Chiàn-cheng goân-pún sı̄ thiⁿ-ı̀
Thiu-khı̀ peh-sı̀ⁿ lâng kiáⁿ-jı̂
Phài khı̀ chiân-soàⁿ ū lâng sí
Ka-lāi pi-siong lām-lūi thı̂.
Hiān-sı̂ gín-ná m̄-chai-iáⁿ
Boē-bat kı̀ⁿ koè boē-hiáu kiáⁿ
Chiah kú thang kóng chin hó-miā
Pē-bú kà-sı̄ lín tio̍h thiaⁿ.
Khǹg lín lia̍t-ūi sió pêng-iú
Bûn-hoà hoat-ta̍t chin chū-iû
Ha̍k-būn tı̀-sek tio̍h gián-kiù
Boē-hiáu, iang lâng put chū-iû.
Kong-ho̍k liáu-āu tē-jı̄ nı̂
Soá lâi Sūi-hong choè pùn-ki
Hit sı̂ bu̍t-chu tı̍t-tı̍t khí
Chı̂ⁿ-gûn toā-ı̂ⁿ pı̀ⁿ soè-ı̂ⁿ.
O-ló kám-siā Chú ê thiàⁿ
Chiàu-kò͘ goán seng-khu ióng-kiāⁿ
Goán kiáⁿ tióng-sêng ài hō͘ lâng chhiàⁿ
Saⁿ-chhoā soá lâi Tâi-pak siâⁿ.
Goá taⁿ tı̄ iù-tı̄-hn̂g choè kang
Chú-lāi hiaⁿ-ché lâi pang-bâng
Kám-siā tāi-ke gâu thiàⁿ-thàng
Goá bô jı̄n-chin pò-tap lâng.
Sèng Lêng ū lâi kám-tōng goá
Beh liām khoàn-sè kiàn-chèng koa
Í-chêng goá ū sio kim-choá
Sı̍t-chāi kan-khó͘ bô khoàⁿ-oa̍h.
Ta-ke ta-koaⁿ i lâi sí
Ū sio khò͘-chı̂ⁿ khı̀ hō͘ i
Iā ū khiā-lêng kap choè kı̄
Iáu boē sı̀n Chú hit tong-sı̂.
Siⁿ-jı̍t kong-tek lóng ū choè
Choè khı̀ ta̍k-hāng chin chéng-choê
Sı̄ goá tı̀-pı̄ⁿ chiah khí-cheh
Ngó͘-siōng kā i pài chı̍t-koe̍h.
Tō-lí bô thiaⁿ goá chin gōng
Chiah tio̍h khı̀ ho̍k-sāi kúi-ông
Hō͘ i bê-khı̀ lâng soà gōng
Sı̀n Chú liáu-āu chiah cheng-kong.
Siōng-tè bô siōng lâng m̄ pài
Gio̍k-hông ké-pu̍t lâng m̄ chai
Tāi-ke tio̍h gián-kiù khoàⁿ-māi
Sèng-keng nā tha̍k chiū oē chai.
Í-chêng ngó͘-siōng goá ū pài
Ti-kong goá iā chin chia̍p-thâi
Ke-lāi sè-sū thâi saⁿ-pái
Choè-hı̀ lāu-jia̍t saⁿ-chiⁿ thâi.
Ke-lāi ti-kong thâi 7 chiah
Tio̍h boé ti-thâu chiah kàu-gia̍h
Sı̀-piⁿ ngó͘-siōng lóng chiâu-siā
Siā liáu hiám khı̀ chò khit-chia̍h.
Ti-kong thâi choē teh phín-phóng
Ho̍k-sāi ngō͘-siōng chin bô thong
Siáⁿ-sū goán oē hiah nı̍h gōng
Chheng-ho͘ Tiuⁿ Gı̂ sı̄ thiⁿ-kong.
Lia̍h choè chit hāng chin iàu-kín
Kim-khı̀ the̍h-khı̀ tǹg Lı̂m Tı̂n
Chhin-chiâⁿ pêng-iú chhiáⁿ kui-tı̄n
Lōng-hùi choē-choē sǹg boē chı̄n.
Hông-tè tùi thiⁿ chin bô lé
Loān hong Tiuⁿ Gı̂ i chı̍t ê
Hong i kiò gio̍k-hông siōng-tè
Peh-sı̀ⁿ sūn-thàn m̄-káⁿ ke̍h.
