Papa

Ū chı̍t-kang, kok-hāu-á pàng-o̍h tńg-kàu chhù, chu-pau khǹg--leh, tō khı̀ chhân-piⁿ ê chhài-hn̂g khoàⁿ a-pà giâ tı̂-thâu teh ku̍t chhài-kó͘. Soaⁿ-piⁿ jı̍t-thâu tng beh lo̍h-soaⁿ, thin-sek ta̍uh-ta̍uh-á àm--lo̍h-lâi, chhân--nih ê chhek-chiáu-á toā-tı̄n toā-tı̄n poe-khı̀ hioh tı̄ tek-phō lāi, goá kap a-pà tı̄ chhài-hn̂g thoáⁿ-chháu, péng-thô͘......ná chò ná khai-káng. A-pà hiông-hiông kā goá khó chı̍t-ê būn-tê: “A-me-á, tek-á ùi toeh lâi--ê?” Goá siūⁿ-siūⁿ--leh, ı̀n kóng: “Thiⁿ-tē seⁿ-sêng--ê-lah!” Che sı̄ a-kong kà--ê, siáⁿ-mih tāi-chı̀ nā chhoē bô tap-àn, tō-si “thiⁿ-tē seⁿ-sêng--ê”. A-pà hàiⁿ-thâu, kā goá kà-sı̄ chı̍t-khùn, chiah kóng: “Sı̄ ùi Tek-kok lâi--ê-lah, ‘tek’ tō-sı̄ Tek-kok ê ‘tek’, lí tha̍k-chu lóng bô tha̍k thiat-té!” Thiaⁿ-liáu, goá chiok khim-phoè a-pà--ê, a-pà sui-bóng m̄-bat jı̄, m̄-koh ha̍k-būn ū-kàu hó--ê. Sūn a-pà ê oē-boé, goá mā liáu-kái ‘bí’ sı̄ án-choáⁿ kiò-chò ‘bí’ ---- sı̄ ùi Bí-kok lâi--ê a. A-pà thiaⁿ kah chin moá-ı̀, o-ló kóng goá chèng-keng sı̄ in kiáⁿ. Chin chē nı̂ liáu-āu, koh siūⁿ-tio̍h a-pà ê『腦筋急轉彎』, goá koh ē chhiò kah oai-io--khı̀, goá teh siūⁿ, ka-tı̄ ē kui-kang “siūⁿ-khang siūⁿ-phāng” “pı̀ⁿ-kúi pı̀ⁿ-koài”, hoān-sè sı̄ chéng-tio̍h goán a-pà! (TGB Thong-sı̀n tē 43 kı̂, 2003 nı̂ 4 goe̍h)