
Ke-lāi pı̄ⁿ kàu loān chhau-chhau
Siūⁿ beh sı̀n-hōng Ki-tok-kàu
Goá kiò tiōng-hu i chhut-thâu.
Tiōng-hu hoaⁿ-hí tı̄ sim-lāi
Khı̀ chhiáⁿ hoē-iú Hûn-lâm lâi
Hit sı̂ ngó͘-siōng chiū bô pài
Kim-choá sūn-soà siu khí-lâi.
Pài-thok Hûn-lâm i khı̀ chhiáⁿ
Chhiáⁿ Toh bo̍k-su goán chhù kiâⁿ
Thoè goá kı̂-tó kín ióng-kiāⁿ
Soà kóng tō-lí hō͘ goán thiaⁿ.
Goá pı̄ⁿ Iâ-so͘ i goá hó
Un-chêng goá m̄-káⁿ phah bô
Chú ê kang-tiâⁿ goá tio̍h chò
Chiah bián ko͘-hū Chú kong-lô.
Mô͘-kúi kiáu-jiáu chin kan-khó͘
Koat-sim goá chiah sı̀n Iâ-so͘
Bo̍k-su pò goá kiâⁿ chiàⁿ-lō͘
Í-chêng boē-hiáu àm-àm bong.
Bo̍k-su pò goá goá pò lâng
Hoaⁿ-hí chò Siōng-tè ê kang
Siōng-tè sı̍t-chāi chin thiàⁿ-thàng
Ū chhe Kiù-chú i pı̄ⁿ-lâng.
Tiōng-hu hō͘ bo̍k-su khoàn-kái
Kiò i sı̀n Chú ha̍p eng-kai
Āu-lâi sèng-tē ū chiām kái
Sūn-soà bo̍k-chú siu khí-lâi.
Tit-tio̍h tō-lí ang-bó͘ hó
Saⁿ-cha̍p-poeh hoè ang sí-bô
Lêng-hûn Siōng-tè tiàu tńg-tò
Ke-lāi pàng hō͘ goá hoa̍t-lo̍h.
Tiōng-hu sí-liáu chin hiau-hēng
Jı̍t-pún ê chı̂ⁿ khiàm kui-chheng
Han-chı̂ goá tio̍h kín lâi chèng
Iā thang chhı̄-ti chè lâi hêng.
Hoē-á iā ū chio chin thàu
Saⁿ-kho͘ gō͘-kho͘ chin chiàⁿ chiâu
Múi-goa̍h hoē-chı̂ⁿ la̍p liáu-āu
Chhun ê the̍h khı̀ hêng tiàm-thâu.
Hū-chè hêng lâng chhit poeh nı̂
Lóng bô hoân-ló kàu poàⁿ-si
Lín nā m̄ sı̀n bián saⁿ-chı̀ⁿ
Pêng-an khah iâⁿ lâng chhun chı̂ⁿ.
Tiōng-hu pàng-lo̍h nn̄g kiáⁿ-jı̂
Toā-hàn kiò chò Lı̂m Liân-ki
Liân-ki chhit-hoè pē chiū sí
Liân-khim chí ū gō͘ hoè sı̂.
Ūi-tio̍h poê-iúⁿ kiáⁿ sêng-khı̀
Goá tio̍h keng-êng choè pùn-ki
Kan-lân siū-khó͘ bóng péng pı̀ⁿ
Choè bú eng-kai tio̍h chhiâⁿ-tı̂.
Goá choè pùn-ki chin kan-khó͘
Thiⁿ-kng choè kàu poàⁿ-mı̂ bong
Ham-bān boē-hiáu choè thâu-lō͘
Choè kàu chhiú-phoê kiông beh kô͘.
Hit sı̂ Jı̍t-pún teh koán-lí
Tú-tio̍h chiàn-loān ê thiⁿ-nı̂
Chhiⁿ-chhám Tâi-oân lāu peh-sı̀ⁿ
Kan-lân siū-khó͘ ū poeh-nı̂.
Hit sı̂ ta̍k-ūi phoè-kip bí
Bô kàu tio̍h ài chham han-chı̂
Chia̍h lo̍h bô pá, gō boē sí
Iā bô pa̍t-mı̍h thang saⁿ-thiⁿ.
Ti-bah múi ê phoè saⁿ-niú
Phoè-kip chèng-bêng kui toā-tiuⁿ
Toā-soè lóng-chóng phoè tâng-iūⁿ
Beh boé tio̍h kı̀ tı̄ hit tiuⁿ.
Hit sı̂ pò͘-lūi phoè-kip chió
Toā-soè boē-thang chhēng kàu sio
Ū chı̂ⁿ boé bô chin khó-sioh
Chiàn-cheng iā sı̄ thiⁿ-ı̀ tio̍h.