Chóng-thóng iā sı̀n Ki-tok-kàu
Siōng-tè chiok-hok i chin gâu
Cháiⁿ-iūⁿ lín oē siūⁿ boē kàu
Khı̀ pài ngó͘-siōng m̄-tio̍h thâu.
Choè-kı̄ lūn-lí sı̄ put-hàu
Lóng sı̄ kiáⁿ-sun chia̍h chheⁿ-chhau
Chāi-siⁿ ū chia̍h chı̍t-lia̍p-tāu
Khah-iâⁿ sí-liáu pài ti-thâu.
Khǹg lín pē-bú tio̍h iú-hàu
Saⁿ chio sı̀n Chú chiah ū gâu
Iâ-so͘ chin-lí bat oē thàu
Āu-jı̍t kiáⁿ-sun oē chhut-thâu.
Ang-bó͘ tāi-ke tio̍h hô-hó
Iú-hàu ke-koaⁿ ke-lāi hô
Nā ū sı̍t-thâu tāi-ke chò
Chia̍h chhēng kap ēng bián kiaⁿ bô.
Chò lâng kiáⁿ-jı̂ tio̍h hàu-sūn
Hiaⁿ-tı̄ ha̍p-hô bok kheng-hun
Iú-hàu nn̄g-jı̄ chò kun-pún
Lâu hó bô͘-hoān thoân kiáⁿ-sun.
Soè-hàn lāu-bú lia̍p sái-jiō
Kiaⁿ lán iau-koâⁿ chhēng bô sio
Ngó͘-ge̍k pē-bú lâng ài chhiò
Hàu-sūn pē-bú ū khah tio̍h.
Kóng-khí Teng Lân ê tāi-chı̀
Khó͘-to̍k in bú thiàu lo̍h pi
It-sı̂ hoán-hoé í-keng tı̂
Sūn-soà thiàu-lo̍h beh kiù i
Teng Lân thiàu lo̍h chúi liáu-āu
Kiù bô in bú loān chhau-chhau
Chúi-lāi sı̀-koè chhoē thàu-thàu
Chí-ū bong tio̍h chı̍t-tè chhâ-thâu.
Chhâ-thâu the̍h tńg in chhù-lāi
Thı̂-lâm khàu-lūi chin pi-ai
Saⁿ-tǹg phâng-pn̄g kā i pài
Bo̍k-chú goân-thâu tùi hia lâi.
In bó͘ sim-lāi bô hoaⁿ-hí
Khui-chhùi chhut-siaⁿ chiū mā i
Chiù mā Teng Lân put hàu-gı̄
Sí liáu iú-hàu í-keng tı̂.
Teng Lân i sı̄ toā put-hàu
Chhin-chhiūⁿ thek-siⁿ ná ū gâu
Thoân-siat bo̍k-chú hō͘ lâng hàu
Lín lâi o̍h i m̄ tio̍h thâu.
Í-chêng poa̍h-kiáu goá chin ài
Kiáu-tiûⁿ siông-siông teh óng-lâi
Ū thiaⁿ tō-lí goá chiah kái
Beh kóng kiàn-chèng hō͘ lín chai.
Tō-lí m̄-bat boē koé-pı̀ⁿ
Káⁿ khui kiáu-keng tong lâng chı̂ⁿ
Poa̍h-kiáu goá iā chin ài pı̀ⁿ
Chiah boē tit-tio̍h têng-thâu-siⁿ.
Tō-lí ū bêng chiah chai-iáⁿ
Sim-lāi hui-siông ê kiaⁿ-hiâⁿ
Taⁿ goá í-keng ū siūⁿ-tiāⁿ
Kiáu-keng m̄-káⁿ chham lâng kiâⁿ.
Sèng Sı̂n kám-tōng goá choè-kang
Ū lâng chhiò goá sı̄ siáu-lâng
Kang-chok chı̍t-lâng choè chı̍t-hāng
Tāi-ke só͘ choè bô saⁿ-tâng.
Hā-lēng poê-lêng-hoē ê sı̂
Tı̄ Koe-lâng hái-chúi-e̍k piⁿ
Hit sı̂ goá ū poah-kang khı̀
Tit-tio̍h chin hó ê kà-sı̄.
