Pak-káng Má ê Sin-bûn

Ka-gı̄ sio̍k Pak-káng ū chı̍t-keng biō, miâ kiò Tiâu-thian-keng, lāi-tiong ū chı̍t-sin jı̄-má, hō-chò Thian-siōng Sèng-bó, sı̄ thong Tâi-oân tē-it ū miâ-siaⁿ--ê ; lâng nā beh chhiáⁿ chit-sin Jı̄-má lâi kèng, chı̍t-jı̍t tio̍h saⁿ-kho͘-gı̂n,100 jı̍t tio̍h 300 kho͘, chē-chió jı̍t tio̍h chiàu-sǹg .

Kū-nı̂ peh-goe̍h-kan, Ka-gı̄ siâⁿ-lāi-goā ta̍k kéng-hūn ū khı̀ chhiáⁿ , ēng chē-chē kò͘-sū lāu-jia̍t ; iū mê-jı̍t chò-hı̀ hàu-kèng,khai-chı̂ⁿ chin-chē kàu bē-sǹg--tit . Ka-gı̄ siâⁿ pak-mn̂g-goā Un-sio-chhù-kéng sı̄ lō͘-boé chhiáⁿ lâi kèng, kèng-liáu tio̍h soà chhiáⁿ khı̀ hêng .

Thâu chı̍t-jı̍t chhiáⁿ , lâng chiū chò-hı̀ siang-pêng tàu, koh tı̀m phàu-siâⁿ chin lāu-jia̍t ; tē-jı̄-jı̍t, tē-saⁿ-jı̍t iā-sı̄ án-ni ; tē-sı̀-jı̍t beh sàng khı̀ hêng Pak-káng-biō . Kng kàu Sin-káng hioh-khùn, kiō-lāi pu̍t ū tháu-khui , kàu koh khí-sin ê sı̂ , bē kı̀--tit pa̍k . Kàu Pak-káng khe ê khàm-téng , beh lo̍h khàm-ē, Má-chó͘-pô tùi kiō-lāi ū khı̍h-lı̍h kho̍k-lo̍k poa̍h--lo̍h-khı̀ , siak tı̄ khàm-ē. Kng ê lâng koáⁿ-kín khioh , hē tı̄ kiō-lāi , koh kng--khı̀ .

Theⁿ-pâi ê lâng cháu chò-chêng khı̀ pò hoê-siūⁿ. Kng kàu-ūi, hoê-siūⁿ chiū giām-siong , kah lâng khı̀ phah lô kiò thâu-ke , lô͘-chú , kap chèng phò͘-hō͘ , kóng , Lán ê Chó͘-má hō͘ ka-gı̄ ê lâng kng-khı̀ chau-that ,seng-khu giām gō͘-siong .

Āu-lâi chiong hiah-ê kiō-pan, kap sàng-khı̀ hêng ê lâng, lóng pa̍k-la̍k--khí-lâi , lêng-jio̍k, khó͘-chhó͘ in .

Iā ū siá-phoe hō͘ thong Ka-gı̄ chhiáⁿ Má-chó͘ ê thâu-lâng, kóng tio̍h Pak-káng kā in chò-chiò, á-sı̄ khı̀ Bı̂-chiu khai-gán chhiáⁿ-sı̂n, kóng sı̂n tio̍h-kiaⁿ tò--khı̀ lah . Ka-gı̄ ê thâu-lâng hoê-phoe kóng, nā beh-soah chiū án-ni soah, nā m̄ , mê-nı̂ in m̄ chhiáⁿ .

Taⁿ hiah-ê kiō-pan ū lâng pàng-tò-lâi; chóng-sı̄ chit-ê sū-chêng m̄-chai āu-lai beh kàu-nāu kàu án-choáⁿ-iūⁿ .

Koh ū chı̍t-ê Un-sio-chhù lâng, kúi-nā-cha̍p nı̂ chêng siàu-liām beh kàu biō khı̀ sio-kim, kàu hit-tia̍p iā kap in khı̀ ; kim sio-liáu, iā hō͘ lâng pa̍k chò-tui .

Kúi-nā mı̂-jı̍t iau, koâⁿ; iā-kàu pàng tó lâi ê sı̂, chin m̄ kam-goān; ū pháiⁿ-chhùi chiù-chó͘, kóng i kàu sí iā m̄-khéng hit-hō chhâ-thâu-á, iā beh hoan-hù i ê āu-e̍k m̄-thang pài bu̍t, chin-chiàⁿ bē pó-pı̀ lâng; bē kè-tit in jı̍p-kàu ê lâng kóng bu̍t sı̄ chhâ-thâu-á bô sèng. Ū lâng hı̀-lōng kóng, káⁿ sı̄ khoàⁿ káng-goe̍h mı̂-jı̍t ê hı̀, bô bı̂n, tı̄ kiāu-lāi ài khùn tuh-ka-choē, chiah poa̍h lo̍h--khı̀; ū lâng kóng, káⁿ sı̄ chhùi-ta, kàu khoe beh lo̍h-lâi chia̍h chúi.

Goá siūⁿ i bô khoàⁿ-hı̀ , iā bē chhùi-ta lim-chúi, put-kò sı̄ chhâ ê siōng , sio̍k sí-ê mı̍h, bô sı̂n , bē siàⁿ, lâng kèng i ho̍k-sāi i, sı̍t-chāi sı̄ gōng kàu-ke̍k; ǹg-bāng lâng tùi án-ni chhéⁿ-gō͘, chhin-chhiūⁿ hit-ê lâng kóng pún-sin m̄-pài , iā beh hoan-hù i-ê hō͘-è m̄-thang pài:sı̄ goán-ê sim só͘-ài .

Āu-lâi ū thiaⁿ--kı̀ⁿ kóng, Ka-gı̄ siâⁿ ū thê 30 kho͘-gı̂n hō͘ hoê-siūⁿ khı̀ chò-chiò:tāi-chı̀ chiū án-ni soah .

(Tâi-lâm-hú-siâⁿ kàu-hoē-pò tē-8-tiuⁿ, 1886 nı̂ 2 goe̍h)