Goá tùi bo̍k-su Lí Pang-chān
La̍h-chek kā i thó chı̍t-ki
Kóng beh the̍h tńg thoân tō-lí
Sı̍t-chāi lóng bô thoân poàⁿ-si.
Chio lâng sı̀n Chú bô chı̂ⁿ thàn
Lêng-hûn bô kiù sim put-an
Kan-khó͘ tio̍h-boâ bián oàn-thàn
Sim-koaⁿ khoài-lo̍k chiū pêng-an
Siōng-tè beh kiù lán lêng-hûn
Iā beh chiok-hok lán kiáⁿ-sun
Thian-tông hok-khı̀ lán ū hūn
Bián lo̍h tē-ge̍k khı̀ tı̂m-lûn.
Sè-kan ê lâng chin khó͘-chhó͘
Chí-ū oá-khò Chú Iâ-so͘
I beh chhoā lán kiâⁿ thiⁿ-lō͘
Bián lo̍h tē-ge̍k àm-àm bong.
Iâ-so͘ sı̄ chı̀-hó pêng-iú
Chai lán hoân-ló kap iu-chhiû
Kap lán kau-poê kàu éng-kiú
Nā ū khiàm-kheh tùi I kiû.
Iâ-so͘ kiò lán kiân thiⁿ-lō͘
Bô-lūn gûi-hiám á kan-khó͘
Sı̂-khek I kā lán pó-hō͘.
Iâ-so͘ ê un tē-it toā
Hō͘ lâng tèng-sí I koh-oa̍h
Jiân-āu chiūⁿ-thiⁿ thiⁿ-téng toà
Sı̀n-gióng Iâ-so͘ ū éng-oa̍h.
Iâ-so͘ tèng-sí tı̄ sı̍p-kè
Ūi lán choē-jı̂n chèng tāi-ke
Thoè lán choē-jı̂n lâi siū sí
Sio̍k-choē kong-lô kui tı̄ I.
Thoè lán tèng sí sı̍p-kè téng
Lâu-chhut pó-huih soé lán chheng
Taⁿ lán tio̍h o̍h hó phín-hēng
Chiah oē pò-tap I un-chêng
Sı̀n Chú ê lâng ū hok-khı̀
Lán sı̄ Siōng-tè ê kiáⁿ-jı̂
Thian-tông éng-oán lán khiā-khí
Tio̍h lâi o-ló kám-siā I.
Chú oē i-pı̄ⁿ kap koáⁿ-kúi
Hō͘ lán kap pháiⁿ lâi lı̄-khui
Tāi-ke tio̍h thiaⁿ goá ê chhùi
Boa̍t-jı̍t lêng-hûn ū só͘ kui
Sèng-keng kà-sı̄ tio̍h sı̍t-hêng
Lán ê kok-ka chiah oē heng
Gı̂m-si kı̂-tó oē tek-sèng
Goān Chú pó-siú kok hô-pêng.
Sió-bē hoaⁿ-hí choè kiàn-chèng
Pêng-an khoài-lo̍k sim chin chheng
Lóng bô hoân-ló chia̍h chhēng ēng
Sı̀n-khò Iâ-so͘ choè kong-êng.
Lán ná chhut-goā ê lú-kheh
Thian-tông chiah sı̄ lán chó͘-ke
Lú-kheh chı̍t-mı̂ hioh kheh-koán
Thiⁿ-kng khí-sin bô tı̂-oān.
Ta̍k-lâng chhut-sı̀ khang-chhiú lâi
Kè-bô hù-kùi chek chı̂ⁿ-châi
Lán tiàm sè-kan ná bı̂n-bāng
Kàu-bé lóng-chóng sı̄ khang-khang.
Khǹg lín lia̍t-ūi hó pêng-iú
Hok-im chin-lí tio̍h sêng-siū
Chú beh koh lâi ngiâ-chih lí
Thang kap Iâ-so͘ tâng chiūⁿ-thiⁿ.
Goá tiàm tı̄ Tâi-pak Bı̂n-seng lō͘
Nn̄g-pah jı̄-sı̀ kóng chheng-chhó
Sui-jiân só͘ tiàm bô thang hó
Chhiáⁿ lín tāi-ke lâi thit-thô.
